Sab 33
33
Ŋləta a Yawe mataba mnduha wa
1Ka Yawe nda Musa mantsa: « Sliʼaf sliʼa hadna kagha kawadaga nda na mnduha hlagaf ka ta haɗika Masar na, ka ŋla kuni ŋa dzaʼa ta tsa haɗik waɗana yu ta i Abraham, nda Izak, nda Yakubu ya kazlay dzaʼa vlaŋ vla yu ta zivira taŋ kəʼa nda həŋ ya. 2Dzaʼa ghunaf ghuna yu ta duhwala ɗa ta kəma gha. Dzaʼa ghəzliŋ ghəzla yu ta la Kanʼana, nda la Amuru, nda la Het, nda la Periz, nda la Hiv, nda la Yəbus. 3Ka ŋla ka tsa haɗik ta mbəzaku uʼa nda zuɗum mida ya. Ama iʼi, ŋla a yu mataba ghuni wu, da zaɗaghunatá yu ta tvi, kabga mndəra gwal təŋ təŋa ghəŋa taŋ kuni, » kaʼa.
4Snaŋta mnduha ta tsa ghwaɗaka gwaɗa ya, rəɓ həŋ ma taw. Ka kwalaghutá həŋ ta kla huzla rka taŋ ta vgha, 5kabga ka Yawe si mnanatá Musa na: « Mnana mna ta la Israʼila: “Mndəra mnduha təŋ təŋa ghəŋa taŋ kuni. Ka má si dzaʼa ŋlay yu mataba ghuni katsi ná, gi hada hada má dzaʼa rwaghunata yu. Suɗiŋwa suɗa ta huzla rka ghuni, dzaʼa nda sna yu ta skwi ká yu dzaʼa magaghunata,”» kaʼa. 6Mantsa tama, daga ta ghwá Hwarev ka suɗatá la Israʼila ta huzla rka ta vgha taŋ.
Tumpula guyaku
7Ma inda fata la Israʼila ta ghuɓa taŋ ya ná, ta klaf kla Musa ta tumpul ka laghwi da dzagwata ta hula ghuɓu diʼiŋ nda ghuɓu. Ka hgə tsi ka tumpula guyaku. Inda gwal ta zba snaŋtá ndana Yawe ya ná, ta sab sa həŋ ma ghuɓu, ka dzaʼa təv tsa tumpula guyaku ta hula ghuɓu ya. 8Inda saba Musa ka dzaʼa təv tsa tumpul ya ná, sliʼafta inda mndu ta wa tgha tumpula ni, ka sladata nda slada, ka ngha dzaʼa Musa ha ka lama ni da tsa tumpul ya. 9Inda lama Musa da tsa tumpul ya, ta sa sa kusay sundul nzuŋta ta wa tgha tsa tumpul ya ta gwaɗ Yawe ta gwaɗa nda Musa. 10Na nghaŋta inda mnduha ta tsa sundula kusay ta nzuŋta ta wa tgha tsa tumpul ya, zlambata inda mndu zluzlumbruh, dər wa ta wa tgha tumpula ni. 11Mantsa tama, ka gwaɗ Yawe ta gwaɗa nda Musa kuma nda kuma manda ya ta gwaɗ mndu ta gwaɗa nda gra ni. Tahula tsa, ŋa vraghuta Musa da ghuɓu, ama slufa ni Yəhusuwa ka galaɓay, zwaŋa Nuŋ ya haɗ ta zlaŋta nzatá ma tsa tumpul ya wa.
Ghwa yiva Yawe nda Musa
12Ka Musa nda Yawe mantsa: « Sudi, ka ka nda iʼi na: “Hladaf hla ta na mnduha na,” ka ka, ama mniha a ka ta na mndu dzaʼa ghunafta ka ŋa katihata na wa. Wya guli kagha ta mnihata: “Nda sna yu ta kagha nda hga gha tani, zɗəgiha zɗa ka guli,” ka ka nda iʼi. 13Ndanana, kdəkkdək, ka si zɗəgagha zɗa yu ya, mariha mara ta nzakwa gha, kada snaŋta yu ta kagha dar, ŋa mutsafta ɗa ta zɗakatahuɗa gha. Ma zanap ka guli kazlay mndəra na mnduha na ná, mnduha gha ya kəʼa, » kaʼa. 14Ka Yawe mantsa: « Ta dzaʼa htsiŋa vərɗa iʼi kawadaga nda kagha, haɗ skwi ŋa ndanay gha ta ghəŋa ni wu, » kaʼa. 15Ka Musa nda tsi guli mantsa: « Ka si la a vərɗa htsiŋa kagha kawadaga nda aŋni wu katsi, ma sliʼaŋnaf ka hadna. 16Ka si la a vərɗa htsiŋa kagha mista ŋni wu, ta wu dzaʼa grafta lu kazlay zɗəgagha zɗa mnduha gha, nda iʼi tani kəʼa na? Mbaɗay gha ta mbaɗa kawadaga nda aŋni, dzaʼa klə ŋni ka nzakway tsəkəm nda hamata inda sanlaha ma mnduha ta haɗik, » kaʼa. 17Ka Yawe nda Musa mantsa: « Dzaʼa magay yu manda va tsa mna ka ya, kabga zɗəgiha zɗa ka, nda sna yu ta kagha, nda hga gha tani, » kaʼa.
18Ka Musa mantsa: « Kdəkkdək, mariɗiŋ mara ta glakwa gha, » kaʼa. 19Ka Yawe mantsa: « Dzaʼa lab la yu ta kəma gha, ŋa maraghaŋta ɗa ta inda zɗakwa ɗa, dzaʼa mnigiŋ mna yu ta hga ɗa ka “Yawe.” Dzaʼa zɗanaŋ zɗa yu ta huɗi ta mndu ta kum yu ta zɗanaŋta huɗi. Dzaʼa tawa tawa yu ta hiɗahiɗa ta mndu, ya ta kum yu ta tawata hiɗahiɗa tida. 20Ama haɗ ka dzaʼa laviŋta nghaŋtá kuma ɗa wu, kabga laviŋ a mnda səla ta nghaŋtá iʼi ka nzata ni nda hafu wu, » kaʼa. 21Ka Yawe guli mantsa: « Wana vli ndusa ta vata iʼi, ka sladafta ka ta pala. 22Ta lab yu nda maraŋtá glakwa ɗa ya ná, dzaʼa ɗifagha ɗifa yu ma guɗukwa pala, ka bukwaghata ɗa nda dzva ɗa ha ka laba ɗa. 23Dzaʼa klaghu kla yu ta dzva ɗa, ŋa nghidiɗista gha nda ga mahulhula ɗa, ama kuma ɗa ya ná, nghaŋta a lu wu, » kaʼa.
Currently Selected:
Sab 33: xed
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
