San Juan 7
7
Ich Jesús eeugpeenaupaijã i iek ʉkhaba aajerr
1Magtarr khur ich Jesús Galilea durr phobordam nʉnʉidʉmpierr phʉʉrdʉ nʉrrajim. Ich tag Judea durr mamapha sĩejim, judionaan chi pornaanau ich thõog ẽkhaajerr aawai. 2Pari mag i phʉʉr nʉrrʉm ee, judionaan phiesta Las Enramadas anʉm burrju khãai khapan khaba waaur narr aawai, 3ich eeugpeenaupai irig, —Mʉig Galileapai sĩeba Judeaagta petá ajierram, jamjã pʉchig ee aajem khʉʉnag pʉchdeu nem wau sim oomkhĩir. 4Maadeu thumaam khʉʉnag dich khaphʉ apim khõsi chirʉm chan, sĩi dich appaita meraa nem wauba aajem. Jãg pʉch nem wau sim thumaam khʉʉnag khap amkhĩirta waubá ajierram irig.
5Mamʉ ich eeugpeenaupai irig mag narran, irua amach dakhĩir mag nem wau sim oo nʉmjã amach paarmua ich Ẽwandamau pʉiju a jaaujerr khabam aajerr aawaita juau ogthom irig mag naajim. 6Ich eeugpeenaupai ichig magbaawai Jesuu amag, —Pãragan ora thum wajaphamgui ajim, phiesta ee maag. Pari agtha mʉch maju ora khaba sĩewai mʉʉgwaiwe chan mʉ mabamgui ajim. 7Pãar chan pod õrau oomapha abam, pãachjã am igar naawai. Magarrau mʉʉn chadau amau oomapha wai nʉmgui ajim, amachdeu nem khaigba wau nʉm mua amach khĩircha jaaujeewai. 8Magnaa amag, Pãachta pãach phiesta ee wetjurauma ajim. Mamʉ agtha mʉch maju ora khaba aawai mʉʉgwaiwe chan mʉ mabamgui ajim ich eeugpeenag.
9Amag mag iekhapʉiwia ich chan maba, chadcha Galilea sĩsijim.
Jesús judionaan phiesta Las Enramadas anʉm ee
10Pari mag ich eeugpeen wettarr khur nʉʉ awia okharta am ẽudee petajim, ich Jesús. Pari mag matarrjã õrag ich mam khaugpiba meraata petajim. 11Maagwai judionaan chi pornaanau chi phiesta ee i jʉrphoo thʉnʉmua, “¿Jamta simta jãg oobáma?” aajeejim.
12Mag nʉm dʉi ĩchab sĩi bigaaum khʉʉnaujã i igwia, “Jãg wounan ãba nem wajaphampaita wau khitaajem” a iyʉʉ aawai, jũrr ãaur khʉʉnau, “Ʉ̃hʉ̃, ¿jãga õor wajapham abarju jãg sĩi õor khũgur nʉrraajem?” aajeejim aajem jũrram khʉʉnau. 13Pari mag iekha nʉmjã sĩi parhooba thumaam khʉʉnag ũrmkhĩir khaba, amach appaita mamag aajeejim anaabá, magʉm gaaimua judionaan chi pornaanau jũrr amach dʉita khaigbaju khĩirjuwia.
14Pari jũrram khʉʉnau mamagkham ee, mag nʉm dʉi ĩchab chi phiestajã seman jãrr pamam eeta barwia, Aai i jeeujem deg dubwia, õrag Ẽwandam iek jaau sĩeimajim. 15Mag irua nem jaaumam ũrwia judionaan chi pornaan jʉ̃gderraa nʉmua, “¿Jãga jãg estudietarrjã chukhu sĩerrʉmta magʉm nemjã jaau khaauga sĩma?” aajeejim.
