ܣܘܥܪ̈ܢܐ 20

ܦܵܘܠܘܿܣ ܓܵܘ ܡܵܩܹܕܘܿܢܝܼܵܐ

1ܡ̣ܢ ܒܵܬ݇ܪ ܕܫܠܹܐ ܠܹܗ ܫܓ݂ܘܼܫܝܵܐ ܓܵܘ ܐܵܦܸܣܘܿܣ، ܩܪܹܐ ܠܹܗ ܦܵܘܠܘܿܣ ܠܬܲܠܡܝܼ̈ܕܹܐ، ܘܝܘܼܗܒܲܝ ܠܹܗ ܠܸܒܵܐ، ܫܒ݂ܝܼܩܲܝ ܠܹܗ ܘܦܠܝܼܛ ܠܹܗ ܐ݇ܙܝܼܠ ܠܹܗ ܠܡܵܩܹܕܘܿܢܝܼܵܐ. 2ܚܕܝܼܪܹܗ ܒܗ̇ܘ ܐܲܬܪܵܐ، ܘܝܘܼܗ݇ܒܸܠ ܠܹܗ ܠܸܒܵܐ ܠܐ݇ܢܵܫܹ̈ܐ ܒܗܹܡܸܙܡܵܢܹ̈ܐ ܪܵܒܵܐ ܘܐ݇ܬܹܐ ܠܹܗ ܠܐܲܬܪܵܐ ܕܝܵܘܢܵܝܹ̈ܐ. 3ܦܝܼܫ ܠܹܗ ܬܵܡܵܐ ܬܠܵܬܵܐ ܝܲܪ̈ܚܹܐ. ܗ̇ܘ ܗܕܝܼܪܵܐ ܝܗ݇ܘܵܐ ܠܹܐܙܵܠܵܐ ܠܣܘܼܪܝܼܵܐ، ܐܝܼܢܵܐ ܩܛܝܼܥ ܠܹܗ ܒܠܸܒܹܗ ܕܕܵܐܹܪ ܡ̣ܢ ܓܵܘ ܡܵܩܹܕܘܿܢܝܼܵܐ ܒܗ̇ܝ ܕܝܗܘܼܕܵܝܹ̈ܐ ܥܒ݂ܝܼܕ ܠܗܘܿܢ ܒܘܼܨܵܐ ܥܲܠܘܼܗܝ. 4ܦܠܝܼܛ ܠܗܘܿܢ ܥܲܡܹܗ ܣܹܘܦܵܛܪܘܿܣ، ܒܪܘܿܢܵܐ ܕܦܘܼܪܘܿܣ ܡ̣ܢ ܒܹܪܘܿܐܵܐ ܡܕܝܼܢ݇ܬܵܐ، ܘܐܵܪܸܣܛܲܪܟ݂ܘܿܣ ܘܣܲܩܘܼܢܕܘܿܣ ܡ̣ܢ ܬܹܣܵܠܘܿܢܝܼܩܹܐ، ܘܓܵܐܝܼܘܿܣ ܡ̣ܢ ܕܲܪܒܹܐ ܡܕܝܼܢ݇ܬܵܐ، ܘܛܝܼܡܵܬܹܐܘܿܣ، ܘܡ̣ܢ ܐܵܣܝܼܵܐ ܛܘܼܟ݂ܝܼܩܘܿܣ ܘܛܪܘܿܦܝܼܡܘܿܣ. 5ܐܲܢܹܐ ܐ݇ܙܝܼܠ ܠܗܘܿܢ ܡ̣ܢ ܩܵܕ݇ܡ ܕܝܼܲܢ، ܘܣܦܝܼܪܗܘܿܢ ܥܲܠܲܢ ܓܵܘ ܛܪܘܿܐܘܿܣ. 6ܐܲܚܢܲܢ ܛܪܹܐ ܠܲܢ ܒܝܵܡܵܐ ܡ̣ܢ ܦܝܼܠܝܼܦܘܿܣ ܡ̣ܢ ܒܵܬ݇ܪ ܥܹܐܕܵܐ ܕܦܲܛܝܼܪܹ̈ܐ. ܡ̣ܢ ܒܵܬ݇ܪ ܚܲܡܫܵܐ ܝܵܘܡܵܢܹ̈ܐ ܡܛܹܐ ܠܲܢ ܠܟܸܣ ܠܲܝܗܝ ܒܛܪܘܿܐܘܿܣ. ܦܝܼܫ ܠܲܢ ܬܵܡܵܐ ܫܲܒ݂ܥܵܐ ܝܵܘܡܵܢܹ̈ܐ. 7ܒܝܵܘܡܵܐ ܩܵܕ݇ܡܵܝܵܐ ܕܫܲܒܬܵܐ ܓ̰ܡܝܼܥ ܠܲܢ ܠܸܩܨܵܝܵܐ ܠܲܚܡܵܐ، ܘܫܘܼܪܹܐ ܠܹܗ ܦܵܘܠܘܿܣ ܠܗܲܡܙܘܼܡܹܐ. ܘܡܘܼܪܝܸܟ݂ܵܐ ܠܹܗ ܗܲܡܙܲܡܬܹܗ ܗܲܠ ܦܲܠܓܵܐ ܕܠܲܝܠܹܐ، ܣܵܒܵܒ ܒܝܵܘܡܵܐ ܐ݇ܚܹܪ݇ܢܵܐ ܗܕܝܼܪܵܐ ܝܗ݇ܘܵܐ ܕܐܵܙܹܠ ܗ݇ܘܵܐ. 8ܐܝܼܬ ܗ݇ܘܵܘ ܠܲܡܦܹܝ̈ܕܹܐ ܪܵܒܵܐ ܓܵܘ ܥܸܠܝܼܬܵܐ ܕܓ̰ܡܝܼܥܹܐ ܝܘܲܚ ܗ݇ܘܵܘ ܓܵܘܘܼܗ̇. 9ܘܐܝܼܬ ܗ݇ܘܵܐ ܬܵܡܵܐ ܚܲܕ ܥܠܲܝܡܵܐ ܫܸܡܹܗ ܐܸܘܛܝܼܟ݂ܘܿܣ ܝ݇ܬܝܼܒ݂ܵܐ ܓܵܘ ܟܵܘܹܐ، ܥܒ݂ܝܼܪܵܐ ܒܫܸܢܬܵܐ ܝܲܩܘܼܪܬܵܐ. ܘܟܲܕ ܡܘܼܪܝܸܟ݂ܵܐ ܠܹܗ ܦܵܘܠܘܿܣ ܗܹܡܸܙܡܵܢ ܩܵܐ ܪܵܒܵܐ ܥܕܵܢܵܐ، ܗ̇ܘ ܥܠܲܝܡܵܐ ܥܒ݂ܝܼܪܵܐ ܒܫܸܢܬܵܐ ܢܦܝܼܠ ܠܹܗ ܡ̣ܢ ܬܵܒܵܩܵܐ ܕܬܠܵܬܵܐ، ܘܦܝܼܫ ܠܹܗ ܫܩܝܼܠܵܐ ܟܲܕ ܡܝܼܬܵܐ. 10ܨܠܹܐ ܠܹܗ ܦܵܘܠܘܿܣ، ܘܢܦܝܼܠ ܠܹܗ ܥܲܠܘܼܗܝ ܘܚܦܝܼܩ ܠܹܗ، ܘܐ݇ܡܝܼܪܹܗ ܐܸܠܲܝܗܝ، ”ܠܵܐ ܙܵܕܥܝܼܬܘܿܢ، ܚܵܝܵܐ ܝܠܹܗ.“ 11ܐ݇ܣܝܼܩ ܠܹܗ ܡܸܢܕܪܸܫ ܥܸܠܸܠ، ܩܨܹܐ ܠܹܗ ܠܲܚܡܵܐ ܘܐ݇ܟ݂ܝܼܠ ܠܹܗ. ܘܡ̣ܢ ܒܵܬ݇ܪ ܕܗܘܼܡܙܸܡ ܠܹܗ ܗܲܠ ܙܪܵܩܵܐ ܕܫܸܡܫܵܐ، ܐ݇ܙܝܼܠ ܠܹܗ. 12ܐ݇ܢܵܫܹ̈ܐ ܠܘܼܒܸܠ ܠܗܘܿܢ ܠܗ̇ܘ ܥܠܲܝܡܵܐ ܚܵܝܵܐ ܠܒܲܝܬܵܐ، ܘܪܵܒܵܐ ܚܕܹܐ ܠܗܘܿܢ.

