Jon 1
1
Iesu Neni Lavapaase
1Ganoxa at lereot lavapaase mo gara nemen pam; la neni gak lox eburu mi ne Moroa, la neni ga epovo mun mi ne Moroa. 2Boro xa at lereot, lavapaase gak lox eburu mi ne Moroa.
3Keneng teren ne Moroa ga rudum li levempanga axap; la kopmen tepanga at nai luruntudum li, gita ravasu boro at tara vetpes. 4Ga lavapaase neni lavasuun at lorooro, la na lorooro ga raba laxasep ti limixin. 5La laxasep i soosoo ri limixin at lamain la mo limixin kopmen di goxo lox epovo i do gita lox asi i.
Lovotpot At Ne Jon Laradi Sep Susu
6Moroa ga riki laradi vapaase ren, laasen teren ne Jon. 7Ga vot kusu na paase ri limixin mumu nom laxasep, kusu nedi diba ronga i la dina nuunu at laxasep. 8Neni xa xopmen mo laxasep; neni ga vot mun kusu na tong asu levelinga ap mo laxasep. 9Anai ni laxasep tuturun, laxasep ga si ude at na lavatbung menemen la ik lox asuusu laxasep ti limixin axap.
10Ni ga nemen at na lavatbung menemen, ketla limixin di goxo ven kibis i, keke do neni ga rudum li lempanga axap. 11Neni gat pas uto at lubungmixin teren, ketla limixin axa ren di goxo siam ka i. 12Ketla nedi diga siam ka i la diga nuunu ren, ni ga lok li nedi ngan tinotno luvutnitna ne Moroa. 13Di goxo ravasu ngan luvutnitna ne Moroa at loklok at na lavatbung menemen, i ngan ta do laxamdak mi laxaalik at lenasun, kopla at lavavara at latlok, kopmen; ne Moroa xa, neni ne Temen di.
14Lavapaase ga vee radi la ga nemen kantubu atnama. Maga ven lisisixam teren, la ni ga umsu mi letaba nabalamu la levelinga ruturun at ne Moroa. La mo lisisixam neni ga lok ka i ngan legesamdak at ne Temen.
15Jon ga vavang min la ga xup lolos ti limixin keretna, “Neni na laradi nenia aga paase alii mumu i. Aga vaase xeretna, ‘Laradi mo naba vot melemu rak, neni i silok aleng tia, mila neni ga rooro avot tia.” 16Letaba nabalamu ren i silok aleng tidik, la kerepmo neni ira lox anarong nedik, la iram taba amisik dik mi nom leveloklox anarong. 17Moroa ga raba avolo ne Moses mi Lenavolo; ketla letaba nabalamu at ne Moroa mi levelinga ruturun ga ravasu at ne Iesu Karisito. 18Tara goxovisi ven ne Moroa. Ne Nitna xusuk mun, neni i epovo mi ne Moroa, neni it kis esogo mi ne Temen la neni xa ga paase axasep dik mi ne Moroa.
Levesusue Mumu Ne Jon Mi Lugugu Ren
(Mt 3:1-12; Mk 1:1-8; Lu 3:1-18)
19Limixin amgomgo ro Jerusalem diga riki aonon lentaba lavamaasa la lentaba luvuttadi gugu at loogu laplavang#1:19 Na luvuttadi, nedi at libibinat at ne Levi la diga lok tooro lavamaasa ro xeneng at loogu laplavang. uto ri ne Jon la diga sue i do, “Nenu nege?” 20Jon goxo ronga xape di xusu neni gi toxo vorang lususue atdi, ketla neni ga vaase axasep di xusu diba xasep. Ni ga vaase xeretna, “Nenia xopmen Lanarong.”
21La diga sue manga i, “Nenu nege? Kereva, nenu mo leeme vapaase alii megano, ne Elaisa?”
Jon ga vorang i ridi xeretna, “Nenia xopmen.”
La diga sue manga i xeretna, “Kereva, nenu leeme vapaase alii, ne Moroa ga xaape min at levelinga at ne Moses?”
La ni ga vorang i ridi xeretna, “Kopmen.”
22Melemu rinotno diga sue i, “Una tong i rinama do nenu nege; ma vara i do maba lok ka tovoporang at na lususue uto atnedi limixin amgomgo diga riki nama. Una tong i do nenu nege.”
23Jon ga vorang i ridi mi levelinga at leeme vapaase alii ne Aisaia, ni ga lok keretna,
‘Nenia mo lara ip kup to at lamatbin keretna, mina lox akmokso langas ti Leeme Silok.’ Ais 40:3
24La lentaba lubung Parisi, luvuttadi amgomgo diga riki di, diga vot pasa ne Jon. 25Diga sue i xeretna, “Do nenu xopmen Lanarong, kopla ne Elaisa, kopla mo leeme vapaase alii, la tila u sep susu limixin?”
26Jon ga vorang i ridi xeretna, “A sep susu limixin mi ladan mun; kantubu atnimi laradi mo i tu, nemi xopmen minaklen i. 27Neni mo naba vot melemu rak, ketla nenia axo epovo xusu ana soxomus luvanga vatpas teren mila i silok aleng tia.”#1:27 Anai ni lavapaase poovo ri lox asuusu i do ne Jon ga lox asu langsangan loklok ngangao ren ti ne Iesu.
