ܡܦܩܢܐ 18
18
ܝܲܬܪܘܿܢ ܒܸܬܦܵܩܵܐ ܒܡܘܼܫܹܐ
1ܝܲܬܪܘܿܢ، ܟܵܗܢܵܐ ܕܡܸܕܝܲܢ، ܚܸܡܝܵܢܵܐ ܕܡܘܼܫܹܐ، ܫܡܝܼܥ ܠܹܗ ܟܠ ܡܸܢܕܝܼ ܕܥܒ݂ܝܼܕ ܠܹܗ ܐܲܠܵܗܵܐ ܠܡܘܼܫܹܐ ܘܠܝܼܣܪܵܝܹܠ ܛܵܝܸܦܹܗ، ܕܦܘܼܠܸܛ ܠܹܗ ܡܵܪܝܵܐ ܠܝܼܣܪܵܝܹܠ ܡ̣ܢ ܡܸܨܪܹܝܢ. 2ܫܩܝܼܠ ܠܹܗ ܝܲܬܪܘܿܢ، ܚܸܡܝܵܢܵܐ ܕܡܘܼܫܹܐ، ܠܨܸܦܘܿܪܵܐ، ܒܲܟ݂ܬܵܐ ܕܡܘܼܫܹܐ ܡ̣ܢ ܒܵܬ݇ܪ ܕܫܘܼܕܪܘܼܗ̇ ܝܗ݇ܘܵܐ ܠܟܸܣ ܠܹܗ، 3ܘܥܲܡܘܼܗ̇ ܬܸܪܘܲܝܗܝ ܒܢܘܿܢܘܼ̈ܗܝ، ܫܸܡܵܐ ܕܚܲܕ ܓܸܪܫܘܿܡ،#18:3 ܥܸܒ݂ܪܵܐܝܼܬ ܒܡܲܥܢܵܝܵܐ ܕܡܵܫܵܚܲܛ ܬܵܡܵܐ ܣܵܒܵܒ ܐ݇ܡܝܼܪܵܐ ܝܗ݇ܘܵܐ، ”ܡܵܫܵܚܲܛ ܗܘܹܐ ܠܝܼ ܒܐܲܪܥܵܐ ܢܘܼܟ݂ܪܵܝܬܵܐ؛“ 4ܘܫܸܡܵܐ ܕܗ̇ܘ ܐ݇ܚܹܪ݇ܢܵܐ، ܐܹܠܝܼܥܵܙܲܪ،#18:4 ܥܸܒ݂ܪܵܐܝܼܬ ܒܡܲܥܢܵܝܵܐ: ܐܲܠܵܗܝܼ ܗܲܝܸܪܵܢܵܐ ܝܠܹܗ ܣܵܒܵܒ ܐ݇ܡܝܼܪܵܐ ܝܗ݇ܘܵܐ، ”ܐܲܠܵܗܵܐ ܕܒܵܒܝܼ ܗܘܹܐ ܠܹܗ ܗܵܝܲܪܬܵܐ ܐܸܠܝܼ، ܘܩܲܡ ܦܲܨܹܐ ܠܝܼ ܡ̣ܢ ܣܲܝܦܵܐ ܕܦܸܪܥܘܿܢ.“
5ܐ݇ܬܹܐ ܠܹܗ ܝܲܬܪܘܿܢ، ܚܸܡܝܵܢܵܐ ܕܡܘܼܫܹܐ، ܥܲܡ ܒܢܘܿܢܹ̈ܐ ܘܒܲܟ݂ܬܵܐ ܕܡܘܼܫܹܐ، ܠܟܸܣ ܡܘܼܫܹܐ، ܠܒܲܪܝܼܵܐ ܕܫܸܪܝܵܐ ܝܗ݇ܘܵܐ ܬܵܡܵܐ، ܠܛܘܼܪܵܐ ܕܐܲܠܵܗܵܐ. 6ܘܡܘܼܚܒܸܪܹܗ ܠܡܘܼܫܹܐ، ”ܐܵܢܵܐ ܚܸܡܝܵܢܘܼܟ݂، ܝܲܬܪܘܿܢ، ܒܹܐܬܵܝܵܐ ܝܘܸܢ ܠܟܸܣ ܠܘܼܟ݂، ܥܲܡ ܒܲܟ݂ܬܘܼܟ݂ ܘܬܸܪܘܲܝܗܝ ܒܢܘܿܢܘܼ̈ܗ̇ ܥܲܡܘܼܗ̇.