YouVersion Logo
Search Icon

ܡܙܡܘܪ̈ܐ 116 (ܩܝܘ)

116 (ܩܝܘ)
1ܡܘܼܚܸܒ ܠܝܼ ܠܡܵܪܝܵܐ ܣܵܒܵܒ ܫܡܝܼܥ ܠܹܗ
ܩܵܠܝܼ ܘܦܲܪ̈ܦܲܠܝܵܬܝܼ.
2ܣܵܒܵܒ ܡܘܼܟܸܦ ܠܹܗ ܢܵܬܹܗ ܐܸܠܝܼ،
ܒܝܘܼܪܟ݂ܵܐ ܕܝܵܘܡܵܢܝܼ̈ ܒܸܬ ܩܵܪܹܝܢ ܐܸܠܹܗ.
3ܟܪܝܼܟܸܢܗܘܿܢ ܚܸܒ݂ܠܹ̈ܐ ܕܡܵܘܬܵܐ،
ܘܡܘܼܫ݇ܟ̰ܚܸܢܗܘܿܢ ܐܘܼܠܨܵܢܹ̈ܐ ܕܫܝܘܿܠ،
ܥܵܘܩܵܢܵܐ ܘܚܲܫܵܐ ܡܘܼܫ݇ܟ̰ܸܚ ܠܝܼ.
4ܗ̇ܝܓܵܗ ܒܫܸܡܵܐ ܕܡܵܪܝܵܐ ܩܪܹܐ ܠܝܼ،
”ܐܘܿܗ، ܝܵܐ ܡܵܪܝܵܐ، ܦܲܨܝܼ ܠܓܵܢܝܼ.“
5ܚܲܢܵܢܵܐ ܝܠܹܗ ܡܵܪܝܵܐ ܘܙܲܕܝܼܩܵܐ،
ܘܐܲܠܵܗܲܢ ܡܪܲܚܡܵܢܵܐ ܝܠܹܗ.
6ܟܹܐ ܢܵܛܹܪ ܠܦܫܝܼ̈ܛܹܐ ܡܵܪܝܵܐ،
ܦܝܼܫ ܠܝܼ ܡܘܼܟܸܦܵܐ ܘܩܲܡ ܦܲܪܸܩ ܠܝܼ.
7ܕܘܼܪܝ، ܝܵܐ ܓܵܢܝܼ، ܠܢܝܵܚܬܵܟ݂ܝ،
ܣܵܒܵܒ ܡܵܪܝܵܐ ܦܪܝܼܥ ܠܹܗ ܐܸܠܵܟ݂ܝ ܒܦܸܪܝܘܼܬܵܐ.
8ܣܵܒܵܒ ܦܘܼܨܹܐ ܠܘܼܟ݂ ܓܵܢܝܼ ܡ̣ܢ ܡܵܘܬܵܐ،
ܥܲܝܢܝܼ ܡ̣ܢ ܕܸܡܥܬܵܐ،
ܐܲܩܠܝܼ ܡ̣ܢ ܬܲܪܩܲܠܬܵܐ.
9ܒܸܬ ܚܵܕܪܹܢ ܩܵܕ݇ܡ ܡܵܪܝܵܐ
ܒܐܲܪ̈ܥܵܬܹܐ ܕܚܵܝܹ̈ܐ.
10ܗܘܼܡܸܢܝܼ ܟܲܕ ܗܘܼܡܙܸܡ ܠܝܼ،
”ܐܵܢܵܐ ܦܝܼܫ ܠܝܼ ܡܘܼܠܝܸܨܵܐ ܪܵܒܵܐ.“
11ܐܵܢܵܐ ܐ݇ܡܝܼܪܝܼ ܓܵܘ ܡܲܠܝܲܙܬܝܼ،
”ܟܠ ܒܲܪܢܵܫܵܐ ܕܲܓܵܠܵܐ ܝܠܹܗ.“
12ܡܘܿܕܝܼ ܡܲܕܸܪܸܢ ܠܡܵܪܝܵܐ،
ܒܘܼܬ ܟܠܲܝܗܝ ܦܘܼܪ̈ܥܵܢܘܼܗܝ ܐܸܠܝܼ؟
13ܟܵܣܵܐ ܕܦܘܼܪ̈ܩܵܢܹܐ ܒܸܬ ܡܲܪܡܸܢ،
ܘܒܫܸܡܵܐ ܕܡܵܪܝܵܐ ܒܸܬ ܩܵܪܹܝܢ.
14ܢܸܕܪ̈ܝܼ ܠܡܵܪܝܵܐ ܒܸܬ ܬܲܡܸܡܸܢ
ܩܵܕ݇ܡ ܦܵܬܵܐ ܕܟܠܹܗ ܥܲܡܹܗ.
15ܝܲܩܝܼܪܵܐ ܝܠܹܗ ܒܥܲܝܢܹ̈ܐ ܕܡܵܪܝܵܐ
ܡܵܘܬܵܐ ܕܙܲܕܝܼܩܘܼ̈ܗܝ.
16ܐܘܿܗ، ܝܵܐ ܡܵܪܝܵܐ، ܗܹܐ، ܐܵܢܵܐ ܪܹܓܘܼܟ݂ ܝܼܘܸܢ،
ܪܹܓܘܼܟ݂ ܒܪܘܿܢܵܐ ܕܚܹܕܲܡܬܘܼܟ݂،
ܩܲܡ ܫܵܪܹܝܬ ܠܗܘܿܢ ܐܸܣܘܼܪ̈ܝܼ.
17ܐܸܠܘܼܟ݂ ܒܸܬ ܕܵܒ݂ܚܹܢ ܕܸܒ݂ܚܵܐ ܕܫܵܟܲܪܬܵܐ،
ܘܒܫܸܡܵܐ ܕܡܵܪܝܵܐ ܒܸܬ ܩܵܪܹܝܢ.
18ܢܸܕܪ̈ܝܼ ܠܡܵܪܝܵܐ ܒܸܬ ܬܲܡܸܡܸܢ
ܩܵܕ݇ܡ ܦܵܬܵܐ ܕܟܠܹܗ ܥܲܡܹܗ،
19ܓܵܘ ܕܵܪ̈ܵܬܹܐ ܕܒܲܝܬܵܐ ܕܡܵܪܝܵܐ،
ܒܓܵܘܵܟ݂ܝ، ܝܵܐ ܐܘܿܪܸܫܠܸܡ. ܗܲܠܸܠܘܼܝܵܐ.

Highlight

Share

Copy

None

Want to have your highlights saved across all your devices? Sign up or sign in