Ding Kasebian 8
8
Ing Kapurian king Kabiasnan
1 # Kas 1:20, 21. E wari mamaus ing kabiasnan
at ing beluan#8:1 King Hebreo: pamanalastas. anti naman?
2Makayabat ya karing matas a lugal lele dalan,
at karing mikurus a dalan.
3Atyu karin king piluluban king siudad,
karing lele pasbul dalan.
Nganang mamaus:
4Ausan da ka kapanamdaman, O taung melalang,
mamaus ku king balang tau ning mabilug a yatu.
5Ikong mangmang, kabiasnan kekong pagaralan,
at pakaisipan.
6Makiramdam kayu, uling magsalita kung bage maulaga;
karing labi ku lumual ing katutuan.
7Ing kakung sabian katutuan,
uling masusumami ku king kalaraman.
8Ing sablang kakung sabian makatuliran;
ala kang akit a pamangabiran.
9Masala la king taung ating aintindian,
at malino la king taung ating kabiasnan.
10Ipaygit yu king pilak ing kakung tuturu;
pilinan yu ing kabiasnan kesa king purung gintu.
11 # Sir 24:1-22. Uling ing kabiasnan maygit ya karing alahas a mangamal;
ala yang kalupa king nanumang kekang pagnasan.
12Aku ing Kabiasnan; atyu kaku ing bage aintindian,
atin kung beluan at masalese kapasyahan.
13Ing takut king Ginu ya ing pikasaman ing e ustu;
kakung kasaman ing ketasan at ing kapalaluan,
ing ugaling e mayap at kalaraman.
14Kaku ing mayap a kaisipan at ing tune agyu kung daptan,
atin kung beluan at sikanan.
15King uli ku ding ari atyu la king tronu,
at pamuntuk patupad dang kautusan a makatuliran.
16King uli ku pamuntuk makapamahala la,
at pati na detang marangal a tau ning yatu.
17Kaluguran ku la detang malugud kaku,
at ding manintun kaku akit da ku.
18Atyu kaku ing pibandian at dangalan,
pati ing e kukupas a pibandian at kanawan.
19Ing kaku akua yu maygit ya king gintung puru
at king pilak a puru.
20Lalakad ku king dalan ning kabanalan;
kaku lang tutukian ding tuntunan ning katuliran.
21Karetang malugud kaku dinan kong pibandian
pati na ding karelang tuknangan.
22 # Sir 1:4, 9; Kap 3:14. Karing sablang lelang ning Ginu aku ing minuna,
king sablang depat na kanitang milabas a panaun aku ing mumuna.
23Melalang na ku bayu linto ing sabla,
kanitang ing yatu e ya pa megawa.
24Atyu na ku bayu ya linto ing dagat;
kanitang ala la pang danum ding sibul.
25Atyu na ku bayu la linto ding bunduk, at ding bunduk-bundukan,
26bayu ne lelang ning Dios ing yatu,
at ding marangle o ing gabun ning yatu.
27 # Kab 9:9; Sir 24:3-6. Atyu na ku kanitang lelang ne ing banua king ngeni kabilian na,
kanitang lidlad ne ing balamu suklub babo ning danuman,
28kanitang binili no ding biga king banua,
kanitang ding sibul ning dagat biklat na la,
29at kanitang inutus na king danum ning dagat
king e la mitatas lagpus king sinabi na,
at inyang ding pundasyun ning yatu telakad na la.
30Atyu ku siping na anting maestro de obra,
aldo-aldo aku ing tula na;
king arapan na parating masaya;
31matula ya king yatu
at maligaya karing anak da ring tau.
32 # Sir 14:20-27. Ngeni, kakung anak, makiramdam kayu kaku,
daptan yu ing sasabian ku at magtagumpe kayu.
33Makiramdam kayu at magpakabiasa
at e kayu magpabaya.
34Tumula ya ing taung kaku makiramdam,
itang aldo-aldo manaya karing kakung pasbul dalan;
itang manatiling king pasbul mibuklatanan.
35Itang kaku makatuklas, bie ing atagpuan na,
at king Ginu tanggap yang kaligayan.
36Oneng ing taung kaku e makatuklas, ing sarili na yang panasakitan na;
detang kaku mimimua, ing kamatayan ya ing kaburian da.
Currently Selected:
Ding Kasebian 8: PmPV
Highlight
Copy
Compare
Share
Want to have your highlights saved across all your devices? Sign up or sign in
Philippine Bible Society New Testament © 1981, Bible © 1994
