متّی ۲
۲
ستاره‌شنأسأن عیسی اَمرأ دیدار کونیدی
۱ عیسی، هیرودیسٚ پادشایی زمان، بیت‌لحمٚ یهودیه میأن بدونیا بمو. بأزین چن‌تأ ستاره‌شنأس، مشرق زیمینٚ جأ بموییدی اورشلیم ۲ و وَورسه‌ییدی: «او زأکی کی یهودٚ پادشاهه کویه ایسَه؟ چونکی اونٚ ستاره‌یَ، مشرقٚ جأ بیده‌ییمی و بموییم کی اونَ پرستش بوکونیم.» ۳ وختی اَ خبر هیرودیسٚ پادشا گوش فأرسه، اون و تومامٚ اورشلیمٚ مردومأن خیلی پریشأنَ بوستیدی.
۴ هیرودیس تومامٚ سرأنٚ کاهنأن و قومٚ دینٚ علمایَ دوخوأده و اوشأنَ وَورسه: «مسیح کویه وأستی بدونیا بأیه؟» ۵ جواب بدَه‌ییدی: «بیت‌لحمٚ یهودیه میأن، چونکی نبی دسٚ جأ اَطویی بینیویشته بوبوسته:
۶ ‹اَی بیت‌لحم کی یهودا سرزیمینٚ دورون نهَه‌یی،
تو به هیچ وجه یهودا فرمانروایأنٚ جأ کمتر نی‌یی،
چونکی تی جأ ایتأ فرمانروا ظوهور کونه
کی می قوم، ایسرائیلَ شبانی کونه.#۲:۶ میکاه نبی بابٚ ۵، آیه ۲›»
۷ بأزین هیرودیس ستاره‌شنأسأنَ خلوتی خو ورجأ دوخوأده و اوشأنَ وَورسه کی اوّلی وار چی وخت او ستاره‌یَ بیده‌ییدی ۸ و قبلٚ اَنکی اوشأنَ اوسه کونه کی بیشید بیت‌لحم، بوگفته: «بیشید و درباره‌یٚ او زأی حیسابی وَورس وَورس بوکونید. وختی اونَ پیدا بوکودیدی، مرَ وأخبرَ کونید تا منم بأیم و اونَ پرستش بوکونم.» ۹ ستاره‌شنأسأن بعدٚ اَنکی پادشا گبأنَ بیشتأوستیدی، رأ دکفتیدی و ستاره‌یی کی مشرقٚ طرف بیده بید اوشأنٚ جُلُو شوئون دوبو تا آخرٚ سر هو جایی کی او زأی ایسَه‌بو، اونٚ جور بِیسه. ۱۰ وختی اوشأن ستاره‌یَ بیده‌ییدی جٚه خوشحالی آرام و قرار نأشتیدی. ۱۱ بأزین بوشوییدی خانه دورون، زأکَ، اونٚ مار مریمٚ اَمرأ بیده‌ییدی، سوجده کودنٚ وأسی زیمینٚ سر بکفتید و او زأکَ پرستش بوکودیدی. بأزین خوشأنٚ صوندوقچه‌یأنَ وأکودیدی و طلا و کُندر و مُرَ#۲:۱۱ مُر - ایجور عطرٚ خوش‌بو کی ایتأ درختچه شیره جأ بدس اَیه و هو زمانم بعنوانٚ دوا و هم جسدٚ تدهین کودنٚ وأسی ایستفاده کودیدی. پیش‌کشی وأسی اونَ تقدیم بوکودید ۱۲ و چونکی خوداوند، اوشأنَ خوابٚ میأنی هوشدار بدَه‌بو کی هیرودیسٚ ورجأ وأنگردید، ایتأ رأیٚ دیگرٚ جأ، خوشأنٚ سرزیمین وأگردستید.
