Mat 19

Tagha skwi ta ghəŋa ghəzla marakw

Mak 10:1-12

1Manda kɗiŋta *Yesu ta tsa gwaɗa ya, ka sliʼaftá tsi ta haɗika Galili ka laghwi ta haɗika Zudiya ta ɓla ghwa *Yardeŋ. 2Ka sliʼafta dəmga rutut mista ni. Ka mbambə tsi ta mnduha.

3Ka gavadaghatá la *Farisa da tsi, kabga ta kumay həŋ ta tsanamtá matsavaɗa. Ka həŋ nda tsi mantsa: « Laviŋ lava mndu ta ghəzliŋtá markwa taŋ, ka maga maga tsi ta dər wati ma skwi tsi ra? » ka həŋ. 4Ka Yesu nda həŋ mantsa: « Ta dzaŋa a kuni ta skwi ya nda vinda ma defteri nda ghuɓa ra? “Ma zlrafta inda skwi ná, zlagigiŋ zlaga Lazglafta ta i zgun nda marakw#19:4 Ngha ta Zlrafta 1:27 nda 5:2..” 5Ka Lazglafta mantsa: “Tsaya dzaʼa kəl zgun ka zlaŋtá i da ni nda ma ni, ka laghu da ndiʼaftá vgha nda markwa taŋ, ŋa nzakway tsa hahəŋ his ya ka mndu turtuk#19:5 Zlrafta 2:24..” Mantsa ya tama, 6nzəgla a həŋ ka mnduha his wa, ama ka mndu turtuk nzakwa taŋ. Yaha mndu tama da dganatá skwi ya ndiʼanaf Lazglafta, » kaʼa. 7Ka la Farisa nda tsi mantsa: « Kabgawu tama kəl Musa ka mnay kazlay: Ka ta ghəzlay mndu ta markwa taŋ katsi ná, vindanafta ni ta ɗelewera ghəzlatá marakw #19:7 Ngha ta Vrafta ta Zlahu 24:1. Nda Mata 5:31. kəʼa ɓa? » ka həŋ nda tsi. 8Ka Yesu nda həŋ mantsa: « Təŋata ghəŋa ghuni kəl Musa ka vlaghunatá tva ghəzliŋtá marakw. Ma zlrafta ni ná, mantsa ya a nzakwa ni wa. 9Ama ka iʼi ta mnaghunata ná, yaha mndu walaŋtá ghəzliŋtá markwa taŋ, ka ta ghəŋa hliri#19:9 Ngha ta 5:32. a tsi. Nzakwa ni ná, ka ghəzliŋ ghəzla mndu ta markwa taŋ, ka klafta ni ta sani katsi ná, ta hliri tsa mndu ya nda tsa. »

10Ka duhwalha ni nda Yesu mantsa: « Ka si mantsa ya ta magakwa skwi mataba i marakw nda zəʼal katsi ná, dər kwal kul klay, » ka həŋ. 11Ka Yesu nda həŋ mantsa: « Inda mndu a dzaʼa laviŋtá ŋaftá tsa gwaɗa ya wa, ba gwal ya vlaŋ Lazglafta ta mbrakwa ŋafta kasiʼi, 12kabga mamu gwal ya yaga lu ka kuɓitik, mamu gwal ya pslaf mnduha nda psla, mamu gwal ta kwalaghutá klay, kabga gwaɗa ta ga mghama Lazglafta guli. Mndu ya dzaʼa laviŋtá ŋaftá tsa gwaɗa ya, ka ŋa tsi, » kaʼa.

Fanaghata Yesu ta dzvu ta ghəŋa zwani

Mak 10:13-16, Luk 18:16-17

13Tahula tsa, ka hladaghatá mnduha ta zwani kwitikw kwitikw da *Yesu, ŋa fanaghata ni ta dzvu ta həŋ ka maga duʼa ta ghəŋa taŋ. Ama ka pyə duhwalha Yesu ta mnduha. 14Ka Yesu nda tsa duhwalha ya mantsa: « Zlaŋwa zla ta zwani ka sagha həŋ da iʼi, ma pyə kuni ta həŋ, kabga ŋa gwal ta gara vgha nda hahəŋ#19:14 Ngha ta 18:3-5. na ga mghama Lazglafta, » kaʼa. 15Ka fafanaghatá Yesu ta dzvu ta ghəŋa tsa zwani ya. Tahula tsa, ka sliʼaftá tsi ma tsa vli ya, ka laghu.

