ܡܦܩܢܐ 16
16
ܒܢܲܝ̈ ܝܼܣܪܵܝܹܠ ܛܲܪܛܘܼܡܹܐ ܒܘܼܬ ܠܲܚܡܵܐ
1ܫܘܼܢܹܐ ܠܹܗ ܟܠܹܗ ܟܸܢܫܵܐ ܕܒܢܲܝ̈ ܝܼܣܪܵܝܹܠ ܡ̣ܢ ܐܝܼܠܸܡ، ܘܒܝܵܘܡܵܐ ܕܚܲܡܫܲܥܣܲܪ ܒܝܲܪܚܵܐ ܕܬܪܹܝ ܡ̣ܢ ܒܵܬ݇ܪ ܦܠܵܛܬܲܝܗܝ ܡ̣ܢ ܐܲܪܥܵܐ ܕܡܸܨܪܹܝܢ، ܐ݇ܬܹܐ ܠܗܘܿܢ ܠܒܲܪܝܼܵܐ ܕܨܝܼܢ، ܕܝܼܠܹܗ ܒܹܝܠ ܐܝܼܠܸܡ ܘܣܝܼܢܲܝ، 2ܘܛܘܼܪܛܸܡ ܠܗܘܿܢ ܟܠܹܗ ܟܸܢܫܵܐ ܕܒܢܲܝ̈ ܝܼܣܪܵܝܹܠ ܥܲܠ ܡܘܼܫܹܐ ܘܥܲܠ ܐܲܗܪܘܿܢ ܓܵܘ ܒܲܪܝܼܵܐ، 3ܘܐ݇ܡܝܼܪܗܘܿܢ ܐܸܠܲܝܗܝ، ”ܛܘܼܒ݂ܵܐ ܕܗܵܘܲܚ ܗ݇ܘܵܘ ܡܝܼܬܹܐ ܒܐܝܼܕܵܐ ܕܡܵܪܝܵܐ ܓܵܘ ܐܲܪܥܵܐ ܕܡܸܨܪܹܝܢ، ܟܲܕ ܝ݇ܬܝܼܒܹܐ ܝܘܲܚ ܗ݇ܘܵܘ ܒܕܸܦܢܵܐ ܕܡܲܪܸ̈ܓܠܹܐ ܕܒܸܣܪܵܐ، ܒܹܐܟ݂ܵܠܵܐ ܠܲܚܡܵܐ ܠܣܒ݂ܵܥܬܲܢ؛ ܣܵܒܵܒ ܩܲܡ ܦܲܠܛܝܼܬܘܿܢ ܠܲܢ ܠܐܵܗܵܐ ܒܲܪܝܼܵܐ ܠܸܩܛܵܠܵܐ ܠܟܠܵܗ̇ ܐܵܗܵܐ ܟܸܢܫܵܐ ܒܟܸܦܢܵܐ.“
4ܗ̇ܝܓܵܗ ܐ݇ܡܝܼܪܹܗ ܡܵܪܝܵܐ ܠܡܘܼܫܹܐ، ”ܗܵܐ، ܒܸܬ ܡܲܪܥܸܝܢ ܐܸܠܵܘܟ݂ܘܿܢ ܠܲܚܡܵܐ ܡ̣ܢ ܫܡܲܝܵܐ؛ ܦܵܠܛܝܼ ܥܲܡܵܐ ܘܓ̰ܲܡܥܝܼ ܡܹܐܟ݂ܘܼܠܬܵܐ ܕܝܵܘܡܵܐ ܒܝܵܘܡܵܐ، ܗܲܕܟ݂ܵܐ ܕܓ̰ܲܪܒܸܢܗܘܿܢ، ܘܚܵܙܹܝܢ ܐܸܢ ܒܸܬ ܢܵܛܪܝܼ ܦܘܼܩܕܵܢܝܼ ܝܲܢ ܠܵܐ. 5ܒܝܵܘܡܵܐ ܕܐܸܫܬܵܐ، ܟܲܕ ܗܲܕܪܝܼ ܡܸܢܕܝܼ ܠܡܲܝܬܘܼܝܹܐ، ܒܸܬ ܗܵܘܹܐ ܚܲܕ ܒܬܪܹܝ ܗܵܕܵܐ ܥܲܠ ܗ̇ܘ ܕܓ̰ܲܡܥܝܼ ܠܹܗ ܝܵܘܡܵܐ ܒܝܵܘܡܵܐ.“