یوسف، مریم و عیسی اَمرأ فرار کونه مصر
۱۳ وختی کی ستاره‌شنأسأن بوشوییدی، خوداوندٚ فرشته خوابٚ میأن یوسفَ ظاهیرَ بوسته و بوگفته: «ویریز، زأی و اونٚ مارَ اوسأن، فرار بوکون بوشو مصر و هویه بِیس تا ترَ وأخبرَ کونم، چونکی هیرودیس زأکٚ دونبأل گرده کی اونَ بوکوشه.» ۱۴ پس وختی شب دکفته، یوسف ویریشته، زأی و اونٚ مارَ اوسأده، رأ دکفته بوشو مصر ۱۵ و تا هیرودیسٚ مردنٚ وخت اویه بِیسه. اَطویی اونچی کی خوداوند، نبی زبانٚ جأ بوگفته‌بو، حقیقت پیدا بوکوده کی «می پسرَ مصرٚ جأ دوخوأدم.#۲:۱۵ هوشع نبی بابٚ ۱۱، آیه ۱»
۱۶ وختی هیرودیس بفهمسته کی ستاره‌شنأسأن اونَ گول بزه‌ییدی، اونَ خیلی غیظَ گیفته و دستور بدَه کی بیشید بیت‌لحمٚ میأن و اونٚ دور و اطراف، تومامٚ دو ساله پسر زأکأنَ و کوجه‌دأنه‌ترم بوکوشید، جٚه اَ خأطر کی ستاره‌شنأسأنٚ جأ بیشنأوسته‌بو کی ستاره دو سال پیش ظاهیرَ بوسته‌بو. ۱۷ اَطویی اونچی کی اِرمیایٚ نبی زبانٚ جأ بوگفته بوبوسته‌بو، حقیقت پیدا کوده کی:
۱۸ «رامه جأ صدایی ایشنأوسته به،
شیون و زاری و پیله ماتمٚ صدایه.
راحیل خو زأکأنٚ وأسی هَی گریه کونه
و نخوأیه آرامَ به،
چونکی دِه نِیسَه‌ییدی.#۲:۱۸ اِرمیا نبی بابٚ ۳۱، آیه ۱۵»
یوسف، مریم و عیسی اَمرأ وأگرده ناصره
۱۹ بعدٚ اونکی هیرودیس بمرده، خوداوندٚ فرشته مصرٚ دورون یوسفَ بخواب بمو ۲۰ و بوگفته: «ویریز، زأی و اونٚ مارَ اوسأن، وأگرد بوشو ایسرائیلٚ سرزیمین، چونکی اوشأنی کی خوأستیدی زأکَ بوکوشید، بمردیدی.» ۲۱ یوسف ویریشته، زأی و اونٚ مارَ اوسأده، وأگردسته بوشو ایسرائیلٚ سرزیمین. ۲۲ امّا وختی بیشنأوسته کی آرکِلائوس، به جایٚ خو پئر هیرودیس، یهودیه میأن سلطنت کودَن دره، بترسه بشه اویه و چونکی خوابٚ میأنی اونَ وحی فأرسه، هَنٚ وأسی بوشو اوستانٚ جلیل ۲۳ و اویه ناصره شهرٚ میأن ساکن بوبوسته. اَطویی پیغمبرأنٚ کلام حقیقت پیدا بوکوده کی بوگفته‌بید: «اون ناصری دوخوأده به#۲:۲۳ زبانٚ عبری دورون «ناصره» ایسمی ایسه کی به کلمه‌یٚ «شاخه» ایرتباطٚ نزدیک دأره و ایتأ جٚه توضیح یا تعریف یا نامی ایسه کی نبی‌یأن، عهدٚ عتیقٚ دورون مسیحٚ رِه ایستفاده بوکودیدی، مثلاً تأنیدی اِشعیا بابٚ ۱۱ آیه ۱ نیگاه بوکونید. .»
Currently Selected:
متّی ۲: گیلکی (رشتی)
Highlight
Share
Copy
Want to have your highlights saved across all your devices? Sign up or sign in
© 2010-2019 Gilak Media