ܡܦܩܢܐ 19

ܥܲܡܵܐ ܒܸܐܬܵܝܵܐ ܠܣܝܼܢܲܝ

1ܒܝܲܪܚܵܐ ܕܬܠܵܬܵܐ ܡ̣ܢ ܒܵܬ݇ܪ ܕܦܠܝܼܛ ܠܗܘܿܢ ܒܢܲܝ̈ ܝܼܣܪܵܝܹܠ ܡ̣ܢ ܐܲܪܥܵܐ ܕܡܸܨܪܹܝܢ، ܒܗ̇ܘ ܝܵܘܡܵܐ ܐ݇ܬܹܐ ܠܗܘܿܢ ܠܒܲܪܝܼܵܐ ܕܣܝܼܢܲܝ. 2ܫܘܼܢܹܐ ܠܗܘܿܢ ܡ̣ܢ ܪܦܝܼܕܝܼܡ، ܘܐ݇ܬܹܐ ܠܗܘܿܢ ܠܒܲܪܝܼܵܐ ܕܣܝܼܢܲܝ. ܫܪܹܐ ܠܗܘܿܢ ܬܵܡܵܐ ܩܵܕ݇ܡ ܛܘܼܪܵܐ.

ܚܲܒܪܵܐ ܕܡܵܪܝܵܐ ܠܡܘܼܫܹܐ

3ܗ̇ܝܓܵܗ ܐ݇ܣܝܼܩ ܠܹܗ ܡܘܼܫܹܐ ܠܟܸܣ ܐܲܠܵܗܵܐ، ܘܩܪܹܐ ܠܹܗ ܐܸܠܹܗ ܡܵܪܝܵܐ ܡ̣ܢ ܛܘܼܪܵܐ، ܒܹܐܡܵܪܵܐ، ”ܗܲܕܟ݂ܵܐ ܐܵܡܪܹܬ ܠܒܹܝܬ ܝܲܥܩܘܿܒ݂، ܘܡܲܕܥܸܬ ܠܒܢܲܝ̈ ܝܼܣܪܵܝܹܠ، 4’ܚܙܹܐ ܠܵܘܟ݂ܘܿܢ ܐܲܚܬܘܿܢ ܡܸܢܕܝܼ ܕܥܒ݂ܝܼܕ ܠܝܼ ܠܡܸܨܪ̈ܵܝܹܐ، ܘܕܵܐܟ݂ܝܼ ܕܩܲܡ ܫܵܩܠܸܢܵܘܟ݂ܘܿܢ ܥܲܠ ܓܘܼܠܦܵܢܹ̈ܐ ܕܢܸܫܪܹ̈ܐ، ܘܩܲܡ ܡܲܝܬܸܝܢܵܘܟ݂ܘܿܢ ܠܟܸܣ ܠܝܼ. 5ܘܐܵܕܝܼܵܐ ܐܸܢ ܫܡܵܥܵܐ ܫܵܡܥܝܼܬܘܿܢ ܠܩܵܠܝܼ ܘܢܵܛܪܝܼܬܘܿܢ ܠܘܲܥܕܝܼ، ܒܸܬ ܗܵܘܹܝܬܘܿܢ ܓܲܙܵܐ ܕܓܵܢܝܼ ܡ̣ܢ ܟܠܲܝܗܝ ܥܲܡܡܹ̈ܐ، ܣܵܒܵܒ ܕܝܼܝܼ ܝܠܵܗ̇ ܟܠܵܗ̇ ܐܲܪܥܵܐ. 6ܘܐܲܚܬܘܿܢ ܒܸܬ ܗܵܘܹܝܬܘܿܢ ܐܸܠܝܼ ܡܲܠܟܘܼܬܵܐ ܕܟܵܗܢܹ̈ܐ ܘܥܲܡܵܐ ܩܲܕܝܼܫܵܐ.‘ ܐܲܢܹܐ ܝܢܵܐ ܚܲܒܪܹ̈ܐ ܕܗܲܡܙܸܡܸܬ ܠܗܘܿܢ ܠܒܢܲܝ̈ ܝܼܣܪܵܝܹܠ.“