“ 7ܘܦܠܝܼܛ ܠܹܗ ܡܘܼܫܹܐ ܠܐܘܼܪܚܵܐ ܕܚܸܡܝܵܢܹܗ، ܡܘܼܟܸܦܵܐ ܠܹܗ ܓܵܢܹܗ، ܘܢܫܝܼܩ ܠܹܗ ܐܸܠܹܗ؛ ܟܠ ܚܲܕ ܒܘܼܩܸܪܹܗ ܒܘܼܬ ܚܘܼܠܡܵܢܵܐ ܕܗ̇ܘ ܐ݇ܚܹܪ݇ܢܵܐ، ܘܥܒ݂ܝܼܪܗܘܿܢ ܠܡܲܫܟܢܵܐ. 8ܗܘܼܩܹܐ ܠܹܗ ܡܘܼܫܹܐ ܐܸܠܹܗ ܟܠ ܡܸܢܕܝܼ ܕܥܒ݂ܝܼܕܵܐ ܝܗ݇ܘܵܐ ܡܵܪܝܵܐ ܠܦܸܪܥܘܿܢ ܘܠܡܸܨܪ̈ܵܝܹܐ ܒܘܼܬ ܝܼܣܪܵܝܹܠ، ܘܟܠܲܝܗܝ ܐܘܼܠܨܵܢܹ̈ܐ ܕܬܦܝܼܩܹܐ ܝܗ݇ܘܵܘ ܒܝܼܲܝܗܝ ܒܐܘܼܪܚܵܐ، ܘܕܵܐܟ݂ܝܼ ܕܦܘܼܨܝܲܝ ܝܗ݇ܘܵܐ ܡܵܪܝܵܐ.
9ܚܕܹܐ ܠܹܗ ܝܲܬܪܘܿܢ ܥܲܠ ܟܠܵܗ̇ ܛܵܒ݂ܬܵܐ ܕܥܒ݂ܝܼܕܵܐ ܝܗ݇ܘܵܐ ܡܵܪܝܵܐ ܠܝܼܣܪܵܝܹܠ، ܒܦܲܨܵܝܬܲܝܗܝ ܡ̣ܢ ܐܝܼܕܵܐ ܕܡܸܨܪ̈ܵܝܹܐ. 10ܐ݇ܡܝܼܪܹܗ، ”ܒܪܝܼܟ݂ܵܐ ܝܠܹܗ ܡܵܪܝܵܐ ܕܦܘܼܨܹܐ ܠܹܗ ܐܸܠܵܘܟ݂ܘܿܢ ܡ̣ܢ ܐܝܼܕܵܐ ܕܡܸܨܪ̈ܵܝܹܐ ܘܡ̣ܢ ܐܝܼܕܵܐ ܕܦܸܪܥܘܿܢ، ܘܕܦܘܼܨܹܐ ܠܹܗ ܠܥܲܡܵܐ ܡ̣ܢ ܬܚܘܿܬ ܐܝܼܕܵܐ ܕܡܸܨܪ̈ܵܝܹܐ. 11ܐܵܕܝܼܵܐ ܝ݇ܕܝܼܥ ܠܝܼ ܕܓܘܼܪܵܐ ܝܠܹܗ ܡܵܪܝܵܐ ܡ̣ܢ ܟܠܲܝܗܝ ܐܲܠܵܗܹ̈ܐ، ܣܵܒܵܒ ܟܲܕ ܥܒ݂ܝܼܕ ܠܗܘܿܢ ܡܸܨܪ̈ܵܝܹܐ ܫܘܼܒ݂ܗܵܪܵܐ ܥܲܠܲܝܗܝ ܩܲܡ ܦܲܨܹܐ ܠܗܘܿܢ.“ 12ܘܡܘܼܩܪܸܒ݂ ܠܹܗ ܝܲܬܪܘܿܢ، ܚܸܡܝܵܢܵܐ ܕܡܘܼܫܹܐ، ܕܸܒ݂ܚܵܐ ܡܘܼܩܕܵܐ ܘܕܸܒ݂ܚܹ̈ܐ ܐ݇ܚܹܪ̈݇ܢܹܐ ܠܐܲܠܵܗܵܐ؛ ܘܐ݇ܬܹܐ ܠܹܗ ܐܲܗܪܘܿܢ ܘܟܠܲܝܗܝ ܚܘܵܪ̈ܕܸܩܢܹܐ ܕܝܼܣܪܵܝܹܠ ܠܹܐܟ݂ܵܠܵܐ ܠܲܚܡܵܐ ܥܲܡ ܚܸܡܝܵܢܵܐ ܕܡܘܼܫܹܐ ܩܵܕ݇ܡ ܐܲܠܵܗܵܐ.