6ܐ݇ܡܝܼܪܗܘܿܢ ܡܘܼܫܹܐ ܘܐܲܗܪܘܿܢ ܠܟܠܲܝܗܝ ܒܢܲܝ̈ ܝܼܣܪܵܝܹܠ، ”ܒܪܲܡܫܵܐ ܒܸܬ ܝܵܕܥܝܼܬܘܿܢ ܕܡܵܪܝܵܐ ܦܘܼܠܸܛ ܠܹܗ ܐܸܠܵܘܟ݂ܘܿܢ ܡ̣ܢ ܐܲܪܥܵܐ ܕܡܸܨܪܹܝܢ، 7ܘܒܨܲܦܪܵܐ ܒܸܬ ܚܵܙܹܝܬܘܿܢ ܬܸܫܒܘܿܚܬܵܐ ܕܡܵܪܝܵܐ، ܣܵܒܵܒ ܫܡܝܼܥ ܠܹܗ ܛܲܪ̈ܛܲܡܝܵܬܵܘܟ݂ܘܿܢ ܥܲܠ ܡܵܪܝܵܐ. ܐܲܚܢܲܢ ܡܘܿܕܝܼ ܝܘܲܚ ܕܛܲܪܛܘܼܡܹܐ ܝܬܘܿܢ ܥܲܠܲܢ؟“ 8ܗ̇ܝܓܵܗ ܐ݇ܡܝܼܪܹܗ ܡܘܼܫܹܐ، ”ܒܪܲܡܫܵܐ ܒܸܬ ܝܲܗ݇ܒܸܠ ܠܵܘܟ݂ܘܿܢ ܡܵܪܝܵܐ ܒܸܣܪܵܐ ܠܹܐܟ݂ܵܠܵܐ، ܘܒܨܲܦܪܵܐ ܠܲܚܡܵܐ ܠܸܣܒ݂ܵܥܵܐ، ܣܵܒܵܒ ܫܡܝܼܥ ܠܹܗ ܡܵܪܝܵܐ ܛܲܪ̈ܛܲܡܝܵܬܵܘܟ݂ܘܿܢ ܕܐܲܚܬܘܿܢ ܛܲܪܛܘܼܡܹܐ ܝܬܘܿܢ ܥܲܠܘܼܗܝ؛ ܐܲܚܢܲܢ ܡܵܢܝܼ ܝܘܲܚ؟ ܛܲܪ̈ܛܲܡܝܵܬܵܘܟ݂ܘܿܢ ܠܹܐ ܝܢܵܐ ܥܲܠܲܢ ܐܸܠܵܐ ܥܲܠ ܡܵܪܝܵܐ.“
9ܘܐ݇ܡܝܼܪܹܗ ܡܘܼܫܹܐ ܠܐܲܗܪܘܿܢ، ”ܐ݇ܡܘܿܪ ܠܟܠܹܗ ܟܸܢܫܵܐ ܕܒܢܲܝ̈ ܝܼܣܪܵܝܹܠ، ’ܩܲܪܒܸܢܘܼܢ ܩܵܕ݇ܡ ܡܵܪܝܵܐ، ܣܵܒܵܒ ܫܡܝܼܥ ܠܹܗ ܠܛܲܪ̈ܛܲܡܝܵܬܵܘܟ݂ܘܿܢ.‘“ 10ܗܘܹܐ ܠܵܗ̇ ܟܲܕ ܗܲܡܙܘܼܡܹܐ ܝܗ݇ܘܵܐ ܐܲܗܪܘܿܢ ܥܲܡ ܟܠܹܗ ܟܸܢܫܵܐ ܕܒܢܲܝ̈ ܝܼܣܪܵܝܹܠ، ܚܝܼܪܗܘܿܢ ܠܓܹܒܵܐ ܕܒܲܪܝܼܵܐ، ܘܗܵܐ ܬܸܫܒܘܿܚܬܵܐ ܕܡܵܪܝܵܐ ܦܝܼܫ ܠܵܗ̇ ܚܙܝܼܬܵܐ ܓܵܘ ܥܢܵܢܵܐ. 11ܗܘܼܡܙܸܡ ܠܹܗ ܡܵܪܝܵܐ ܥܲܡ ܡܘܼܫܹܐ، ܒܹܐܡܵܪܵܐ، 12”ܫܡܝܼܥ ܠܝܼ ܛܲܪ̈ܛܲܡܝܵܬܹܐ ܕܒܢܲܝ̈ ܝܼܣܪܵܝܹܠ. ܐ݇ܡܘܿܪ ܐܸܠܲܝܗܝ، ’ܒܪܲܡܫܵܐ ܒܸܬ ܐܵܟ݂ܠܝܼܬܘܿܢ ܒܸܣܪܵܐ، ܘܒܨܲܦܪܵܐ ܒܸܬ ܣܵܒ݂ܥܝܼܬܘܿܢ ܒܠܲܚܡܵܐ؛ ܗ̇ܝܓܵܗ ܒܸܬ ܝܵܕܥܝܼܬܘܿܢ ܕܐܵܢܵܐ ܝܘܸܢ ܡܵܪܝܵܐ ܐܲܠܵܗܵܘܟ݂ܘܿܢ.“
