Sab 36
36
1Ka zlraf zlra i Betsalʼel, nda Uhuliyav, nda inda mnduha ta vivɗa ta slna mnda ya mnaf Yawe. Vlaŋ vla Yawe ta ɗifil nda mahizl ma ghəŋ ta həŋ ŋa snaŋta taŋ ta maga inda slna baftá həga nda ghuɓa, » kaʼa.
2Ka hagaktá Musa ta i Betsalʼel nda Uhuliyav nda inda mnduha ta vivɗa ya fanam Yawe ta ɗifil ma ghəŋ ta həŋ, nda inda gwal ya ksaŋ tsa slna ya ta ŋuɗuf taŋ ŋa sagha magay. 3Ka zlghaftá həŋ da Musa ta inda tsa mbəhuha hlak la Israʼila ŋa maga slna həga nda ghuɓa ya. Inda sərɗək, ka va kɗaŋtá mnduha ta hlaktá mbəhuha da Musa nda kumay ŋuɗufa taŋ. 4Ka zlaŋtá inda tsa mnduha ta vivɗa ta maga inda slnaha kavghakavgha ta həga nda ghuɓa ya ta slnaha taŋ, ka lagha. 5Ka həŋ nda Musa mantsa: « Nda fərta na skwi ta hlakta mnduha na, malaghu mala ka skwi ya ŋa maga slna manda ya mnaf Yawe, » ka həŋ.
6Ka mnaftá Musa ŋa dzaʼa manay ma ghuɓu kazlay na: « Ma hləglak dər zgun tsi, dər marakw a tsi ta mbəhu ŋa həga nda ghuɓa, » kaʼa. Ka zlaŋtá mnduha ta hləglakta. 7Slaghu sla skwiha hlak həŋ prək ka maga inda slna ha ka haslanavata.
Magatá həga tumpula nzakwa Yawe
8Ka magaftá inda gwal ta vivɗa mataba gwal ksa slna ta həga tumpul ta patakha ghwaŋ nda vəvɗatá sləvdza liŋ kulefeɗ, tsərslata ni nda sləvdzi ka kubwalkubwal, nda ya ka dva ghuz, nda ya ka dva ghəlez. Ka gagamtá həŋ ta kerubaha tida guli. Sla mnda vivɗa ya. 9Slrakwa patak turtuk ya ná, ka mitər ghwaŋpəɗ fwaɗ, bughwata ni guli ka mitər his. Ka gragra inda tsa patakha ya. 10Ka nzagwaftá lu ta patakha hutaf, mantsa ya nzagwafta lu ta tsa sanlaha hutaf ya guli. 11Ta sana slərpa turtuk ta kɗavakta ni təv ŋa nzugway ta tsa mahutafa patak ya ná, ka maguŋtá lu ta ketsiŋha nda sləvdza kubwalkubwal. Manda tsaya maguŋta lu guli təv kɗavakta tsa nzugwata ni hutaf ya guli. 12Mantsa tama, ka maguŋtá lu ta ketsiŋha hutaf mbsak təv slərpa ta tsa patakha nzagwaf lu taŋtaŋ ya. Ketsiŋha hutaf mbsak guli ta slərpa tsaha nzagwaf lu ka mahisa ya. Ka guyanatá lu ta tsa ketsiŋha ya sani nda sani. 13Ka magaftá lu ta skwiha hdeuʼhdeuʼ hutaf mbsak ka dasu. Ka nzagwanatá lu ta tsa patakha ya nda tsa skwiha hdeuʼhdeuʼ ya, sani nda sani ka nzakw tsi ka həga tumpul turtuk.
14Ka magaftá lu ta patakha ghwaŋpəɗ ndeŋ nda swida gu. Ka nzakw tsi ka tumpul ta ghəŋa həga tumpul. 15Slrakwa patak turtuk ná, mitər ghwaŋpəɗ hutaf. Bughwata ni guli ná, ka mitər his. Ka gragra inda tsa patakha ghwaŋpəɗ ndeŋ ya. 16Ka nzagwaftá lu nda ghəŋa taŋ ta patakha hutaf, nzagwafha lu nda ghəŋa taŋ ta tsaha mkuʼ ya guli. 17Ta sana slərpu turtuk ta tsa patakha hutaf taŋtaŋ ya ná, ka maguŋtá lu ta ketsiŋha hutaf mbsak. Manda va tsaya maguŋta lu ta slərpa tsa sana mahisa patakha mkuʼ ya guli. 18Ka magaftá lu ta skwiha hdeuʼhdeuʼ hutaf mbsak ka ghuva tili ŋa gwayanatá həga tumpul, kada nzakwa tsi ka skwa turtuk. 19Ka magaftá lu ta hutaha maŋazak dvap lu ka bukwamtá tsa həga tumpul ya. Magaf lu guli ta sana hutaha ɗina ɗina ka zləɓanaghata.