16Amau mag iekha nʉm ũrwia jũrr ich Jesuu amag, —Mua nem jaau chirʉm chan sĩi mʉch iekpai khabamgui ajim. Mua nem jaau chirʉmʉn mʉch pʉitarr wounau mʉchig jaaupitarrta jaau chirʉmgui ajim. 17Ãbmua Ẽwandam ipierr nem waum khõsi sim khai, magua khaphʉ ajugui ajim, chadcha mua Ẽwandam iekta jaau chirʉ́ wa sĩi mʉch iekpaita jaau chirʉ́. 18Sĩi ar amach khĩirjug eemuapai iekha nʉm khʉʉnan sĩi õrag amach tho iekhamkhĩirta iekhaajerramgui ajim. Pari magba ar sĩi dich chogpʉitarrta wajapha ig iyʉʉ amkhĩir nem jaau nʉm khʉʉnan, chadcha ichdeu jaaupitarr iekta ich agpierrpai jaaujemgui ajim.
19Magnaa ichdeupai amag, —¿Moiseeu chadcha pãar atheeta ley phã pʉabajĩ? ajim. Magtarrjã pãrau iwiram ãbmuajã ag gaai jaau sim ipierraa aba aajemgui ajim. ¿Ag gaai ĩchab õorjã thõopiba jaau sĩebá? ajim. Mag simta, ¿jãgwia pãrau mʉ thõom ig nʉmma? ajim judionaan chi pornaanag.
20Magbaawai chi ũr narr khʉʉnau irig, —Pʉʉn chadcha dosãtauta por meu simgui ajierram. ¿Khaíu pʉ thõom ig nʉmta pua mag sĩ? ajierram.
21Magbaa Jesuu amag magjim:
—Chadcha pãar thumaam khʉʉn dakhĩir jua ʉ̃ʉijem edta mua õor monaaujim. Magtarr aawai ãba maata pãrau ig naabma ajim. 22Pãach garmuan pãrau mʉrʉg mag naabma, pari khĩir eeya abat: Moiseeu jaauju nawe ya pãach jooinau ich maagjerr aawai, ¿warag Moiseeujã pãrag chaain meheudam ich mag phʉʉrbichpi jaau pʉabajĩ? Magtarr aawai ¿jua ʉ̃ʉijem edam magwe pãrau ag ipierr aba aajẽ pãach chaain dʉi? ¿Pari jãg nʉm aigjã phidkha nʉm khabá? ajim. 23Mamʉ ich jãg Moiseeu jaau pʉarr ichaaur amaaugau sabarhedam magwe pãachdeun chaain meheu phʉʉrbich nʉmta, ¿jãgwia mua sĩi sabarhed woun monaautarr oowiapai pãar mʉ dʉi meeukha nʉ? ajim, mua sabarhedjã ʉʉrkhaba chirʉm awia. 24Magnaa amag, Chikham jaauju nʉm khai, wajapha khĩirjunaata nem agcha jaaubat; pari oob jãg sĩi pãach khõchagpierrta nem jaaumiet ajim.
¿Khaíuta Jesús pʉijĩ?
25Mag khapanag dakhĩir Aai i jeeujem deg ijẽjẽbkham oowia chi Jerusalenpien chi porkha narr khʉʉn ee ãaur khʉʉnau jũrr amach khapeenag, —¿Chamʉ́ ar amau thõopäaig pʉr auju ẽkha nʉm woun khabá cha ijẽjẽbkham? aajeejim. 26¿Jãga jãg õor pom thʉnʉm dakhĩir amachigcha mag iekhamamjã bʉ̃ʉrjã i chig aba nʉmma? ¿Wa ya chi thethecharam khʉʉnaujã, “Jãata chadcha warrgarwe ich Ẽwandamaucha pʉiju jaaujerr” a nʉwa? aajeejim. 27Pari mag khai, maadeu khaphʉ nʉmgui aajeejim, jam agá i durr. Mamʉ chadcha ich Ẽwandamau pʉiju a jaaujerrcha beewai chan ãbmuajã khaugbaju, jammuata beeju khai. Magua jã ar khabamgui aajeejim jũrram khʉʉnau, chadcha ich Galileapierrkha sim khaphʉ narr aawai.
