Mat 21

Lama Yesu da luwa Ursalima

Mak 11:1-11, Luk 19:28-40, Yuh 12:12-19

1Taghwaŋ a i *Yesu nda duhwalha ni ka ɓhadaghata da luwa Ursalima wu, ndusa həŋ nda luwa Beslaze ta vata ghwá Zaytuŋ#21:1 Ngha ta Markus 11:1., ka ghunaftá Yesu ta gwal his mataba duhwalha ni. 2Kaʼa nda həŋ mantsa: « Lawa la da a luwa ta kəma ghuni a. Ka ɓhadagha ɓha kuni, dzaʼa gi slanagha sla kuni hada ta hbatá mana kəɗih nda zwaŋa ni. Ka pligiɗaghata kuni ta həŋ. 3Ka mamu mndu ta gwaɗgaghunata ta ghəŋa ni katsi ná, “Mgham ta kumay,” ka kuni da zlghanaftá wa ni. Dzaʼa gi zlaghunaŋ zla həŋ. »

4Kəl tsaya ka nzakway mantsa ná, nda nza kabga ŋa dzanaghatá ghəŋa gwaɗa ya mna anabi Zakari kazlay:

5« Mnanawa mna ta gwal ma luwa *Tsiyuŋ, waʼa mghama

gha ta sagha da kagha,

leɓtekw nzakwa ni katakata, ta sagha ta kəɗih,

ta vuvuʼukwa kəɗih,

ta nzakway ka zwaŋa kəɗih#21:5 Ngha ta Zakari 9:9., » kaʼa.

6Ka sliʼaftá tsa duhwalha ya ka laghu magata manda ya mnanaf Yesu ta həŋ. 7Ka hlaktá həŋ ta tsa mana kəɗih ya nda zwaŋa ni, ka pghaftá həŋ ta lgutha taŋ ta həŋ, ka lafi Yesu nzafta tida. 8Ka zlazlatə ndəghata mnduha ta lgutha taŋ ta tvi. Sluhwa ŋa sanlaha ta patsay ka pghay ta tvi#21:8 Ngha ta 2 Mghamha 9:13. guli. 9Ka hlə gwal ta kəma Yesu nda gwal nda hula ni tani ta wi, ka həŋ mantsa: « Ŋa Zwaŋa Dawuda glaku, ka tfanagha tfa Lazglafta ta wi ta mndu ta sagha ma hga Mgham Lazglafta! Ŋa Lazglafta ta luwa#21:9 Ngha ta Zabura 118:25-26, Zabura 118:25. glaku! » ka həŋ.

10Manda ɓhadamta Yesu da luwa Ursalima, ka kəɓutá mnduha. « Wa na mndu na tama? » ka həŋ. 11Ka tsa dəmga mista ni ya mantsa: « Anabi Yesu ta sabi ma luwa Nazaret ta haɗika Galili ya, » ka həŋ.

Lama Yesu da həga Lazglafta

Mak 11:15-19, Luk 19:45-48, Yuh 2:13-22

12Ka lami *Yesu da həga Lazglafta. Ka ghəzligiŋtá tsi ta inda gwal ta tsakala nda gwal ta skway tani ma tsa həga Lazglafta ya. Ka zlambidiŋtá tsi ta tabəla gwal mbəɗu, nda vla nzakwa gwal ta dzawaptá ghərbuʼ. 13Kaʼa nda həŋ mantsa: « Nda vinda ma deftera Lazglafta kazlay: Həga ɗa ná, həga maga duʼa ya kəʼa, ka niŋtá kaghuni ka galigha la gənda#21:13 Ngha ta Isaya 56:7 nda Yirməya 7:11.. »

14Ka gavadaghatá gwal nda ghulpa nda gwal nda raghwa səla taŋ ta vata ni ma tsa həga Lazglafta ya. Ka mbambanaftá tsi ta həŋ. 15Nghay la mali ta ghəŋa gwal ta dra skwi ŋa Lazglafta, nda gwal tagha zlahu ŋa mnduha ta tsa mandərmima skwi ta mag Yesu, nda tsa hlawa zwani ma həga Lazglafta kazlay: « Ŋa Zwaŋa Dawuda glaku! » kəʼa ya ná, ka kuzlanaftá tsi ta həŋ ta ŋuɗuf. 16Ka həŋ nda Yesu mantsa: « Nda sna ka ta na skwi ta mnə həŋ na ra? » ka həŋ. « Aŋi! Nda sna yu, » ka Yesu nda həŋ. « Ta walaŋ a kuni ta dzaŋaftá tsa gwaɗaha ya ma deftera Lazglafta ra? Kaʼa na: “Kagha ta payaftá zləzlva kagha nda ma wa zwani nda ya nda ma wa zwana vziʼuwa, manda ya kumaŋ ka#21:16 Ngha ta Zabura 8:3.,” » kaʼa.

