ܡܦܩܢܐ 20

ܥܸܣܪܵܐ ܦܘܼܩܕܵܢܹ̈ܐ

1ܗܘܼܡܙܸܡ ܠܹܗ ܐܲܠܵܗܵܐ ܟܠܲܝܗܝ ܐܲܢܹܐ ܗܹܡܸܙܡܵܢܹ̈ܐ، ܒܹܐܡܵܪܵܐ، 2”ܐܵܢܵܐ ܝܘܸܢ ܡܵܪܝܵܐ ܐܲܠܵܗܘܼܟ݂، ܕܦܘܼܠܸܛ ܠܹܗ ܐܸܠܘܼܟ݂ ܡ̣ܢ ܐܲܪܥܵܐ ܕܡܸܨܪܹܝܢ، ܡ̣ܢ ܒܹܝܬ ܥܲܒ݂ܕܘܼܬܵܐ. 3ܠܵܐ ܗܵܘܹܐ ܠܘܼܟ݂ ܐܲܠܵܗܹ̈ܐ ܐ݇ܚܹܪ̈݇ܢܹܐ ܫܒ݂ܘܿܩ ܡܸܢܝܼ. 4ܠܵܐ ܥܵܒ݂ܕܹܬ ܠܘܼܟ݂ ܨܲܠܡܵܐ، ܝܲܢ ܕܡܘܼܬܵܐ ܡ̣ܢ ܟܠ ܕܝܼܠܹܗ ܒܫܡܲܝܵܐ ܡܥܸܠܸܠ ܝܲܢ ܒܐܲܪܥܵܐ ܡܠܬܸܚܬ ܝܲܢ ܒܡ̈ܝܼܵܐ ܕܝܼܢܵܐ ܠܠܬܸܚܬ ܡ̣ܢ ܐܲܪܥܵܐ. 5ܠܵܐ ܣܵܓ݂ܕܹܬ ܐܸܠܲܝܗܝ ܘܠܵܐ ܦܵܠܚܹܬ ܐܸܠܲܝܗܝ؛ ܣܵܒܵܒ ܐܵܢܵܐ ܝܘܸܢ ܡܵܪܝܵܐ ܐܲܠܵܗܘܼܟ݂، ܐܲܠܵܗܵܐ ܛܲܢܵܢܵܐ، ܘܣܲܚܒܸܪܵܢܵܐ ܕܥܵܘܠܵܐ ܕܐܲܒ݂ܵܗܹ̈ܐ ܥܲܠ ܒܢܘܿܢܹ̈ܐ، ܥܲܠ ܬܠܵܬ ܘܥܲܠ ܐܲܪܒܲܥ ܬܵܘܠܕܵܬܹ̈ܐ ܕܣܵܢܝܵܢܝܼ̈، 6ܐܝܼܢܵܐ ܥܵܒ݂ܕܵܢܵܐ ܕܫܵܦܵܩܲܬ ܠܐܲܠܦܹ̈ܐ ܕܡܲܚܸܒܵܢܝܼ̈ ܘܕܢܵܛܪ̈ܵܢܹܐ ܕܦܘܼܩܕܵܢܝܼ̈. 7ܠܵܐ ܡܲܦܠܸܚܸܬ ܠܫܸܡܵܐ ܕܡܵܪܝܵܐ ܐܲܠܵܗܘܼܟ݂ ܒܣܪܝܼܩܘܼܬܵܐ؛ ܣܵܒܵܒ ܠܹܐ ܥܵܒܹܪ ܡܵܪܝܵܐ ܡ̣ܢ ܚܛܝܼܬܵܐ ܠܗ̇ܘ ܕܡܲܦܠܸܚ ܠܫܸܡܵܐ ܕܡܵܪܝܵܐ ܣܪܝܼܩܵܐܝܼܬ. 8ܕܟ݂ܘܿܪ ܠܝܵܘܡܵܐ ܕܫܲܒܬܵܐ ܠܩܲܕܘܼܫܹܗ. 9ܐܸܫܬܵܐ ܝܵܘܡܵܢܹ̈ܐ ܦܵܠܚܹܬ، ܘܥܵܒ݂ܕܹܬ ܟܠ ܦܘܼܠܚܵܢܘܼܟ݂؛ 10ܐܝܼܢܵܐ ܝܵܘܡܵܐ ܕܫܲܒ݂ܥܵܐ ܫܲܒܬܵܐ ܝܠܹܗ ܠܡܵܪܝܵܐ ܐܲܠܵܗܘܼܟ݂؛ ܠܵܐ ܥܵܒ݂ܕܹܬ ܒܝܼܹܗ ܗܸܟ̃ ܦܘܼܠܚܵܢܵܐ، ܐܲܢ݇ܬ، ܘܒܪܘܿܢܘܼܟ݂، ܘܒܪܵܬܘܼܟ݂، ܘܪܹܓܘܼܟ݂، ܘܚܹܕܲܡܬܘܼܟ݂، ܩܸܢܝܵܢܘܼܟ݂، ܘܬܵܘܬܵܒ݂ܘܼܟ݂ ܕܝܼܠܹܗ ܒܬܲܪ̈ܥܵܢܘܼܟ݂؛ 11ܣܵܒܵܒ ܒܐܸܫܬܵܐ ܝܵܘܡܵܢܹ̈ܐ ܥܒ݂ܝܼܕ ܠܹܗ ܡܵܪܝܵܐ ܠܫܡܲܝܵܐ ܘܠܐܲܪܥܵܐ ܘܠܝܵܡܵܐ، ܘܟܠ ܕܐܝܼܬ ܓܵܘܲܝܗܝ، ܐܝܼܢܵܐ ܡܘܼܢܝܸܚ ܠܹܗ ܒܝܵܘܡܵܐ ܕܫܲܒܬܵܐ؛ ܒܘܼܬ ܐܵܗܵܐ، ܒܘܼܪܸܟ݂ ܠܹܗ ܡܵܪܝܵܐ ܠܝܵܘܡܵܐ ܕܫܲܒܬܵܐ ܘܩܘܼܕܸܫ ܠܹܗ. 12ܡܝܲܩܸܪ ܠܒܵܒܘܼܟ݂ ܘܠܝܸܡܘܼܟ݂، ܩܵܐ ܕܝܵܪܟ݂ܝܼ ܝܵܘܡܵܢܘܼ̈ܟ݂ ܥܲܠ ܐܲܪܥܵܐ ܕܡܵܪܝܵܐ ܐܲܠܵܗܘܼܟ݂ ܒܝܼܵܗ݇ܒ݂ܘܼܗ̇ ܝܠܹܗ ܐܸܠܘܼܟ݂. 13ܠܵܐ ܩܵܛܠܹܬ. 14ܠܵܐ ܥܵܒ݂ܕܹܬ ܓܲܝܵܪܘܼܬܵܐ. 15ܠܵܐ ܓܵܢܒܹܬ. 16ܠܵܐ ܝܵܗ݇ܒܹܬ ܥܲܠ ܫܒ݂ܵܒ݂ܘܼܟ݂ ܣܵܗܕܘܼܬܵܐ ܕܕܘܼܓܠܵܐ. 17ܠܵܐ ܫܲܗܘܸܬܸܬ ܠܒܲܝܬܵܐ ܕܫܒ݂ܵܒ݂ܘܼܟ݂؛ ܠܵܐ ܫܲܗܘܸܬܸܬ ܠܒܲܟ݂ܬܵܐ ܕܫܒ݂ܵܒ݂ܘܼܟ݂، ܠܪܹܓܹܗ، ܠܚܹܕܲܡܬܹܗ، ܠܬܵܘܪܹܗ، ܠܚܡܵܪܹܗ ܘܠܟܠ ܡܸܢܕܝܼ ܕܐܝܼܬ ܠܹܗ ܫܒ݂ܵܒ݂ܘܼܟ݂.“

