Bɔa 24

Lua bàa kua ń Isailiɔ sa'oa

1Dii ò Mɔiziɛ: Mpi ń Aalonao ń Nadabuo ń Abiuo ń Isaili gbɛ̃zɔ̃ɔ gbɛ̃ɔn baaɔ̃kwiɔ, à dɛdɛ gbɛwa à mɔ ma kĩi, í kulɛmɛɛ za kãakãa. 2Ní sɔ̃mazi ndo, aasu sɔ̃mazio, mɛ́ bila su dɛdɛnnɔ gbɛpiwao.

3Mɔizi gɛ̀, à yã pɔ Dii ò dàu a sìunɛ́ pii ń ikoyãɔ pii. Aa wè sãnusãnu mpii aa mɛ̀: Yã pɔ Dii ò pii, wá kɛɛ. 4Ɔ̃ Mɔizi yã pɔ Dii òpiɔ kɛ̃̀ lá guu pii.

À fɛ̀lɛ kɔɔkɔɔ, à aà gbagbakĩi bò gbɛpɔlɛu, ɔ̃ à gbɛpɛ̀lɛpɛlɛ mɛn kuɛpla Isaili bui kuɛplaɔ pɔ ũ. 5À Isaili ɛwaasoɔ zĩ̀ ń zuswanaɔ, ɔ̃ aa sa pɔ wì a pɔ katɛu à tɛkũ òò Diiwa ń saaukpasa'obɔɔ. 6Ɔ̃ Mɔizi zupiɔ au sì a kpaalɛ̀ lɛɛ pla. À a lɛɛ do dìlɛ ń taɔ, à a lɛɛ do ɛ̀lɛ sa'okĩiwa. 7Ɔ̃ à Dii baakuańnɔ lá sɛ̀, à a kyokɛ̀nɛ́. Aa mɛ̀: Yã pɔ Dii ò pii, wá kɛɛ, wá misiilɛɛ̀ɛ. 8Ɔ̃ à aupi sɛ̀ a fã̀fãmá à mɛ̀: Dii baakuaánɔ aun we yãdilɛaɛ́piɔ musu pii.#Mat 26.28; 1 Kln 11.25; Hɛb 9.19-20, 10.29

9Mɔizi ń Aalonao ń Nadabuo ń Abiuo ń Isaili gbɛ̃zɔ̃ɔ gbɛ̃ɔn baaɔ̃kwiɔ dɛ̀dɛ aa gɛ̀ Lua kĩi. 10Aa ń Isailiɔ Lua è. Safii gbɛ̀ gusalala kalɛ aà gbá ziɛ, a í dɛ buunnɔ wasawasa lan luabɛbuunawa.#Eze 1.26; Zia 4.2-3 11Lua i yãe kɛ Isaili gbãadepiɔnɛo. Aa wɛsìaalɛ, ɔ̃ aa pɔblè, aa imì.

Mɔizi kua Sinai gbɛ musu

12Dii ò Mɔiziɛ: Dɛdɛ gbɛwa ǹ mɔ ma kĩi, níɔ ku we. Má gbɛpɛpɛɛ pɔ ma ikoyã pɔ má dìlɛ kɛ̃̀máɔ kpama, kɛ́ ǹ e ǹ dadanɛ́. 13Ɔ̃ à fɛ̀lɛ ń a zɔbãna Yozueo, aalɛ gɛ́ dɛdɛi Lua gbɛwa. 14Ɔ̃ Mɔizi ò gbɛ̃zɔ̃ɔɔnɛ: Àɔ wá dã́ la, wá ɛa suwá. Aalona ń Huluo aaɔ kuánɔɛ. Tó gbɛ̃e yãe vĩ, aà gɛ́ò ń kĩi. 15Ɔ̃ Mɔizi dɛ̀dɛ gbɛpiwa. Suɛlɛ kulɛa a musu, 16ɔ̃ Dii gawi pìla Sinai gbɛpiwa. Suɛlɛpi kulɛawà màa e gɔɔ soolo, a gɔɔ soplade ɔ̃ Dii lɛzù Mɔizizi za suɛlɛpiu. 17Isailiɔ Dii gawi è lan tɛ́ pãsĩwa gbɛpi musu. 18Ɔ̃ Mɔizi gɛ̃̀ suɛlɛpiu, à ɛ̀a dɛ̀dɛ gbɛpiwa. A ku we e gɔɔ bla fãanɛ ń gwãasĩnao.

Currently Selected:

Bɔa 24: Boo2024

Highlight

Copy