ܡܦܩܢܐ 21

ܩܵܢܘܿܢܹ̈ܐ ܒܘܼܬ ܪܹ̈ܓܵܘܵܬܹܐ

1”ܐܲܢܹܐ ܝܢܵܐ ܩܵܢܘܿܢܹ̈ܐ ܕܡܲܬܒܸܬ ܩܵܕ݇ܡܲܝܗܝ: 2ܐܸܢ ܙܵܒ݂ܢܹܬ ܥܲܒ݂ܕܵܐ ܥܸܒ݂ܪܵܝܵܐ، ܦܵܠܹܚ ܐܸܫܸܬ ܫܸܢܹ̈ܐ؛ ܐܝܼܢܵܐ ܒܫܹܢ݇ܬܵܐ ܕܫܒܲܥ ܦܵܠܹܛ ܚܹܐܪܵܐ، ܕܠܵܐ ܦܪܵܥܬܵܐ ܕܙܘܼܙܵܐ. 3ܐܸܢ ܒܢܲܦ̮ܫܹܗ ܐܵܬܹܐ، ܒܢܲܦ̮ܫܹܗ ܦܵܠܹܛ؛ ܐܝܼܢܵܐ ܐܸܢ ܐܝܼܬ ܠܹܗ ܒܲܟ݂ܬܵܐ، ܦܵܠܛܵܐ ܐܘܼܦ ܒܲܟ݂ܬܹܗ ܥܲܡܹܗ. 4ܐܸܢ ܡܵܪܹܗ ܝܲܗ݇ܒܸܠ ܠܹܗ ܒܲܟ݂ܬܵܐ، ܘܝܵܠܕܵܐ ܩܵܬܹܗ ܒܢܘܿܢܹ̈ܐ ܝܲܢ ܒܢܵܬܹ̈ܐ، ܒܲܟ݂ܬܹܗ ܘܝܵܠܕ݇ܘܼ̈ܗ̇ ܦܵܝܫܝܼ ܩܵܐ ܡܵܪܹܗ، ܘܗ̇ܘ ܦܵܠܹܛ ܒܢܲܦ̮ܫܹܗ. 5ܐܝܼܢܵܐ ܐܸܢ ܐ݇ܡܵܪܵܐ ܐܵܡܹܪ ܥܲܒ݂ܕܵܐ، ’ܟܹܐ ܡܲܚܸܒܸܢ ܠܡܵܪܝܼ، ܠܒܲܟ݂ܬܝܼ ܘܠܒܢܘܿܢܝܼ̈؛ ܠܹܐ ܒܵܥܹܝܢ ܕܦܵܠܛܹܢ ܚܹܐܪܵܐ،‘ 6ܗ̇ܝܓܵܗ ܡܲܝܬܹܐ ܠܹܗ ܡܵܪܹܗ ܠܟܸܣ ܕܲܝܵܢܹ̈ܐ، ܠܟܸܣ ܬܲܪܥܵܐ، ܝܲܢ ܠܟܸܣ ܫܝܼܦܵܢܹ̈ܐ، ܘܒܵܙܹܥ ܡܵܪܹܗ ܠܢܵܬܹܗ ܒܒܵܙܘܿܥܵܐ، ܘܦܵܠܹܚ ܐܸܠܹܗ ܟܠܲܝܗܝ ܚܲܝܘܼ̈ܗܝ.