ܡ̣ܢ ܛܪܘܿܐܘܿܣ ܠܡܝܼܠܹܛܘܿܣ

13ܐܲܚܢܲܢ ܐ݇ܙܝܼܠ ܠܲܢ ܩܵܕ݇ܡܵܝܬܵܐ ܒܓܵܡܝܼ ܘܛܪܹܐ ܠܲܢ ܠܐܵܣܘܿܣ، ܕܫܵܩܠܲܚ ܗ݇ܘܵܐ ܠܦܵܘܠܘܿܣ ܥܲܡܲܢ ܡ̣ܢ ܬܵܡܵܐ، ܣܵܒܵܒ ܗܲܕܟ݂ܵܐ ܡܘܼܪܝܸܙܘܼܗ̇ ܝܗ݇ܘܵܐ ܕܗ̇ܘ ܒܸܬ ܐܵܙܹܠ ܗ݇ܘܵܐ ܠܬܵܡܵܐ ܒܒܸܪܙܵܐ. 14ܐܝܼܡܲܢ ܕܬܦܝܼܩ ܠܹܗ ܒܝܼܲܢ ܓܵܘ ܐܵܣܘܿܣ، ܫܩܝܼܠ ܠܲܢ ܐܸܠܹܗ ܘܐ݇ܬܹܐ ܠܲܢ ܠܡܝܼܛܘܿܠܝܼܢܹܐ. 15ܒܝܵܘܡܵܐ ܐ݇ܚܹܪ݇ܢܵܐ ܛܪܹܐ ܠܲܢ ܡ̣ܢ ܬܵܡܵܐ ܘܐ݇ܬܹܐ ܠܲܢ ܠܒܲܠܩܘܼܒ݂ܠ ܕܓܵܙܲܪܬܵܐ ܕܟܝܼܘܿܣ. ܘܒܝܵܘܡܵܐ ܐ݇ܚܹܪ݇ܢܵܐ ܐ݇ܬܹܐ ܠܲܢ ܠܣܵܡܘܿܣ، ܘܒܝܵܘܡܵܐ ܕܒܵܬ݇ܪ ܡܸܢܹܗ ܠܡܝܼܠܹܛܘܿܣ. 16ܦܵܘܠܘܿܣ ܩܛܝܼܥܵܐ ܝܗ݇ܘܵܐ ܒܠܸܒܹܗ ܕܛܵܪܹܐ ܗ݇ܘܵܐ ܡ̣ܢ ܠܟܸܣ ܐܵܦܸܣܘܿܣ ܕܠܵܐ ܥܲܪܩܸܠ ܗ݇ܘܵܐ ܓܵܘ ܐܵܣܝܼܵܐ، ܣܵܒܵܒ ܡܲܠܝܘܼܙܹܐ ܝܗ݇ܘܵܐ ܕܐܸܢ ܡܵܨܹܐ ܗ݇ܘܵܐ ܩܵܐ ܥܹܐܕܵܐ ܕܦܲܢܛܹܩܘܼܣܛܹܐ ܗܵܘܹܐ ܗ݇ܘܵܐ ܓܵܘ ܐܘܿܪܸܫܠܸܡ.