ܓ̰ܘܼܘܵܒ ܕܥܲܡܵܐ

7ܐ݇ܬܹܐ ܠܹܗ ܡܘܼܫܹܐ ܘܩܪܹܐ ܠܹܗ ܠܚܘܵܪ̈ܕܸܩܢܹܐ ܕܥܲܡܵܐ ܘܡܘܼܕܸܥ ܠܹܗ ܐܸܠܲܝܗܝ ܟܠܲܝܗܝ ܐܲܢܹܐ ܗܹܡܸܙܡܵܢܹ̈ܐ ܕܦܩܝܼܕ ܠܹܗ ܐܸܠܹܗ ܡܵܪܝܵܐ. 8ܘܓ̰ܘܼܘܸܒ ܠܗܘܿܢ ܟܠܹܗ ܥܲܡܵܐ ܥܲܡ ܚܕܵܕܹ̈ܐ ܘܐ݇ܡܝܼܪܗܘܿܢ، ”ܒܸܬ ܥܵܒ݂ܕܲܚ ܟܠ ܡܸܢܕܝܼ ܕܗܘܼܡܙܸܡ ܠܹܗ ܡܵܪܝܵܐ.“ ܘܡܘܼܕܸܥ ܠܹܗ ܡܘܼܫܹܐ ܓ̰ܘܼܘܵܒ ܕܥܲܡܵܐ ܠܡܵܪܝܵܐ. 9ܘܐ݇ܡܝܼܪܹܗ ܡܵܪܝܵܐ ܠܡܘܼܫܹܐ، ”ܒܹܐܬܵܝܵܐ ܝܘܸܢ ܠܟܸܣ ܠܘܼܟ݂ ܓܵܘ ܥܢܵܢܵܐ ܚܸܫܟܵܢܵܐ، ܕܫܵܡܹܥ ܥܲܡܵܐ ܟܲܕ ܗܲܡܙܸܡܸܢ ܥܲܡܘܼܟ݂، ܕܗܲܡܸܢܝܼ ܒܝܼܘܼܟ݂ ܠܥܵܠܲܡ.“ ܘܡܘܼܕܸܥ ܠܹܗ ܡܘܼܫܹܐ ܗܹܡܸܙܡܵܢܹ̈ܐ ܕܥܲܡܵܐ ܠܡܵܪܝܵܐ.