ܩܵܢܘܿܢܹ̈ܐ ܒܘܼܬ ܚܹܕܲܡܝܵܬܹ̈ܐ

7”ܐܸܢ ܐ݇ܢܵܫܵܐ ܙܲܒܸܢ ܒܪܵܬܹܗ ܕܗܵܘܝܵܐ ܚܹܕܲܡܬܵܐ، ܠܵܐ ܦܵܠܛܵܐ ܐܲܝܟ݂ ܕܦܵܠܛܝܼ ܥܲܒ݂ܕܹ̈ܐ. 8ܐܸܢ ܣܪܝܼܬܵܐ ܝܠܵܗ̇ ܒܥܲܝܢܹ̈ܐ ܕܡܵܪܘܼܗ̇، ܗ̇ܘ ܕܪܫܝܼܡܘܼܗ̇ ܝܠܹܗ ܩܵܐ ܓܵܢܹܗ، ܫܵܒܹܩ ܠܵܗ̇ ܕܦܵܝܫܵܐ ܡܘܼܕܸܪܬܵܐ؛ ܐܝܼܢܵܐ ܠܲܝܬ ܠܹܗ ܫܘܼܠܛܵܢܵܐ ܕܙܲܒܹܢܵܗ̇ ܠܥܲܡܵܐ ܢܘܼܟ݂ܪܵܝܵܐ، ܣܵܒܵܒ ܗ̇ܘ ܥܒ݂ܝܼܕܵܐ ܝܠܹܗ ܦܸܠܡܵܐ ܐܸܠܘܼܗ̇. 9ܐܸܢ ܛܵܠܹܒ ܠܵܗ̇ ܩܵܐ ܒܪܘܿܢܹܗ، ܗ̇ܝܓܵܗ ܚܲܫܒܸܢܵܗ̇ ܐܲܝܟ݂ ܒܪܵܬܹܗ. 10ܐܝܼܢܵܐ ܐܸܢ ܓܵܒܹܪ ܚܕܵܐ ܒܲܟ݂ܬܵܐ ܐ݇ܚܹܪ݇ܬܵܐ، ܠܵܐ ܡܲܒܨܸܪ ܡ̣ܢ ܬܘܼܪܣܵܝܘܼܗ̇، ܠܵܐ ܡ̣ܢ ܠܒ݂ܝܼܫܬܘܼܗ̇، ܘܠܵܐ ܡ̣ܢ ܕܡܵܟ݂ܵܐ ܥܲܡܘܼܗ̇ ܐܲܝܟ݂ ܒܲܟ݂ܬܹܗ. 11ܐܸܢ ܠܵܐ ܥܵܒܹܕ ܐܲܢܹܐ ܬܠܵܬܵܐ ܡܸܢܕܝܼܵܢܹ̈ܐ ܐܸܠܘܼܗ̇، ܦܵܠܛܵܐ ܚܹܐܪܬܵܐ ܚܘܼܪܵܝܝܼ، ܕܠܵܐ ܦܪܵܥܬܵܐ ܕܙܘܼܙܵܐ.“

ܩܵܢܘܿܢܹ̈ܐ ܒܘܼܬ ܩܛܵܠܵܐ

12”ܗ̇ܘ ܕܡܵܚܹܐ ܠܐ݇ܢܵܫܵܐ ܘܡܵܐܹܬ، ܡܝܵܬܵܐ ܦܵܐܹܫ ܡܘܼܡܝܸܬܵܐ. 13ܐܝܼܢܵܐ ܐܸܢ ܠܹܐ ܝܗ݇ܘܵܐ ܥܒ݂ܝܼܕܵܐ ܒܘܼܨܵܐ ܥܲܠܘܼܗܝ، ܐܸܠܵܐ ܐܲܠܵܗܵܐ ܫܒ݂ܝܼܩ ܠܹܗ ܐܸܠܹܗ ܕܢܵܦܹܠ ܒܐܝܼܕܹܗ، ܗ̇ܝܓܵܗ ܒܸܬ ܪܵܫܡܹܢ ܐܸܠܘܼܟ݂ ܕܘܼܟܵܐ ܕܥܵܪܹܩ ܗ̇ܘ ܠܬܵܡܵܐ. 14ܐܝܼܢܵܐ ܐܸܢ ܐ݇ܢܵܫܵܐ ܒܠܹܐܒܹ̈ܐ ܡܵܚܹܐ ܠܚܲܒ݂ܪܹܗ ܠܸܩܛܵܠܹܗ، ܘܒܨܸܒ݂ܝܵܢܵܐ ܩܵܛܹܠ ܐܸܠܹܗ، ܫܵܩܠܹܬ ܠܹܗ ܡ̣ܢ ܡܲܕܒܚܝܼ ܕܡܵܐܹܬ. 15ܗ̇ܘ ܕܡܵܚܹܐ ܠܒܵܒܘܼܗܝ ܝܲܢ ܠܝܸܡܹܗ، ܡܝܵܬܵܐ ܦܵܐܹܫ ܡܘܼܡܝܸܬܵܐ. 16ܗ̇ܘ ܕܓܵܢܹܒ݂ ܐ݇ܢܵܫܵܐ، ܐܸܢ ܙܲܒܸܢܹܗ ܝܲܢ ܦܵܐܹܫ ܡܫ݇ܟ̰ܝܼܚܵܐ ܠܟܸܣ ܠܹܗ، ܡܝܵܬܵܐ ܦܵܐܹܫ ܡܘܼܡܝܸܬܵܐ. 17ܗ̇ܘ ܕܨܲܥܸܪ ܠܒܵܒܘܼܗܝ ܝܲܢ ܠܝܸܡܹܗ، ܡܝܵܬܵܐ ܦܵܐܹܫ ܡܘܼܡܝܸܬܵܐ.

