Bɔa 30

Tulaleti katɛakĩi yã

(Bɔa 37.25-28)

1Lɛpusia lí ã ǹ tulaleti katɛakĩi kɛò. 2A gbã̀a iɔ gãsĩsuu do, a yaasa gãsĩsuu do lɔ, a gbã̀a ń a yaasao iɔ sáa, a lɛsĩ iɔ gãsĩsuu pla. Ní kɛ àɔ kɔba vĩ. 3Vua tɛ̃ɛtɛ̃ɛ kulɛ a kpɛɔwa ǹ liai ń a musuo ń a kɔbaɔ, ní zãble a bèewa ń vuao ǹ liai. 4Vua zã pi kpɛla ń kpɛleo mɛn plapla, ní pɛpɛ zã pɔ wa blèwà zĩlɛ oi, kɛ́ wà e lipɔ̃ɔɔ sɔlɔsɔlɔu tulaleti katɛakĩipi sɛbɔ ũ. 5Lɛpusia lí ã lipɔ̃ɔɔpiɔ ũ, ní kpá ń vuao. 6Tulaleti katɛakĩipi dilɛ suuna pɔ kpaa ikoyã kpagoloi aɛ, bɔaaa ń duunkɛ̃makĩi pɔ wì ta kpagolopilɛo, gu pɔ máli kpaaũunnɔ. 7Aalona líɔ tulaleti gĩnana ka a tɛ́u lagulɛdɔ, gɔɔ pɔ àlɛ filiaɔ kɛkɛ. 8Ali tulaletikaɛ̀ tɛ́u lɔ oosiɛlɛ filianagɔɔ. Màa tulaleti suɛlɛ aliɔ dɔ ma aɛ gɔɔpii e á buiwa. 9Wasuli tulaleti pãle ka a tɛ́uo, ge sa pɔ wì a pɔ katɛu à tɛkũ ge pɔwɛnti, mɛ́ wasuli imia kawào. 10Wɛ̃ ń wɛ̃o gɛ̃n dodo Aalona líɔ sa pɔ wì o duuna yãmusu au mama a kɔbaɔwa duunkɛ̃ama yãi. Á buiɔ líɔ kɛ màa lɔ wɛ̃ ń wɛ̃o gɛ̃n dodo duunkɛ̃ama yãi. Tulaleti katɛakĩipiá ma pɔɛ ń a mìbao.

Duunkɛ̃amá ɔ̃a

11Dii ò Mɔiziɛ à mɛ̀: 12Tó n Isailiɔ nào, an baade líɔ fĩabomɛɛ azĩa boa yãi, kɛ́ gagyãe su ń le naopi kɛgɔɔo yãi. 13Gbɛ̃́ pɔ aalɛ gɛ́ gbɛ̃́ pɔ wà ń naoɔ kĩi, aàli ãnusu kpa galaũ soolo, lá wà a gbia dìlɛ luakukĩiwa, gela bao. Ãnusu galaũ soolopi mɛ́ aɔ asea pɔ wali simɛɛ ũ.#Bɔa 38.25-26; Mat 17.24 14Gbɛ̃́ pɔ wàlɛ ń da gbɛ̃́ pɔ wà ń naoɔ guu, tó à kà wɛ̃̀ bao ge a dɛa, a aseapi kpaɛ. 15Tó álɛ aseapi kpaa ázĩa boa yãi, ɔde su kpa dɛ a lɛ́ao, mɛ́ taaside su kpa à kɛ̃sãio. 16Duunakɛ̃a Isailiɔwa ɔ̃api simá, ní kpá wà kpaaũkpɛ zĩkɛò. Ɔ̃api a to á Isailiɔ duuna kɛ̃wá, a yã líɔ dɔmagu.

