Sab 32
32
Mamakwa sla ka dasu
1Ka nghə la Israʼila ná, nda gərɗa Musa ta saha ta ghwá. Ka tskavata həŋ ta vata Haruna. Ka həŋ nda tsi mantsa: « Sliʼaf sliʼa ka magaŋnaf maga ta lazglaftaha dzaʼa kla aŋni, kabga sna a ŋni ta skwi ta slanaghatá nana Musa, mndu ta hlagaŋnapta ma haɗika Masar na wu, » ka həŋ. 2Ka Haruna nda həŋ mantsa: « Tsahagapwa tsaha ta yeriha ka dasu ma sləməŋa miʼa ghuni, nda zwana zgwana ghuni nda kwagha ghuni, ka hliɗikta kuni, » kaʼa. 3Ka tsahagaptá inda mnduha ta yeriha ka dasu ma sləməŋha taŋ, ka hlədanaghatá Haruna. 4Ka zlghaghuta tsi da həŋ, ka pghamtá tsa dasu ya ma ghəzla ka nwapta, ka tsaftá mamakwa sla. Tahula tsa, ka həŋ mantsa: « Israʼila, wana lazglaftaha gha ta hlagaghunafta ma haɗika Masar! » ka həŋ. 5Nghanata Haruna ta tsaya, ka baftá tsi ta gwir ta kəma tsa mamakwa sla ya, kaʼa gugɗatá mantsa: « Mamu skalu mahtsim ŋa vlaŋtá glaku ta Yawe, » kaʼa. 6Ga mahtsima ni, ka sliʼaftá mnduha wrək tgha, ka lagha da vlatá skwa pla ghəŋ ŋa dray tsuh tsuh, nda ya ŋa pla ghəŋa zɗaku. Ka nzatá mnduha ka za skwi, ka sa skwi. Ka sliʼaftá həŋ ka dza baslabasla.
7Ka Yawe nda Musa mantsa: « Sliʼaf sliʼa ka vala ka misimmisim, kabga nda ziʼa tsa mnduha gha hlagap ka ma Masar ya. 8Gi misimmisim, zluŋ zla həŋ ta tvi ya mnanaf yu ta həŋ. Ka slraftá həŋ ta mamakwa sla ŋa ghəŋa taŋ nda kfur nwap lu, ka tsəlɓu ta kəma ni, ka pla ghəŋ ŋa ni. Ka həŋ mantsa: “Israʼila, wana lazglaftaha gha ta hlagaghunapta ma haɗika masar,” ka həŋ. » 9Ka Yawe nda Musa mantsa: « Ta nghə yu ta na mnduha na ná, mnduha təŋ təŋa ghəŋa taŋ ya. 10Ndanana ná, zliha zla, nda gufa ŋuɗufa ɗa, dzaʼa zaɗanatá həŋ yu. Tahula tsa, dzaʼa yanaf ya yu ta mnduha gha da manaka taŋ, » kaʼa.
11Ka zbə Musa ta lɓanatá ŋuɗuf ta Yawe, Lazglafta ni, kaʼa mantsa: « Ari Yawe! kagha ta hlagaptá həŋ ma haɗika Masar nda glakwa mbrakwa dzva gha ta fərtuta. Ndanana ná, nda gufa ŋuɗufa gha ta ghəŋa mnduha gha, kabgawu na? 12Ka mantsa ká ka magata katsi, ka la Masar dzaʼazlay na: “Ta sidi Yawe, tsaya kəl tsi ka hlaptá la Israʼila ma haɗika mu, ŋa rwanatá həŋ ta ghwáha, ka zaɗanatá həŋ ta ghəŋa haɗik,” ka həŋ dzaʼazlay. Vrana vra ta gufatá ŋuɗufa gha, zlana zla ta maga tsa ghwaɗaka skwi ta kum ka ta maganatá mnduha gha ya. 13Havap hava ka kwalvaha gha i Abraham, nda Izak, nda Israʼila, waɗana ka ta həŋ kahwathwata ya. Ka ka nda həŋ na: “Dzaʼa yanaf ya yu ta hulfa ghuni tusak manda tekwatsaha ta luwa. Dzaʼa vlaŋ vla yu ta hulfa ghuni ta inda na haɗik mnə yu na, ŋa nzakwa ni ka ŋa taŋ ŋa ɗekɗek,” ka ka, » kaʼa. 14Mantsa tama, ka zlanatá Yawe ta tsa ghwaɗaka skwi si ta kum tsi ta maganatá mnduha ni ya.
15Ka mbəɗavatá Musa ka saha ta ghwá, nda ŋatá tsa klamha dzratá wi his ya nda dzva ni. Ta tsa klamha ya, nda vinda gwaɗa ta slərpuha ni his his. 16Tsa klamha ya ná, magatá slna Lazglafta ya. Tsa vindi ya guli ná, Lazglafta ta tahafta ta tsa klamha ya. 17Ka snaŋtá Yəhusuwa ta hlawa mnduha. Kaʼa nda Musa mantsa: « Mamu hlawa vulu ma ghuɓu, » kaʼa.
