San Juan 6
6
Jesuu õor cinco mil thach khopitarr
(Mt. 14:13-21; Mr. 6:30-44; Lc. 9:10-17)
1Magtarr khur deeu Jesús petajim, ag khĩirpheepai thʉrrdo pom Galilea a thʉ̃r sim ee. Ich ag thʉrrdopai ĩchab Tiberias a thʉ̃ʉrjem. 2Mag i ag khĩirphee petaawai õor pom i ẽudee ereubaadejim, amachdeu mag õor mor masim khʉʉn pooma monaaumamua i jua theeg oojerr aawai. 3Mag mawia maar na buchagdam gaai waaidʉwia jupbaimaawai maarjã i bigaau jupimajim. 4Maagwai judionaan phiesta Pascua aajem ya burrju ʉ̃rʉʉ sĩejim. 5Jesuu oowai mag ich ẽudee õor pooma beewia pos aichem oobaawai Felipeegta, —Felipe, õor pom mʉg wejom athee ¿jamta maadeu khoju bawaagauma? ajim.
6Pari ichdeu Felipeeg mag sĩerran, daau irua khan abarju khai awiata mag sĩejim. Mamʉ ich Jesuu ichdeu khap nem wauju khĩirju sĩejim. 7Magbaa Felipeeu irig, —Doscientos denarios wai nʉm anaa sĩi pan appai aukhiinjã, agdaujo dau ãhãbdojã dʉrrkhabajugui ajim.
8Magbaawai maar khapeer ãb Simón Pedro eeum Andrés a thʉ̃ʉrjerrau, 9—Ãb mʉig chaaidam simuata pandam cinco wai nʉrrʉmgui ajim, maimua ãwarrdam dau numí. Pari õor pom mʉg wejom, ¿khanii jãgpaimua dʉrr abarju? ajim.
10Andreeu magbaawai Jesuu jũrr maragta, —Magan amag thum ohoodo api jaaubat ajim.
Mag jaaubaawai chadcha thumaa phũak ee ohood aphobaadejim. Mag õor pom wejom ee emkhooin appai cinco miljo naajim. 11Maimua Jesuu makhʉʉn pandam ich jua ee phe auwia, Ẽwandamag ʉu ajim anaa, jũrr marag ʉapʉimajim, jũrr õor pom mag ohood wejomʉg jigmamkhĩir. Maimua jũrr chi ãwarrdam paarjã ich agjo Ẽwandamag ʉu ajim anaa agjo jigpijim, amachdeu khom aig khomkhĩir. 12Maimua ya thumaam khʉʉn biwaauwia tag khomapha aphobaadeewai, sĩi barpʉiju khãai, Jesuu marag phepi jaaujim. 13Maimua chadcha marau thumaa phenaa oowai, mag pandam cincopai narrta thʉbʉt doce ipiirkha aujim, chi sobau. 14Õor pom mag thʉnarr khʉʉnau amach daúacha Jesuu ich iiu aawai mag ag na amau mag ooba aajerrta mag waubarm oobaawai jũrr amach eepai, “Chadcha mʉg wounta ich Ẽwandamaucha ich i jaaumkhĩir jʉr auwi pʉiju a jaaujerrauwai” aajeejim.
15Mag nʉmua warag ajués ich pʉr arrwia amach reikhapim ig nʉm ichdeu khaug athaawai warag durrsĩeg petajim, mam ich appai sĩeimaag.
Jesús do ʉ̃r nʉrrarr
(Mt. 14:22-27; Mr. 6:45-52)
16Maimua ya edau kheubaadeewai maar jerag beewia, thʉrrdo ee burrdʉtkhachewia, 17jũrr jap ee paaukhabaadejim, ag khĩirphee phobor Capernaum anʉmʉg wetaag. Mag maar dojãrr paaukhabaadem ee warag khĩssu aadejim. Maagwai ich Jesús agtha beeba sĩerr aawai maar dʉi maba thʉba sĩsijim. 18Mag ya maar dojãrr wetumta, phũ theeg webaadeewai sĩi phũas baupa aadejim. 19Ya maagwai maar dojãrr naajim. Cinco khabamʉn seis kilómetros khãijã naajim, dohi aigmua chi warphag. Mag nʉm eeta marau oowai, Jesuuta dojã ʉ̃r durramjo dʉdʉrg urum oophobaadejim. Mag oophobaadeewai maar jãphierr phobaadejim. 20Pari mag maar jãphierr phobaadeewai ichdeu marag, —Oob jãphierrmiet, mʉ khabahab ajim.
