JOHN 19
19
1Áko Páílat bizaad k'ehgo Jesus dah náádeidiidlóozgo nídeineestsxas. 2Áádóó siláo ch'il hooshahii nídeiniisxodgo, ch'ah ádayiilaago hak'i deideez'ą́, índa éénééz tsídídééh nahalingo łichí'ígíí yiih dahastį́, 3áko hadááhdę́ę́' ninádaalwo'go, Yá'át'éhéii, Jew dine'é Aláahgo biNanit'a'í nílíinii! daaníigo nídahodiyiikaad. 4Áádóó Páílat ch'ínáánádzáago ánéidoo'niid, Jó'akon, nihich'į' ch'ínááhonisdlóós, bee ádąąh dah hodzist'áanii doo ła' há shił bééhoozin daígíí nihił béédahodoozįįł. 5Áko Jesus ch'il hooshahii hach'ah áádóó éé' tsídídééh nahalingo łichí'ígíí bee joogáałgo áádę́ę́' ch'ízhníyá. Áko Páílat éí diné áłah silį́'ígíí áyidííniid, Jó, kǫ́ǫ́ dzizį́. 6Áko aláahgo nááda'iiłniihii áádóó bisiláo dahoołtsą́ągo, Tsin ałnáoszid bikáa'jį' bił o'ołkaałgo sołhé héii, bił o'ołkaałgo sołhé héii! daaníigo hahodííłdláád. Áádóó Páílat ábidííniid, Nihílááh, t'áá nihí tsin ałnáoszid bikáa'jį' hoł ada'ołkaałgo dahosołhé, háálá bee ádąąh dah hodzist'áanii doo ła' há shił bééhoozin da. 7Nít'éé' Jew dine'é ánáádahodoo'niid, Nihibee haz'áanii hólǫ́, áko éí bik'ehgo ts'ídá dazdootsaał, háálá t'áá hó Diyin God biYe' ízh'díl'į́. 8Áko Páílat éí ha'oodzí'ígíí dzidiizts'ą́ą'go, t'ah yówehígo nídzísdzííd, 9áádóó naat'ááh kin góne' yah anínáádzoodzáago Jesus ábizhdííniid, Háádę́ę'shą' naniná? Nidi Jesus t'áadoo haadzíi' da. 10Áko Páílat áhodííniid, Da' doósh shich'į' hadíídzih da? Néédideeshchiłgo doodaléi' tsin ałnáoszid bikáa'jį' nił ada'doolkałgo bee shóhólníhígíísh doo nił bééhózin da? 11Jesus ánááhodoo'niid, Bee nóhólníihii doo yá'ąąshdę́ę́' naa deet'ą́ą́góogo doo shíninil'ą́ą da, éí bąą naa shidiní'ánígíí aláahgo bąąhági ádzaa.
12Díidíígíí binahjį' Páílat ts'ídá hwéédideeshchił niizį́į́', nidi Jew dine'é hadadeeshghaazhgo ádaaní, Díí diné béédííníchid ládą́ą́' doo Síízar bik'is nílį́į da doo; t'áá háiida ła' aláahgo naat'áanii ízh'díl'ínígíí éí Síízar bits'ą́ą́jí jílį́. 13Áko Páílat díí saadígíí yidiizts'ą́ą'go, Jesus yił ch'íní'áazhgo bikáá'dóó aa náhát'į́ yik'i dah neezdá, ákwii haz'ą́ągi Tsé Sikaad hoolyé, nidi Hííbrew bizaad k'ehgo Gábatha hoolyé. 14Áko atis'adeesdzá bee bééhániihii biniyé hasht'ehodi'nééh bijį́į́ góne', abínígo hastą́ądi oolkiłgo daats'í Páílat éí Jew dine'é ííłní, Jó kóoní, Aláahgo nihiNanit'a'í sizį́! 15Nidi hadadeeshghaazhgo ádadííniid, Sołhé héii, sołhé héii, tsin ałnáoszid bikáa'jį' yee' bił o'ołkaał! Nít'éé' Páílat áhodííniid, Da' Aláahgo nihiNanit'a'íísh tsin ałnáoszid bikáa'jį' bił i'deeshkał? Áko aláahgo nááda'iiłniihii ánáádahodoo'niid, Aláahgo nihiNanit'a'í ádin, Síízar t'éiyá. 16Áko índa tsin ałnáoszid bikáa'jį' hoł ada'doołkał biniyé baa hozhníłtį́. [Áko Jesus dayiiłtsoodgo dah deidiilóóz.]
