ܡܦܩܢܐ 22
22
ܚܲܡܵܝܬܵܐ ܕܝܵܪܬܘܼܬܵܐ
1”ܐܸܢ ܓܵܢܹܒ݂ ܐ݇ܢܵܫܵܐ ܬܵܘܪܵܐ ܝܲܢ ܥܸܪܒܵܐ، ܘܩܵܛܹܠ ܠܹܗ ܝܲܢ ܙܲܒܸܢܹܗ، ܦܵܪܹܥ ܚܲܡܫܵܐ ܬܵܘܪܹ̈ܐ ܡ̣ܢ ܓܹܒܵܐ ܕܬܵܘܪܵܐ، ܘܐܲܪܒܲܥ ܥܸܪ̈ܒܹܐ ܡ̣ܢ ܓܹܒܵܐ ܕܥܸܪܒܵܐ. 2ܘܐܸܢ ܦܵܐܹܫ ܡܘܼܫ݇ܟ̰ܚܵܐ ܓܹܢܵܒ݂ܵܐ ܒܒܲܝܬܵܐ ܒܸܓܢܵܒ݂ܵܐ، ܘܦܵܐܹܫ ܡܸܚܝܵܐ ܘܡܵܐܹܬ، ܩܵܛܘܿܠܵܐ ܠܲܝܬ ܠܹܗ ܓܢܵܗܵܐ ܠܬܲܦܲܟ݂ܬܵܐ ܕܕܸܡܵܐ. 3ܐܝܼܢܵܐ ܐܸܢ ܝܵܘܡܵܐ ܙܪܝܼܩܵܐ ܝܠܹܗ ܥܲܠܘܼܗܝ، ܩܵܛܘܿܠܵܐ ܐܝܼܬ ܠܹܗ ܓܢܵܗܵܐ. ܓܹܢܵܒ݂ܵܐ ܕܦܵܐܹܫ ܕܒ݂ܝܼܩܵܐ، ܘܵܠܹܐ ܝܠܵܗ̇ ܕܦܵܪܹܥ ܒܘܼܬ ܡܸܢܕܝܼ ܕܓܢܝܼܒ݂ܵܐ ܝܠܹܗ؛ ܐܸܢ ܠܲܝܬ ܠܹܗ ܠܸܦܪܵܥܵܐ، ܦܵܐܹܫ ܙܘܼܒܢܵܐ ܐܲܝܟ݂ ܥܲܒ݂ܕܵܐ ܕܦܵܪܹܥ ܒܘܼܬ ܓܹܢܵܒ݂ܘܼܬܹܗ. 4ܐܸܢ ܗܲܝܘܵܢ ܓܢܝܼܒ݂ܵܐ ܦܵܐܹܫ ܡܘܼܫ݇ܟ̰ܚܵܐ ܚܵܝܵܐ ܒܐܝܼܕܹܗ، ܐܸܢ ܗܵܘܹܐ ܬܵܘܪܵܐ ܝܲܢ ܚܡܵܪܵܐ ܝܲܢ ܥܸܪܒܵܐ، ܦܵܪܹܥ ܚܲܕ ܒܬܪܹܝ.
5ܐܸܢ ܡܲܪܥܹܐ ܐ݇ܢܵܫܵܐ ܚܲܩܠܵܐ ܝܲܢ ܟܲܪܡܵܐ، ܝܲܢ ܕܵܪܹܐ ܩܸܢܝܵܢܘܼ̈ܗܝ ܒܚܲܩܠܵܐ ܕܚܲܕ ܐ݇ܚܹܪ݇ܢܵܐ ܘܡܲܪܥܹܐ ܠܵܗ̇، ܦܵܪܹܥ ܠܡܵܪܵܐ ܕܚܲܩܠܵܐ ܡ̣ܢ ܡܸܢܕܝܼ ܒܘܼܫ ܨܦܵܝܝܼ ܕܐܝܼܬ ܠܹܗ ܕܚܲܩܠܹܗ ܝܲܢ ܕܟܲܪܡܹܗ.