21Magbaawai warag marau maach jap ee i thʉ̃r aujim. Mag maar dʉi jap ee pabaadeewai seukhabarmjo abarm ee jopchata ya maar maach maa arr aar naaimajim.
Õrau Jesús jʉrphoo thʉnarr
22Ag noram ãspaau thoom igar thʉbagkhatarr khʉʉnau khaug athajierram aajem, jap ãbpai aig sĩerr ee maar ereubaadem. Mag maar weetwai chi Jesús maar dʉi maba arrjã khaphʉ naajim aajem ĩchab. 23Mag nʉm ee ich ag thʉrrdo eepai phobor Tiberias anʉm aarmua bote beewia, mag ag noram Jesuu pan cinco ich jua ee aunaa ag paar ʉu ajim anaa õrag khopitarr dakha jopdʉtkhachejim aajem. 24Mag chadcha amachdeu oowai, Jesús aig khaba ni maar i dʉi wenʉrraajem khʉʉnjã aig khaba nʉm khaug athaawai, mag bote jopdʉtkhachetarr ee jũrr dojãrr paaukhabaadejim aajem Capernaumag, Jesús ẽudee i jʉr wetumua.
Jesús, õor iiupiejem pan
25Maimua mag wetwia chadcha ag khĩirphee Jesús sim oobaimaawai irig, —Maestro, ¿khan orata pʉ mau pabaadejĩma? ajierram.
26Magbaawai Jesuu amag, —Chadcha pãrau mʉ jʉr wenʉrrʉmʉn, sĩi pãach thach biwaau khopitarr aawaita pãrau mʉ jʉr wenʉrrʉmgui ajim. Mamʉ ĩs mag mua jãg pãach dakhĩir wautarr gaaimua mua jaau chitʉm ʉkhakhimjã aba nʉm. 27Jãg sĩi biwaau thach khom khõchgaupai mʉ ẽudee ẽkha wenʉrraju khãyau, tag bʉ̃ʉrjã jãsoo apiba ich mag pãach iiupiejem pan khĩirta athat ajim amag. Mʉch chi Emkhooi Iewaauta mag pan pãar athee wai chirʉm. Mʉch Aai Ẽwandamau pãrau ag na mag nem ooba aajem waumkhĩir juapá deetarrauta nem waaujeewai pãrau mʉ iek ʉkhanaa ichdeuta mʉ pʉitarrjã khaphʉ aju aai nʉmgui ajim.
28Magbaawai amach garmua jũrr irig, —¿Marau khani wauju aai nʉ ajierram, Ẽwandamau nem waupim khõsi simjo aag?
29Magbaawai Jesuu amag magjim:
—Ẽwandamau pãrag waupim khõsi simʉn, mʉʉta warrgarwe ichdeu pʉiju a jaaujerr aawai mua nem jaau chitʉmta pãrag ʉkhapim khõsi simgui ajim.
30Magbaawai deeu amachdeu irig, —Pua deeu maar dakhĩir ag na marau ooba aajemta waukhiin chadau marau chadcha pʉ Ẽwandamauta pʉijim aju. ¿Mamʉ khani pua wau nʉ? ajierram. 31Maimua amachdeupai, Maar jooin õor chukag durr wenʉrraajeewai Moiseeu “maná” anʉm ʉ̃gtharmua khʉipitarrta khojierramgui ajierram. Ich Ẽwandam iek phã sim gaai jaauwaijã, “Ʉ̃gtharmua pan khʉipiwia amag khopijim” a sim. Maagwai puajã, ¿khani wau nʉ? ajierram deeu irig.