ܦܵܘܠܘܿܣ ܗܲܡܙܘܼܡܹܐ ܩܵܐ ܚܘܵܪ̈ܕܸܩܢܹܐ ܕܐܵܦܸܣܘܿܣ

17ܡ̣ܢ ܡܝܼܠܹܛܘܿܣ ܫܘܼܕܸܪܹܗ ܠܐܵܦܸܣܘܿܣ ܘܩܪܹܐ ܠܹܗ ܠܚܘܵܪ̈ܕܸܩܢܹܐ ܕܥܹܕܬܵܐ. 18ܐܝܼܡܲܢ ܕܐ݇ܬܹܐ ܠܗܘܿܢ ܠܟܸܣ ܠܹܗ، ܐ݇ܡܝܼܪܹܗ ܐܸܠܲܝܗܝ، ”ܐܲܚܬܘܿܢ ܟܹܐ ܝܵܕܥܝܼܬܘܿܢ ܕܗܵܐ ܡ̣ܢ ܝܵܘܡܵܐ ܩܵܕ݇ܡܵܝܵܐ ܕܥܒ݂ܝܼܪܝܼ ܠܐܵܣܝܼܵܐ ܕܵܐܟ݂ܝܼ ܗܘܹܐ ܠܝܼ ܠܟܸܣ ܠܵܘܟ݂ܘܿܢ ܟܠܵܗ̇ ܥܕܵܢܵܐ، 19”ܒܸܦܠܵܚܵܐ ܠܡܵܪܝܵܐ ܒܟܠ ܡܲܟܝܼܟ݂ܘܼܬܵܐ ܘܒܕܸܡܥܹ̈ܐ، ܘܒܓ̰ܘܼܪ̈ܵܒܹܐ ܕܬܦܝܼܩ ܠܗܘܿܢ ܒܝܼܝܼ ܡ̣ܢ ܒܘܼܨܹ̈ܐ ܕܝܗܘܼܕܵܝܹ̈ܐ. 20”ܘܠܵܐ ܚܣܝܼܟ݂ ܠܝܼ ܕܡܲܟܪܸܙܸܢ ܗ݇ܘܵܐ ܐܸܠܵܘܟ݂ܘܿܢ ܡܸܢܕܝܼ ܕܐܝܼܬ ܠܹܗ ܝܘܼܬܪܵܢܵܐ، ܘܕܡܲܠܦܸܢ ܗ݇ܘܵܐ ܠܵܘܟ݂ܘܿܢ ܓܲܠܝܵܐܝܼܬ، ܘܡ̣ܢ ܒܲܝܬܵܐ ܠܒܲܝܬܵܐ، 21”ܘܟܹܐ ܝܵܗ݇ܒܹܢ ܗ݇ܘܵܐ ܣܵܗܕܘܼܬܵܐ ܠܝܗܘܼܕܵܝܹ̈ܐ ܘܠܝܵܘܢܵܝܹ̈ܐ ܕܕܵܝܪܝܼ ܠܟܸܣ ܐܲܠܵܗܵܐ ܒܬܝܵܒ݂ܘܼܬܵܐ، ܘܗܲܡܸܢܝܼ ܒܡܵܪܲܢ ܝܼܫܘܿܥ ܡܫܝܼܚܵܐ. 22”ܘܐܵܕܝܼܵܐ ܟܲܕ ܦܝܼܫܵܐ ܝܘܸܢ ܐ݇ܣܝܼܪܵܐ ܒܪܘܼܚܵܐ، ܒܹܐܙܵܠܵܐ ܝܘܸܢ ܠܐܘܿܪܸܫܠܸܡ. ܠܹܐ ܝܘܸܢ ܒܝܼܕܵܥܵܐ ܡܘܿܕܝܼ ܒܸܬ ܩܲܘܸܡ ܐܸܠܝܼ ܬܵܡܵܐ. 23”ܪܘܼܚܵܐ ܕܩܘܼܕܫܵܐ ܐܲܚܟ̰ܝܼ ܟܹܐ ܡܲܕܸܥ ܠܝܼ ܕܒܟܠ ܡܕܝܼܢ݇ܬܵܐ ܒܹܝܬ ܐܲܣܝܼܪܹ̈ܐ ܘܐܘܼܠܨܵܢܹ̈ܐ ܒܸܬ ܬܵܦܩܝܼ ܒܝܼܝܼ. 24”ܐܝܼܢܵܐ ܐܵܢܵܐ ܠܹܐ ܝܘܸܢ ܒܸܚܫܵܒ݂ܘܼܗ̇ ܚܲܕ ܡܸܢܕܝܼ ܓܵܢܝܼ ܕܐܝܼܬ ܠܵܗ̇ ܛܝܼܡܵܐ ܠܟܸܣ ܠܝܼ، ܕܬܲܡܸܡܸܢ ܪܲܗܛܝܼ ܘܚܸܠܡܲܬ ܕܣܘܼܦܹܐ ܠܹܗ ܐܸܠܝܼ ܡܵܪܲܢ ܝܼܫܘܿܥ، ܠܸܣܗܵܕܵܐ ܠܐܹܘܲܢܓܲܠܝܼܘܿܢ ܕܫܵܦܵܩܲܬ ܕܐܲܠܵܗܵܐ.

