Mat 20

Gwaɗa ta ghəŋa kwalvaha ma vwaha inabi

1« Wya skwi ŋa gray nda ga mghama Lazglafta. Ka tsavagaptá sana zəʼala həga ma həga ni, wrək sərɗək, da zba gwal ŋa ksanatá slna ma vwaha inaba ni. 2Ka dzraftá tsi nda tsa gwal ksa slna ya ta planatá həŋ ka tseda vagha mndu#20:2 Ngha ta Mata 5:26. turtuk, ta vagha taŋ. Ka ghunaghatá tsi ta həŋ da vwaha inabi. 3Ka sliʼiglaftá tsi wər ta nzemndi təmbay gavzlazlaŋ, ka nghəglaŋtá tsi ta gwal ksa slna ta nzaku bətbət. 4Kaʼa nda həŋ mantsa: “Lawa kaghuni guli da ksa slna ma vwaha inaba ɗa, dzaʼa plaghuna pla yu ta tseda ghuni manda ya ta raku,” kaʼa nda həŋ. 5Ka sliʼaftá tsa gwal ksa slna ya ka laghu da tsa vwaha inabi ya. Ka sliʼiglaftá tsi guli wər fitik ma ghəŋ vli, mantsa guli ta fitik hawu, ka magata manda va tsaya guli. 6Ka sliʼiglaftá tsi guli beeghwa fitik, ka slanaghatá tsi guli ta sanlaha ma gwal ksa slna ta nzaku. Kaʼa nda həŋ mantsa: “Nya kəl kuni ka vaghay ta nzaku kul laghu maga slna na?” kaʼa nda həŋ. 7Ka həŋ nda tsi mantsa: “Haɗ mndu ta klaftá aŋni ŋa maga slna wa,” ka həŋ. Kaʼa nda həŋ mantsa: “Lawa kaghuni guli da maga slna ma vwaha ɗa,” kaʼa.

8« Ga hawu tama, “hagakhaga ta tsa gwal ta ksa slna ya, ka planata ka ta nisəla taŋ ka zlrafta ka nda tsa gwal ka kwanaha ni ya, ŋa kɗiŋta gha nda gwal taŋtaŋ,” ka tsa da ni ma vwaha inabi ya nda kwalva ni. 9Ka lagha tsa gwal ta zlraftá ksa slna beeghwa fitik ya. Ka vlaŋtá lu ta tseda vagha mndu turtuk turtuk ta həŋ. 10Ka lagha gwal ta zlraftá ksa slna taŋtaŋ. “Mali dzaʼa aŋni zlghay” ka hahəŋ si ta gray. Ama ka vlaŋtá lu ta tseda vagha mndu turtuk turtuk ta həŋ. 11Ta zlghə həŋ ya, ta dzaʼa nda ŋuŋuraku həŋ ta ghəŋa tsa daŋahəga ni həga ya. 12Ka həŋ mantsa: “Beeghwa fitik ta sagha nanaha na, awa#20:12 Awa: Tsaya fitik maga mndu ta maga slna. turtuktuk kweŋkweŋ maga həŋ ta ksa slna ná, waká kagha planatá həŋ guram nda ŋa aŋni na? Aŋni, hərfu hərfa ŋni ta ksa slna tles fitik, ka vaghay ta maga slna ta fitik,” ka həŋ. 13Kaʼa nda həŋ mantsa: “Gra ɗa, nənɓap a yu ta kagha wa. Ta tseda vagha mndu turtuk a dzrafta u nda kagha kay ra? 14Zlgha ta nisəla gha, ka sliʼa ka. Manda va ya kumaŋ yu vlaŋta yu ta tsa mndu ta sagha nda hul ya, manda va ŋa gha. 15Laviŋ lava yu ta maga skwi manda ya kumaŋ yu nda tseda ɗa, mantsa a kasiʼi wa? Ari zɗəgagha a wa a na skwi ɗina maga yu na ta wa ira gha na?” kaʼa. 16Tsaya tama ná, dzaʼa nzakway gwal nda hul, ka gwal taŋtaŋ. Ŋa nzakwa gwal taŋtaŋ, ka gwal nda hul, » ka *Yesu sganaghata.

Mahkəna mnaŋta Yesu ta gwaɗa ta mtakwa ni nda sliʼagaptani

Mak 10:32-34, Luk 18:31-34

17Ka sliʼaftá *Yesu ka ŋlu ka dzaʼa da luwa Ursalima. Ta mbaɗa həŋ ta tvi, ka ksaghutá tsi ta tsa gwal ghwaŋpəɗ his ya, kaʼa nda həŋ mantsa: 18« Ndanana, wana mu ta ŋlu ka dzaʼa da luwa Ursalima. Dzaʼa ksaf ksa lu ta *Zwaŋa mndu, ka vlaŋtá la mali ta ghəŋa gwal dra skwi ŋa Lazglafta, nda gwal tagha zlahu ŋa mnduha, ŋa tsanaghata taŋ ta guma dzata. 19Dzaʼa vlaŋ vla həŋ ta gwal kul haɗ ka la *Yahuda, ŋa gagay tsaha ya, ŋa sləvay taŋ nda krupi, ŋa zləŋafta taŋ ta udza zləŋay. Baɗu mahkəna fitik, ŋa sliʼagaptani nda hafu ma mtaku, » kaʼa.