6ܐܸܢ ܢܵܦܹܠ ܢܘܼܪܵܐ ܘܡܵܛܹܐ ܠܟܸܬܘܹ̈ܐ، ܘܡܲܩܸܕ ܓܕܝܼܫܵܐ، ܝܲܢ ܕܲܚܠܵܐ ܕܥܲܠ ܐܲܩܠܘܼܗ̇، ܝܲܢ ܠܚܲܩܠܵܐ ܒܓܵܢܘܼܗ̇، ܦܪܵܥܵܐ ܦܵܪܹܥ ܗ̇ܘ ܕܫܘܼܪܹܐ ܠܹܗ ܢܘܼܪܵܐ.
7ܐܸܢ ܐ݇ܢܵܫܵܐ ܣܲܦܹܐ ܙܘܼܙܹ̈ܐ ܝܲܢ ܡܵܐܢܹ̈ܐ ܛܝܼܡܵܢܹ̈ܐ ܠܚܲܕ ܐ݇ܢܵܫܵܐ ܐ݇ܚܹܪ݇ܢܵܐ ܕܢܵܛܹܪܗܘܿܢ، ܘܦܵܝܫܝܼ ܓܢܝܼܒܹܐ ܡ̣ܢ ܒܲܝܬܵܐ ܕܗ̇ܘ ܐ݇ܢܵܫܵܐ، ܐܸܢ ܦܵܐܹܫ ܕܒ݂ܝܼܩܵܐ ܓܹܢܵܒ݂ܵܐ، ܦܵܪܹܥ ܚܲܕ ܒܬܪܹܝ. 8ܐܝܼܢܵܐ ܐܸܢ ܠܵܐ ܦܵܐܹܫ ܡܘܼܫ݇ܟ̰ܚܵܐ ܓܹܢܵܒ݂ܵܐ، ܐܵܬܹܐ ܡܵܪܵܐ ܕܒܲܝܬܵܐ ܠܟܸܣ ܕܲܝܵܢܹ̈ܐ، ܕܥܵܒ݂ܕܝܼ ܩܛܵܥܬܵܐ ܐܸܢ ܗ̇ܘ ܓܢܝܼܒ݂ܵܐ ܝܠܹܗ ܡܸܢܕܝܼ ܕܫܒ݂ܵܒܹܗ.
9ܒܘܼܬ ܟܠ ܫܘܼܠܵܐ ܠܵܐ ܡܗܘܼܡܢܵܐ: ܐܸܢ ܗܵܘܹܐ ܒܘܼܬ ܬܵܘܪܵܐ، ܝܲܢ ܚܡܵܪܵܐ، ܝܲܢ ܥܸܪܒܵܐ، ܝܲܢ ܓ̰ܘܼܠܹ̈ܐ، ܝܲܢ ܒܘܼܬ ܟܠ ܡܸܢܕܝܼ ܐ݇ܚܹܪ݇ܢܵܐ ܛܠܝܼܩܵܐ، ܗ̇ܘ ܕܐܵܡܹܪ ܐ݇ܢܵܫܵܐ ܒܘܼܬ ܕܝܼܹܗ، ’ܐܵܗܵܐ ܕܝܼܝܼ ܝܠܹܗ،‘ ܐܵܬܝܼ ܬܸܪܘܲܝܗܝ ܠܟܸܣ ܕܲܝܵܢܹ̈ܐ؛ ܘܗ̇ܘ ܕܥܵܒ݂ܕܝܼ ܠܹܗ ܡܵܪܵܐ ܕܓܢܵܗܵܐ ܕܲܝܵܢܹ̈ܐ، ܦܵܪܹܥ ܚܲܕ ܒܬܪܹܝ ܠܗ̇ܘ ܐ݇ܚܹܪ݇ܢܵܐ.
