HEBRENA 13
13
Li dla mayra jivi ii Lonara
1Minigi tagiya kay agi ni gorse tagi hu Kristu. 2Lagi suu mba varagina jiviya, ko suu daŋŋa li suu sunda huulona jivi bay wasi ana ni asiya. 3Saaragi kay suu daŋgayna ko agi ay hu daŋgayna u asi na may. Saaragi kay suu suuna lasasina, ko agi tagira las ni agi na may.
4Suuna halaŋ gol ɗum masira jiviya, njufna u cara kak jivi eg tasiya. Lona hin mba kaɓakŋa kay suu li dlara yowna u suu li zoŋga.
5Hin saara vi begera a su kagiɗi, furiyugi u va ma ka kogina, kay Lona di ana «An ka hiniŋ kiɗi, ka noyoŋ kiɗi lay.» 6Kay ndaɗta ay ndak di bay ndaana ana,
«Bu Suuna ni sa ma njununna,
an ka li ndaa vaɗi,
sana ndak a lan nanage?»
7Humugi maa ki kay suu ŋgolo suu fokogi suu dagi Boy Lonana ay jewnaɗi. Saaragi kay poy masira jivira u miɗ masina lay, vi u Lona ko asi lira na may. 8Yesu Kristu ni ko kaa na lay, karam lay ha fok na gak gak. 9Viɗigi tagi ki u gaɗta daŋga vi suuna zeɗ zeɗtaɗi. A jivira ni sooygi huruygi u oora vi Lona, ka u gaɗta kay tlesuu tiraɗi, suu njun tasi u gaɗ ndaɗtana ka fi va huɗi.
10Muli suu li ɓivunna hu mbutluɓma vi suu Juifna ka ndak a ti funa hu givin ma togolla maynaɗi. 11Mul ŋgol ma li ɓivunna vi suu Juifna tli busuna kom tani kal u nam hu Li ma ki Saɓaki Teteɗna, a li a ɓivun ma yow cora kina, tliw yoori asina ŋgalasi ha ki ŋgoo doŋ kaana. 12Kay ndaɗta Yesu miɗ ha doŋ kaana hu ɦoŋzi ma ŋgolna a mbus suuna ki teteɗ u busuumu. 13Ay tuɗuygi doŋ kaana a siɓ panna ko namma may. 14Kay ziiygi ma kaŋga tani wanna ka eŋ cocoɗi, ay halaygi ni zi ma fokŋa. 15Geleɗeygi Lona tew tew ni ko ɓivunna u Yesu Kristu na, ni di ana geleɗem u vunuy tew tew. 16Humugi maa kay a li jiviraɗi, njunugi u tagiya, ni ɓivun ma ii Lona jivina.
17Humugi u suu fokogina, hoŋ yagi kaŋga usiya, kay asi ka saa kay ŋgus magira tew tew, lini agi hum usiya ni asi ka joɓ Lona kagiya. Asi hin li sun masira ni u furira may, li ka naɗi ni asi li sun masira ni u yoora, ni agi ka fi va huɗi may.
18Cenegi Lona kami tew tew, ami wi ana ami ka u saara jivira, ami min ana poy mamira mba li ɗegee hu tlena halaŋ. 19An joɓogi ni kay agi cen Lona kanu, nam malan voɗta an hoŋ ha egegi zak.
Cenda
20Lona col Bu Suuna Yesu iiri ki duk suu miɗina, nammi sa ŋgol ma taa yoona, bana mayra didinda faɗ ki ni u miɗ mamma. U saɓakŋa vi busuna vi ɓivun mamma nam mi galamba ka daɓ kiɗira. 21Ko Lona ma heɓpa ɦagi saɓakŋa a li u tlesuu jivina halaŋ kay agi lam min mamba, ta nam laygira huruygi u Yesu Kristu ni dlara irim jivira. Ŋgolla maŋ Yesu Kristu a fafatɗa. Amin.
Boy ma daɓ daganna u gi deɓpa
22Gorsenna an cenegiya, boy ma soogi hurugina wanni agi humum u lalamba, kay boy ma an ɓiirigina hu magaara wanna ka ŋgolɗi. 23An dagi ha ni kay wayagina Timote asi gam ay kiwa, lini nam mba zaki ni ami hin tuɗ ha gologi u tamiya.
24Gi deɓ maŋ suu ŋgolo suu fokogina u suu vi Lonna halaŋ. Gorsegi suu ka hu Italina gagi deɓpa.
25Ko oora kak u agi halaŋ.
Currently Selected:
HEBRENA 13: BMS
Highlight
Copy
Compare
Share
Want to have your highlights saved across all your devices? Sign up or sign in
Bible Moussey © Bible Society of Chad, 2002.
