حِزِقیال 10

ربّئن عئزّتی معبدی ترک ادئر

1سونرا باخدیم، و باخ، کَرّوبلارین باشی اوستونده‌کی قوبّه‌نئن اوستونده لاجورد داشی کئمی بئر شی آشکار اولدو کی، گؤرونوشجه بئر تخته بَنزه‌یئردی. 2رب کتان گِیئنمئش آداما بله ددی: «کَرّوبلارین آلتیندا اولان فیرلانان چرخلرئن آراسینا گئر. کَرّوبلارین آراسیندان ائکی اوووج اودلو کؤز گؤتور و شهرئن اوستونه سَپه‌له.» و او آدام گؤزومون قاباغیندا اورایا گئردی. 3او آدام اورایا گئرنده، کَرّوبلار معبدئن جنوب طرفئنده دورموشدولار. بو زامان بولود ائچه‌ری حیطی دولدوردو. 4ربّئن عئزّتی کَرّوبون اوستوندن قالخیب معبدئن آستاناسینا گتدی. معبدی بولود بورودو و حیط ربّئن شؤوکتئنئن جلاسی ائله دولدو. 5کَرّوبلارین قانادلارینین سَسی باییر حیطه قدر گلئردی. بو سَس قادئری موطلقئن سَسی کئمی اوجا ائدی، او زامان کی، دانیشیر.

6او زامان کی، رب کتان گِیئنمئش آداما امر اتدی: «کَرّوبلارین و فیرلانان چرخلرئن آراسیندان اود گؤتور.» او آدام ائچه‌ری گئرئب بئر چرخئن یانیندا دوردو. 7او واخت کَرّوبلاردان بئری، کَرّوبلارین آراسیندان، اَلئنی اوزادیب اونلارین اورتاسیندا اولان اودون بئر آزینی گؤتوردو و کتان گِیئنمئش آدامین اووجونا قویدو. او آدام دا اودو گؤتوروب چیخدی. 8اِله گؤرونوردو کی، اِله بئل کَرّوبلارین قانادلاری آلتیندا ائنسان اَلئنه بَنزر بئر شی وار.

9من باخیب گؤردوم کی، کَرّوبلارین یانیندا دؤرد چرخ وار؛ هر کَرّوبون یانیندا بئر چرخ. چرخلر زبرجد کئمی پاریلداییردی. 10دؤردونون ده گؤرونوشو هَمَن جور ائدی، سانکی بئر چرخ او بئری چرخئن ائچئنده یِرلَشمئشدی. 11گتدئکلری زامان صاغا-سولا دؤنمه‌دن دؤرد طرفئن هر بئرئنه حرکت ادئردئلر؛ قاباقداکی هانسی طرفه گدئردی، او بئرئلری ده صاغا-سولا دؤنمه‌دن اونون دالینجا گِدئردئلر. 12اونلارین بوتون بدنی، کوره‌یی، اَللری، قانادلاری و دؤردونون ده چرخلری هر طرفدن گؤزلرله دولو ائدی. 13من اشئتدئم کی، بو چرخلر «فیرلانان چرخلر» چاغیریلیر. 14اونلارین هر بئرئنئن دؤرد اوزو وار ائدی: بئرئنجئسی کَرّوب اوزو ائدی، ائکئنجئسی ائنسان اوزو، اوچونجوسو آصلان اوزو و دؤردونجوسو قارتال اوزو.

15کَرّوبلار یردن قالخدیلار. بونلار کِبار چایینین قیراغیندا گؤردویوم همئن جانلی مخلوقلار ائدئلر. 16کَرّوبلار گِدنده، اونلارین یانیندا اولان چرخلر ده گتدئلر. کَرّوبلار یردن قالخماق اوچون قانادلارینی قالدیراندا، چرخلر اونلارین یانیندان آیریلمیردی. 17اونلار دایاناندا، بونلار دا دایانیردیلار. اونلار یردن قالخاندا، بونلار دا بئرلئکده یردن قالخیردیلار، چونکی جانلی مخلوقلارین روحو چرخلرده ائدی.

18او واخت ربّئن عئزّتی معبدئن آستاناسیندان چیخدی و کَرّوبلارین اوستونده دوردو. 19کَرّوبلار گِدنده قانادلارینی قالدیریب گؤزومون قاباغیندا یردن قالخدیلار، چرخلر ده یانلاریندا ائدی. اونلار ربّئن معبدئنئن شرق دروازاسینین گئرئش یِرئنده دایاندیلار. ائسرایئل تاریسینین عئزّتی یوخاریدا، اونلارین اوستونده ائدی.

20بونلار همئن جانلی مخلوقلار ائدئلر کی، کِبار چایینین قیراغیندا ائسرایئل تاریسینین آلتیندا گؤردوم. من بئلئردئم کی، اونلار کَرّوبدور. 21هر بئرئنئن دؤرد اوزو و دؤرد قانادی وار ائدی. قانادلاری آلتیندا ائنسان اَللرئنه بَنزر بئر شی وار ائدی. 22اونلارین اوزلرئنئن بَنزه‌یئشی کِبار چایی قیراغیندا گؤردویوم اوزلره اوخشاییردی. هر بئری اوز توتدوغو طرفه ائره‌لی‌له‌یئردی.

Currently Selected:

حِزِقیال 10: موقدس کتاب

Highlight

Copy