ܡܦܩܢܐ 17

ܥܲܡܵܐ ܛܲܪܛܘܼܡܹܐ ܒܘܼܬ ܡ̈ܝܼܵܐ

1ܫܘܼܢܹܐ ܠܗܘܿܢ ܟܠܹܗ ܟܸܢܫܵܐ ܕܒܢܲܝ̈ ܝܼܣܪܵܝܹܠ ܡ̣ܢ ܒܲܪܝܼܵܐ ܕܨܝܼܢ، ܒܡܲܫܪ̈ܵܝܵܬܹܐ، ܐܲܝܟ݂ ܦܘܼܩܕܵܢܵܐ ܕܡܵܪܝܵܐ، ܘܫܪܹܐ ܠܗܘܿܢ ܒܪܦܝܼܕܝܼܡ؛ ܘܠܲܝܬ ܗ݇ܘܵܘ ܡ̈ܝܼܵܐ ܕܫܵܬܹܐ ܗ݇ܘܵܐ ܥܲܡܵܐ. 2ܘܡܘܼܩܪܸܨ ܠܹܗ ܛܵܝܸܦܵܐ ܥܲܡ ܡܘܼܫܹܐ، ܒܹܐܡܵܪܵܐ، ”ܗܲܒ݂݇ܠ ܠܲܢ ܡ̈ܝܼܵܐ ܕܫܵܬܲܚ.“ ܐ݇ܡܝܼܪܹܗ ܐܸܠܲܝܗܝ ܡܘܼܫܹܐ، ”ܩܵܡܘܿܕܝܼ ܡܲܩܪܘܼܨܹܐ ܝܬܘܿܢ ܥܲܡܝܼ؟ ܩܵܡܘܿܕܝܼ ܓ̰ܲܪܘܼܒܹܐ ܝܬܘܿܢ ܠܡܵܪܝܵܐ؟“ 3ܐܝܼܢܵܐ ܨܗܹܐ ܠܹܗ ܬܵܡܵܐ ܥܲܡܵܐ ܠܡ̈ܝܼܵܐ، ܘܛܘܼܪܛܸܡ ܠܗܘܿܢ ܥܲܠ ܡܘܼܫܹܐ ܘܐ݇ܡܝܼܪܗܘܿܢ، ”ܩܵܡܘܿܕܝܼ ܩܲܡ ܡܲܐܣܩܸܬ ܠܲܢ ܡ̣ܢ ܡܸܨܪܹܝܢ ܠܸܩܛܵܠܵܐ ܐܸܠܲܢ ܘܠܒܢܘܿܢܲܢ̈ ܘܠܩܸܢܝܵܢܲܢ̈ ܡ̣ܢ ܨܲܗܘܵܐ؟“ 4ܘܡܘܼܩܘܸܚ ܠܹܗ ܡܘܼܫܹܐ ܠܡܵܪܝܵܐ، ܘܐ݇ܡܝܼܪܹܗ، ”ܡܘܿܕܝܼ ܥܵܒ݂ܕܹܢ ܠܐܵܗܵܐ ܥܲܡܵܐ؟ ܚܲܕ݇ܟ̰ܵܐ ܦܵܝܫܵܐ ܕܪܵܓ̰ܡܝܼ ܠܝܼ.“ 5ܐ݇ܡܝܼܪܹܗ ܡܵܪܝܵܐ ܠܡܘܼܫܹܐ، ”ܙܹܠ݇ ܡ̣ܢ ܩܵܕ݇ܡ ܥܲܡܵܐ. ܫܩܘܿܠ ܥܲܡܘܼܟ݂ ܚܲܕ݇ܟܡܵܐ ܡ̣ܢ ܚܘܵܪ̈ܕܸܩܢܹܐ ܕܝܼܣܪܵܝܹܠ، ܘܫܩܘܿܠ ܒܐܝܼܕܘܼܟ݂ ܚܘܼܛܪܘܼܟ݂ ܕܡܚܹܐ ܠܘܼܟ݂ ܒܝܼܹܗ ܠܢܲܗܪܵܐ ܘܙܹܠ݇. 6ܐܵܢܵܐ ܒܸܬ ܟܵܠܹܝܢ ܩܵܕ݇ܡܘܼܟ݂ ܬܵܡܵܐ ܥܲܠ ܩܵܝܵܐ ܕܚܘܿܪܝܼܒ݂. ܡܵܚܹܝܬ ܥܲܠ ܩܵܝܵܐ، ܘܒܸܬ ܦܵܠܛܝܼ ܡܸܢܹܗ ܡ̈ܝܼܵܐ ܕܫܵܬܹܐ ܥܲܡܵܐ.“ ܘܥܒ݂ܝܼܕ ܠܹܗ ܡܘܼܫܹܐ ܗܲܕܟ݂ܵܐ ܩܵܕ݇ܡ ܥܲܝܢܹ̈ܐ ܕܚܘܵܪ̈ܕܸܩܢܹܐ ܕܝܼܣܪܵܝܹܠ. 7ܘܩܪܹܐ ܠܹܗ ܫܸܡܵܐ ܕܗ̇ܝ ܕܘܼܟܵܐ ”ܡܲܣܵܐ ܘܡܪܝܼܒ݂ܵܐ،“ ܣܵܒܵܒ ܬܵܡܵܐ ܡܘܼܩܪܸܨ ܠܗܘܿܢ ܒܢܲܝ̈ ܝܼܣܪܵܝܹܠ ܘܓ̰ܘܼܪܸܒ ܠܗܘܿܢ ܠܡܵܪܝܵܐ، ܒܹܐܡܵܪܵܐ، ”ܒܓܵܘܲܢ ܝܼܠܹܗ ܡܵܪܝܵܐ، ܝܲܢ ܠܵܐ؟“