ܒܘܼܬ ܡܚܵܝܵܬܹ̈ܐ

18”ܐܸܢ ܡܲܩܪܸܨܝܼ ܐ݇ܢܵܫܹ̈ܐ، ܘܚܲܕ ܡܵܚܹܐ ܠܚܲܒ݂ܪܹܗ ܒܟܹܐܦܵܐ ܝܲܢ ܒܠܘܼܟܡܵܐ، ܘܠܵܐ ܡܵܐܹܬ، ܐܸܠܵܐ ܢܵܦܹܠ ܒܫܘܝܼܬܵܐ، 19ܐܝܼܢܵܐ ܐܸܢ ܩܵܐܹܡ ܘܚܵܕܹܪ ܠܒܲܕܲܪ ܒܚܘܼܛܪܹܗ، ܗ̇ܝܓܵܗ ܡܵܚܝܵܢܵܐ ܗܵܘܹܐ ܙܲܟܵܝܵܐ؛ ܐܲܚܟ̰ܝܼ ܦܵܪܹܥ ܐܸܠܹܗ ܩܵܐ ܥܕܵܢܵܐ ܕܒܛܵܠܬܹܗ ܘܗܲܠ ܚܘܼܠܡܵܢܹܗ ܓܡܝܼܪܵܐ. 20ܐܸܢ ܡܵܚܹܐ ܐ݇ܢܵܫܵܐ ܠܥܲܒ݂ܕܹܗ ܝܲܢ ܠܚܹܕܲܡܬܹܗ ܒܚܘܼܛܪܵܐ ܘܡܵܐܹܬ ܬܚܘܿܬ ܐܝܼܕܹܗ، ܬܘܼܥܠܵܐ ܦܵܝܫܵܐ ܫܩܝܼܠܬܵܐ ܡܸܢܹܗ. 21ܐܝܼܢܵܐ ܐܸܢ ܚܵܝܹܐ ܪܹܓܵܐ ܚܲܕ ܝܵܘܡܵܐ ܝܲܢ ܬܪܹܝ، ܠܵܐ ܦܵܝܫܵܐ ܫܩܝܼܠܬܵܐ ܬܘܼܥܠܵܐ ܡ̣ܢ ܡܵܪܹܗ؛ ܣܵܒܵܒ ܡܘܼܠܟܵܢܵܐ ܕܡܵܪܹܗ ܝܠܹܗ.