ܝܲܬܪܘܿܢ ܒܝܼܵܗ݇ܒ݂ܵܐ ܢܵܨܝܼܗܲܬ ܠܡܘܼܫܹܐ
13ܒܝܵܘܡܵܐ ܐ݇ܚܹܪ݇ܢܵܐ، ܝ݇ܬܝܼܒ݂ ܠܹܗ ܡܘܼܫܹܐ ܠܸܥܒ݂ܵܕܵܐ ܕܲܝܵܢܘܼܬܵܐ ܠܥܲܡܵܐ، ܘܟܠܹܐ ܠܹܗ ܥܲܡܵܐ ܠܟܸܣ ܠܹܗ ܡ̣ܢ ܨܲܦܪܵܐ ܘܗܲܠ ܪܲܡܫܵܐ. 14ܟܲܕ ܚܙܹܐ ܠܹܗ ܚܸܡܝܵܢܵܐ ܕܡܘܼܫܹܐ ܟܠ ܕܗ̇ܘ ܒܸܥܒ݂ܵܕܵܐ ܝܗ݇ܘܵܐ ܠܥܲܡܵܐ، ܐ݇ܡܝܼܪܹܗ، ”ܡܘܿܕܝܼ ܝܠܹܗ ܐܵܗܵܐ ܫܘܼܠܵܐ ܕܐܲܢ݇ܬ ܒܸܥܒ݂ܵܕܵܐ ܝܘܸܬ ܠܥܲܡܵܐ؟ ܩܵܡܘܿܕܝܼ ܒܝܼܬܵܒ݂ܵܐ ܝܘܸܬ ܒܢܲܦ̮ܫܘܼܟ݂، ܘܟܠܹܗ ܥܲܡܵܐ ܒܸܟܠܵܝܵܐ ܝܠܹܗ ܠܟܸܣ ܠܘܼܟ݂ ܡ̣ܢ ܨܲܦܪܵܐ ܘܗܲܠ ܪܲܡܫܵܐ؟“ 15ܓ̰ܘܼܘܸܒ ܠܹܗ ܡܘܼܫܹܐ ܠܚܸܡܝܵܢܹܗ، ”ܣܵܒܵܒ ܟܹܐ ܐܵܬܹܐ ܠܟܸܣ ܠܝܼ ܥܲܡܵܐ ܠܒܲܩܘܼܪܹܐ ܡ̣ܢ ܐܲܠܵܗܵܐ؛ 16ܐܝܼܡܲܢ ܕܗܵܘܹܐ ܠܗܘܿܢ ܚܲܕ ܕܘܼܪܵܫܵܐ، ܟܹܐ ܐܵܬܝܼ ܠܟܸܣ ܠܝܼ، ܘܐܵܢܵܐ ܟܹܐ ܕܵܝܢܹܢ ܒܹܝܠ ܐ݇ܢܵܫܵܐ ܘܠܚܲܒ݂ܪܹܗ، ܘܟܹܐ ܡܲܕܥܸܢ ܐܸܠܲܝܗܝ ܦܘܼܩܕܵܢܹ̈ܐ ܘܢܵܡܘܿܣܹ̈ܐ ܕܐܲܠܵܗܵܐ.“ 17ܐ݇ܡܝܼܪܹܗ ܚܸܡܝܵܢܵܐ ܕܡܘܼܫܹܐ ܐܸܠܹܗ، ”ܐܵܗܵܐ ܠܹܐ ܝܠܹܗ ܨܦܵܝܝܼ ܫܘܼܠܵܐ ܕܐܲܢ݇ܬ ܒܸܥܒ݂ܵܕܵܐ ܝܘܸܬ. 18ܢܘܵܠܵܐ ܒܸܬ ܢܵܘܠܹܬ، ܐܲܢ݇ܬ ܘܐܘܼܦ ܐܵܗܵܐ ܥܲܡܵܐ ܕܝܼܠܹܗ ܥܲܡܘܼܟ݂، ܣܵܒܵܒ ܪܵܒܵܐ ܝܲܩܘܼܪܵܐ ܝܠܹܗ ܐܵܗܵܐ ܫܘܼܠܵܐ ܐܸܠܘܼܟ݂؛ ܠܹܐ ܡܵܨܹܝܬ ܥܵܒ݂ܕܹܬ ܠܹܗ ܒܢܲܦ̮ܫܘܼܟ݂. 