Sab 37
37
Magatá akwata dzratá wi
1Ka tsaftá Betsalʼel ta akwati nda udza kwehi. Slrakwa ni, saŋtimitər dərmək nda hisambsak hutaf mida. Bughwata ni, saŋtimitər ndəfáŋ mbsak hutaf mida, slada ni saŋtimitər ndəfáŋ mbsak hutaf mida, 2ka zlərɓata nda dasu ghenen nda hula ni tani, nda huɗa ni tani. Ka ɓluŋtá tsi ta wa ni nda dasu. 3Ka nwaptá tsi ta gidaŋha fwaɗ ka dasu ta səlaha ni fwaɗ guli, his təvu ya slərpu his təvu ya slərpu. 4Ka fifiɗaftá tsi ta sandlaŋha udza kwehi, ka zlərɓata nda dasu. 5Ka dzadzamtá tsi ta tsa sandlaŋha ya da tsa gidaŋha ta slərpuha tsa akwati ya ŋa klay tida.
6Ka magaftá tsi ta paɗuwa vla pla dmaku ka dasu ghenen. Slrakwa ni ka saŋtimitər dərmək nda hisambsak hutaf mida. Bughwata ni guli, ka saŋtimitər ndəfáŋ mbsak hutaf mida. 7Ka tsatsaftá tsi ta kerubaha his ka dasu. Nda dasu pəslap lu nda guduma tsatsafta tsi ta həŋ ta wa slərpuha tsa paɗuwi ya his. 8Ka magaftá tsi ta kerubaha his pal ta wa ya slərpu, pal ta wa ya slərpu. Ka magaftá tsi ta tsa kerubaha ya ka skwa turtuk nda tsa paɗuwi ya ta tsa slərpuha ni his ya. 9Zlataga nda zlatá tsa kerubaha ya ta zlambakha taŋ nda ta luwa, ka bukwanaghatá tsa paɗuwi ya nda tsa zlambakha taŋ ya, ka nzatá həŋ mbəŋ ya mbəŋ ya, ka dzadzagatá ghəŋ nda təv tsa paɗuwa vla pla dmaku ya.
Magatá tabəla buradi ta vəl lu ŋa Yawe
10Ka tsaftá tsi ta tabəl nda udza kwehi: Ka mitər turtuk slrakwa ni, ka saŋtimitər hutaf mbsak bughwata ni, ka saŋtimitər ndəfáŋ mbsak slada ni. 11Ka zlərɓaftá tsi nda dasu ghenen. Ka ɓluŋtá tsi ta wa ni nda dasu. 12Ka maguŋtá tsi ta skwi taɓta pehwata dzvu ta wa ni ka wanafta, ka maguŋtá tsi ta dasu ta wa ni ka wanafta guli. 13Ka nwaptá tsi ta gidaŋha fwaɗ ka dasu. Ka pghaftá tsi ta tsa gidaŋha ya ta vata slərpuha ni fwaɗ ta tsa səlaha ni fwaɗ ya. 14Ndusa nda tsa skwi pehwa ta wanafta ya, nzakwa tsa gidaŋha ta ŋaŋanatá tsa sandlaŋha ŋa kla tsa tabəl ya. 15Ka fifiɗaftá tsi ta sandlaŋha udza kwehi ŋa kla tsa tabəl ya, ka zlərɓatá tsi ta həŋ nda dasu. 16Ka magaftá tsi ta kliwtirha, nda leghwaha, nda hurdzukha, nda kwapha ŋa slranatá skwi. Nda dasu ghenen magafta tsi ta həŋ.
Magatá sundula pitirla ka dasu
17Ka magaftá tsi ta sundula pitirla nda dasu ghenen. Tida tida taɗagapta tsi nda guduma ta səla ni, nda sundula ni, nda ŋulaŋha ni, nda mazalha ni, nda vzlizlaha ni ka skwa turtuk. 18Mkuʼ kəʼa taɗagaptá zligamaha ta slrəpuha ni. Hkən zligama təv ya, hkən zligama təv ya. 19Ta inda tsa zligamaha ya ná, hkən hkən hkən nzakwa ŋulaŋha ni manda ŋa fwa amanda nda mazalha ni, nda vzlizla ni ya. 20Ta tsa sundula pitirla ya ná, fwaɗ nzakwa ŋulaŋha ni manda ŋa fwa amanda nda mazalha ni, nda vzlizla ni ya tani. 21Pal pal pal nzakwa mazal mista vla nzagwatá tsa zligamaha hkən ya. Mantsa ya nzakwa taŋ ta tsa zligamaha mkuʼ ya. 22Tsa mazalha ni nda zligamaha ni ya ná, ka skwa turtuk nda tsi nzakwa taŋ. Inda ni ná, nda guduma taɗagapta lu ta həŋ ka dasu ghenen. 23Ka magaftá tsi ta pitirlaha ni ndəfáŋ, nda lmislha ni, nda hutaya ni. Ka dasu ghenen nzakwa taŋ. 24Inda tsa pitirlaha ya nda huzlaha taŋ ya ná, nda kiluʼ a dasu ghenen hkən mbsak hutaf mida slarafta lu ta həŋ.
Magatá gwira dra urdi
25Ka magaftá tsi ta gwira dra urdi nda udza kwehi. Ka gragra slrakwa ni nda bughwata ni. Saŋtimitər hutaf mbsak nda təv ya, saŋtimitər hutaf mbsak guli nda təv ya. Mitər turtuk slada ni. Ka magaftá tsi tida tida ta duliha ni. 26Ka zlərɓaftá tsi nda dasu ghenen, nda ghəŋa ni, nda slərpuha ni, nda duliha ni, ka wanafta. Ka maguŋtá tsi ta dasu ta wa ni, ka wanafta. 27Ka maganaftá tsi ta gidaŋha his ka dasu nda mista wa ni ta slərpuha his ŋa hahamtá sandlaŋha ŋa klay tida. 28Ka fifiɗaftá tsi ta tsa sandlaŋha udza kwehi ya, ka zlərɓata nda dasu.
29Ka magaftá tsi guli ta rɗi nda ghuɓa ŋa fata ka ŋa Yawe, nda urdi ghenen zɗa ziʼakwa ni ŋa dray nda dra, manda ya ta mag midala.
Currently Selected:
Sab 37: xed
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