ܥܲܡܵܐ ܗܲܕܘܼܪܹܐ ܓܵܢܹܗ

10ܗ̇ܝܓܵܗ ܐ݇ܡܝܼܪܹܗ ܡܵܪܝܵܐ ܠܡܘܼܫܹܐ، ”ܙܹܠ݇ ܠܟܸܣ ܥܲܡܵܐ، ܘܩܲܕܸܫ ܠܗܘܿܢ ܐܸܕܝܘܿܡ ܝܵܘܡܵܐ ܘܩܵܝܕܲܡܬܵܐ، ܘܡܵܣܝܼ ܓ̰ܘܼܠܲܝ̈ܗܝ، 11ܘܗܵܘܝܼ ܗܕܝܼܪܹܐ ܒܝܵܘܡܵܐ ܕܬܠܵܬܵܐ، ܣܵܒܵܒ ܒܝܵܘܡܵܐ ܕܬܠܵܬܵܐ ܒܸܬ ܨܵܠܹܐ ܡܵܪܝܵܐ ܥܲܠ ܛܘܼܪܵܐ ܕܣܝܼܢܲܝ ܩܵܕ݇ܡ ܥܲܝܢܹ̈ܐ ܕܟܠܹܗ ܥܲܡܵܐ. 12ܘܡܲܬܒܸܬ ܬܚܘܼܡܹ̈ܐ ܠܚܵܕܸܪ̈ܘܵܢܹܐ ܕܥܲܡܵܐ، ܘܐܵܡܪܹܬ، ’ܗܘܹܝܡܘܼܢ ܗܸܫܝܵܪ ܐܲܚܬܘܿܢ، ܠܵܐ ܐܵܣܩܝܼܬܘܿܢ ܠܛܘܼܪܵܐ ܘܠܵܐ ܕܵܩܪܝܼܬܘܿܢ ܒܡܲܪ̈ܙܵܢܘܼܗܝ؛ ܟܠ ܕܕܵܩܹܪ ܒܛܘܼܪܵܐ ܡܝܵܬܵܐ ܒܸܬ ܦܵܐܹܫ ܡܘܼܡܝܸܬܵܐ؛ 13ܠܵܐ ܕܵܩܪܵܐ ܒܝܼܹܗ ܐܝܼܕܵܐ، ܐܸܠܵܐ ܪܓ̰ܵܡܵܐ ܦܵܐܹܫ ܪܓ̰ܝܼܡܵܐ ܝܲܢ ܦܵܐܹܫ ܩܛܝܼܠܵܐ ܒܓܹܐܪܹ̈ܐ؛ ܠܵܐ ܚܵܝܹܐ ܐܸܢ ܗܵܘܹܐ ܗܲܝܘܵܢ ܝܲܢ ܒܲܪܢܵܫܵܐ. ܐܲܚܟ̰ܝܼ ܟܲܕ ܦܵܝܫܵܐ ܡܚܝܼܬܵܐ ܩܲܪܢܵܐ ܐܵܣܩܝܼ ܠܛܘܼܪܵܐ.‘“ 14ܗ̇ܝܓܵܗ ܨܠܹܐ ܠܹܗ ܡܘܼܫܹܐ ܡ̣ܢ ܛܘܼܪܵܐ ܠܟܸܣ ܥܲܡܵܐ، ܘܩܘܼܕܸܫ ܠܹܗ ܠܥܲܡܵܐ؛ ܘܡܣܹܐ ܠܗܘܿܢ ܓ̰ܘܼܠܲܝ̈ܗܝ. 15ܘܐ݇ܡܝܼܪܹܗ ܠܥܲܡܵܐ، ”ܗܘܹܝܡܘܼܢ ܗܕܝܼܪܹܐ ܠܝܵܘܡܵܐ ܕܬܠܵܬܵܐ؛ ܠܵܐ ܩܲܪܒܸܢܝܼܬܘܿܢ ܠܒܲܟ݂ܬܵܐ.“