ܩܘܼܦܫܝܼܢܹ̈ܐ ܘܡܲܢܢܵܐ ܦܝܵܫܵܐ ܫܘܼܕܪܹܐ
13ܗܘܹܐ ܠܵܗ̇ ܒܪܲܡܫܵܐ، ܐ݇ܬܹܐ ܠܗܘܿܢ ܩܘܼܦܫܝܼܢܹ̈ܐ ܘܟܘܼܣܹܐ ܠܗܘܿܢ ܠܡܲܫܪܝܼܬܵܐ، ܘܒܨܲܦܪܵܐ ܝ݇ܬܝܼܒ݂ ܠܹܗ ܛܠܘܼܠܵܐ ܠܚܵܕܸܪ̈ܘܵܢܹܐ ܕܡܲܫܪܝܼܬܵܐ. 14ܘܟܲܕ ܐ݇ܣܝܼܩ ܠܹܗ ܛܠܘܼܠܵܐ، ܫܛܝܼܚ ܠܹܗ ܥܲܠ ܦܵܬܵܐ ܕܒܲܪܝܼܵܐ ܡܸܢܕܝܼ ܐܲܝܟ݂ ܩܲܠܦܵܐ ܪܲܩܝܼܩܵܐ، ܪܲܩܝܼܩܵܐ ܐܲܝܟ݂ ܣܸܠܘܼܪ، ܥܲܠ ܐܲܪܥܵܐ. 15ܟܲܕ ܚܙܹܐ ܠܗܘܿܢ ܐܸܠܹܗ ܒܢܲܝ̈ ܝܼܣܪܵܝܹܠ، ܐ݇ܡܝܼܪܗܘܿܢ ܚܲܕ ܠܗ̇ܘ ܐ݇ܚܹܪ݇ܢܵܐ، ”ܡܘܿܕܝܼ ܝܠܹܗ ܗ̇ܘ؟“#16:15 ܥܸܒ݂ܪܵܐܝܼܬ: ܡܵܢ ܗܘܼ؟ ܣܵܒܵܒ ܠܹܐ ܝܗ݇ܘܵܘ ܒܝܼܕܵܥܵܐ ܡܘܿܕܝܼ ܝܗ݇ܘܵܐ. ܐ݇ܡܝܼܪܹܗ ܐܸܠܲܝܗܝ ܡܘܼܫܹܐ، ”ܗ̇ܘ ܝܼܠܹܗ ܠܲܚܡܵܐ ܕܝܘܼܗ݇ܒܸܠ ܠܹܗ ܡܵܪܝܵܐ ܐܸܠܵܘܟ݂ܘܿܢ ܠܹܐܟ݂ܵܠܵܐ. 16ܐܵܗܵܐ ܝܠܹܗ ܡܸܢܕܝܼ ܕܦܩܝܼܕ ܠܹܗ ܡܵܪܝܵܐ، ’ܓ̰ܲܡܸܥܡܘܼܢ ܡܸܢܹܗ، ܟܠ ܚܲܕ ܐܲܝܟ݂ ܐ݇ܟ݂ܵܠܬܹܗ، ܚܲܕ ܥܘܿܡܸܪ ܠܟܠ ܐ݇ܢܵܫܵܐ، ܐܲܝܟ݂ ܡܸܢܝܵܢܵܐ ܕܓܵܢܵܬܹ̈ܐ ܒܡܲܫܟܢܹܗ.‘“ 17ܘܥܒ݂ܝܼܕ ܠܗܘܿܢ ܗܲܕܟ݂ܵܐ ܒܢܲܝ̈ ܝܼܣܪܵܝܹܠ؛ ܚܲܕ݇ܟܡܵܐ ܓ̰ܘܼܡܸܥ ܠܗܘܿܢ ܙܵܘܕܵܐ، ܚܲܕ݇ܟܡܵܐ ܒܵܨܘܿܪܵܐ. 18ܘܟܲܕ ܟܝܼܠ ܠܗܘܿܢ ܒܥܘܿܡܸܪ، ܠܵܐ ܡܘܼܙܝܸܕ ܠܹܗ ܗ̇ܘ ܕܓ̰ܘܼܡܥܵܐ ܝܗ݇ܘܵܐ ܙܵܘܕܵܐ، ܘܠܵܐ ܚܣܝܼܪܹܗ ܗ̇ܘ ܕܓ̰ܘܼܡܥܵܐ ܝܗ݇ܘܵܐ ܒܵܨܘܿܪܵܐ؛ ܟܠ ܚܲܕ ܓ̰ܘܼܡܸܥ ܠܹܗ ܐܲܝܟ݂ ܕܣܢܝܼܩܵܐ ܝܗ݇ܘܵܐ ܠܹܐܟ݂ܵܠܵܐ.
