یوحنّا 19
19
عئسا اؤلومه محکوم اولور
1او زامان پئلاط عئسانی توتوب اونا شالّاق ووردوردو. 2عسگرلر ده تئکانلاردان بئر تاج هؤروب اونون باشینا قویدولار و اونا قیرمیزی رنگئنده بئر شئنل گیدئردئلر. 3و اونون یانینا گلئب ددئلر: «سالام، ای یهودئلرئن پادشاهی.» و اونا شئلّه ووروردولار.
4پئلاط گئنه اشئیه گدئب یهودئلره#19:4 مقصد یهودئلرئن ریئسی ددی: «باخین، اونو سئزئن یانینیزا گتئرئرم کی، اوندا هچ بئر گوناه تاپمادیغیمی بئله‌سئنئز.»
5او واخت عئسا، باشیندا تئکاندان تاج و اَینئنده قیرمیزی بئر شئنل، اشئیه چیخدی. پئلاط یهودئلره ددی: «باخین، او آدام!»
6باش کاهئنلر و موحافئظلر عئسانی گؤرن زامان چیغیریب ددئلر: «چارمیخا چک! چارمیخا چک!»
پئلاط اونلارا ددی: «گؤتورون سئز اؤزونوز چارمیخا چکئن. من اوندا هچ بئر گوناه گؤرمورَم.»
7یهودئلر جاواب وردئلر: «بئزئم بئر قانونوموز وار و او قانونا گؤره بو آدام اؤلمه‌لی‌دئر. چونکی اؤزونو تارینین اوغلو ادئب.»
8پئلاط بو سؤزو اشئدن واخت داها چوخ قورخدو 9و تکرار سارایا قاییدیب عئسایا ددی: «سن هارادانسان؟» آمّا عئسا اونا جاواب ورمه‌دی.
10او واخت پئلاط اونا ددی: «منه جاواب ورمئرسن؟ بئلمئرسن کی، سنی هم چارمیخا چکمه‌یه قودرتئم وار، هم ده آزاد اتمه‌یه؟»
11عئسا جاواب وردی: «اگر بو قودرت سنه یوخاریدان ورئلمه‌سَیدی، منئم اوستومده هچ بئر قودرتئن اولمازدی. اونا گؤره ده، او آدامین گوناهی کی، منی سنئن الئنه ورئب، داها بؤیوکدور.»
12بو زاماندان پئلاط عئسانی آزاد اتمه‌یه چالیشدی، آمّا یهودئلر قیشقیریب دیئردئلر: «اگر بو آدامی بوراخاسان، آرتیق قیصرئن دوستو دیئلسن. اؤزونو پادشاه ادن بئر آدام قیصرئن ضئدّئنه قالخیب.»
13پئلاط بو سؤزلری اشئدنده عئسانی اشئیه گتئردی و «داش دؤشه‌مه» دیئلن یرده حؤکم کورسوسونده اوتوردو. بو یره عئبرانی دئلئنده «جابّاتا» دیئلئر. 14او گون پاسخا بایرامینین حاضیرلیق گونو ائدی. تقرئبن گونون آلتینجی ساعاتی ائدی. پئلاط یهودئلره ددی: «بودور، سئزئن پادشاهینیز!»
15یهودئلر چیغیردیلار: «محو اولسون، محو اولسون. چارمیخا چک!»
پئلاط اونلارا ددی: «پادشاهینیزی چارمیخا چکئم؟»
باش کاهئنلر جاواب وردئلر: «قیصردن باشقا هچ پادشاهیمیز یوخدور.»
16او زامان پئلاط عئسانی چارمیخا چکئلمک اوچون اونلارا تحوئل وردی.
عئسا چارمیخا چکئلئر
(متّا 27:32-34، مرقوس 15:21-32، لوقا 23:26-43)
اونلار عئسانی آلیب گؤتوردولر. 17عئسا چارمیخینی داشییاراق کلّه دیئلن بئر یره گتئرئلدی. بو یره عئبرانی دئلئنده جولجوتا دیئردئلر. 18اونلار بو یرده عئسا و اونونلا برابر ائکی نفری ده چارمیخا چکدئلر. بئرئنی اونون بئر طرفئنده و او بئرئسئنی اونون او بئری طرفئنده و عئسا اورتادا قالدی. 19پئلاط بئر تخته یازیب اونو چارمیخین باشینا ووردو. بو تخته‌ده بله یازیلمیشدی؛ «ناصئره‌لی عئسا، یهودئلرئن پادشاهی» 20یهودئلردن چوخلاری بو یازینی اوخودولار. چونکی عئسانین چارمیخا چکئلدئیی یر شهرئن یاخینلیغیندا ائدی و بو یازی عئبرانی، یونانی، و لاتین دئلئنده یازیلمیشدی.
21او واخت یهودئلرئن باش کاهئنلری پئلاطا ددئلر: «یازما؛ یهودئلرئن پادشاهی، یاز؛ بو آدام ”یهودئلرئن پادشاهی‌یام“ دیئردی.»
22پئلاط جاواب وردی: «یازدیغیمی یازمیشام.»