22ܘܟܲܕ ܡܲܩܪܸܨܝܼ ܬܪܹܝ ܐ݇ܢܵܫܹ̈ܐ، ܘܡܵܚܝܼ ܠܒܲܟ݂ܬܵܐ ܒܛܝܼܢܬܵܐ ܘܦܵܠܹܛ ܝܵܠܕ݇ܘܼܗ̇، ܐܝܼܢܵܐ ܠܵܐ ܗܵܘܹܐ ܚܘܼܙܕܵܓܵܐ، ܦܪܵܥܵܐ ܦܵܪܹܥ ܡܵܚܝܵܢܵܐ ܕܵܐܟ݂ܝܼ ܕܡܲܬܸܒ݂ ܥܲܠܘܼܗܝ ܓܲܒ݂ܪܵܐ ܕܒܲܟ݂ܬܵܐ، ܘܝܲܗ݇ܒܸܠ ܓ̰ܵܪܝܼܡܹܗ ܐܲܝܟ݂ ܩܛܵܥܬܵܐ ܕܕܲܝܵܢܹ̈ܐ. 23ܐܝܼܢܵܐ ܐܸܢ ܗܵܘܹܐ ܚܘܼܙܕܵܓܵܐ، ܝܵܗ݇ܒܹܬ ܓܵܢܵܐ ܡ̣ܢ ܓܹܒܵܐ ܕܓܵܢܵܐ، 24ܥܲܝܢܵܐ ܡ̣ܢ ܓܹܒܵܐ ܕܥܲܝܢܵܐ، ܟܹܟܵܐ ܡ̣ܢ ܓܹܒܵܐ ܕܟܹܟܵܐ، ܐܝܼܕܵܐ ܡ̣ܢ ܓܹܒܵܐ ܕܐܝܼܕܵܐ، ܐܲܩܠܵܐ ܡ̣ܢ ܓܹܒܵܐ ܕܐܲܩܠܵܐ، 25ܟܘܵܝܵܐ ܡ̣ܢ ܓܹܒܵܐ ܕܟܘܵܝܵܐ، ܕܲܪܒܵܐ ܡ̣ܢ ܓܹܒܵܐ ܕܕܲܪܒܵܐ، ܡܚܵܝܬܵܐ ܡ̣ܢ ܓܹܒܵܐ ܕܡܚܵܝܬܵܐ. 26ܐܸܢ ܡܵܚܹܐ ܐ݇ܢܵܫܵܐ ܠܥܲܝܢܵܐ ܕܥܲܒ݂ܕܵܐ ܝܲܢ ܕܚܹܕܲܡܬܹܗ، ܘܡܲܚܪܸܒ݂ ܠܵܗ̇، ܫܲܕܸܪܹܗ ܚܹܐܪܵܐ ܡ̣ܢ ܓܹܒܵܐ ܕܥܲܝܢܹܗ. 27ܘܐܸܢ ܫܵܡܹܛ ܟܹܟܵܐ ܕܥܲܒ݂ܕܹܗ ܝܲܢ ܕܚܹܕܲܡܬܹܗ، ܫܲܕܸܪܹܗ ܚܹܐܪܵܐ ܡ̣ܢ ܓܹܒܵܐ ܕܟܹܟܹܗ.

28ܐܸܢ ܬܵܘܪܵܐ ܡܵܚܹܐ ܒܩܵܪ݇ܢܵܐ ܠܐ݇ܢܵܫܵܐ ܝܲܢ ܠܒܲܟ݂ܬܵܐ ܠܡܵܘܬܵܐ، ܪܓ̰ܵܡܵܐ ܦܵܐܹܫ ܪܓ̰ܝܼܡܵܐ ܬܵܘܪܵܐ، ܘܒܸܣܪܹܗ ܠܵܐ ܦܵܐܹܫ ܐ݇ܟ݂ܝܼܠܵܐ؛ ܐܝܼܢܵܐ ܡܵܪܵܐ ܕܬܵܘܪܵܐ ܗܵܘܹܐ ܚܹܐܪܵܐ. 29ܐܝܼܢܵܐ ܐܸܢ ܬܵܘܪܵܐ ܐܝܼܬ ܗ݇ܘܵܐ ܠܹܗ ܥܝܵܕܵܐ ܕܡܚܵܝܬܵܐ ܒܩܵܪ݇ܢܵܐ ܡ̣ܢ ܩܵܕ݇ܡܵܝܬܵܐ، ܘܦܝܼܫܬܵܐ ܝܗ݇ܘܵܐ ܣܗܝܼܕܬܵܐ ܒܘܼܬ ܕܝܼܹܗ، ܐܝܼܢܵܐ ܡܵܪܹܗ ܠܹܐ ܝܗ݇ܘܵܐ ܢܛܝܼܪܹܗ، ܘܩܵܛܹܠ ܠܐ݇ܢܵܫܵܐ ܝܲܢ ܠܒܲܟ݂ܬܵܐ، ܬܵܘܪܵܐ ܦܵܐܹܫ ܪܓ̰ܝܼܡܵܐ، ܘܡܵܪܹܗ ܦܵܐܹܫ ܡܘܼܡܝܸܬܵܐ. 30ܐܝܼܢܵܐ ܐܸܢ ܦܪܵܥܬܵܐ ܦܵܝܫܵܐ ܡܘܼܬܸܒ݂ܬܵܐ ܥܲܠܘܼܗܝ، ܦܵܪܹܥ ܩܵܐ ܦܵܪܲܩܬܵܐ ܕܓܵܢܹܗ ܐܲܝܟ݂ ܕܝܼܠܵܗ̇ ܦܝܼܫܬܵܐ ܩܛܝܼܥܬܵܐ. 31ܐܸܢ ܡܵܚܹܐ ܬܵܘܪܵܐ ܒܩܵܪ݇ܢܵܐ ܠܒܪܘܿܢܵܐ ܝܲܢ ܠܒܪܵܬܵܐ، ܗܲܪ ܐܵܗܵܐ ܩܵܢܘܿܢܵܐ ܦܵܐܹܫ ܡܘܼܦܠܸܚܵܐ ܐܸܠܹܗ. 32ܐܸܢ ܡܲܚܹܐ ܬܵܘܪܵܐ ܒܩܵܪ݇ܢܵܐ ܠܥܲܒ݂ܕܵܐ ܝܲܢ ܠܚܹܕܲܡܬܵܐ، ܡܵܪܵܐ ܕܬܵܘܪܵܐ ܦܵܪܹܥ ܬܠܵܬܝܼ ܙܘܼܙܹ̈ܐ ܕܣܹܐܡܵܐ، ܘܬܵܘܪܵܐ ܦܵܐܹܫ ܪܓ̰ܝܼܡܵܐ.