19ܐ݇ܡܝܼܪܹܗ ܡܘܼܫܹܐ ܐܸܠܲܝܗܝ، ”ܐ݇ܢܵܫܵܐ ܠܵܐ ܫܵܒܹܩ ܡܸܢܕܝܼ ܡܸܢܹܗ ܗܲܠ ܨܲܦܪܵܐ.“ 20ܐܝܼܢܵܐ ܠܵܐ ܫܡܝܼܥ ܠܗܘܿܢ ܠܡܘܼܫܹܐ؛ ܚܲܕ݇ܟܡܵܐ ܫܒ݂ܝܼܩ ܠܗܘܿܢ ܡܸܢܹܗ ܗܲܠ ܨܲܦܪܵܐ، ܘܥܒ݂ܝܼܪܗܘܿܢ ܓܵܘܹܗ ܬܸܘܸܠܥܹ̈ܐ ܘܚܡܝܼܩ ܠܹܗ؛ ܘܟܪܝܼܒ ܠܹܗ ܡܘܼܫܹܐ ܥܲܠܲܝܗܝ. 21ܟܹܐ ܓ̰ܲܡܸܥ ܗ݇ܘܵܘ ܨܲܦܪܵܐ ܠܨܲܦܪܵܐ، ܐ݇ܢܵܫܵܐ ܚܕܵܐ ܐܲܝܟ݂ ܐ݇ܟ݂ܵܠܬܹܗ؛ ܘܟܲܕ ܫܵܚܹܢ ܗ݇ܘܵܐ ܫܸܡܫܵܐ، ܦܵܝܫܵܢܵܐ ܟܹܐ ܦܵܫܹܪ ܗ݇ܘܵܐ.
22ܘܗܘܹܐ ܠܵܗ̇، ܒܝܵܘܡܵܐ ܕܐܸܫܬܵܐ، ܓ̰ܘܼܡܸܥ ܠܗܘܿܢ ܠܲܚܡܵܐ ܬܪܹܝ ܗܵܕܵܐ، ܬܪܹܝ ܥܘܿܡܹܪܹ̈ܐ ܠܟܠ ܐ݇ܢܵܫܵܐ. ܘܐ݇ܬܹܐ ܠܗܘܿܢ ܟܠܲܝܗܝ ܓܘܼܪ̈ܵܢܹܐ ܕܟܢܘܼܫܝܵܐ ܘܡܘܼܕܸܥ ܠܗܘܿܢ ܠܡܘܼܫܹܐ. 23ܘܐ݇ܡܝܼܪܹܗ ܐܸܠܲܝܗܝ ܡܘܼܫܹܐ، ”ܐܵܗܵܐ ܝܠܹܗ ܡܸܢܕܝܼ ܕܦܩܝܼܕ ܠܹܗ ܡܵܪܝܵܐ، ’ܩܘܼܕܡܹܐ ܝܵܘܡܵܐ ܕܡܲܢܝܲܚܬܵܐ ܝܠܹܗ، ܫܲܒܬܵܐ ܝܠܵܗ̇، ܩܘܼܕܸܫܬܵܐ ܠܡܵܪܝܵܐ؛ ܝ݇ܦܹܝܡܘܼܢ ܡܸܢܕܝܼ ܕܝܵܦܹܝܬܘܿܢ ܘܒܲܫܠܘܼܢ ܡܸܢܕܝܼ ܕܒܲܫܠܝܼܬܘܿܢ، ܘܡܸܢܕܝܼ ܕܙܵܐܹܕ ܫܒ݂ܘܿܩܘܼܢ ܠܹܗ ܗܲܠ ܩܵܝܕܲܡܬܵܐ.