18Ka Musa mantsa:
« Hlawa zata ghwa a wu,
hlawa ŋawatá mnduha a guli wa,
ama hlawa fa laha ya ta snə iʼi, » kaʼa.
19Na ɓhadaghata Musa ndusa nda ghuɓu, ka nghaŋtá tsi ta tsa mamakwa sla ya, nda mnduha ta skalu. Huf saf sa ŋuɗufa Musa, ka slanatá tsi ta tsa klamha ma dzva ni ya, ka dzaɓiŋta mista ghwá. 20Ka klaftá tsi ta tsa mamakwa sla si magaf həŋ ya ka driŋta nda vu, ka huʼapta kəzlitit. Ka dzaftá ta imi, ka sasunustá la Israʼila.
21Ka Musa nda Haruna mantsa: « Nya maga gha na mnduha na kəl ka ka klanaktá həŋ da mghama dmaku manda na na? » kaʼa. 22Ka Haruna mantsa: « Kdəkkdək, ma gufaf ŋuɗufa gha mghama ɗa! Nda sna vərɗa kagha ya ká na mnduha na ta gi hwaya da maga ghwaɗaka skwi. 23Ka həŋ nda iʼi na: “Magaŋnaf maga ta lazglaftaha dzaʼa kla aŋni, kabga sna a ŋni ta skwi ta slanaghatá nana Musa, mndu ta hlagaŋnapta ma haɗika Masar na wu,” ka həŋ nda iʼi. 24Ka iʼi nda həŋ tama mantsa: “Inda gwal nda dasu da həŋ ka hla hla həŋ,” ka yu. Ka hlatá həŋ ka vlihata. Ka pghamtá yu ma vu, ka gi sap tsi ka na mamakwa sla na! » kaʼa.
25Ka nghadaptá Musa ná, kusaɓat mnduha, zlanaŋ zla Haruna ta tvi ta həŋ ŋa maga skwi kusaɓat manda ya kumaŋ həŋ. Tsaya ná, zlanaŋ zla həŋ ta tvi ta ghumaha ŋa ghuɓasa həŋ. 26Ka sladata Musa ta wa tgha lami da ghuɓu. Kaʼa mantsa: « Ka i wa ta nzakway ka ŋa Yawe ya, ka sawi həŋ ta vata iʼi! » kaʼa. Ka lagha inda mndəra la Levi tskavata ta vata ni. 27Kaʼa nda həŋ mantsa: « Wya ka Yawe, Lazglafta la Israʼila: “Inda dər wa tsi ma kaghuni, ka faf fa tsi ta kafaya ni ta tatay, lawa la ka ranafta kuni, rəglanaf kuni ta inda vli ma ghuɓu. Ka dzata dər wa tsi ma kaghuni ta dər zwaŋama ni, dər gra ni, dər sləvda ni a tsi guli,” » kaʼa. 28Ka magatá mndəra Levi manda va ya mnana Musa ta həŋ. Baɗ tsa fitik ya, ka rwanatá lu mataba mnduha ta mnduha ta klafta dəmbuʼ hkən. 29Ka Musa mantsa: « Nda fa kuni ŋa maga slna Yawe gita, kabga dzutskwaŋ a dər wa ma kaghuni ta dzata dər zwaŋa ni, dər zwaŋama ni wa. Tsaya kəl tsi ka vlaghunatá tfa wi gita, » kaʼa.
Ndəɓay Musa ta dzvu da Yawe
30Ga mahtsima ni, ka Musa nda mnduha mantsa: « Gaga kuni ta mghama dmaku. Ndanana, ka ŋla yu da Yawe, dzaʼa mutsay yu kasiʼi ta plighunista ni ta dmakwa ghuni, » kaʼa. 31Ka vradaftá Musa slanaghatá Yawe. Kaʼa mantsa: « Ay kakaɗawna! Maga maga tsa mnduha ya ta mghama dmaku. Tsaf tsa həŋ ŋa ghəŋa taŋ ta lazglaftaha ka dasu. 32Ama kdəkkdək, plana pla ta dmakwa taŋ. Ka mantsa a tsi wu, hərɗiŋ hərɗa ta hga ɗa ya vindam ka ma ɗelewera gha, » kaʼa. 33Ka Yawe nda Musa mantsa: « Dər wati ma mndu ta giha ta dmaku ya, tsa mndu ya dzaʼa hərɗiŋta yu ta hga ni ma ɗelewera ɗa. 34Ndanana, la! ka kla ka ta tsa mnduha ya da vli ya mna gha yu. Duhwala ɗa dzaʼa kla kagha. Ama baɗ sagha fitika tsay ɗa ta guma, dzaʼa tsanagha tsa yu ta guma ta həŋ ta ghəŋa dmakwa taŋ, » kaʼa. 35Ka dzuŋtá Yawe ta la Israʼila ta ghəŋa vəl tsafta taŋ ta mamakwa sla ya tsaf Haruna.
Currently Selected:
Sab 32: xed
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