28Mamʉ jũrram khʉʉnau mamagkham ũrwia mag Aai i jeeujem deg ichdeu jaau sĩerr aigmua ich Jesuu khĩesir iekhamamua, —Magan pãraun mʉch chi wounjã khaphʉnaa ĩchab mʉ durrjã khaphʉ naabma ajim. Pari mʉ chan pãrau khĩirju nʉmjo sĩi mʉch khĩrau beetarr khabam. Mʉʉn ãb pãrau khaugba naab mamʉ, bʉ̃ʉrjã seu chukhu sĩerrʉmuata pʉijimgui ajim. Ma pãrau khaugba nʉmgui ajim, khai agá. 29Mʉchdeun mua i khaphʉ chirʉmgui ajim, i aar chirawia beetarr aawai. Ichdeuta mʉ pʉijimgui ajim.
30Amachig magbapäaiwai warag i pʉr auju khĩirjujierram. Pari agtha Ẽwandamau i pʉr aupiju ora khaba arr aawai ni ãbmuajã i pʉr auba, sĩi ich magpai sĩujierram. 31Ãaur khʉʉnau i dʉi mag nʉm ee, ãaur khʉʉn khapan aig narr khʉʉnau ʉkha nʉm iekhau, —Daau mag nʉm ich Ẽwandamaucha pʉiju a jaaujerr pierrwaijã, mʉg Jesuu nem wau nʉrrʉm khãaijã ʉ̃rʉʉcha ag na õrau nem ooba aajem waubarju a iekha naajim.
Chi pornaanau Jesús pʉr auju ẽkhatarr
32Moiseeu phã pʉarr iek wajapcha ʉʉrkhaajem khʉʉnau ũurwai õrau Jesús igar iekha nʉm ũrbaawai amach garmua phadnaan chi porkha narr khʉʉn dʉimua guardianaan chi Aai i jeeujem di thʉajerr khʉʉn pʉijierram, i pʉr aumkhĩir. 33Pari mag ich pʉr aumkhĩir ich aar õor pʉi nʉmjã ich Jesuu khaphʉ sĩerr aawai amag, —Khũchpaita pãar dʉi mʉ mʉig eegar chitabahab. Mʉʉn deeu mʉch pʉitarr aar maju chirʉmʉugui ajim. 34Mag mʉ petaawai pãrau mʉ jʉrju, pari pod mʉ baau aubajugui ajim, mag mʉ chiraimaju aar pãar barju khaba naawai.
35Jesuu mag iekhabapʉim ũrwia, chi judionaan sereu phobaadewia, jũrr amach wir aigpai, “¿Jamag maju jaau simta mag pod maadeu i baaubaju anʉm? ¿Wa deeum durr mawia jũrr parhoobam khʉʉnag jawaan maju igwiata mag sĩwa?” aajeejim. 36“¿Khan a simʉu mag maadeu i jʉrwiajã pod i sim aar chan barbaju anʉm?” aajeejim amach eepai.
Õor iiupiejem do
37Ya ãbmiecha chi phiesta o nʉm edta chi wajapcharam ajim. Mag ed Jesuu dʉnʉʉunaa thet iekhamamua õrag, —Ãb khãijã obisi sim khai, mua wai chirʉm do khĩirta dobá ajim. 38Ich Ẽwandam iek phã sim gaai jaau simjo, chi mʉ iekta ʉkha sim thãarbʉ eemuan ich mag sĩi õor iiupiejem doota khumdʉ ober sĩsimjo sĩeju ajim.
39Mag sim aiguin Jesuu i iek ʉkhabarm khʉʉnaun Ẽwandam Akhaarta auju a sim ajim. Pari maagwai chan agtha chi Ẽwandam Akhaar beeba sĩejim, ich Jesujã agtha ich Aai aar ʉ̃gthar maba sĩerr aawai.