‘“ 24ܘܫܒ݂ܝܼܩ ܠܗܘܿܢ ܗܲܠ ܩܵܝܕܲܡܬܵܐ ܕܵܐܟ݂ܝܼ ܕܦܩܝܼܕ ܠܹܗ ܡܘܼܫܹܐ، ܘܠܵܐ ܚܡܝܼܩ ܠܹܗ، ܘܠܲܝܬ ܗ݇ܘܵܘ ܬܸܘܸܠܥܹ̈ܐ ܒܝܼܹܗ. 25ܐ݇ܡܝܼܪܹܗ ܡܘܼܫܹܐ، ”ܐ݇ܟ݂ܘܿܠܘܼܢ ܠܹܗ ܐܸܕܝܘܿܡ ܝܵܘܡܵܐ، ܣܵܒܵܒ ܫܲܒܬܵܐ ܝܠܵܗ̇ ܐܸܕܝܘܿܡ ܠܡܵܪܝܵܐ؛ ܠܹܐ ܡܲܫ݇ܟ̰ܚܝܼܬܘܿܢ ܠܹܗ ܒܕܸܫܬܵܐ ܐܸܕܝܘܿܡ ܝܵܘܡܵܐ. 26ܐܸܫܬܵܐ ܝܵܘܡܵܢܹ̈ܐ ܒܸܬ ܓ̰ܲܡܥܝܼܬܘܿܢ ܡܸܢܹܗ؛ ܐܝܼܢܵܐ ܒܝܵܘܡܵܐ ܕܫܲܒ݂ܥܵܐ ܫܲܒܬܵܐ ܝܠܵܗ̇، ܠܹܐ ܗܵܘܹܐ ܡܸܢܕܝܼ ܡܸܢܹܗ.“
27ܗܘܹܐ ܠܵܗ̇ ܒܝܵܘܡܵܐ ܕܫܲܒ݂ܥܵܐ، ܦܠܝܼܛ ܠܗܘܿܢ ܚܲܕ݇ܟܡܵܐ ܠܓ̰ܲܡܘܼܥܹܐ، ܐܝܼܢܵܐ ܠܵܐ ܡܘܼܫ݇ܟ̰ܸܚ ܠܗܘܿܢ ܡܸܢܕܝܼ. 28ܐ݇ܡܝܼܪܹܗ ܡܵܪܝܵܐ ܠܡܘܼܫܹܐ، ”ܗܲܠ ܐܝܼܡܲܢ ܒܸܬ ܡܲܚܦܸܠܝܼܬܘܿܢ ܠܸܢܛܵܪܵܐ ܦܘܼܩܕܵܢܝܼ̈ ܘܢܵܡܘܿܣܝܼ̈؟ 29”ܚܙܹܝܡܘܼܢ، ܡܵܪܝܵܐ ܝܘܼܗ݇ܒ݂ܵܐ ܝܠܹܗ ܐܸܠܵܘܟ݂ܘܿܢ ܫܲܒܬܵܐ. ܒܘܼܬ ܐܵܗܵܐ ܒܝܵܘܡܵܐ ܕܐܸܫܬܵܐ ܒܸܬ ܝܲܗ݇ܒܸܠ ܠܵܘܟ݂ܘܿܢ ܠܲܚܡܵܐ ܩܵܐ ܬܪܹܝ ܝܵܘܡܵܢܹ̈ܐ. ܟܠ ܐ݇ܢܵܫܵܐ ܦܵܐܹܫ ܒܕܘܼܟܬܹܗ؛ ܠܵܐ ܦܵܠܹܛ ܐ݇ܢܵܫܵܐ ܡ̣ܢ ܕܘܼܟܬܹܗ ܒܝܵܘܡܵܐ ܕܫܲܒ݂ܥܵܐ.“ 30ܘܢܝܼܚ ܠܹܗ ܥܲܡܵܐ ܒܝܵܘܡܵܐ ܕܫܲܒ݂ܥܵܐ.