32Magbaawai Jesuu amag, —Pari Moiseeu khabajimgui ajim amag pan deetarr; mʉ Ayau khabajieb ajim. Maimua ĩsjã agtha ich mʉ Ayauta ʉ̃gtharm pan pãrag dee sĩebahab; pari ĩsimʉn warr pãar jooinag deejerr khãaijã chi wajapcharamʉugui ajim. 33Magnaa ichdeupai ich igwi, Pari mag pan ich Ẽwandamauta dee sĩewai ʉ̃gtharmuachata beejimgui ajim, õor iiupi awaag.
34Magbaawai amachdeu irig, —Señor, magan mag pan marag ich mag dee chitá ajierram.
35Magbaa Jesuu, —Wajapcharan mʉchpai khabahab ajim, mag pan õor iiupiejem. Mʉig eegarin par pãar thach pom biwaau khowiajã deeu jãsooju. Biwaau do dowiajã deeu obisi aju. Mamʉ chi mʉ iek ʉkhanaa mʉʉta au sim chan tag deeum igbajugui ajim, ich peerdʉ aumkhĩir. 36Mamʉ chaig mʉchdeu pãrag jaau chirarrjo, pãraun mʉ oo naab mamʉ, bʉ̃ʉrjã mʉ iek ʉkhaba nʉmgui ajim. 37Thum mʉ Ayau mʉ iek ʉkhapi nʉm khʉʉnaun mʉ ig nʉm. Mag mʉch ig nʉm khʉʉnan mua aub khaba aujugui ajim. 38Mʉ chan sĩi mʉchdeu am aig nem wawaagjã ʉ̃gtharmua beebajim. Mʉʉn mʉch Ayau mʉchig nem mag abaawai i ipierr aagta beejimgui ajim, ichdeuta mʉ pʉitarr aawai. 39Ich chi mʉ pʉitarr Jooiraujã khõsi simʉn, mag ya mʉch õorkha thʉnʉm khʉʉn eem ãbjã okhoopiba, sĩi mʉg durr o nʉm edjã deeu phiriutkha aupim khõsita simgui ajim. 40Mʉ Ayaun, ar mʉ igwia “Jãata chadcha i Iewaau” anaa mʉ iek ʉkha nʉm khʉʉnta mʉg atag pawiajã ich mag ichjo iiu wenʉrrapim khõsi sim. Pari magaagan mʉg atag mʉg durr o nʉm edjã mʉchdeuta am phiriutkha aujugui ajim ich Jesuu.
41Irua magbarm ee chi judionaan sereu phobaadejim, Jesuu amach jʉ̃gdaar “Mʉʉta ʉ̃gtharmua beetarr Panau” a iekhabaawai. 42Mag sereu phobaadewi amach eepai, —Keena, pari ¿chamʉg Jesús maachdeu oo bãautarr khabá anaajim, José iewaa? Mag simta ¿jãga mag iita ʉ̃gtharmua beetarr abarju? Magan maadeuta i dennaan khaugba naab, i mag iekha chirʉm anaajim.