Sana duhwal ka gadghəl

Mak 10:17-31, Luk 18:18-30

16Va gi ka lagha sana mndu da *Yesu, kaʼa mantsa: « Maləma ɗa, nahgani skwi dzaʼa yu magata ɗina, ŋa nzakwa ɗa nda hafu ŋa kɗekedzeŋ kawadaga nda Lazglafta na? » kaʼa. 17Ka Yesu nda tsi mantsa: « Kabgawu kəl ka ka ɗawihata ta ghəŋa ŋərma skwi na? Turtuktuk ŋərmata nzakway ka Lazglafta. Ka ta kumay ka ta nzakwa gha nda hafu ŋa kɗekedzeŋ kawadaga nda Lazglafta katsi ná, snata gha ta zlahuha ni, » kaʼa. 18« Wati zlahuha ya na? » Ka tsa mndu ya. Ka Yesu mantsa: « Yaha ka da dzatá mndu, yaha ka da hliri, yaha ka da ghali, yaha ka da tsanavatá gwaɗa ta mndu, 19vla ta glaku ŋa i da gha nda ma gha, ɗvu ɗva ta mnda səla manda va ghəŋa gha#19:19 Ngha ta Sabi 20:12-16, Vrafta ta zlahu 5:16-20, Zlahu 19:18., » kaʼa. 20Ka tsa duhwal ya nda tsi mantsa: « Sna sna yu ta inda tsaha ya demdem, nu ta pɗakwa ni ŋa magəgəlta ɗa na? » kaʼa. 21Ka Yesu nda tsi mantsa: « Ka ta kumay ka ta nzakwa gha hem#19:21 Ngha ta 5:48. katsi ná, la ka dzawiŋta ka ta inda skwa gha, ka daganafta ka ta tseda ni ta gwal ka pɗu. Dzaʼa mutsay ka ta gadghəl ta luwa, tahula tsa ka sagha ka, ka dzaʼa ka mista ɗa, » kaʼa. 22Na snaŋta tsa duhwal ya ta tsa gwaɗa ya, ka ɓasaftá tsi ta ŋuɗuf ka sliʼafta ka laghu, kabga gadghəl ya.

23Ka Yesu nda duhwalha ni mantsa: « Kahwathwata ka yu ta mnaghunata, nda bla katakata ka lama mndu ta fafta ghəŋa ni ta gadghəl da ga mghama Lazglafta. 24Ka yu ta vrəgliŋtá mnaghunata na: Ta dər laba ŋalibwa nda ta ghuruma lipir, ka lama mndu ta faftá ghəŋa ni ta gadghəl da ga mghama Lazglafta, » kaʼa. 25Na snaŋta duhwalha ni ta tsa gwaɗa ya, ka ndərauʼ həŋ katakata, ka həŋ mantsa: « Ka si mantsa tsi, wa dzaʼa laviŋta mutsaftá mbaku tama? » ka həŋ. 26Ka nghanavatá Yesu ta həŋ, kaʼa mantsa: « Skwi nda bla da mnduha ya ná, bla a da Lazglafta wa, » kaʼa.

27Gi tsauʼ ka piyer tsuʼaghutá gwaɗa, kaʼa nda Yesu mantsa: « Aʼa! Ya wana aŋni, zlanava zla aŋni ta inda skwi, ka dzaʼa mista gha ya ní, kinawu kəʼa dzaʼa magaku nda aŋni tama? » kaʼa. 28Ka Yesu nda həŋ mantsa: « Kahwathwata ka yu ta mnaghunata, ma mbəɗavafta#19:28 Ngha ta Danyel 7:14. inda skwi dzaʼazlay ná, dzaʼa nzafta ta dughurukwa glakwa ni na Zwaŋa mndu. Kaghuni gwal ta dzaʼa mista ɗa ya guli, dzaʼa nzanzafta ta dughurukha ghwaŋpəɗ his kaghuni, ŋa tsa guma ta ghəŋa mndəra la Israʼila ghwaŋpəɗ his guli. 29Dər wati ma mndu ta zlanavatá həga ni, ka zwana ma ni a tsi, ka kwaghama ni a tsi, ka da ni a tsi, ka ma ni a tsi, ka zwana ni a tsi, ka vwaha ni a tsi, ta ghəŋa gwaɗa ta iʼi ná, dzaʼa mutsay həŋ ta dərməkata ni, ka malaghuta a tsi, ŋa mutsay taŋ ta hafu ŋa kɗekedzeŋ guli ta ghəŋa ni. 30Ama nda ndəgha gwal ta nzakway taŋtaŋ, dzaʼa nzakway nda hul. Nda ndəgha gwal ta nzakway nda hul guli, dzaʼa nzakway taŋtaŋ, » kaʼa.

Currently Selected:

Mat 19: xed

Highlight

Copy

Compare