10ܘܐܸܢ ܐ݇ܢܵܫܵܐ ܣܲܦܹܐ ܠܫܒ݂ܵܒܹܗ ܚܡܵܪܵܐ، ܝܲܢ ܬܵܘܪܵܐ، ܝܲܢ ܥܸܪܒܵܐ، ܝܲܢ ܗܲܝܘܵܢ ܐ݇ܚܹܪ݇ܢܵܐ ܕܦܵܐܹܫ ܢܛܝܼܪܵܐ، ܘܡܵܐܹܬ ܗܲܝܘܵܢ، ܝܲܢ ܦܵܐܹܫ ܚܘܼܙܕܸܓܵܐ، ܝܲܢ ܣܠܝܼܒܵܐ، ܘܐܘܼܦ ܚܲܕ ܠܵܐ ܗܵܘܹܐ ܚܸܙܝܹܗ، 11ܗ̇ܝܓܵܗ ܡܵܘܡܝܼܬܵܐ ܒܡܵܪܝܵܐ ܗܵܘܝܵܐ ܒܹܝܠ ܬܸܪܘܲܝܗܝ، ܕܐܸܢ ܠܹܐ ܝܠܹܗ ܗ̇ܘ ܦܘܼܫܛܵܐ ܐܝܼܕܵܐ ܠܡܸܢܕܝܼ ܕܫܒ݂ܵܒܹܗ؛ ܘܡܵܪܵܐ ܕܗܲܝܘܵܢ ܠܵܙܸܡ ܩܲܒܸܠ ܚܲܒܪܵܐ ܕܫܒ݂ܵܒܹܗ، ܘܠܹܐ ܗܵܘܝܵܐ ܦܪܵܥܬܵܐ. 12ܐܝܼܢܵܐ ܐܸܢ ܦܵܐܹܫ ܓܢܝܼܒ݂ܵܐ ܡ̣ܢ ܫܒ݂ܵܒ݂ܵܐ، ܗ̇ܝܓܵܗ ܠܵܙܸܡ ܦܵܪܹܥ ܠܡܵܪܵܐ ܕܗܲܝܘܵܢ. 13ܐܸܢ ܦܪܵܛܵܐ ܦܵܐܹܫ ܦܪܝܼܛܵܐ ܒܗܲܝܘܵܢ، ܠܵܙܸܡ ܡܲܝܬܹܐ ܠܵܗ̇ ܫܠܲܕܵܐ ܠܣܵܗܕܘܼܬܵܐ، ܘܠܵܐ ܦܵܪܹܥ ܡܸܢܕܝܼ.
14ܐܸܢ ܡܲܕܝܸܢ ܐ݇ܢܵܫܵܐ ܗܲܝܘܵܢ ܡ̣ܢ ܫܒ݂ܵܒܹܗ، ܘܐܵܬܹܐ ܚܘܼܙܕܵܓܵܐ ܥܲܠܘܼܗܝ ܝܲܢ ܡܵܐܹܬ، ܘܡܵܪܹܗ ܠܹܐ ܗܵܘܹܐ ܠܟܸܣ ܠܹܗ، ܦܵܐܹܫ ܦܪܝܼܥܵܐ ܛܝܼܡܵܐ ܕܗܲܝܘܵܢ. 15ܐܝܼܢܵܐ ܐܸܢ ܡܵܪܹܗ ܗܵܘܹܐ ܠܟܸܣ ܠܹܗ، ܠܵܐ ܦܵܐܹܫ ܦܪܝܼܥܵܐ. ܐܸܢ ܕܒ݂ܝܼܩܵܐ ܝܗ݇ܘܵܐ ܒܗܵܩܵܐ، ܗܵܩܹܗ ܗܵܘܹܐ ܡ̣ܢ ܓܹܒܹܗ.