43Magbaawai jũrr ichdeu amag, —¿Khantheeta pãachig iekhaawaijã pãar den warag magta iekhaajerráma? ajim. 44Chadcha ich mʉ Ayauta mʉ pʉitarr aawai ichdeuta mua õrag jaau chitʉmjã ʉkhapibam chan ni ãbmuajã pod mʉ iek ʉkhabamgui ajim. Ichdeu ʉkhapibaawai ʉkhabarm khʉʉnan chadau mʉg durr o nʉm edjã deeu mua am phiriutkha aujugui ajim. 45Ẽwandam i jaaujerr khʉʉnau ẽsap phã pʉarr gaai jaauwai, ich Ẽwandamauta ich õorkha nʉm khʉʉnag jaaukhamaju a sim, ich iek khaugmamkhĩir. Ichdeucha magtarr aawaita ar thum i iek ũrnaa ʉu i khaugphomam khʉʉnaun mʉjã igjuraugui ajim. 46Mua mag chirʉm chan mag õrau i oojeewai aba chirʉm. Ãba i oowia i khaphʉ simʉn, mʉchta i sim aarmua beetarr aawai mʉchdeupaita i oojemgui ajim. 47Magnaa, Mua mag chirʉmgui ajim: Chi mʉ iek ich thãraucha ʉkha simʉn mʉg atagjã ich mag Ẽwandam denkha sĩsim iekhau. 48Mʉʉta chadcha õor ich mag iiu wenʉrrapiejem Panaugui ajim deeu Jesuu, ich igwia. 49Pãar jooinaun chadcha õor chukag ee durr phʉʉr wenʉrraawai maná khojierram. Amau mag maná khojierrab mamʉ, ichiita khechjierramgui ajim. 50Mamʉ mua jaau chirʉm pan chan mag maná khĩir khabam. Mua mag ʉ̃gtharmua beetarr pan a chirʉmʉn, mʉch jaauwiata mag chirʉmgui ajim. Chi mag panta khobarm wounan ich magta iiu sĩsim iekhau. 51Mʉchta mag pan ʉ̃gtharmua beetarr õor iiupiejem khabahab ajim. Mag panta kho simʉn ich magta iiu sĩsiju. Mamʉ mag panjo mua pãrag deeju a chirʉmʉn, thumaam khʉʉn iiu wenʉrraju aai amkhĩir am kõit ʉdʉraa mʉch thõopijuuta jaau chirʉmgui ajim.
52Amach pem aawai, Jesuu mag iekhabapʉim ũrwia, deeu sereu phobaadewia amach eepai, “¿Jãga jãg simua maachig ichta pankha khopibarju?” aajeejim. 53Jũrram khʉʉnau mamagkham ũrwia Jesuu amag magjim:
—Mʉ cha iekha chirʉm iekhau ar mʉch chi Emkhooi Iewaa modta khowia mʉ bagjã doba sim chan pod ich mag iiu nʉrrabamgui ajim. 54Magarrau chadcha chi mʉ mod khowia mʉ bagjã do sim khʉʉn chadau meewiajã deeu iiu phiidʉwia ich mag iiu sĩsim iekhau ajim. Pari magaagan mʉg atag mʉg durr o nʉm edjã mʉchdeuta deeu ũwaai i phiriu aujugui ajim. 55Mua mag chirʉmʉn, mʉ modouta mʉ bag ãrbarm dʉimua chadcha õor iiupi auju aawaita mag chirʉmgui ajim. 56Chi mʉ mod khonaa mʉ bagjã do simʉn mʉ dʉi khapeerkham iekta khapeerkha sĩsiju. Maagwai mʉch garmuajã i dʉi ich mag khapeerkha chirsijugui ajim. 57Mʉ Aai mʉ pʉitarrjã mee khaugba sĩerraawai mʉchjã i gaaimuata ich mag iiu chitʉm. Maagwai ĩchab chi mʉ modta thachjo wajap kho sim khʉʉn, ich jãg mʉjã mʉch Aai gaaimuata ich mag iiu chitaajemjo, mag wounjã ĩchab mʉ gaaimuata mʉg atag pawiajã ich mag iiu sĩsijugui ajim. 58Muan pãragan mag pãar jooinau maná khoojerr khĩir khaba, ʉ̃gtharmua beetarr panta khopi jaau chirʉmgui ajim. Mag maná õor ich mag iiupiejem khĩir khaba arr aawai par amau kho durrajieb pari mag kho nʉm gaaimuata Ẽwandamau am auju abajim. Mamʉ cha mua pan jaau chirʉmta khobarmʉn chadau Ẽwandamau auwi ich mag ich dʉi wai sĩsijugui ajim.
59Jesuu amag mag iekhatarran Capernaum phobor ee judionaan Ẽwandam iek jaaujem di wai narr eeta mag jaaumajim.