20Ka fifiɗaftá lu ta katakuha udza kwehi ŋa ba həga tumpul, ka dzagwata nda dzagwa. 21Mitər hutaf nzakwa slrakwa kataku turtuk, saŋtimitər ndəfáŋ mbsak hutaf mida bughwata ni guli. 22Ka magaftá lu ta tsa kataku ya ta dzvuha his ŋa gwaya sana nda sani. Mantsa ya magafta lu ta inda katakuha tsa həga tumpul ya. 23Ka fifiɗaftá lu ta katakuha hisambsak ta slərpu nda təv suda həga tumpul ya. 24Ka magaftá lu ta tughuha fwaɗ mbsak ka kfura tsedi ŋa pghiŋta mista tsa katakuha hisambsak ya. Tughuha his ta mndəra kataku turtuk ŋa dihanatá tsa dzvuha his ya. Mantsa ya mista inda ni. 25Təv mahisa slərpa tsa həga tumpul nda təv mazlay ya guli ná, ka magaftá lu ta katakuha hisambsak, 26nda tughuha ni fwaɗ mbsak ka kfur tsedi, his his his tughuha mista ni. 27Ka mamagaftá lu ta katakuha mkuʼ ŋa ta slərpa hula tsa həga tumpul ya nda təv dɗakwa fitika ni. 28Ka mamagaftá lu ta katakuha his guli ŋa ta tuldiha nda ta hula tsa həga tumpul ya. 29Ka zləɓaftá lu nda zləɓa ta həŋ daga ta mndər, ka hbanatá ghəŋa ni ɗina nda gidaŋ. Mantsa ya nzakwa taŋ his his, ka nzakw həŋ ka tuldiha his. 30Tsaya tama ná, tghas tsa katakuha ni ya, ghwaŋpəɗ mkuʼ tughuha ni ka kfura tsedi his his his mista inda kataku.
31Ka mamagaftá lu hutaf ta həndilha udza kwehi ŋa hbanatá tsa katakuha həga tumpul ya nda təv slərpu turtuk. 32Ka mamagaftá lu hutaf ta həndilha ŋa hbanatá tsa katakuha həga tumpul ya, təv sana slərpu turtuk guli. Ka mamagaftá lu hutaf guli ta həndilha ŋa hbanatá tsa katakuha həga tumpul ya, nda ta hul təv mazu. 33Tsa həndil ma takataka ya ná, ka dzadaptá lu ma takataka tsa katakuha ya dikw ta kɗavakta ni ta sana slərpu. 34Ka zlərɓaftá lu nda dasu ta tsa katakuha nda tsa həndilha ya. Nda dasu magafta lu ta gidaŋha ŋa ŋaŋanatá həndilha.
35Ka magaftá lu ta zlala nda sləvdzi ka kubwalkubwal, nda ya ka dva ghuz, nda ya ka dva ghəlez nda tsərslata vəvɗatá sləvdza liŋ kulefeɗ. Ka gamtá mnda vivɗa ta kerubaha mida guli. 36Ka magaftá lu ta guguɗiha udza kwehi fwaɗ ŋa hbaptá zlala, ka zlərɓata nda dasu, nda hdeuʼhdeuʼha ka dasu. Ka magaftá ta tughuha fwaɗ ka kfura tsedi ŋa tsa guguɗiha ya.
37Ka magaftá lu ta laɓle ta wa tva lam da tsa həga tumpul ya nda sləvdzi ka kubwalkubwal, nda ya ka dva ghuz, nda ya ka dva ghəlez nda tsərslata vəvɗatá sləvdza liŋ kulefeɗ. Mnda vivɗa ta gamta. 38Ka mamagaftá lu ta guguɗiha ni hutaf, nda hdeuʼhdeuʼha ni ka zlərɓatá ghəŋa taŋ nda htsiŋha taŋ nda dasu. Ama ka magaftá lu ka ghuva tili ta tsa tughuha taŋ hutaf ya.
Currently Selected:
Sab 36: xed
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