23عسگرلر عئسانی چارمیخا چکندن سونرا اونون پالتارلارینی دؤرد یره بؤلدولر و هر بئرئسی بئر پای گؤتوردو. اونون کؤینه‌یئنی ده گؤتوردولر، آمّا کؤینک تئکئشسئز و باشدان باشا بئر توخوما ائدی. 24اونا گؤره ده بئربئرلرئنه ددئلر: «بونو ییرتمایاق. گلئن اونون کئمئن اولماسینا پوشک آتاق.» و بونلار اونا گؤره اولدو کی، موقدّس کئتابین ددئیی سؤز یرئنه یتئشسئن؛ «اونلار پالتارلاریمی اؤز آرالاریندا بؤلدولر و کؤینه‌یئم اوچون پوشک آتدیلار.»#19:24 مزمور ۲۲:۱۸ عسگرلر بله اتدئلر.
25عئسانین چارمیخی یانیندا اونون آناسی، خالاسی، کلوپاسین آروادی مریم و مجدللی مریم دورموشدولار. 26عئسا آناسی و اونون یانیندا سودئیی شاگئردئن دوردوغونو گؤرنده آناسینا ددی: «آنا، بودور، سنئن اوغلون!» 27سونرا دا او شاگئرده ددی: «بودور، سنئن آنان.» و او زاماندان او شاگئرد عئسانین آناسینی اؤز اِوئنه آپاردی.
عئسانین اؤلومو
(متّا 27:45-56، مرقوس 15:33-41، لوقا 23:44-49)
28بوندان سونرا، عئسا بوتون ائشلرئن تامام اولدوغونو بئلدی و موقدّس کئتابدا دیئلن سؤزون یرئنه یتئشمه‌سی اوچون «سوسوزام» ددی. 29اورادا سئرکه دولو بئر قاب قویولموشدو. سئرکه‌دن بئر سونگر دولدوروب اونو بئر زوفا بوداغینا تاخیب عئسانین آغزینا اوزاتدیلار. 30عئسا سئرکه‌نی داددی و سونرا ددی: «هر شی یرئنه یتئشدی.»
و باشینی اَیئب جان وردی.
31او گون بایرامین حاضیرلیق گونو ائدی و یهودئلر سبّت گونونده جسدلرئن چارمیخدا قالماسینی ائسته‌مئردئلر، چونکی او سبّت بؤیوک بئر گون ائدی. اونا گؤره ده پئلاطدان ائسته‌دئلر کی، اونلارین قیچلاری سیندیریلسین و چارمیخدان گؤتورولسون. 32بو سببدن عسگرلر گلئب بئرئنجی آدامین، سونرا دا عئسانین او بئری یانیندا چارمیخا چکئلمئش آدامین قیچلارینی سیندیردیلار. 33آمّا عئسانین یانینا گلنده اونون اؤلموش اولدوغونو گؤروب قیچلارینی سیندیرمادیلار. 34لاکئن، عسگرلردن بئری اونون بؤیرونه نئزه ووردو و او آندا اورادان قان و سو آخدی. 35بونو گؤرن شهادت ورئب و اونون شهادتی دوغرودور. او، حقئقتی ددئیئنی بئلئر و شهادت ورئر کی، سئز ده ائمان گتئره‌سئنئز. 36بو شیلرئن هامیسی باش وردی کی، موقدّس کئتابین یازدیغی بو سؤز یرئنه یتئشسئن: «اونون سوموکلرئندن هچ بئری سینمایاجاق.»#19:36 چیخیش ۱۲:۴۶، سایلار ۹:۱۲، مزمور ۳۴:۲۰ 37و گئنه باشقا بئر یازی دیئر: «نئزه ووردوقلاری آداما باخاجاقلار.»#19:37 زِکَرئیّا ۱۲:۱۰
38بو حادئثه‌لردن سونرا، آراماتایلی یوسئف پئلاطدان ائجازه ائسته‌دی کی، عئسانین بدنئنی گؤتورسون. او، عئسانین شاگئردی ائدی، لاکئن یهودئلرئن#19:38 مقصد یهودئلرئن ریئسی قورخوسوندان اؤزونو گئزله‌دئردی. پئلاط بو ائشه ائجازه وردی و او دا گلئب عئسانین بدنئنی گؤتوردو. 39نئقودئموس دا کی، اوّلجه گجه قارانلیغیندا عئسانین یانینا گلمئشدی، یوز لئتراس#19:39 تقرئبن ۳۴ کئلو قاریشمیش مور و عؤد آغاجی ائله گلدی. 40او زامان عئسانین بدنئنی گؤتوروب عطئرلر‌له کفنه بوکدولر. نجه کی، یهودئلرئن دفن عادتی ائدی. 41عئسانین چارمیخا چکئلدئیی یرده بئر باغ وار ائدی و بو باغدا تزه بئر مقبره قازیلمیشدی کی، اونون ائچئنه بو زامانا قدر کئمسه‌نی قویمامیشدیلار. 42یهودئلرئن بایرامینین حاضیرلیق گونو اولدوغونا گؤره، عئسانین بدنئنی اورایا قویدولار. چونکی بو مقبره یاخین ائدی.
Currently Selected:
یوحنّا 19: موقدس کتاب
Highlight
Share
Copy
Want to have your highlights saved across all your devices? Sign up or sign in
© Elam Ministries 2013. All rights reserved.