Ɗawutá vla ma ni ma i Yakubu nda Yuhwana

Mak 10:35-45

20Tahula tsa, ka lagha ma ni ma zwana Zebedi nda zwana ni. Ka tsəlɓata tsi ta kəma ni ŋa ɗawa skwi da tsi. 21« Nu ta kum ka na? » ka *Yesu nda tsi. « Wana na zwana ɗa his na, sagha fitika ga mghama gha ya ná, ka mnata ka, ŋa nzata na zwana ɗa na, nda ga zeghwa gha ya, nda ga zlaɓa gha ya, ka yu, » kaʼa nda tsi. 22« Sna a kuni ta skwi ta ɗawu kuni wa. Dzaʼa laviŋ lava kuni ta sa leghwa tsa ghuya ɗaŋwa dzaʼa yu ghuyay ya ra? » ka Yesu. « Dzaʼa say ŋni! » ka həŋ nda tsi. 23Ka Yesu#20:23 Ngha ta Slna gwal ghunay 12:2. nda həŋ mantsa: « Mantsa nzakwa ni, dzaʼa say kuni ta tsa leghwa ghuya ɗaŋwa ɗa ya, ama ta ghəŋa gwaɗa ta nzaku nda ga zeghwi nda ya nda ga zlaɓa ná, iʼi a dzaʼa mna tsaya wa. Da ɗa dzaʼa vlaŋtá tsa vli ya ta gwal ya payanaf tsi ta həŋ, » kaʼa.

24Snaŋta tsa pɗakwa duhwalha ghwaŋ ya ta tsa gwaɗa ya, ka ɓasanavatá həŋ ta ŋuɗuf ta tsa zwanamaha his ya. 25Ka hagadaghatá Yesu ta həŋ, kaʼa nda həŋ mantsa: « Nda sna kuni ná, ta gay mghamha ta ghəŋa mnduha ta má mgham mghama taŋ ta ghəŋa taŋ. Gwal dagala dagala guli, ta maray hahəŋ ta mbrakwa taŋ ta ghəŋa taŋ. 26Ama mantsa ya a nzakwa ni mataba kaghuni wa. Katək ná, ka ta kumay sani ta nzakway ka mali mataba ghuni ná, nzata ni ka kwalva ghuni. 27Ala, ka dər wa ta kuma nzakway ka mnda kla kəma mataba ghuni ya, nzata ni ka vuʼa ghuni. 28Manda va tsaya ná, sa a *Zwaŋa mndu ŋa maganata lu ta slna wa. Ama sasa ŋa maganatá slna ta mnduha, ŋa vlata ni ta hafa ni ŋa mbanaftá ndəghata mnduha#20:28 Ngha ta 26:28, nda 1 Timute. 2:6., » kaʼa.

Mbambanafta Yesu ta ghulpata mnduha his

Mak 10:46-52

29Ta sab i *Yesu nda duhwalha ni ma luwa Yeriku, ka sliʼaftá dəmga rutut mista ni. 30Ta nzaku ghulpata mnduha his ta wa tvi. Ka snaŋtá həŋ ta lab la Yesu nda ta tsa kəʼa, ka dzatá həŋ ta lawlaw. « Mgham, Zwaŋa Dawuda! Tawa ta hiɗahiɗa ta aŋni, » ka həŋ. 31« Hafwa wa ghuni! » Ka tsa dəmga ya, ka dava həŋ. Ama ka sganaghatá tsa ghulpata mnduha ya ta dza lawlaw. « Mgham, Zwaŋa Dawuda! Tawa ta hiɗahiɗa ta aŋni, » ka həŋ. 32Ka sladavatá Yesu, ka hgadaghatá tsi ta həŋ. « Nahgani ta kum kuni ta magaghunata ɗa na? » kaʼa nda həŋ. 33« Mghama ɗa, gwanaŋnagwana ta iriha ŋni! » ka həŋ nda tsi. 34Ka ksaŋtá həŋ ta Yesu ka hiɗahiɗa. Ka kasaŋtá tsi ta iriha taŋ. Ka gi nghaŋtá həŋ ta vli nziɗiɗ. Ka laghu həŋ mista Yesu.

Currently Selected:

Mat 20: xed

Highlight

Copy

Compare