17Ka sliʼaftá Yesu ka zlaŋtá həŋ ka saghwi ma tsa luwa ya, ka laghu da luwa Betani ka hani tsi hada.

Ksiʼafta Yesu ta sana ghuraf

Mak 11:12-14, 20-24

18Ga sərɗək ta vru *Yesu ka dzaʼa da tsa luwa dagala ya, ka kuzlanaftá maya. 19Ka nghaŋtá tsi ta fwa sana ghuraf ta wa tvi. Ka lagha tsi distani. Kəʼa kəʼa ná, sluhwa yeya dzeʼdzeʼ tida. « Haɗ ka dzaʼa walglaŋta yəglafta wu, » kaʼa nda tsi. Gi hada hada dzuŋ ghwalatá tsa fu ya tsa. 20Kəʼa ká tsa duhwalha ni ya nghanata ghwalatá tsa fu ya ná, ka ndərmimi həŋ nda ndərmima. Ka həŋ mantsa: « Waká na ghuraf na gi ghwaluta hada hada kay ka na? » ka həŋ. 21Ka Yesu nda həŋ mantsa: « Kahwathwata ka yu ta mnaghunata, ka zlghaf zlgha kuni ta Lazglafta nda ŋuɗuf dgaŋ a kuni ta ghəŋ ɗekɗek wu katsi ná, skwi magana lu ta na ghuraf na yeya a dzaʼa kuni magay wa: “Ama, sliʼaf sliʼa hada ka vzamta ka ta vgha da drəf,” ka kuni dzaʼazlay nda ya ghwá ya ná, dzaʼa magaku manda va tsaya. 22Inda skwi dzaʼa ɗawaŋta kuni nda zlghay nda ŋuɗuf nda ma maga duʼa ná, dzaʼa mutsay kuni, » kaʼa.

Wa ta vlaŋtá mbrakwa maga skwiha manda na?

Mak 11:27-33, Luk 20:1-8

23Ka lam *Yesu da həga Lazglafta ka taghə tsi ta skwi ŋa mnduha. Ka gavadaghata la mali ta ghəŋa gwal dra skwi ŋa Lazglafta, nda la galata mndu da ɗawaŋta da tsi. « Mutsu ga kagha ta na mbraku ta kəl kagha ka maga na skwiha na na? Wa ta vlaghata na mbraku na? » ka həŋ. 24Ka Yesu nda həŋ mantsa: « Mamu skwi turtuktuk dzaʼa ɗawaŋta yu da kaghuni guli. Ka zlghiɗif zlgha kuni ta wa ni katsi, dzaʼa mnaghuna mna yu ta vli ta mutsu yu ta na mbraku ta kəl yu ka maga na skwiha na. 25Wa taghunafta Yuhwana ŋa maga batem#21:25 Ngha ta 3:6. na? Lazglafta re, ari mnduha a na? » kaʼa nda həŋ. Ka laghu həŋ da dzray mataba hahəŋ hahəŋ.

Ka həŋ mantsa: « “Ka Lazglafta taghunafta Yuhwana ka mu,” nu kwal kuni kul zlghafta ɓa? kaʼa dzaʼazlay nda amu. 26Ala, ka “mnduha taghunafta” ka mu guli, ta zləŋay mu ta mnduha guli, kabga klaf kla həŋ demdem kazlay: *Anabi Yuhwana kəʼa. » 27Ka həŋ nda Yesu tama mantsa: « Sna a aŋni ka wa taghunafta wu, » ka həŋ. Ka Yesu nda həŋ guli mantsa: « Iʼi guli ná, haɗ yu ta mnaghunata ka wa ta vlihata na mbraku ta kəl yu ka maga na skwiha na wu, » kaʼa.

Gwaɗa ta ghəŋa zwani his

28Ka *Yesu nda həŋ guli mantsa: « Kinawu ka kaghuni ta ndanay na? Mamu sana mndu his zwana ni. Kaʼa nda sani taŋtaŋ mantsa: “La ka dzaʼa ka da maga slna ma vwaha inaba u sagəŋ,” kaʼa nda tsi. 29“La a yu wu,” kaʼa. Tahula tsa, ka ndanglaptá tsi ka sliʼafta ka laghu da vwah. 30Ka mnanatá da ni ta tsa sana zwaŋ ya manda va tsaya guli. “Aray, ta dzaʼa yu da,” kaʼa. Tahula tsa, ka kwalaghuta tsi. 31Wati mataba tsa zwani his ya, ta magata skwi ya kum da taŋ ná? » ka Yesu nda həŋ. « Tsa taŋtaŋa ya ya, » ka həŋ. Ka Yesu nda həŋ tama mantsa: « Kahwathwata ka yu ta mnaghunata ná, dzaʼa tiŋlaghu tiŋla gwal tska dzumna nda miʼa hliri ta lami da ga mghama Lazglafta ka kaghuni. 32Wya sagha sa Yuhwana mnda maga batem da kaghuni, ka maraghunatá tsi ta tvi tɗukwa, ka kwalaghutá kuni ta zlghafta. Ama ka zlghaftá gwal ta tska dzumna nda miʼa hliri. Kulam nda va tsa nghaŋta ghuni ya tani, mbəɗanaf a kuni ta nzakwa ghuni ka zlghafta wa, » ka Yesu nda həŋ.