ܥܲܡܵܐ ܒܙܕܘܼܥܬܵܐ

18ܟܠܹܗ ܥܲܡܵܐ ܒܸܚܙܵܝܵܐ ܝܗ݇ܘܵܘ ܠܪ̈ܲܥܡܹܐ، ܠܒܸܪ̈ܩܹܐ، ܘܒܸܫܡܵܥܵܐ ܠܩܵܠܵܐ ܕܫܝܼܦܘܿܪܵܐ، ܘܒܸܚܙܵܝܵܐ ܠܛܘܼܪܵܐ ܬܲܢܬܘܼܢܹܐ، ܘܟܲܕ ܚܙܹܐ ܠܗܘܿܢ، ܪܘܼܬܪܸܬ ܠܗܘܿܢ، ܘܟܠܹܐ ܠܗܘܿܢ ܡ̣ܢ ܪܸܚܩܵܐ، 19ܘܐ݇ܡܝܼܪܗܘܿܢ ܠܡܘܼܫܹܐ، ”ܗܲܡܙܸܡ ܐܲܢ݇ܬ ܥܲܡܲܢ، ܘܒܸܬ ܫܵܡܥܲܚ؛ ܐܝܼܢܵܐ ܠܵܐ ܗܲܡܙܸܡ ܥܲܡܲܢ ܐܲܠܵܗܵܐ، ܠܵܐ ܗܵܘܹܐ ܕܡܵܝܬܲܚ.“ 20ܐ݇ܡܝܼܪܹܗ ܡܘܼܫܹܐ ܠܥܲܡܵܐ، ”ܠܵܐ ܙܵܕܥܝܼܬܘܿܢ؛ ܐ݇ܬܝܼܵܐ ܝܠܹܗ ܐܲܠܵܗܵܐ ܕܓ̰ܲܪܸܒ ܠܵܘܟ݂ܘܿܢ، ܕܗܵܘܝܵܐ ܙܕܘܼܥܬܹܗ ܩܵܕ݇ܡ ܥܲܝܢܵܘ̈ܟ݂ܘܿܢ، ܕܠܵܐ ܚܵܛܹܝܬܘܿܢ.“ 21ܘܟܠܹܐ ܠܹܗ ܥܲܡܵܐ ܡ̣ܢ ܪܸܚܩܵܐ، ܘܡܘܼܫܹܐ ܩܘܼܪܒܸܢܹܗ ܠܟܸܣ ܥܲܪܦܸܠܵܐ، ܐܲܝܟܵܐ ܕܝܼܗ݇ܘܵܐ ܐܲܠܵܗܵܐ.

