Sab 35
35
Zlahu ta ghəŋa Sabat
1Ka tskanatá Musa ta guyatá ghəŋa la Israʼila demdem, kaʼa nda həŋ mantsa: « Wya skwiha mnaf Yawe ŋa magay: 2Mkuʼ fitik ŋa maga slna. Ama baɗ mandəfáŋ ta nzakway ka Sabat, fitika mbiʼa vgha dar dar tsaya, nda fa ka ŋa Yawe. Inda mndu dzaʼa magaŋtá slna baɗ tsa fitik ya, dzaʼa dza dza lu. 3Ma vanagha kuni ta vu ma inda həgaha ghuni baɗ fitika Sabat, » kaʼa.
Hlaktá inda huzlaha ŋa Yawe
4Ka Musa nda guyatá ghəŋa inda la Israʼila mantsa: « Wya skwi mnaf Yawe, kaʼa na: 5“Hlaʼawa hla ta skwa ghuni ka mbəhu ŋa Yawe. Inda mndu nda fa ŋuɗufa ni, hlanakta ni ta mbəhu ta Yawe manda: Dasu, nda kfura tsedi, nda ghuva tili, 6nda sləvdzi ka kubwalkubwal, nda ya ka dva ghuz, nda ya ka dva ghəlez, nda liŋ kulefeɗ, nda swida gu, 7nda hutaha maŋazak dvap lu, nda hutaha ɗina ɗina, nda udza kwehi, 8nda rɗa zaytuŋ ŋa da pitirlaha, nda urdi ŋa laɓay nda rɗa fata ka ŋa Yawe, nda urdi zɗa ziʼakwa ni ŋa dray nda dra, 9nda palaka uniks, nda sanlaha ma palaha nda bla nda bla ŋa wirtsaptá ifut nda ya ta zliba ghuva”. »
10« “Ka sliʼakta inda gwal ta vivɗa mataba ghuni, ka maga həŋ ta inda skwi mnaf Yawe manda: 11Həga tumpul, nda tumpul nda skwa bukwanaghata, nda skwiha hdeuʼhdeuʼ, nda katakuha ni, nda həndilha ni, nda guguɗiha ni, nda tughuha ni, 12nda akwati nda sandlaŋha ni nda ya nda paɗuwa vla pla dmaku, nda zlala ŋa tanaptá huɗa ni, 13nda tabəl nda sandlaŋha ni, nda inda huzlaha ni, nda buradi ŋa fata ta kəma Yawe, 14nda pitirlaha nda inda huzlaha ni, nda vla tsatsaftá vu tida, nda rɗa pitirla, 15nda gwira dra urdi, nda sandlaŋha ni, nda rɗi ŋa fata ka ŋa Yawe, nda urdi zɗa ziʼakwa ni ŋa dray nda dra, nda laɓle wa tgha lami da həga tumpul, 16nda gwira pla ghəŋ ŋa dray tsuh tsuh, nda katsara ni ka ghuva tili, nda sandlaŋha ni, nda inda huzlaha ni tani, nda glifiŋ nda tughwa ni tani, 17nda wupayha ŋa wamtá daɓa həga tumpul, nda matalaha ni, nda tughuha ni, nda laɓle wa tgha lami da tsa daɓi ya, 18nda silikha həga tumpul, nda ŋa daɓa həga, nda tɓaŋha taŋ tani, 19nda lgutha rka gaf lu nda ga ŋa magihatá slna ma vli nda ghuɓa, nda lgutha nda ghuɓa ŋa Haruna mnda dra skwi ŋa Lazglafta, nda lgutha ŋa zwana ni ŋa maga slna dra skwi,” » kaʼa.
20Ka gazlatá inda guyatá ghəŋa la Israʼila ta kəma Musa. 21Ka hlaktá inda mndu ya ksaŋ tsi ta ŋuɗufa ni, nda mndu ya ya kuksanaf sulkuma ni ta mbəhu ŋa Yawe, ŋa baftá tumpula guyaku, nda ya ŋa maga slna ni, nda ya ŋa maga lgutha nda ghuɓa. 22Ka sliʼaktá zgwana, nda miʼaha tani, inda mndu ya kuksaŋ tsi ma ŋuɗufa ni, ka hladaghatá həŋ ta mbəhuha, ka zuzukwanaftá Yawe ta pelha, nda yeriha, nda halagarha, nda miziɗikwha, nda inda mndərga skwiha ka dasu. 23Ka hlagaghatá inda gwal ya mamu tsi da həŋ ta sləvdziha ka kubwalkubwal, nda ya ka dva ghuz, nda ya ka dva ghəlez, nda liŋ kulefeɗ, nda swida gu, nda hutaha maŋazak dvap lu, nda hutaha ɗina ɗina. 24Inda gwal si ta hlapta mbəhuha ka tsedi, nda ya ka ghuva tili, ka hlaktá həŋ ta mbəhuha taŋ ŋa Yawe. Inda gwal nda udza kwehi laviŋ lu ta klay ŋa maga slnaha ná, ka hlaktá həŋ ta ŋa taŋ. 25Ka vəvɗaftá inda miʼaha ta vivɗa nda dzva taŋ ta sləvdziha ka kubwalkubwal, nda ya ka dva ghuz, nda ya ka dva ghəlez, nda liŋ kulefeɗ, ka hlaktá həŋ ta ŋa taŋ. 26Ka gagaftá inda miʼaha ta viɗviɗ nda ɗifil da həŋ, gwal nda fa ŋuɗufa taŋ, ta swida gu. 27Ka kladaghatá la mali ta palaha uniks, nda palaha nda bla nda bla ŋa wirtsaptá ifut nda zliba ghuva, 28nda urdi, nda rɗa pitirla, nda rɗa fata ka ŋa Yawe, nda urdi zɗa ziʼakwa ni ŋa dray nda dra. 29Inda la Israʼila zgwana nda miʼaha, gwal nda fa ŋuɗufa taŋ ŋa vla skwi ŋa maga inda slnaha ya mnanaf Yawe ta Musa ná, ka hlagaghatá həŋ ta mbəhuha taŋ nda kumaŋta ŋuɗufa taŋ ka vlaŋtá Yawe.
30Ka Musa nda la Israʼila mantsa: « Nghawa ɓa, Yawe ta zbaptá Betsalʼel zwaŋa Uri, zigha Hur ma mndəra la Yahuda. 31Ka ndəghanaftá tsi nda sulkuma ni, ŋa nzakwa ni nda ɗifil, nda mahizl, nda snaŋtá skwi ŋa maga inda slnaha, 32ŋa snaŋta ni ta tva maga tsatsaftá skwiha nda dasu, nda kfura tsedi, nda ghuva tili, 33nda fiɗa palaha nda bla nda bla ŋa wirtsaptá skwi, nda fiɗa udzuha, nda ya ŋa snaŋta ni ta maga inda slnaha gwal ta vivɗa. 34Ka vlaŋtá tsi guli ta i Betsalʼel nda Uhuliyav zwaŋa Ahisamah ma mndəra la Daŋ ta mbrakwa snaŋtá tagha skwi ŋa sanlaha. 35Ka ndəghanaftá tsi ta həŋ nda ɗifila snaŋtá maga dər wati ma slna: Fifiɗaku, nda wiwirtsaku, nda gagaku nda sləvdziha ka kubwalkubwal, nda ya dva ghuz, nda ya ka dva ghəlez, nda ya ka liŋ kulefeɗ, nda ɗaɗahaku. Laviŋ lava həŋ ta maga inda slna vivɗa, nda wiwirtsaku.
Currently Selected:
Sab 35: xed
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