ܙܕܘܼܥܬܵܐ ܕܡܵܪܝܵܐ ܥܲܠ ܛܘܼܪܵܐ

16ܒܝܵܘܡܵܐ ܕܬܠܵܬܵܐ ܒܨܲܦܪܵܐ، ܗܘܹܐ ܠܗܘܿܢ ܪ̈ܲܥܡܹܐ ܘܒܸܪ̈ܩܹܐ، ܘܥܢܵܢܵܐ ܩܫܝܼܬܵܐ ܥܲܠ ܛܘܼܪܵܐ، ܘܩܵܠܵܐ ܕܫܝܼܦܘܿܪܵܐ ܪܵܒܵܐ ܚܲܝܠܵܢܵܐ، ܗܵܕܵܐ ܕܪܘܼܬܪܸܬ ܠܹܗ ܟܠܹܗ ܥܲܡܵܐ ܕܝܼܗ݇ܘܵܐ ܒܡܲܫܪܝܼܬܵܐ. 17ܘܦܘܼܠܸܛ ܠܹܗ ܡܘܼܫܹܐ ܠܥܲܡܵܐ ܡ̣ܢ ܡܲܫܪܝܼܬܵܐ ܠܐܘܼܪܚܵܐ ܕܐܲܠܵܗܵܐ، ܘܟܠܹܐ ܠܗܘܿܢ ܒܠܬܸܚܬ ܕܛܘܼܪܵܐ. 18ܟܠܹܗ ܛܘܼܪܵܐ ܕܣܝܼܢܲܝ ܩܪܝܼܡܵܐ ܝܗ݇ܘܵܐ ܒܬܸܢܵܐ، ܣܵܒܵܒ ܨܠܹܐ ܠܹܗ ܡܵܪܝܵܐ ܥܲܠܘܼܗܝ ܒܢܘܼܪܵܐ؛ ܘܐ݇ܣܝܼܩ ܠܹܗ ܬܸܢܹܗ ܐܲܝܟ݂ ܬܸܢܵܐ ܕܐܲܬܘܿܢܵܐ، ܘܪܓܝܼܕ ܠܹܗ ܪܓܵܕܵܐ ܟܠܹܗ ܛܘܼܪܵܐ. 19ܘܩܵܠܵܐ ܕܫܝܼܦܘܿܪܵܐ ܗܘܹܐ ܠܹܗ ܚܲܠܘܼܢܹܐ ܪܵܒܵܐ. ܡܘܼܫܹܐ ܗܘܹܐ ܠܹܗ ܗܲܡܙܘܼܡܹܐ، ܘܐܲܠܵܗܵܐ ܓ̰ܲܘܘܼܒܹܐ ܐܸܠܹܗ ܒܩܵܠܵܐ ܕܪܲܥܡܵܐ. 20ܘܨܠܹܐ ܠܹܗ ܡܵܪܝܵܐ ܠܪܹܫܵܐ ܕܛܘܼܪܵܐ ܕܣܝܼܢܲܝ، ܘܩܪܹܐ ܠܹܗ ܠܡܘܼܫܹܐ ܠܪܹܫܵܐ ܕܛܘܼܪܵܐ، ܘܐ݇ܣܝܼܩ ܠܹܗ ܡܘܼܫܹܐ. 21ܐ݇ܡܝܼܪܹܗ ܡܵܪܝܵܐ ܐܸܠܹܗ، ”ܨܠܝܼ ܘܣܲܦܝܼ ܩܸܘܝܵܐ ܠܥܲܡܵܐ ܕܠܵܐ ܬܵܪܥܝܼ ܠܟܸܣ ܡܵܪܝܵܐ ܠܸܚܙܵܝܹܗ، ܕܠܵܐ ܦܵܝܫܝܼ ܩܛܝܼܠܹܐ ܪܵܒܵܐ ܡܸܢܲܝܗܝ. 22ܐܘܼܦ ܟܵܗܢܹ̈ܐ ܕܩܲܪܒܸܢܝܼ ܠܡܵܪܝܵܐ ܩܲܕܫܝܼ ܓܵܢܲܝܗܝ، ܕܠܵܐ ܚܲܡܬܹܢ ܡܵܪܝܵܐ ܥܲܠܲܝܗܝ.“ 23ܐ݇ܡܝܼܪܹܗ ܡܘܼܫܹܐ ܠܡܵܪܝܵܐ، ”ܠܹܐ ܡܵܨܹܐ ܥܲܡܵܐ ܠܹܐܣܵܩܵܐ ܠܛܘܼܪܵܐ ܕܣܝܼܢܲܝ، ܣܵܒܵܒ ܐܲܢ݇ܬ ܣܘܼܦܹܐ ܠܘܼܟ݂ ܐܸܠܲܢ، ܒܹܐܡܵܪܵܐ، ’ܡܲܬܸܒ݂ ܬܚܘܼܡܹ̈ܐ ܠܛܘܼܪܵܐ ܘܩܲܕܸܫ ܠܹܗ.‘“ 24ܐ݇ܡܝܼܪܹܗ ܐܸܠܹܗ ܡܵܪܝܵܐ، ”ܙܹܠ݇ ܨܠܝܼ، ܘܡܲܐܣܸܩ ܥܲܡܘܼܟ݂ ܠܐܲܗܪܘܿܢ؛ ܐܝܼܢܵܐ ܟܵܗܢܹ̈ܐ ܘܥܲܡܵܐ ܠܵܐ ܬܵܪܥܝܼ ܠܬܚܘܼܡܹ̈ܐ ܠܹܐܣܵܩܵܐ ܠܟܸܣ ܡܵܪܝܵܐ، ܕܠܵܐ ܚܲܡܬܹܢ ܥܲܠܲܝܗܝ.“ 25ܘܨܠܹܐ ܠܹܗ ܡܘܼܫܹܐ ܠܟܸܣ ܥܲܡܵܐ ܘܐ݇ܡܝܼܪܹܗ ܐܸܠܲܝܗܝ ܐܲܢܹܐ ܚܲܒܪܹ̈ܐ.

Currently Selected:

ܡܦܩܢܐ 19: ABTAB

Highlight

Copy

Compare