Tsin ałnáoszid bikáa'jį' Jesus hoł o'oolkaal
(Mt. 27:32-44; Mk. 15:21-32; Lk. 23:26-43)
17Áko Jesus t'áá hó hatsin ałnáoszid jootį́įłgo kintahdóó Tsiits'in Si'ání hoolyéégóó hoł dah adiildee', éí Hííbrew k'ehjí Gálgatha hoolyé. 18Ákwii tsin ałnáoszid bikáa'jį' hoł ada'askaal, áádóó náánáła' nidilt'éego ałdó', Jesus aníí'dę́ę́' nijiyííłtį́įgo ałts'ą́ą́hjí hoł bił ada'askaal. 19Áko Páílat kót'éego yee ak'e'ashchį́įgo tsin ałnáoszid yąąh dah yiztą́; Jesus Názarethdóó, Jew dine'é Aláahgo biNanit'a'í, níigo bikáá'. 20Áko éí bee ak'e'ashchínígíí Jew dine'é lą'í dayííłta', háálá Jesus tsin ałnáoszid bikáa'jį' hoł o'oolkaalídóó kin haal'áajį' t'áá áyídí, áko éí Hííbrew áádóó Látin índa Gríik dine'é bizaad yee ak'eda'ashchį́. 21Áko nít'éé' Jew dine'é aláahgo nááda'iiłniihii Páílat ádeidííniid, Jew dine'é Aláahgo biNanit'a'í t'áadoo bee ak'ená'ílchíhí, nidi, Díí diné t'áá bí ání, Jew dine'é Aláahgo biNanit'a'í nishłį́, níigo bee ak'e'íłchí. 22Nidi Páílat ánáádoo'niid, Bee ak'e'shéłchínígíí bíni' t'áá éí bee ak'e'ashchį́.
23Áko siláo danilínígíí tsin ałnáoszid yikáa'jį' Jesus yił ada'askaalgo bee hazhdít'éé nít'é'ígíí siláo dį́lt'éego ałtaadeisnii'; ayaadi ha'éé' ałdó'. Nidi ayaadi ha'éé' éí doo ahídadiilkad da, éí t'áá bílátahdę́ę́' yaago t'áá ła' bizhi'ee yistł'ǫ́,#19:23 Ayaadi ha'éé' doo ahídiilkadí da áádóó bigąąziz áłts'íísí áádóó t'áá agodígo nineel'ą́ą́ nít'éé'. 24áko áda'ahidoo'niid, Haa'íshą', díí doo nidahidiidǫ́ǫs da, nidi háí bíí' dooleeł biniyé yáá'iilt'e' baa nidiikah. Diyin God bizaad bee ak'e'ashchį́įgo kónínígíí bohodoolnííł biniyé ákódzaa:
Shi'éé' ałtaadeis'nii',
índa shi'é'ígíí yiniyé yáá'iilt'e' yaa naaskai.#Ps. 22:18.
Áko siláo ákódáát'įįd.
25Ákwii tsin ałnáoszid yiyaagi Jesus bimá sizį́, áádóó t'áá éí bideezhí ałdó', Mary éí Klíyofas wolyéii be'asdzą́ą́, índa Mary Mágdaliin ałdó'. 26Áko Jesus hamá jiiłtsą́ągo, áádóó hóhooł'aahii ayóó'ájó'nínígíí hamá yíighahgi sizį́įgo, hamá ábizhdííniid, Asdzání, jó, eii niyáázh! 27Áádóó hóhooł'aahii ánáábizhdoo'niid, Jó, eii nimá! Éí áádóó íhooł'aahii jílíinii t'áá hó haghangóó bił níjít'áázh.
Jesus dadziztsą́
(Mt. 27:45-56; Mk. 15:33-41; Lk. 23:44-49)
28Kódzaadóó bik'ijį' há nihoot'áanii ałtso bíighah azlį́'ígíí hoł bééhózingo, Diyin God bizaad bee ak'e'ashchínígíí bohodoolnííł biniyé#Ps. 69:21; 22:15. ázhdííniid, Dibáá' sélį́į́'. 29Nít'éé' ákwe'é ch'il na'atł'o'ii bitoo' dók'ǫ́zhígíí ła' siką́ą́ lá, áko tó náyiits'ǫsígíí éí yéédeiz'ą́ągo ch'il hísap wolyéhígíí bee hazée'jį' dah yída'diiłtsih. 30Áko Jesus ch'il na'atł'o'ii bitoo' dók'ǫ́zhígíí dzizlįhgo ázhdííniid, K'ad lá ałtso bíighah azlį́į' ni, áádóó yaa ádziidzaago hwii' sizíinii ninázhdiní'ą́.