ܡܸܫܬܲܐܠܵܢܘܼܝܵܬܹ̈ܐ ܫܵܘܬܵܦܵܝܹ̈ܐ
16”ܐܸܢ ܐ݇ܢܵܫܵܐ ܫܲܕܸܠ ܒܬܘܼܠܬܵܐ ܕܠܹܐ ܝܠܵܗ̇ ܛܠܝܼܒܬܵܐ، ܘܕܵܡܹܟ݂ ܥܲܡܘܼܗ̇، ܦܵܪܹܥ ܢܸܓܕܵܐ ܘܫܵܩܹܠ ܠܵܗ̇ ܐܸܠܹܗ ܠܒܲܟ݂ܬܵܐ. 17ܐܝܼܢܵܐ ܐܸܢ ܒܵܒܘܼܗ̇ ܠܵܐ ܒܵܣܡܵܐ ܠܹܗ ܕܝܲܗ݇ܒܸܠ ܠܵܗ̇ ܐܸܠܹܗ، ܢܸܓܕܵܐ ܗܲܪ ܦܵܪܹܥ ܠܹܗ ܐܲܝܟ݂ ܢܸܓܕܵܐ ܕܒܬܘܼܠܵܬܹ̈ܐ. 18ܚܲܪܵܫܬܵܐ ܠܵܐ ܫܵܒ݂ܩܹܬ ܕܚܵܝܵܐ. 19ܟܠ ܕܕܵܡܹܟ݂ ܥܲܡ ܗܲܝܘܵܢ ܡܝܵܬܵܐ ܦܵܐܹܫ ܡܘܼܡܝܸܬܵܐ. 20ܟܠ ܕܡܲܩܪܸܒ݂ ܕܸܒ݂ܚܵܐ ܠܐܲܠܵܗܹ̈ܐ، ܫܒ݂ܘܿܩ ܡ̣ܢ ܠܡܵܪܝܵܐ ܒܢܲܦ̮ܫܹܗ، ܦܵܐܹܫ ܡܘܼܚܪܸܡܵܐ.
21ܠܵܐ ܛܵܠܡܹܬ ܠܡܵܫܵܚܲܛ ܘܠܵܐ ܡܲܥܝܸܩܸܬ ܠܹܗ، ܣܵܒܵܒ ܐܘܼܦ ܐܲܚܬܘܿܢ ܡܵܫܵܚܲܛܹ̈ܐ ܝܬܘܿܢ ܗ݇ܘܵܘ ܒܐܲܪܥܵܐ ܕܡܸܨܪܹܝܢ. 22ܠܵܐ ܡܲܠܝܸܨܝܼܬܘܿܢ ܠܐܲܪܡܸܠܬܵܐ ܝܲܢ ܠܝܵܬܘܿܡܵܐ. 23ܐܸܢ ܡܲܠܝܸܨܝܼܬܘܿܢ ܠܗܘܿܢ، ܘܡܲܩܘܸܚܝܼ ܐܸܠܝܼ، ܫܡܵܥܵܐ ܒܸܬ ܫܵܡܥܹܢ ܠܡܲܩܘܲܚܬܲܝܗܝ، 24ܘܒܸܬ ܚܵܝܡܵܐ ܟܲܪܒܝܼ ܘܒܸܬ ܩܵܛܠܹܢܵܘܟ݂ܘܿܢ ܒܣܲܝܦܵܐ؛ ܒܸܬ ܗܵܘܝܼ ܒܲܟ݂ܬܵܬܵܘ̈ܟ݂ܘܿܢ ܐܲܪ̈ܡܸܠܝܵܬܹܐ، ܘܒܢܘܿܢܵܘ̈ܟ݂ܘܿܢ ܝܵܬܘܿܡܹ̈ܐ.