Õor iiupiejem iek
60Jesuu mag jajawagmam ũrwia õor pom i ẽudee wenʉrraajerr khʉʉn ee ãaur khʉʉnau, “Keena, mʉg wounan dau lokta nem jaau nʉrrʉm, ¿khaíu i ipierr abarju?” aajeejim. 61Pari amach eepai mamagkham ich Jesuu khaug athaawai amag magjim:
—¿Mua mag jaau chirʉm ũrwia pãar thãar ee khaigba nʉ? ajim. 62Magan pãach dakhĩir Emkhooi Iewaa deeu ũwaai warr ich sĩerr aar sĩeimaag ʉ̃gthaa papagmam ookhiinjã, pãrau ¿jãga khĩirjukhajĩma? Mag ookhiinjã ¿mʉ chadcha ʉ̃gtharmua beebajim ajupá? ajim. 63Magnaa warre amag, Mua mag mʉch mod khopi jaau chirʉm chan mʉch mod chaarta jaauba chirʉmgui ajim. Mʉ modon chadcha pãrau khowiajã jãgua chan bʉ̃ʉrjã pãar peerdʉ aubajugui ajim, Ẽwandam Akharauta õor iiupiejeewai. Mag mʉ mod chaarta khoju khĩirjuju khãai, cha mua pãach kõit ʉdʉraa mʉch thõopiju jaau chirʉmta ʉkhapi chirʉmgui ajim, chi mag ʉkha nʉm khʉʉnauta Ẽwandam Akhaar õor iiupiejem wai nʉisiju aawai. 64Pari mua mag jaau chirʉm ee pãar ee ãaur khʉʉnau mʉ iek ʉkhaba thʉnʉmgui a iekhamajim.
Jesuu amag mag iekhatarran, warrgarwejã chijã khʉʉnauta i iek chadcha ʉkhaba naaju a khaphʉnaa chijãguata wir aig i oomapham khʉʉnagjã ich pʉr deeju a khaphʉ sĩerr aawaita mag iekhapʉijim.
65Maguata mag iekhamamua, —Chadcha ich mʉ Ayauta mua õrag jaau chitʉmjã ʉkhapibam chan, pod ãbmuajã ʉkhabamgui ajim.
66Jesuu mag iekhatarr aigmua õor pom i dʉi wenʉrraajerr khʉʉn eem khʉʉnaujã i kha ogdʉ pʉawia ya tag i dʉi khaba nʉisijim. 67Mag õor pom ich aigmua ereu thʉnʉm oobaawai maach ichdeucha ich dʉi doce ogdʉba wenʉrramkhĩir thʉ̃rkha autarr khʉʉnagjã, —¿Pãarjã warm khʉʉnjo wetam khõsi nʉwi? ajim marag.
68Magbaawai Simón Pedroou irig, —Señor, mag wetwiajã, ¿khai aar maar ereubaadeju? Ãba pʉchdeupaita õor iiupiejem iek wai sĩebahab ajim. 69Maguata marau pʉ iek ʉkhajim. Maimua marau khaphʉ nʉm, pʉ chadcha Ẽwandam Iewaa pekau chukhu khitʉm khabahab ajim, ichdeu pʉiju a jaaujerr.
70Simón Pedroou ichig magbaawai Jesuu jũrr, —Chadcha mʉchdeuta mua pãar doce thʉ̃rkha aujimgui ajim, mʉch dʉi ogdʉba wenʉrramkhĩir. Magjieb mamʉ pãar ee ãb meperau por meu simgui ajim.
71Jesuu mag sĩerran, Simón Iscariote iewaa Judas aajerr igwiata mag sĩejim. Mag Judas chadcha ĩchab ichdeucha maar doce thʉ̃rkha autarr eem ajim. Pari magua i kha ukhurm khʉʉnag ich pʉr deeju khaphʉ sĩerr aawaita mag iekhajim marag.
Currently Selected:
San Juan 6: noaA
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.