Malakai 1

1Uwumbɔr aah nan di waabɔr ti tuk waabɔnabr Malakai ke u di tuk Israel yaab na sɔ.

Uwumbɔr aah gee Israel yaab pu na

2Uwumbɔr bui waanib ke, “M gee nimi n‑yoonn mɔmɔk.”

Le bi gar u ke, “Kinye aan aa mɔk timi saah gee timi pu na?”

Le Uwumbɔr gar bi ke, “Esɔ ni Jakob nan ye naabitiib la, le m nan tee lee Jakob ni uyaabitiib, 3le ki yii Esɔ ni uyaabitiib. M nan bii Esɔ aatiŋ ki bi ŋigongon ni na, ki cha ki kpaln ipeel aatiŋ.”#1.2-3: Lik Rom Yaab 9.13; Amos 1.11-12; Obadia 1-14.

4Esɔ aayaabitiib, bi ye Edom aanib na, yaa bui ke, “Bi ber timi aatim a, tɔ, ti mu ga ki gir maa mu” kan, le Uwumbɔr ga gar ke, “Cha bi ki maa mu, m ga ki gir ber mu. Binib ga yin ki ke, ‘Titunwanbir aatiŋ,’ ni ‘Litimbol li Uwumbɔr aaŋuul fii li pu kaan sɔŋ na.’”

5Israel aanib aanimbil ga kan nimina, le ki bui ke, “Hali ni yaa kaa ye Israel aatiŋ pu kan, Uwumbɔr pɔɔ la.”

Uwumbɔr aah sak bitotoorb pu na

6Uwumbɔr Mpɔɔnsakpiindaan bui bitotoorb ke, “Japɔɔn nyuŋni ute la, le ututunn mu nyuŋni udindaan. Nite le ye mi, ba ŋa naa nyuŋni mi? Nidindaan le ye mi, ba ŋa naa pak mi? Ni lik mi fam, le ki tee baa ke, ‘Ti lik si fam kinye?’ 7Naah lik mi fam pu na sɔ, ni joo tijikaar ti kaa ŋan na le toor kitork maatork aabimbiln pu. Le ni baa ke, ‘Kinye aan ti yii kaa pak si?’ M ga bui nimi ke naa lik faar maatork aabimbiln. 8Buyoonn ni joo ni kiwakork ki jɔb, bee ki bun, bee ki aataal koo na nan toor kitork tii mi na, ni dak ke taani ubaa aa bi ii? Di kina aawakork tii nimi aayidaan man ki lik. Ni dak ke kina aawakork ga li piin usui ii? U ga faar nimi aapiin ngbaan ki ter nimi ii?”

9Tɔ, nimi bitotoorb, pɔɔn nibaa man ki mee Uwumbɔr ke u li kpa ti pu tiŋann. Waan kii nimi aameel, ba pu? ni tii u ipiin i kaa ŋan na la. 10Uwumbɔr Mpɔɔnsakpiindaan ki bui ke, “M ba neen ke ni ponn ni ubaa laŋ Maadichal aajaaleŋ tiib, aan ni taa ki ŋmaa koo ki ti tuur mmii mu kaa kpa tinyoor tibaa na maatork aabimbiln paab. Nsui aa piin ni pu; maan gaa ipiin i ni joo nan tii mi na. 11Dulnyaa wee aanib mɔmɔk nyuŋni mi la. Bi seer tulalee aayon ni kookoo ki tii mi, ki tii mi ipiin i ŋan na. Bi mɔmɔk nyuŋni mi la. 12Le nima aa nyuŋni mi, ki bui ke maatork aabimbiln aa ye nibaa, le ki joo ni tijikaar ti ni lik seen ti na nan toor kitork li pu. 13Ni bui le ke, ‘Ti kpaan bak nimina pu a,’ le ki fenn nimɔfal toŋ nibaa wɔb. Naah sun kiwakork ki na, bee ki bun na, bee kitaal koo na, le ni joo toor kitork tii mi. Ni dak ke m ga gaa nimina ni chee ee? 14Ujinjir u yaa joo ni kiwakork ki kaa bi tibaa ni na nan toor kitork tii mi na kan, m ga puun lii udaan pu, ba pu? u kpa kiwakork ki ŋan aan u puu ke u ga di tii mi na waapiih ni. M ye ubɔrkpaan la, le ŋitimbol mɔmɔk aanib san mi ijawaan.” Uwumbɔr Mpɔɔnsakpiindaan le len kina.

Currently Selected:

Malakai 1: xonB

Highlight

Copy

Compare