25ܐܸܢ ܝܵܗ݇ܒܹܬ ܙܘܼܙܵܐ ܒܕܲܝܢܵܐ ܠܡܸܣܟܹܢܵܐ ܕܝܼܠܹܗ ܥܲܡܘܼܟ݂ ܒܛܵܝܸܦܝܼ، ܠܵܐ ܗܵܘܹܝܬ ܐܸܠܹܗ ܐܲܝܟ݂ ܡܲܕܝܸܢܵܢܵܐ، ܠܵܐ ܡܲܬܒ݂ܝܼܬܘܿܢ ܥܲܠܘܼܗܝ ܙܵܘܕܘܼܢܝܵܐ. 26ܐܸܢ ܫܩܵܠܵܐ ܫܵܩܠܹܬ ܪܲܗܒ݂ܘܿܢܵܐ ܠܒ݂ܘܼܫܵܐ ܕܫܒ݂ܵܒ݂ܘܼܟ݂، ܡܲܕܸܪܸܬ ܠܹܗ ܡ̣ܢ ܩܵܕ݇ܡ ܓܢܵܝܬܵܐ ܕܫܸܡܫܵܐ، 27ܣܵܒܵܒ ܗܲܪ ܗ̇ܘ ܝܠܹܗ ܟܲܣܵܝܬܹܗ، ܘܠܒ݂ܝܼܫܬܵܐ ܩܵܐ ܦܲܓ݂ܪܹܗ؛ ܒܡܘܿܕܝܼ ܒܸܬ ܕܵܡܹܟ݂؟ ܘܐܸܢ ܡܲܩܘܸܚ ܐܸܠܝܼ، ܒܸܬ ܫܵܡܥܹܢ، ܣܵܒܵܒ ܡܪܲܚܡܵܢܵܐ ܝܘܸܢ.
28ܠܵܐ ܨܲܥܪܸܬ ܠܕܲܝܵܢܹ̈ܐ، ܘܠܵܐ ܠܵܝܛܹܬ ܠܓܘܼܪܵܐ ܕܥܲܡܘܼܟ݂.
29ܠܵܐ ܥܲܪܩܸܠܸܬ ܠܡܲܩܪܘܼܒܹܐ ܡ̣ܢ ܡܸܠܝܘܼܬܵܐ ܕܚܸܨܕܘܼܟ݂ ܘܕܡܲܥܨܲܪܬܘܼܟ݂؛ ܘܝܵܗ݇ܒܹܬ ܐܸܠܝܼ ܒܘܼܟ݂ܪܵܐ ܕܒܢܘܿܢܘܼ̈ܟ݂. 30ܥܵܒ݂ܕܹܬ ܗܲܕܟ݂ܵܐ ܐܘܼܦ ܠܬܵܘܪܘܼܟ݂ ܘܠܥܸܪܒܘܼܟ݂: ܫܲܒ݂ܥܵܐ ܝܵܘܡܵܢܹ̈ܐ ܗܵܘܹܐ ܠܟܸܣ ܝܸܡܹܗ، ܘܒܝܵܘܡܵܐ ܕܬܡܵܢܝܵܐ ܝܵܗ݇ܒܹܬ ܠܹܗ ܐܸܠܝܼ.
31ܐ݇ܢܵܫܹ̈ܐ ܩܲܕܝܼܫܹ̈ܐ ܗܵܘܹܝܬܘܿܢ ܐܸܠܝܼ؛ ܒܸܣܪܵܐ ܕܗܲܝܘܵܢ ܦܪܝܼܛܵܐ ܒܕܸܫܬܵܐ ܠܵܐ ܐܵܟ݂ܠܝܼܬܘܿܢ؛ ܪܲܦܸܝܬܘܿܢ ܠܹܗ ܩܵܕ݇ܡ ܟܲܠܒܹ̈ܐ.
Currently Selected:
ܡܦܩܢܐ 22: ABTAB
Highlight
Copy
Compare
Share
Want to have your highlights saved across all your devices? Sign up or sign in
Aramaic Bible Translation Assyrian Bible © 2025 Aramaic Bible Translation