Ãaur khʉʉnau Jesús igar naawai ãaur khʉʉnau i khõchkhaba arr
40Jesuu mag iekhabarm ũrbaawai ãaur aig narr khʉʉnau, “Mʉg wounan chadcha Ẽwandamau ich i jaaumkhĩir jʉr autarrta jãg nʉrrʉm” aajeejim. 41Maagwai ãaur khʉʉnau jũrr, “Keena, jãan warrgarwe ich Ẽwandamau pʉiju aajerr wounauwai” anʉm ee, tagam khʉʉnau, “Ʉ̃hʉ̃, mag khabam; jãg woun chadcha cha jaau nʉmjo warrgarwe ich Ẽwandamau pʉiju jaaujerr akhiin, Galileapierr khabakham” aajeejim. 42“Ẽwandam iek phã sim gaai jaauwai, Mesías mag warrgarwe ich Ẽwandamau pʉiju jaautarran rey David khararr khod aju aajem, i chaain ewagam khʉʉn bi eem aju aawai. Maimua i thaabaawaijã Belén phobor eeta auju a sim, ich Davidjã Belenpierr arr aawai. Magua mʉg woun chan ag Mesías khababam” khajierram jũrram khʉʉnau.
43Mag Jesús igwia jũrram khʉʉnau pogkha jaauphoo thʉnʉm gaaimua, ãaur khʉʉn i igar naawai ãaur khʉʉnau i khõchkhaba iekha nʉrrjee ajim. 44Ãaur khʉʉnaun ich Jesuuta warag preso pʉr arraag ẽkha naajim, pari mag nʉmta ãbmuajã i pʉr auba sĩi sĩujierram.
Chi thethem khʉʉnau chan Jesús igar khaba naajim
45Mag amachig jaaubaawai chadcha chi Aai i jeeujem di thʉajerr khʉʉn wetwia, deeu beewia, jũrr fariseonaan phadnaan chi pornaan dʉi ãba narr aar wetjierram aajem. Magbaawai makhʉʉnau amag, —¿Jãgwia pãrau i pʉr aibeebajĩ? ajierram anʉm.
46Magbaa chi guardianaanau amag magjierram aajem:
—Marau chadcha i pʉr aubeeba arran, maachdeu ũurwai sĩi parhoobam khʉʉn iekhaajemjo khábata nem jaau sĩerr aawaita pʉr aubeebajimgui ajierram aajem amag.
47Magbaawai chi fariseonaanau chi guardianaanag, —¿Pãachpata ʉdʉraa khũgurpi nʉ ajierram aajem, mag iekhaag? 48Maach meeun judionaan chi pornaanaun khaphʉnaa maach chi fariseonaanaujã khaphʉ nʉmgui ajierram aajem, jãg woun chan Ẽwandamau pʉiju jaaujerr Mesías khaba sim. 49Sĩi phobor ee parhoobam khʉʉnaun chadcha arpii naama. ¿Pari khani jãkhʉʉnau Moiseeu phã pʉarr ley khap nʉ? Jãkhʉʉn Ẽwandamau igbaju khʉʉn aawai sĩi chi maldisiem khʉʉn khabahab ajierram anʉm.
50Magbaawaita tagam khʉʉnau mag nʉm ee, ag na biek ãb edaar ich Jesús dʉi iyʉʉ athurtarr ag fariseo Nicodemo aajerrau ich khapeen ijũrr magjim anʉm:
51—Keena, pari Moiseeu maachig ley werpʉatarr gaai jaauwai, khan gaaimuata mag woun khaibag wawaagpá a khap aag wajapha i iek ũr auba chan pod õor ãbjã khaibag waupi jaauju khaba nʉm a simta, ¿jãga pãar mag iekha nʉ? ajim anaabá.
52Magbaa warm khʉʉnau irig, —¿Pʉchjã agjo Galileapierrá i kõit mag iekhaag? Mag chirabnaa, pʉde Ẽwandam iek phã sim gaai jʉrbarí ajim anʉm. ¿Khaíu jaauwai mag Galileamuata Ẽwandam i jaaujem ãb khãijã oberju a sĩ? ajierram anʉm irig.
[ 53Mag, chi phiestajã obaadeewai warag thum agdaujo amach diig ereubaadejim.
Currently Selected:
San Juan 7: noaA
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.