19ܐܵܕܝܼܵܐ ܫܡܸܥ ܐܸܠܝܼ، ܝܵܗ݇ܒܹܢܘܼܟ݂ ܡܸܠܟܵܐ، ܘܐܲܠܵܗܵܐ ܗܵܘܹܐ ܥܲܡܘܼܟ݂. ܐܲܢ݇ܬ ܗܘܝܼ ܡ̣ܢ ܓܹܒܵܐ ܕܥܲܡܵܐ ܩܵܕ݇ܡ ܐܲܠܵܗܵܐ، ܘܡܲܝܬܝܼ ܠܕܘܼܪ̈ܵܫܲܝܗܝ ܩܵܕ݇ܡ ܐܲܠܵܗܵܐ؛ 20ܡܲܠܸܦ ܠܗܘܿܢ ܩܵܢܘܿܢܹ̈ܐ ܘܢܵܡܘܿܣܹ̈ܐ، ܘܡܲܕܸܥ ܠܗܘܿܢ ܐܘܼܪܚܵܐ ܕܚܵܕܪܝܼ ܒܝܼܘܼܗ̇ ܘܦܘܼܠܚܵܢܹ̈ܐ ܕܥܵܒ݂ܕܝܼ. 21ܘܓܲܒܝܼ ܐ݇ܢܵܫܹ̈ܐ ܡܵܨܝܵܢܹ̈ܐ ܡ̣ܢ ܟܠܹܗ ܥܲܡܵܐ، ܐ݇ܢܵܫܹ̈ܐ ܙܵܕܥܵܢܹ̈ܐ ܡ̣ܢ ܐܲܠܵܗܵܐ، ܐ݇ܢܵܫܹ̈ܐ ܫܲܪܝܼܪܹ̈ܐ، ܐ݇ܢܵܫܹ̈ܐ ܣܵܢܝܵܢܹ̈ܐ ܕܩܢܵܝܬܵܐ ܛܲܢܦܬܵܐ. ܡܲܬܸܒ݂ ܥܲܠܲܝܗܝ ܪܹ̈ܫܵܢܹܐ ܕܐܲܠܦܹ̈ܐ، ܪܹ̈ܫܵܢܹܐ ܕܐܸܡܹ̈ܐܐ، ܪܹ̈ܫܵܢܹܐ ܕܚܲܡܫܝܼܹ̈ܐ ܘܪܹ̈ܫܵܢܹܐ ܕܥܸܣܪܹ̈ܐ. 22ܘܕܵܝܢܝܼ ܠܥܲܡܵܐ ܒܟܠ ܙܲܒ݂ܢܵܐ؛ ܘܐܸܢ ܗܵܘܹܐ ܢܘܼܩܙܵܐ ܓܘܼܪܵܐ ܦܵܐܹܫ ܡܘܼܐܬܝܵܐ ܠܟܸܣ ܠܘܼܟ݂؛ ܘܢܘܼܩܙܵܐ ܙܥܘܿܪܵܐ ܕܵܝܢܝܼ ܐܵܢܝܼ ܒܹܝܠܲܝܗܝ؛ ܗܲܕܟ݂ܵܐ ܒܸܬ ܗܵܘܝܵܐ ܒܘܼܫ ܩܲܠܘܼܠܬܵܐ ܥܲܠܘܼܟ݂، ܣܵܒܵܒ ܐܵܢܝܼ ܒܸܬ ܛܵܥܢܝܼ ܝܘܼܩܪܵܐ ܥܲܡܘܼܟ݂. 23ܐܸܢ ܥܵܒ݂ܕܹܬ ܐܵܗܵܐ، ܘܐܸܢ ܦܵܩܹܕ ܠܘܼܟ݂ ܐܲܠܵܗܵܐ ܗܲܕܟ݂ܵܐ، ܒܸܬ ܡܵܨܹܝܬ ܠܸܟܠܵܝܵܐ، ܘܟܠܹܗ ܐܵܗܵܐ ܥܲܡܵܐ ܒܸܬ ܐܵܙܹܠ ܠܕܘܼܟܬܹܗ ܒܫܠܵܡܵܐ.“
