JOHN 14
14
ATaa' bich'į' Jesus honít'i'ii nilį́
1T'áadoo nihijéí bii' nihíni' daałání; Diyin God deinohdlą́ągo baa dadzíínóhłí, shí ałdó' dashoohdlą́ągo shaa dadzíínóhłí. 2ShiTaa' bighandi t'óó ahayóigo dahooghan; doo éigi áhoot'éégóó doo bee nihił hweeshne' da doo nít'éé'. Nihiba' hasht'ehodeeshłííł biniyé ákǫ́ǫ́ déyá. 3Áko áá níyáago nihá hasht'ehooshłaago, áádę́ę́' náádeeshdááł, áádóó ákǫ́ǫ́ nánihideesh'ishgo honishłónídi nihí ałdó' áadi dahonohłǫ́ǫ doo. 4Déyáágóó nihił béédahózin, áko honít'i'góó nihił béédahózin. 5Nít'éé' Thomas áhodííniid, Bóhólníihii, díníyáágóó doo nihił béédahózin da, áko haash yit'éego honít'i'ii nihił béédahodoozįįł? 6Jesus áhodííniid, Shí honít'i'ii áádóó t'áá aaníinii índa iiná nishłį́; diné doo ła' aTaa' yaa doogáał da, shí sheego t'éiyá. 7Shéédahonohsingo, shiTaa' ałdó' béédahonohsin doo nít'éé', k'ad kodóó hwéédahonohsin áádóó dahoołtsą́.
8Philip áhodííniid, Bóhólníihii, aTaa' nihił bééhonísįįh, éí t'éí daniidzin. 9Áko Jesus ájíní, Philip, da' ałk'idą́ą́' nihił nihidiishkai nidiísh, t'ah doo shééhonísįįh da? T'áá háiida shiiłtsánígíí éí aTaa' yiyiiłtsą́; ha'át'éegoshą' áko, ATaa' nihił bééhonísįįh, shidiní? 10ATaa' bii' honishłónígíí índa aTaa' shii' hólónígíísh doo yinídlą́ą da? Saad bee nihich'į' yáshti'ígíí doo t'áá shíniik'eh bee yáshti' da, nidi aTaa' shii' hólóonii éí binaanish áyoolííł. 11ATaa' bii' honishłǫ́ǫgo áádóó aTaa' shii' hólǫ́ǫgo dashiinohdlą́; éí doodago naanish ááshłíłígíí binahjį' dashiinohdlą́.
12T'áá aaníí, t'áá aaníígóó ánihidishní, T'áá háiida shijoodlą́ągo sheijólíhígíí éí díí naanish ááshłíłígíí hó ałdó' ájoolíił doo, áádóó díí naanish ááshłíłígíí biláahdi ádaat'éii ájoolíił doo, háálá shiTaa' bich'į' déyá, éí bąą. 13T'áá ha'át'íhída shízhi' bee dayínóhkeedgo, éí ádeeshnííł, aYe' bee aTaa' baa ha'niih doo biniyé. 14Ha'át'íhída shízhi' bee dayínóhkeedgo, éí ádeeshnííł.
Níłch'i Diyinii bee nihoot'ą́
15Ayóó'ádashíínóh'níí ládą́ą́' bee nahoséł'áanii bik'eh dahonoł'į́į doo. 16Áko aTaa' néideeshkąąłgo, Áká Análwo'ii ła' nihaa néididoo'áałgo, éí hool'áágóó nihił hólǫ́ǫ doo, 17t'áá éí Níłch'i t'áá aaníinii ííshją́ą́ áyoolíiłii, nihokáá' dine'é doo dahonoozį́į́' át'ée da, háálá doo dahoo'į́į da, doo nidi hwéédahósin da, nidi nihí hwéédahonohsin, háálá nihił kééhojit'į́, áádóó nihiyi' hojílǫ́ǫ doo.
18Doo t'áá sáhí nihi'deeshnih da; nihaa nídeeshdááł. 19Koshídę́ę́' hadziih, áko nihokáá' dine'é doo náádashoot'į́į da doo, nidi nihí t'éiyá dashooh'į́į doo; hinishnánígíí bąą nihí ałdó' dahinohnáa doo. 20Áko éí beiníłką́ądi shiTaa' bii' honishłónígíí, áádóó shii' dahonohłónígíí, índa nihii' dahonishłónígíí nihił béédahodoozįįł. 21Bee nahoséł'áanii hoł bééhózingo bik'eh hojíł'íinii éí ayóó'áshijó'ní, áko ayóó'áshijó'nínígíí éí shiTaa' ayóó'áhó'níi doo, shí ałdó' ayóó'áhósh'níi doo, áko hach'į' ádééhodeeszįįł. 22Júdas (doo Iskáriyat wolyée daígíí) áhodííniid, Bóhólníihii, ha'át'éegoshą' nihí t'éiyá nihich'į' ádééhodíílzįįł, nidi nihokáá' dine'é éí dooda? 23Jesus ánááhodoo'niid, Diné ła' ayóó'áshó'níigo, éí shizaad bik'eh hojíł'į́į doo, áko shiTaa' ayóó'áhó'níi doo, áko haa diikahgo hoł kéédahwiit'į́į dooleeł. 24T'áá háiida doo ayóó'áshó'nínígíí, éí shizaad doo yik'eh hół'į́į da; saad dadoohts'a'ii éí doo shí shizaad át'ée da, nidi aTaa' shiníł'a'ii éí bizaad át'é.
25Díí t'áá ałtso t'ah nihił naashkaidą́ą́', bee nihił hashne'. 26Nidi Áká Análwo'ii, Níłch'i Diyinii nilíinii, t'áá éí aTaa' shízhi' yee yidooł'aałígíí, éí t'áá ałtsoní yínanihiniłtin doo, áádóó t'áá ałtso bee nihich'į' hahásdzí'ígíí béédaałniihgo ánihósin doo. 27Nihich'į' hózhǫ́ǫ le', shibee ił hózhǫ́ nihaa dinish'aah; doo nihokáá' dine'é aa deidiyii'aahígi át'éego nihaa dinish'aah da. T'áadoo nihijéí bii' nihíni' daałání, índa t'áadoo nídaałdzidí. 28Nihiníyá, índa áádę́ę́' nihaa náádeeshdááł, nihidishnínígíí dashidoots'ą́ą́'. Ayóó'ádashíínóh'níigo, aTaa' bich'į' déyáhígíí baa nihił dahózhǫ́ǫ doo nít'éé', háálá shiTaa' shiláahgo át'é. 29Díí t'ah doo áhánééhgóó k'ad bee nihił hweeshne', ákódzaago, da'iidoohdląął. 30Kodóó doo lą'ígóó nihich'į' yánáádeeshtih da, háálá nahasdzáán yinanit'a'í nilíinii k'adę́ę yíghááh. Éí doo shee ádíhólníih da, 31nidi t'áá aTaa' áshidííniidígi át'éego ááshnííł, áko nihokáá' dine'é aTaa' ayóó'óósh'níigo bił béédahózin doo. Sołtį', dah didiikah.
Currently Selected:
JOHN 14: NVJOB
Highlight
Share
Copy
Want to have your highlights saved across all your devices? Sign up or sign in
Navajo Bible © 2000 American Bible Society. All rights reserved.
Bible text from the Navajo Bible is not to be reproduced in copies or otherwise by any means except as permitted in writing by American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org).