28Ana levempanga ga ravasu ro Beteni, to at lara lenep dan Joridan, ne Jon ga sep susu limixin e.
Lanasip At Ne Moroa
29Ap mo manga lara laaleng Jon ga ven ne Iesu gat pas go boro, la ni ga vaase xeretna, “Pen ba i, ni nom Lanasip at ne Moroa naba doxoma xepe laxakapmek at limixin at na lavatbung menemen kopok. 30Neni na laradi nenia aga paase min tinemi, la aga vaase do, “Laradi mo naba vot melemu rak, neni i silok aleng tia, mila neni ga rooro avot tia. 31Gano a goxoklen i do neni nege, ketla nenia aga vot de ngan laradi sep susu mene mi ladan kusu ri lox asuvos i ri leme Israel.”
32La ne Jon ga tong asu lavapaase axasep keretna, “Aga ven Loroonan Kaala ga rava si boro vana at laxalibet la gasga i, ga lok ngan lamno. 33Nia xovisi goxoklen i, ketla ne Moroa ga riki ia xusu anap sep susu limixin mi ladan la neni ga lok tia xeretna, ‘Uba ven Loroonan Kaala naba si boro vana la nasga taradi; neni mo laradi naba sep susu limixin mi Loroonan Kaala.’ 34Agara ven pam i la a tong i rinimi do neni ne Nitna ne Moroa.”
Luvuttadi Loklok Ka Anasa At Ne Iesu
35Ap mo manga lara laaleng melemu Jon ga nemen manga ro saparap ladan sen Joridan eburu mi legepu radi loklok ka anasa ren. 36At loxonaleng neni ga ven ne Iesu gat pas aurer i, la neni ga lok keretna, “Pen ba i. Neni na, lanasip at ne Moroa.”
37Mo laradi loklok ka anasa ren duga ronga na levelinga la duga emu eburu nga mi ne Iesu. 38Iesu ga rem gili la ga ven du, duga mumu asu i, la ga sue du, “Kereva mo?”
Duga vorang i rin keretna, “Rabai. Loogu ram ua?” (Lavasuun at loxolinga Rabai do, leeme loklox ase.)
39La ne Iesu ga lok, “Uto dik ata ven i.” Kuren la duga emu min la duga ven lenep neni gak lok teren; la duga nemen go ap mo laaleng axap eburu min, ga se at lavanuet konaleng ga ukantinao.
40Endru, neton ne Simon Pita, neni lara atdu ga ronga mo levelinga at ne Jon la ga emu mi ne Iesu. 41La soso mun ne Endru ga vot pasa neton, ne Simon la ga lok tin, “Mara long lenget ka vam Lanarong.” Lavasuun at loxolinga Lanarong do, Karisito.
42Melemu neni ga lam ka ne Simon uto saparap ne Iesu. Iesu ga ven tin la ga lok tin keretna, “Nenu, ne Simon, nitna ne Jon. Laasen ta ru ne Kepas.” Na laasen i lok ngan mun ne Pita la lavasuun teren do Luat Kis.
Iesu Ga Ro Xaka Ne Pilip Mi Ne Natanael
43Ap mo manga lara laaleng Iesu ga vara i do nat pas uto Galili. Ni ga vot pasa ne Pilip la ga lok tin keretna, “Ude u, la una mumu asu ia.”
44Pilip neni boro Betsaida, lemenemen at ne Endru mi ne Pita. 45Pilip ga vot pasa ne Natanael la ga lok tin, “Mara long lenget ka vam laradi ne Moses ga malagan axasep mumu i ro xeneng at levenbuk at Lenavolo; la lavaeme vapaase alii bok diga malagan mumu i. Neni ne Iesu, lamdak at ne Josep, boro Nasaret.”
46La ne Natanael ga sue i, “I epovo xusu tempanga avukat naba vot boro Nasaret?”
Pilip ga lok, “Ata onon la una ven ba i.”
47At loxonaleng ne Iesu ga ven ne Natanael ga vas auret, la ni ga vaase mumu i xeretna, “Neni laradi ruturun boro Israel; kopmen tempanga xaxarang nak lok at lorooro ren.”
48La ne Natanael ga sue i. “Uklen ba ia xereva?” Iesu ga vorang i rin keretna, “At loxonaleng ne Pilip kovisi na lam kaka u, ara ven pam u, ut kis to maxopok at luuna pik.”
49Natanael ga lok, “Rabai. Nenu ne Nitna ne Moroa. Nenu loorong silok mede Israel.”
50Iesu ga lok tin, “U nuunu mene rak mila nenia a tong i ru do a ven u ro maxopok at luuna pik. Uba ven levempanga silok aleng ti na lavanga.” 51La ni ga lok bok tidu, “A tong tuturun i rinumu do muba ven laxalibet na rem suang la muba ven lubung angelo at ne Moroa dinat pas si la dinat pas urut uto saparav ia Laradi Mevana.”
Currently Selected:
Jon 1: mmx
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.