31ܘܩܪܹܐ ܠܗܘܿܢ ܒܹܝܬ ܝܼܣܪܵܝܹܠ ܫܸܡܹܗ، ܡܲܢܢܵܐ؛#16:31 ܥܸܒ݂ܪܵܐܝܼܬ: ”ܡܲܢ،“ ܒܡܲܥܢܵܝܵܐ: ܡܘܿܕܝܼ ܝܠܹܗ؟ ܐܲܝܟ݂ ܒܲܪܙܲܪܥܵܐ ܕܬܵܘܠܹ̈ܐ ܝܗ݇ܘܵܐ، ܚܘܵܪܵܐ، ܘܛܲܥܡܹܗ ܐܲܝܟ݂ ܠܲܚܡܵܐ ܕܲܩܝܼܩܵܐ ܓܒ݂ܝܼܠܵܐ ܒܕܸܒ݂ܫܵܐ. 32ܐ݇ܡܝܼܪܹܗ ܡܘܼܫܹܐ، ”ܐܵܗܵܐ ܝܠܹܗ ܡܸܢܕܝܼ ܕܦܩܝܼܕ ܠܹܗ ܡܵܪܝܵܐ، ’ܚܲܕ ܥܘܿܡܸܪ ܡܸܠܝܵܐ ܡܸܢܹܗ ܦܵܐܹܫ ܢܛܝܼܪܵܐ ܠܬܵܘܠܕܵܬܵܘ̈ܟ݂ܘܿܢ، ܕܚܵܙܝܼ ܠܹܗ ܠܲܚܡܵܐ ܕܡܘܼܐܟܸܠ ܠܝܼ ܐܸܠܵܘܟ݂ܘܿܢ ܓܵܘ ܒܲܪܝܼܵܐ ܒܥܕܵܢܵܐ ܕܩܲܡ ܦܲܠܛܸܢܵܘܟ݂ܘܿܢ ܡ̣ܢ ܐܲܪܥܵܐ ܕܡܸܨܪܹܝܢ.‘“
33ܘܐ݇ܡܝܼܪܹܗ ܡܘܼܫܹܐ ܠܐܲܗܪܘܿܢ، ”ܫܩܘܿܠ ܚܲܕ ܡܵܐܢܵܐ ܘܡܲܬܸܒ݂ ܓܵܘܹܗ ܚܲܕ ܥܘܿܡܸܪ ܡܸܠܝܵܐ ܡܲܢܢܵܐ، ܘܡܲܬܸܒ݂ ܠܹܗ ܩܵܕ݇ܡ ܡܵܪܝܵܐ ܕܦܵܐܹܫ ܢܛܝܼܪܵܐ ܠܬܵܘܠܕܵܬܵܘ̈ܟ݂ܘܿܢ.“ 34ܕܵܐܟ݂ܝܼ ܕܦܩܝܼܕ ܠܹܗ ܡܵܪܝܵܐ ܠܡܘܼܫܹܐ، ܗܵܕܵܐ ܡܘܼܬܸܒ݂ ܠܹܗ ܐܲܗܪܘܿܢ ܩܵܕ݇ܡ ܩܹܒ݂ܘܼܬܵܐ ܕܣܵܗܕܘܼܬܵܐ ܕܦܵܝܫܵܐ ܢܛܝܼܪܬܵܐ. 35ܒܢܲܝ̈ ܝܼܣܪܵܝܹܠ ܐ݇ܟ݂ܝܼܠ ܠܗܘܿܢ ܡܲܢܢܵܐ ܐܲܪܒܥܝܼ ܫܸܢܹ̈ܐ، ܗܲܠ ܕܐ݇ܬܹܐ ܠܗܘܿܢ ܠܐܲܪܥܵܐ ܡܸܬܥܲܡܪܵܢܝܼܬܵܐ؛ ܐ݇ܟ݂ܝܼܠ ܠܗܘܿܢ ܡܲܢܢܵܐ ܗܲܠ ܕܐ݇ܬܹܐ ܠܗܘܿܢ ܠܡܲܪܙܵܐ ܕܐܲܪܥܵܐ ܕܟܢܲܥܢ. 36(ܥܘܿܡܸܪ ܚܲܕ ܥܣܝܼܪܵܝܵܐ ܕܐܹܦܵܐ ܝܠܹܗ.)
Currently Selected:
ܡܦܩܢܐ 16: ABTAB
Highlight
Copy
Compare
Share
Want to have your highlights saved across all your devices? Sign up or sign in
Aramaic Bible Translation Assyrian Bible © 2025 Aramaic Bible Translation