Mahdihdi ta ghəŋa gwal ta hva vwaha inabi

Mak 12:1-12, Luk 20:9-19

33« Ka mnaghuna mna yu ta sana mahdihdi ɓa: Mamu sana mndu ta ŋaɓaftá fwa inabiha ma vwaha ni. Ka ŋamtá tsi ma muhul. Ka laptá tsi ta ghurum ŋa ɗitsa yakwa ni. Ka baghatá tsi ta vli ŋa nzagata ka nghay#21:33 Ngha ta Isaya 5:1-2.. Tahula tsa, ka fanamtá tsi ma dzvu ka haya ta gwal hva. Ka sliʼafta tsi ka laghu dista luwa. 34Magatá fitika ɗaga yakwa ni, ka ghunafta tsi ta kwalvaha ni da tsa gwal hva ma tsa vwah ya, ŋa mutsanafta taŋ ta ŋa ni ma ɗagata yakwa tsa inabi ya. 35Ama, ka valaftá tsa gwal hva tsa vwaha inabi ya ta tsa kwalvaha ya. Ka ɗgaptá həŋ nda ɗgatá sani ka dzata həŋ nda dza ta sani. Ka zlərtsatá həŋ nda zlərtsa ta sani. 36Ka ghunəglaftá tsi ta sanlaha ma kwalvaha ni ka malaghuta mbsaka tsaha taŋtaŋ ya. Ka maganatá tsa gwal hva tsa vwah ya ta hahəŋ guli manava ŋa tsaha ya. 37Kɗavakta ni, ka ghunədanaptá tsi ta həŋ ta vərɗa ŋa ni ma zwaŋ nda mnay kazlay: Dzaʼa vlaŋ vla həŋ ta glaku ta zwaŋa ɗa kəʼa. 38Na nghay tsa gwal hva fwa inabi ya ta lagha tsa zwaŋ ya, ka həŋ mataba taŋ mantsa: “Wana tsa mndu dzaʼa za həga ya kay. Sawa, ka dzata mu! Ŋa zay mu ta həga ni,” ka həŋ. 39Ka valaftá həŋ tida. Ka tshidiŋta diʼiŋ nda tsa vwah ya, ka dzata.

40« Baɗu da saghər tsa da ni ma inabi ya ní, kinawu kəʼa dzaʼa magay nda tsa gwal hva tsa vwaha inabi ya na? » ka *Yesu nda həŋ. 41« Dzaʼa psla psla ta tsa ghwaɗakha ya, ksaŋta a həŋ ka hiɗahiɗa wa. Ŋa klafta ni ta tsa vwaha inaba ni ya ka fanamta ma dzvu ka haya ta sanlaha ma gwal hva. Ŋa vlay tsaha ya ŋa ni nda fitika ni ta ŋa ni mataba ɗagata yakwa tsa fwa inabi ya, » ka həŋ.

42Ka Yesu nda həŋ guli mantsa: « Ta walaŋ a kuni ta dzaŋafta skwi vindaf lu ma defteri ra?

“Tsa pala wuɗidiŋ gwal ba həga ya,

tsaya ta nuta ka vərɗa palaka tughwa həga.

Tsaya ná, Lazglafta ta ɗvaftá nzakwa ni mantsa.

Nda nza ka mazəmzəm ta wa ira amu#21:42 Ngha ta Zabura 118:22-23..”

43« Tsaya kəl yu ka mnay ŋa ghuni kazlay: Dzaʼa klaghu kla lu ta ga mghama Lazglafta da kaghuni ŋa vlaŋtá mndəra mnduha dzaʼa snanatá gwaɗa ni ɗina kəʼa ya. 44[Tsa mndu dzaʼa zləmbafta ta tsa pala ya, dzaʼa hurɓə hurɓa. Ala, ka tsa pala ya ta zləmbanaghatá mndu katsi, dzaʼa huʼanap huʼa#21:44 Ngha ta Lukwa 20:18. ŋərɗək ta tsa mndu ya.] »

45Na snanata la mali ta ghəŋa gwal dra skwi ŋa Lazglafta, nda la *Farisa ta tsa mahdihda Yesu ya, ka graftá həŋ kazlay: Ta ghəŋa taŋ ta gwaɗa tsi ta tsa gwaɗa ya, kəʼa. 46Ka zbə həŋ ta ksaftá Yesu. Ama ka zləŋaftá həŋ ta dəmga, kabga klaf kla dəmga ta Yesu ka anabi.

Currently Selected:

Mat 21: xed

Highlight

Copy

Compare