33ܐܸܢ ܦܵܬܹܚ ܐ݇ܢܵܫܵܐ ܓܘܼܒܵܐ، ܝܲܢ ܚܵܦܹܪ ܒܹܐܪܵܐ ܘܠܵܐ ܡܲܟܸܣ ܠܹܗ، ܘܢܵܦܹܠ ܒܓܵܘܹܗ ܬܵܘܪܵܐ ܝܲܢ ܚܡܵܪܵܐ، 34ܡܵܪܵܐ ܕܒܹܐܪܵܐ ܦܵܪܹܥ ܙܘܼܙܹ̈ܐ ܠܡܵܪܵܐ ܕܗܲܝܘܵܢ، ܘܡܝܼܬܵܐ ܗܵܘܹܐ ܩܵܬܹܗ.

35ܐܸܢ ܬܵܘܪܵܐ ܕܚܲܕ ܐ݇ܢܵܫܵܐ ܡܵܚܹܐ ܠܬܵܘܪܵܐ ܕܚܲܕ ܐ݇ܢܵܫܵܐ ܐ݇ܚܹܪ݇ܢܵܐ، ܘܩܵܛܹܠ ܠܹܗ، ܙܲܒܢܝܼ ܠܬܵܘܪܵܐ ܚܵܝܵܐ ܘܦܲܠܥܝܼ ܠܙܘܼܙܹ̈ܐ؛ ܘܐܘܼܦ ܦܲܠܥܝܼ ܠܗ̇ܘ ܡܝܼܬܵܐ. 36ܐܝܼܢܵܐ ܐܸܢ ܦܝܼܫܬܵܐ ܝܗ݇ܘܵܐ ܝ݇ܕܝܼܥܬܵܐ ܕܬܵܘܪܵܐ ܡܵܚܝܵܢܵܐ ܕܩܵܪ݇ܢܵܐ ܝܗ݇ܘܵܐ ܒܕܲܥܒܲܪ، ܘܠܵܐ ܩܲܡ ܢܵܛܹܪܹܗ ܡܵܪܹܗ، ܦܵܪܹܥ ܬܵܘܪܵܐ ܡ̣ܢ ܓܹܒܵܐ ܕܬܵܘܪܵܐ، ܘܡܝܼܬܵܐ ܗܵܘܹܐ ܩܵܬܹܗ.“

Currently Selected:

ܡܦܩܢܐ 21: ABTAB

Highlight

Copy

Compare