ܦܘܼܩܕܵܢܵܐ ܠܸܒܢܵܝܵܐ ܡܲܕܒܚܵܐ

22ܘܐ݇ܡܝܼܪܹܗ ܡܵܪܝܵܐ ܠܡܘܼܫܹܐ، ”ܗܲܕܟ݂ܵܐ ܐܵܡܪܹܬ ܠܒܢܲܝ̈ ܝܼܣܪܵܝܹܠ، ’ܐܲܚܬܘܿܢ ܚܙܹܐ ܠܵܘܟ݂ܘܿܢ ܕܡ̣ܢ ܫܡܲܝܵܐ ܗܘܼܡܙܸܡ ܠܝܼ ܥܲܡܵܘܟ݂ܘܿܢ. 23ܠܵܐ ܥܵܒ݂ܕܝܼܬܘܿܢ ܠܵܘܟ݂ܘܿܢ ܥܲܡܝܼ ܐܲܠܵܗܹ̈ܐ ܐ݇ܚܹܪ̈݇ܢܹܐ؛ ܐܲܠܵܗܹ̈ܐ ܕܣܹܐܡܵܐ ܘܐܲܠܵܗܹ̈ܐ ܕܕܲܗܒ݂ܵܐ ܠܵܐ ܥܵܒ݂ܕܝܼܬܘܿܢ ܠܵܘܟ݂ܘܿܢ. 24ܡܲܕܒܚܵܐ ܕܥܲܦܪܵܐ ܥܵܒ݂ܕܹܬ ܐܸܠܝܼ، ܘܕܵܒ݂ܚܹܬ ܥܲܠܘܼܗܝ ܕܸܒ݂ܚܘܼ̈ܟ݂ ܡܘܼܩܕܹ̈ܐ ܘܕܸܒ݂ܚܘܼ̈ܟ݂ ܕܫܠܵܡܵܐ، ܥܸܪ̈ܒܘܼܟ݂ ܘܬܵܘܪ̈ܘܼܟ݂؛ ܒܟܠ ܕܘܼܟܵܐ ܕܡܲܥܒܸܕܹܢ ܫܸܡܝܼ ܕܦܵܐܹܫ ܕܟ݂ܝܼܪܵܐ، ܒܸܬ ܐܵܬܹܝܢ ܠܟܸܣ ܠܘܼܟ݂ ܘܒܸܬ ܒܲܪܟܸܢܘܼܟ݂. 25ܐܸܢ ܥܵܒ݂ܕܹܬ ܐܸܠܝܼ ܡܲܕܒܚܵܐ ܕܟܹܐܦܹ̈ܐ، ܠܵܐ ܒܵܢܹܝܬ ܠܹܗ ܒܟܹܐܦܹ̈ܐ ܦܪ̈ܝܼܡܹܐ، ܣܵܒܵܒ ܟܲܕ ܡܲܦܠܸܚܸܬ ܐܲܣܒܵܒܘܼܟ݂ ܥܲܠܘܼܗܝ، ܒܸܬ ܟ̰ܲܦܠܸܢܸܬ ܠܹܗ. 26ܘܠܵܐ ܐܵܣܩܹܬ ܒܦܲܠܵܟܵܢܹ̈ܐ ܥܲܠ ܡܲܕܒܚܝܼ، ܕܠܵܐ ܦܵܝܫܵܐ ܓܠܝܼܬܵܐ ܫܘܼܠܚܵܝܘܼܬܘܼܟ݂ ܥܲܠܘܼܗܝ.‘

Currently Selected:

ܡܦܩܢܐ 20: ABTAB

Highlight

Copy

Compare