Jesus booshk'iizh baa o'oolzhiizh
31Hasht'ehodi'nééh bijį́įgo bąą, háá'áyį́į́h jį́į́ góne' ats'íís doo ła' t'áá tsin ałnáoszid yąąh dah hidíłtį́į da doo biniyé Jew dine'é éí tsin ałnáoszid yąąh dah hidíjé'ígíí yijáád deidiyootihgo#19:31 Tsin ałnáoszid bąąhjį' diné díkwíida biiłkááh ti'hooníihgo ákohgo índa daatsaah. Éí bąą dabijáád hetíih łeh nít'éé'. nahgóó ádeidoolííł biniyé Páílat nídayooskan (háálá éí háá'áyį́į́h jį́ aleehígíí ayóogo dílzinii át'é). 32Áko siláo yíkaigo t'áá hoł bił o'oolkaalii átséhígíí bijáád dayiizti', ła'ígíí ałdó', 33nidi Jesus baa jíkai, nít'éé' t'áá íídą́ą́' daaztsą́ą́ lágo hoł béédahoozin, áko t'áadoo bijáád dadziizti' da. 34Nidi siláo ła' tsiidétáán hooshk'iizh góne' yaa ayííłgeed, t'áá áko áádę́ę́' dił tó bił háána'. 35Áko éí binááł baa o'oolzhiizhii yiyiiłtsánígíí yaa hoolne', áko yaa hoolne'ígíí éí t'áá aaníí, índa t'áá aaníígóó halne'go bił bééhózin. Nihí ałdó' deidoohdląął biniyé yaa halne'. 36Bits'in doo ła' k'í'dooltǫǫł da,#Ex. 12:46; Num. 9:12; Ps. 34:20. níigo Diyin God bizaad bee ak'e'ashchínígíí bohodoolnííł biniyé díí t'áá ałtso ákódzaa. 37Índa náánáłahgo ałdó' Diyin God bizaad bee ak'e'ashchíinii ánáádí'ní, Baa ada'jishiizhígíí dazhníł'į́į doo.#Zech. 12:10; Rev. 1:7.
Jesus yóó'áho'diilyaa
(Mt. 27:57-61; Mk. 15:42-47; Lk. 23:50-56)
38Kódzaadóó bik'ijį' Arimathíya hoolyéédę́ę́' Jóseph éí Jew dine'é béédzíldzidgo t'áá nant'inee Jesus yídahooł'aahii jílį́. Éí, Jesus bits'íís nahgóó adeeshtééł, jiníigo Páílat bíjííkeed, áko Páílat ha'di'ní'ą́. Ákwii jiníyáago Jesus bits'íís dashdiiłtį́. 39Nít'éé' Nikodíímas ałdó' ákwii níyá, éí átséédą́ą́' tł'ée'go Jesus baazhníyáhígíí#Jn. 3:1,2. éí spáis wolyéii łikání halchinii mir áádóó álooz wolyéhígíí ałtaanásdziidgo neeznádiindi daats'í dah adiidlohgo jiníyį́. 40Éí nizhdilt'éego Jesus bits'íís dashdiiłtį́įgo, Jew dine'é yóó'áda'ał'ínígi át'éego łikání halchinii spáis wolyéii bąąh ájiilaa áádóó na'at'ą́hí łigaii dits'idígíí bił dzizdis. 41Áko tsin ałnáoszid bikáa'jį' hoł o'oolkaalígi t'áá éí nahós'a'gi tsin bił dah náháltso, áko ákwe'é ániidígo tséní'ootséelgo ts'ídá t'ah doo áajį' diné ła' yóó'álnéeh da. 42Áko Jew dine'é bihasht'ehodi'nééh bijínígíí áádóó tséní'ootséél t'áá áyídígo ałdó' biniinaa ákóne' Jesus yóó'ájiilaa.
Currently Selected:
JOHN 19: NVJOB
Highlight
Share
Copy
Want to have your highlights saved across all your devices? Sign up or sign in
Navajo Bible © 2000 American Bible Society. All rights reserved.
Bible text from the Navajo Bible is not to be reproduced in copies or otherwise by any means except as permitted in writing by American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org).