Dàa ikabɔ

17Dii ò Mɔiziɛ à mɛ̀: 18Dàa pí ń mɔgotɛ̃o#Bɔa 38.8 gbãbɔ'ikabɔ ũ, ní a dibɔ pí ń mɔgotɛ̃o lɔ, ní dilɛ kpaaũkpɛ ń sa'okĩio zãnguo, ní ikau. 19Aalona ń a nɛɔ líɔ ń ɔɔ ń ń gbáɔ pipiò. 20Gɔɔ pɔ aalɛ gɛ̃ kpaaũkpɛu, aali kɛ màa kɛ́ aasu gagao yãi. Tó aalɛ mɔ́ pɔ kaimɛɛ tɛ́u à tɛkũ sa'okĩiwa lɔ, 21aaliɔ ń ɔɔ ń ń gbáɔ pipi, kɛ́ aasu gagao yãi. Bee iɔ dɛ ikoyã ũ Aalonaɛ ń a buiɔ gɔɔpii.

Nisi pɔ wì pɔ dilɛò Lua pɔ ũ

22Dii ò Mɔiziɛ à mɛ̀: 23Pɔ gĩnana maaɛ beeɔ sɛ: Li'ɔ íwa kilo soolo ń sinamɔ litɛɛ gĩnanao kilo aaɔ̃ ń kanɛli fee bui gĩnanao kilo aaɔ̃ 24ń kasiao kilo soolo, lá wà a gbia dìlɛ luakukĩiwa. Nisi sɛ́ litili soolo, 25ní nisi pɔ wì pɔ dilɛò à gɔ̃ ma pɔ ũ azɛi kɛò lá tulaletizɔ̃na ì kɛwa, nisipi iɔ dɛ ma pɔ ũ. 26Nisipi mama kpaaũkpɛwa ń ikoyã kpagoloo 27ń taabũnuo ń a pɔkeleɔ ń dauo ń a pɔkeleɔ ń tulaleti katɛakĩio 28ń sa pɔ wì a pɔ katɛu à tɛkũ okĩio ń a pɔkeleɔ pii ń dàao ń a dibɔo, 29ní pɔpiɔ dilɛ ma pɔ ũ, aai gɔ̃ ma pɔ ũ ń a mìbao. Pɔ pɔ kã̀ pɔpiɔ keewa pii, à gɔ̃̀ ma pɔ ũɛ.

30Nisipi ka Aalona ń a nɛɔwa, ní ń dilɛ ma pɔɔ ũ, kɛ́ aaɔ ma gbagba. 31O Isailiɔnɛ aaɔ dɔ̃ gɔɔpii kɛ́ nisipiá ma pɔɛ. 32Wasuli ká gbɛ̃pãlewao. Á gbɛ̃e suli nisipi taa kɛo, kɛ́ ma pɔɛ yãi, íɔ dɔ̃ kɛ́ ma pɔɛ. 33Gbɛ̃́ pɔ nisipi taa kɛ̀, ge a kà gbɛ̃́ pɔ dɛ sa'ona ũowa, wà ade bɔ a gbɛ̃́ɔ guu wà dɛ.

Tulaleti pɔ wì katɛa

34Dii ò Mɔiziɛ à mɛ̀: Pɔ gĩnanaɛ beeɔ sɛ: Sitaki li'ɔ ń onika litɛɛo ń galibanu li'ɔo ń zɔ̃go li'ɔo sáasaa. 35Pɔpiɔ yãalɛ ǹ zɔ̃ tulaleti pɔ wì katɛa ũ lá tulaletizɔ̃na ì kɛwa, ní wisikau, iɔ dɛ ma pɔ ũ a zɛ́i. 36Ǹ a kĩni lɔ ǹ a tibo, ní dilɛ ikoyã kpagolo aɛ kpaaũkpɛu, gu pɔ máli kpaaũunnɔ. 37Ásu tulaletipi taa kɛ ázĩaɛo. Àli dilɛ ma pɔ ũ. 38Gbɛ̃́ pɔ a taa kɛ̀, àlɛ a gĩkpa, wà ade bɔ a gbɛ̃́ɔ guu wà dɛ.

Currently Selected:

Bɔa 30: Boo2024

Highlight

Copy