ܥܡܵܠܩܵܝܹ̈ܐ ܒܸܦܠܵܫܵܐ ܥܲܡ ܒܢܲܝ̈ ܝܼܣܪܵܝܹܠ

8ܐ݇ܬܹܐ ܠܗܘܿܢ ܥܡܵܠܩܵܝܹ̈ܐ ܘܦܠܝܼܫ ܠܗܘܿܢ ܥܲܡ ܝܼܣܪܵܝܹܠ ܒܪܦܝܼܕܝܼܡ. 9ܐ݇ܡܝܼܪܹܗ ܡܘܼܫܹܐ ܠܝܼܫܘܿܥ ܒܲܪ ܢܘܿܢ، ”ܓܲܒܝܼ ܠܲܢ ܐ݇ܢܵܫܹ̈ܐ، ܘܦܠܘܿܛ ܦܠܘܿܫ ܥܲܡ ܥܡܵܠܩܵܝܹ̈ܐ. ܩܵܝܕܲܡܬܵܐ ܐܵܢܵܐ ܒܸܬ ܟܵܠܹܝܢ ܥܲܠ ܪܹܫܵܐ ܕܪܘܼܡܬܵܐ، ܘܚܘܼܛܪܵܐ ܕܐܲܠܵܗܵܐ ܒܐܝܼܕܝܼ.“ 10ܘܥܒ݂ܝܼܕ ܠܹܗ ܝܼܫܘܿܥ ܒܲܪ ܢܘܿܢ ܕܵܐܟ݂ܝܼ ܕܐ݇ܡܝܼܪܹܗ ܐܸܠܹܗ ܡܘܼܫܹܐ، ܘܐ݇ܙܝܼܠ ܠܹܗ ܠܸܦܠܵܫܵܐ ܥܲܡ ܥܡܵܠܩܵܝܹ̈ܐ؛ ܘܡܘܼܫܹܐ، ܘܐܲܗܪܘܿܢ، ܘܚܘܿܪ، ܐ݇ܣܝܼܩ ܠܗܘܿܢ ܥܲܠ ܪܹܫܵܐ ܕܪܘܼܡܬܵܐ. 11ܗܘܹܐ ܠܵܗ̇، ܕܟܠ ܐܝܼܡܲܢ ܕܡܘܼܪܡܵܐ ܠܹܗ ܐܝܼܕܹܗ ܡܘܼܫܹܐ، ܗܘܹܐ ܠܹܗ ܒܸܓ݂ܠܵܒܵܐ ܝܼܣܪܵܝܹܠ؛ ܘܟܠ ܐܝܼܡܲܢ ܕܡܘܼܢܝܸܚܵܐ ܠܹܗ ܐܝܼܕܹܗ، ܥܡܵܠܹܝܩ ܗܘܹܐ ܠܹܗ ܒܸܓ݂ܠܵܒܵܐ. 12ܐܝܼܢܵܐ ܐܝܼܕܵܬܹ̈ܐ ܕܡܘܼܫܹܐ ܟܟ̰ܝܼܚ ܠܗܘܿܢ. ܘܫܩܝܼܠ ܠܗܘܿܢ ܟܹܐܦܵܐ ܘܡܘܼܬܸܒ݂ ܠܗܘܿܢ ܬܚܘܿܬܘܼܗܝ ܘܝ݇ܬܝܼܒ݂ ܠܹܗ ܥܲܠܘܼܗܝ، ܘܐܲܗܪܘܿܢ ܘܚܘܿܪ ܡܘܼܪܡܲܝ ܠܗܘܿܢ ܐܝܼܕܵܬܹ̈ܗ، ܚܲܕ ܡ̣ܢ ܕܐܵܗܵܐ ܓܹܒܵܐ ܘܚܲܕ ܡ̣ܢ ܕܗ̇ܘ ܓܹܒܵܐ؛ ܘܗܲܕܟ݂ܵܐ ܩܘܹܐ ܠܗܘܿܢ ܐܝܼܕܵܬܹ̈ܗ ܗܲܠ ܓܢܵܝܬܵܐ ܕܫܸܡܫܵܐ. 13ܘܬܒ݂ܝܼܪܹܗ ܝܼܫܘܿܥ ܒܲܪ ܢܘܿܢ ܠܥܡܵܠܹܝܩ ܘܠܛܵܝܸܦܹܗ ܒܦܘܼܡܵܐ ܕܣܲܝܦܵܐ.

14ܗ̇ܝܓܵܗ ܐ݇ܡܝܼܪܹܗ ܡܵܪܝܵܐ ܠܡܘܼܫܹܐ، ”ܟܬܘܿܒ݂ ܐܵܗܵܐ ܓܵܘ ܟܬܵܒ݂ܵܐ ܕܦܵܐܹܫ ܕܟ݂ܝܼܪܵܐ ܘܩܪܝܼ ܠܹܗ ܩܵܕ݇ܡ ܝܼܫܘܿܥ ܒܲܪ ܢܘܿܢ، ܣܵܒܵܒ ܓܪܵܕܵܐ ܒܸܬ ܓܵܪܕܹܢ ܠܕܟ݂ܵܪܵܐ ܕܥܡܵܠܹܝܩ ܡ̣ܢ ܬܚܘܿܬ ܫܡܲܝܵܐ.“ 15ܘܒܢܹܐ ܠܹܗ ܡܘܼܫܹܐ ܡܲܕܒܚܵܐ ܘܩܪܹܐ ܠܹܗ ܫܸܡܹܗ، ܡܵܪܝܵܐ ܐܵܬܝܼ ܝܠܹܗ؛ 16ܘܐ݇ܡܝܼܪܹܗ، ”ܐܝܼܕܵܐ ܦܝܼܫ ܠܵܗ̇ ܡܘܼܪܸܡܬܵܐ ܠܟܘܼܪܣܝܵܐ ܕܡܵܪܝܵܐ. ܡܵܪܝܵܐ ܒܸܬ ܦܵܠܹܫ ܥܲܡ ܥܡܵܠܹܝܩ ܡ̣ܢ ܕܵܘܪܵܐ ܠܕܵܘܪܵܐ.“

Currently Selected:

ܡܦܩܢܐ 17: ABTAB

Highlight

Copy

Compare