MARK TAKKIRA
TAKKIRA
Ɓiiriɗ ni Mark. Li ka ni hu basara 68. Sok boyna, Kristu ni sa sunda.
Sa ma ɓii Boy ma Ayra ma mbana ni Mark, Mark yi Yesu ana sa sunda. Mark sem ma geleɗta ana Jaŋ, nam vuɗ ni hu Yerusalem, sum yaɗ ana Mari (Sunda 12.12). Dlara vi bumba uɗ ka ii saɗi, ay fi sem Mark ka hu Boy ma Ayraɗi (Mark 14.51, 52 ɓak kay Mark kala), fammi hu magaara Sunda vi Suu Vovoɗta, u magaara Paul ɓiiriɗ zeɗ zeɗta doy hol.
Mark poy u goŋ ndusumma Barnabas u Paul hu koy masira jewra, tew ay ta ta Perg. Nam hinisi haa, hoŋ ay Yerusalem, boy ma nam hinisi haa hoŋ kamma ay ka wambi (Sunda 13.13). Ŋgoo dagan Paul hinim kiyo, Barnabas tayam um tuɗ Sipre (Sunda 15.38-40). Ŋgoo dagan Mark hin hoŋ ay eg Paul (Kol. 4.10; Fim. 24). Hu li ma Paul hin tok a asi hin cam kira ni Paul yi Mark ha egemu (2 Tim. 4.11). Piyer yi Mark ana goromma 1 Piy. 5.13. Boy ma Ayra vi Mark tak kay dira Piyer di ki kay Yesura. Ni saara di ki jew kay tin ura vi suu vina.
Boy ma Ayra vi Mark geɗeŋe ni nam tak tlena ki su Matiye u Luk, nam tak ki kay sa ma fulina lamma ay Gerasenna (Mark 5.1-20). Mark ɓii boy namma ni maŋ suu Romma. Nam di ana Kristu ni sa sunda vi Lona ma sunum ay a faɗam vun sun mamba kina. Magaa mamba ɓak ŋgolla kay sunda vi Yesu su boyna, nam ka njaɗ boyna vi Yesu fiyek cocoɗi, ndal boyna ka hu ŋgolɗi lay. Boy ma nam dam ana «cecem gaw nina» ka ndi kaŋga funumbi.
Sunda vi Lona Kristu faɗ ki ni vun boy ma di ay ki kay Sa Lona Fuurumma ma di ay ki hu Galamba Basira na (Ezayi 42.1-21; 49.1-7; 50.4-11; 52.13—53.12; Zakari 3.8).
Kay Mark tak Yesu ko sa sunda na, nam ɓak ka kay sem somoyoŋ Yesuɗi. Boy ma nam damma tak saara vi Bu Suuna ki su Boy ma Ayra ma daŋŋa (Mark 3.5; 7.34; 10.21). Mark tak Kristu ki ana nammi sa sunda, sun mamba nam laɗta tak saɓak ana nammi Goŋ Lonna.
Magaara ndak a ɓorow ko wanni na
1. Takkira vi sunda hu sun mamba duk suuna l. 1-13
2. Sunda sa sunda laɗta 1.14—13.37
3. Sa sunda hum vun Bum ta ta miɗ mamma 14—15
4. Sa sunda su kay miɗna u paɗta kolo iirira u kalla huulonara 16
Currently Selected:
MARK TAKKIRA: BMS
Highlight
Share
Copy
Want to have your highlights saved across all your devices? Sign up or sign in
Bible Moussey © Bible Society of Chad, 2002.