یوحنا ۱۴
۱۴
عیسی، تنها رایی ایسه به سمتٚ پئر
۱ «شیمی دیل نیگران نبه! به خودا ایمأن بدأرید، به منم ایمأن بدأرید. ۲ می پئرٚ خانه میأن منزلٚ زیاده، وگرنه شمرَ گفتیم. شوئون درم تا جایی شِمره حاضرَ کونم. ۳ او وخت کی بوشوم و جایی شِمره حاضرَ کودم، بعداً اَیم و شمرَ می ورجه برم، تا جایی کی من ایسم شومأنم بِیسید. ۴ جایی کی من شوئون درم، او رایَ دأنیدی.»
۵ توما اونَ بوگفته: «اَمأن حتی نأنیمی کویه شوئون دری، پس چوطو تأنیم رایَ بدأنیم؟»
۶ عیسی اونَ بوگفته: «رأ و راستی و حیات من ایسم، هیکس می پئرٚ ورجه نأیه مگر به واسطه‌یٚ من. ۷ اگه مرَ شنأختیدی، می پئرم شنأختیدی. امّا بعد از اَن، اونَ شنأسیدی و اونَ بیده‌ییدی.»
۸ فیلیپُس اونَ بوگفته: «اَی سرور، پئرَ اَمرَ نیشأن بدن، هَن اَمرَ کافی‌یه.»
۹ عیسی اونَ بوگفته: «فیلیپُس، خیلی وخته کی شیمی اَمرأ ایسم، هنوز مرَ نشنأختی؟ کسی کی مرَ بیده، پئرَ بیده. پس چوطو ایسه کی گی ‹پئرَ اَمرَ نیشأن بدن›؟ ۱۰ آیا باور نأری کی من در پئرم و پئرم در من؟ حرفأنی کی من شمرَ گم از خودم نی‌یه، بلکی از پئری‌یه کی در من ساکنه، اونه کی خو کارأنَ به انجام رسأنه. ۱۱ اَ حرفَ کی من گم باور بوکونید کی من در پئرم و پئرم در من؛ وگرنه اونٚ کارأنَ وستی باور بوکونید کی من در پئرم و پئرم در من.
۱۲ «آمین، آمین، شمرَ گم، اونی کی به من ایمأن بدأره، اونم کارأنی کی من کونم انجام دهه، و حتی کارأنٚ بزرگتر از اونم انجام دهه، چونکی من پئرٚ ورجه شوئون درم. ۱۳ و به نامٚ من هر چیزی کی بخوأیید، من اونَ انجام دهم، تا پئر در پسر جلال پیدا بوکونه. ۱۴ اگه چیزی به نامٚ من بخوأیید من اونَ انجام دهم.
روح‌القدسٚ وعده
۱۵ «اگه مرَ دوست بدأرید، می احکامَ دأریدی. ۱۶ و من از پئر خوأیم و اون، پشتیبانٚ#۱۴:۱۶ پشتیبان کی هو روحٚ راستی در بابٚ ۱۵ آیه ۲۶ و بابٚ ۱۶ آیه ۱۳ کی روح‌القدس ایسه. دیگری شمرَ فده کی همیشه شیمی اَمرأ بِیسه، ۱۷ ینی روحٚ راستی کی دونیا نتأنه اونَ قوبیل بوکونه، چونکی نه اونَ دینه و نه اونَ شنأسه، امّا شومأن اونَ شنأسیدی، چره کی شیمی ورجه ساکنَ به و در آینده شیمی میأن ایسه.
۱۸ «شمرَ بی‌کس نَنم، شیمی ورجه اَیم. ۱۹ بعد از مدتی دونیا مرَ نیدینه، امّا شومأن مرَ دینیدی. چونکی من زنده‌یم، شومأنم زندگی کونیدی. ۲۰ در او روز فهمیدی کی من در پئر ایسم و شومأن در من و منم در شومأن. ۲۱ اونی کی می احکامَ بدأره و از اوشأن پیروی بوکونه، اون مرَ دوست دأره؛ و اونی کی مرَ دوست دأره، می پئرم اونَ دوست دأره و منم اونَ دوست دأرم و خودمَ اونٚ‌ره آشکارَ کونم.»
۲۲ یهودا (نه اون یهودایٚ اسخریوطی) از اون وَورسه: «اَی سرور، چوطویه کی خوأیی خودتَ اَمرَ آشکارَ کونی، امّا نه اَ دنیاره؟»
۲۳ عیسی جواب بدَه: «اگه کسی مرَ دوست بدأره، می کلامَ دأره، و می پئرم اونَ دوست دأره و اَمأن اونٚ ورجه اَییم و اونٚ اَمرأ زندگی کونیم. ۲۴ اونی کی مرَ دوست نأره، می کلامم ایطاعت نوکونه، و اَ کلامَ کی ایشنَویدی از من نی‌یه، بلکی از پئری‌یه کی مرَ اوسه کوده.
۲۵ «اَ چیزأنَ تا الأن کی شیمی اَمرأ ایسم، شمرَ بوگفتم. ۲۶ امّا او پشتیبان، ینی روح‌القدس، کی پئر اونَ به نامٚ من اوسه کونه، اون همه چیزَ شمرَ یاد دهه و هر اونچی کی من شمرَ بوگفتم، شمرَ به یاد اَوره. ۲۷ شِمره آرامش بجا نَهم، می آرامشَ شمرَ فدم. اونچی کی من شمرَ فدم اونی نی‌یه کی دونیا شمرَ فده. شیمی دیل نیگران و هراسان نبه. ۲۸ بیشنَوستیدی کی شمرَ بوگفتم ‹من شوئون درم. امّا بازم شیمی ورجه اَیم.› اگه مرَ دوست بدأشته بید، خوشحالَ بوستیدی کی می پئرٚ ورجه شوئون درم، چونکی پئر از من بزرگتره. ۲۹ الأن اَنَ قبل از اَنکی چیزی پیش بأیه شمرَ بوگفتم، تا وختی کی ایتفاق دکفه، ایمأن بأورید. ۳۰ وختٚ زیادی نمأنسته کی شیمی اَمرأ حرف بزنم، چونکی رئیسٚ اَ دونیا اَمون دره، اون هیچ قدرتی بر من نأره. ۳۱ امّا من کاری‌یَ کونم کی پئر مرَ دستور بدَه، تا دونیا بدأنه کی پئرَ دوست دأرم.#۱۴:۳۱ یا: تا دونیا بدأنه کی پئرَ دوست دأرم و من کاری کونم کی پئر مرَ دستور بده. ویریزید، بیشیم.
Currently Selected:
یوحنا ۱۴: گیلکی (رشتی)
Highlight
Share
Copy
Want to have your highlights saved across all your devices? Sign up or sign in
© 2010-2019 Gilak Media