2 KORINTNA 2

1An saa ana an ka tuɗ ha varagi a mbuɗugi yoo oloɗi. 2Lini an mbuɗugi yoora ni sa ma hin mbuɗun hurun furira ni gege? Ni nam sa ma mbuɗun a yoorona. 3Ni kay ndaɗta an ɓiirigi ha ni ko an lira na. An ka tuɗ ha varagiɗi kay suu a furiyun gin hurunna a mbuɗun yoora ni asi tok. An wi kan ana an li ka furiya ni agi lay furi may. 4An ɓiirigi magaara ha wanni hurun haɗ hurun u tiina u simina irinu, ni ka ana a mbuɗugi ni yoora naɗi, kay agi wi ki ana an ka minigiya.

Heɓ hurugi eg sa ma lagi cora

5Lini sana fi dlara yoora wani mbuɗum yoora ni ka anɗi, ni agi halaŋ kay ka a kalaɗ ki saɓakiɗira ni suu ɦiw dukugiya. 6Kay sa namma ŋgolla vi suuna mba tok vunusi kaam ɓakŋa kamu. 7Kay ndaɗta agi ndak a heɓ hurugi ki egemu, gaɗamu, kay ka a mbaaram dlara yoora egem su naɗira wanni agi mba ɗilim irimu. 8An dagiya agi lagi egem wa na ni tak ana agi minimu. 9Gola ni dlara an ɓiirigi magaara ha kaɗta, kay an gologi goliya, kay a wi ana agi ka hum u haɗ manda wan su? 10Sa agi heɓ hurugi ki egemma an hurun ni heɓi may. Lini an heɓ hurun ki wa eg saani ko an hin va ma namma ki wa, ni an li dla ndaɗta ni kagi fok Kristu. 11Ka a hin Satanna su kaygiɗira wanni, kay dlaamba ka iriygi viɗiɗi.

Pol tam lam ndaana hu Troas

12Hu li ma an tew Troas a di Boy ma Ayra vi Kristu, u oora vi Bu Suuna an fi voɗta a li sunda. 13Hu li namma an mbuɗ ndaana ŋgolo kay an fi wayayna Tit kaɗi. Kay ndaɗta an gi deɓpa maŋ suu Troasna ka sini, hinisi tuɗ Masedoin.

Saɓakŋa hu Yesu Kristu

14Gagi deɓ Lona ma ɦaygi saɓakŋa ay tew tew kay taɓ mayra duk tay u Kristura. Nam li sunda u aya kay tak Kristu ki hu lina aragelay, ko mbul ma hisna his hu lina halaŋga na. 15Ami ni ko his ma jivi ma Kristu ɦam maŋ Lonna na, ami ni maŋ suu ka hu voɗta suɗta, u suu ba kina lay. 16Kay suu ba kina ni his ma miɗna, ma ɦal miɗna lay. Kay suu ka hu voɗta suɗta, ni his ma iirina ma ɦal iirira lay. Sa ma ndak a li sunda ndaɗta ni gege? 17Ami ka ko suu may suu li paara u Boy Lonana naɗi, ni na ɗow Lona sunumi a di gasira ki fokomu ko suu sunda vi Kristu na.

Currently Selected:

2 KORINTNA 2: BMS

Highlight

Copy