PSALMS 72
72
Die regverdige koning
1’n Psalm van Salomo.
O God,
skenk u geregtigheid
aan die koning,
en u regverdigheid
aan die seun van die koning.
2Hy sal u volk regverdig oordeel
en aan armes reg verskaf.
3Die berge sal voorspoed bring
vir die volk,
en die heuwels regverdigheid.#72:3 Alternatiewe vertaling Laat berge en rante bly wees oor die vrede en reg vir die volk.
4Hy sal aan die verdruktes
reg verskaf,
die kinders van behoeftiges red,
hulle verdrukkers
verpletter.
5Mag hulle U dien
so lank as wat die son skyn,
en die maan daar is,
geslag na geslag!
6Mag hy wees
soos reën vir plante,
soos reënbuie
wat die aarde natmaak.
7Mag regverdiges floreer
tydens sy bewind
en voorspoed
in oorvloed ontvang
tot die maan nie meer daar is nie.
8Mag hy regeer van see tot see,
en vanaf die Eufraat
tot aan die eindes van die aarde.
9Mag woestynbewoners
voor hom buig,
sy vyande voor hom
in die stof kniel.
10Mag die konings van Tarsis
en die kuslande
vir hom belasting betaal,
die konings van Skeba en Seba
vir hom geskenke bring.
11Mag al die konings
voor hom buig,
en al die nasies hom eer bewys.
12Ja, die armes wat roep,
sal hy verlos,
ook die verdrukte sonder helper.
13Hy het medelye met swakkes
en behoeftiges,
en red die lewe van behoeftiges.
14Uit onderdrukking en geweld
sal hy hulle red,
want hulle lewens is kosbaar
vir hom.
15Lank leef die koning!
Mag hy goud uit Skeba ontvang.
Mag mense gedurig vir hom bid
en die hele dag hom seën.
16Mag daar volop graan wees
in die land,
en die bergtoppe daarvan wuif.
Mag dit vrugbaar wees
soos die Libanon,
en mag die stede groei
soos gras op die veld#72:16 Alternatiewe vertaling die graan so geil opskiet soos gras in die veld..
17Mag die koning se naam
altyd onthou word
en nooit vergeet word
so lank as die son daar is nie.
Mag al die nasies
deur hom geseën word
en al die nasies
hom geseënd noem.
18Prys die Here God,
die God van Israel!
Net Hy doen wonderlike dade.
19Mag sy heerlike Naam
vir altyd geprys word!
Mag die hele wêreld
vol wees van sy heerlikheid.
Amen, ja, amen!
20(Hier eindig die gebede van
Dawid, seun van Isai.)
Currently Selected:
PSALMS 72: NLV
Highlight
Share
Copy
Want to have your highlights saved across all your devices? Sign up or sign in
2006 Christlike Uitgewersmaatskappy, Posbus 1599, Vereeniging, 1930, Eerste uitgawe 2006, Tweede uitgawe 2011