24ܫܡܝܼܥ ܠܹܗ ܡܘܼܫܹܐ ܠܚܲܒܪܵܐ ܕܚܸܡܝܵܢܹܗ، ܘܥܒ݂ܝܼܕ ܠܹܗ ܟܠ ܡܸܢܕܝܼ ܕܐ݇ܡܝܼܪܹܗ. 25ܓܘܼܒܹܐ ܠܹܗ ܡܘܼܫܹܐ ܐ݇ܢܵܫܹ̈ܐ ܡܵܨܝܵܢܹ̈ܐ ܡ̣ܢ ܟܠܹܗ ܝܼܣܪܵܝܹܠ، ܘܪܫܝܼܡܲܝ ܠܹܗ ܪܹ̈ܫܵܢܹܐ ܥܲܠ ܥܲܡܵܐ، ܪܹ̈ܫܵܢܹܐ ܕܐܲܠܦܹ̈ܐ، ܪܹ̈ܫܵܢܹܐ ܕܐܸܡܹ̈ܐܐ، ܪܹ̈ܫܵܢܹܐ ܕܚܲܡܫܝܼܹ̈ܐ، ܘܪܹ̈ܫܵܢܹܐ ܕܥܸܣܪܹ̈ܐ؛ 26ܘܥܒ݂ܝܼܕ ܠܗܘܿܢ ܕܝܵܢܬܵܐ ܠܥܲܡܵܐ ܒܟܠ ܙܲܒ݂ܢܵܐ؛ ܘܢܘܼܩܙܹ̈ܐ ܥܲܣܩܹ̈ܐ ܟܹܐ ܡܲܝܬܝܼ ܗ݇ܘܵܘ ܠܗܘܿܢ ܠܟܸܣ ܡܘܼܫܹܐ، ܘܢܘܼܩܙܹ̈ܐ ܙܥܘܿܪܹ̈ܐ ܟܹܐ ܕܵܝܢܝܼ ܗ݇ܘܵܘ ܠܗܘܿܢ ܒܓܵܢܲܝܗܝ.
27ܫܘܼܕܸܪܹܗ ܡܘܼܫܹܐ ܠܚܸܡܝܵܢܹܗ، ܘܕܝܼܪܹܗ ܗ̇ܘ ܠܐܲܪܥܹܗ.
Currently Selected:
ܡܦܩܢܐ 18: ABTAB
Highlight
Copy
Compare
Share
Want to have your highlights saved across all your devices? Sign up or sign in
Aramaic Bible Translation Assyrian Bible © 2025 Aramaic Bible Translation