25”ܘܐܵܕܝܼܵܐ، ܗܵܐ، ܐܵܢܵܐ ܒܝܼܕܵܥܵܐ ܝܘܸܢ، ܕܡܸܢܕܪܸܫ ܦܵܬܝܼ ܠܹܐ ܚܵܙܹܝܬܘܿܢ ܠܵܗ̇ ܟܠܵܘܟ݂ܘܿܢ، ܐܲܚܬܘܿܢ ܕܚܕܝܼܪܝܼ ܓܵܘܵܘܟ݂ܘܿܢ ܘܡܘܼܟܪܸܙ ܠܝܼ ܡܲܠܟܘܼܬܵܐ. 26”ܒܘܼܬ ܐܵܗܵܐ ܒܹܐܡܵܪܵܐ ܝܘܸܢ ܐܸܠܵܘܟ݂ܘܿܢ ܐܸܕܝܘܿܡ، ܕܸܟ݂ܝܵܐ ܝܘܸܢ ܡ̣ܢ ܕܸܡܵܐ ܕܟܠܲܝܗܝ ܐ݇ܢܵܫܹ̈ܐ، 27”ܣܵܒܵܒ ܠܵܐ ܫܠܹܐ ܠܝܼ ܡ̣ܢ ܠܡܲܕܘܼܥܵܘܟ݂ܘܿܢ ܟܠܹܗ ܨܸܒ݂ܝܵܢܵܐ ܕܐܲܠܵܗܵܐ. 28”ܢܛܘܿܪܘܼܢ ܠܓܵܢܵܘܟ݂ܘܿܢ ܘܠܟܠܵܗ̇ ܡܲܪܥܝܼܬܵܐ، ܗ̇ܝ ܕܩܲܡ ܥܵܒܹܕ ܠܵܘܟ݂ܘܿܢ ܪܘܼܚܵܐ ܕܩܘܼܕܫܵܐ ܐܲܦܸܣܩܘܿܦܹ̈ܐ ܥܲܠܘܼܗ̇، ܕܡܲܪܥܹܝܬܘܿܢ ܠܥܹܕܬܵܐ ܕܡܫܝܼܚܵܐ، ܗ̇ܝ ܕܙܒ݂ܝܼܢܵܐ ܠܹܗ ܒܕܸܡܹܗ. 29”ܐܵܢܵܐ ܒܝܼܕܵܥܵܐ ܝܘܸܢ ܕܡ̣ܢ ܒܵܬ݇ܪ ܕܐܵܙܹܠ݇ܢ ܒܸܬ ܥܵܒ݂ܪܝܼ ܓܵܘܵܘܟ݂ܘܿܢ ܕܹܐܒܹ̈ܐ ܚܵܛܘܿܦܹ̈ܐ، ܘܠܹܐ ܥܵܒ݂ܕܝܼ ܪ̈ܲܚܡܹܐ ܥܲܠ ܡܲܪܥܝܼܬܵܐ. 30”ܐܘܼܦ ܡ̣ܢ ܓܵܘܵܘܟ݂ܘܿܢ ܒܸܬ ܩܵܝܡܝܼ ܐ݇ܢܵܫܹ̈ܐ ܕܒܸܬ ܗܲܡܙܸܡܝܼ ܡܸܢܕܝܼܵܢܹ̈ܐ ܦܟ̰ܝܼܠܹ̈ܐ ܘܓܵܪܫܝܼ ܬܲܠܡܝܼ̈ܕܹܐ ܒܵܬ݇ܪܲܝܗܝ. 31”ܒܘܼܬ ܐܵܗܵܐ ܗܘܹܝܡܘܼܢ ܪܥܝܼܫܹܐ. ܕܟ݂ܘܿܪܘܼܢ ܕܠܵܐ ܫܠܹܐ ܠܝܼ ܬܠܵܬ ܫܸܢܹ̈ܐ، ܒܠܲܝܠܹܐ ܘܒܐܝܼܡܵܡܵܐ، ܠܝܼܵܗ݇ܒ݂ܵܐ ܡܲܪܬܝܼܵܢܘܼܬܵܐ ܒܕܸܡܥܹ̈ܐ ܕܥܲܝܢܹ̈ܐ ܠܟܠ ܚܲܕ ܡܸܢܵܘܟ݂ܘܿܢ. 32”ܘܐܵܕܝܼܵܐ ܣܲܦܘܼܝܵܘܟ݂ܘܿܢ ܝܼܘܸܢ ܒܐܲܠܵܗܵܐ ܘܒܗܹܡܸܙܡܵܢ ܕܫܵܦܵܩܲܬܹܗ، ܗ̇ܝ ܕܟܹܐ ܡܵܨܝܵܐ ܒܵܢܝܵܐ ܠܵܘܟ݂ܘܿܢ ܘܝܵܗ݇ܒ݂ܵܐ ܠܵܘܟ݂ܘܿܢ ܝܵܪܬܘܼܬܵܐ ܥܲܡ ܟܠܲܝܗܝ ܩܲܕܝܼܫܹ̈ܐ. 33”ܠܹܐ ܝܘܸܢ ܫܘܼܗܘܸܬܵܐ ܠܣܹܐܡܵܐ ܝܲܢ ܠܕܲܗܒ݂ܵܐ ܝܲܢ ܠܓ̰ܘܼܠܹ̈ܐ ܕܐܘܼܦ ܚܲܕ ܐ݇ܢܵܫܵܐ. 34”ܐܲܚܬܘܿܢ ܟܹܐ ܝܵܕܥܝܼܬܘܿܢ ܕܐܲܢܹܐ ܐܝܼܕܵܬܝܼ̈ ܡܠܹܐ ܠܗܘܿܢ ܠܣܢܝܼܩܘܼܬܝܼ ܘܠܣܢܝܼܩܘܼܬܵܐ ܕܐܵܢܝܼ ܕܝܼܗ݇ܘܵܘ ܥܲܡܝܼ. 35”ܩܲܡ ܡܲܕܥܸܢܵܘܟ݂ܘܿܢ ܒܟܠ ܡܸܢܕܝܼ ܕܥܒ݂ܝܼܕ ܠܝܼ، ܕܵܐܟ݂ܝܼ ܒܦܘܼܠܚܵܢܵܐ ܩܸܫܝܵܐ ܘܵܠܹܐ ܝܠܵܗ̇ ܕܗܲܝܸܪܲܚ ܠܐܵܢܝܼ ܕܝܼܢܵܐ ܙܲܒܘܼܢܹ̈ܐ. ܕܵܟ݂ܪܲܚ ܗܹܡܸܙܡܵܢܹ̈ܐ ܕܡܵܪܲܢ ܝܼܫܘܿܥ ܡܫܝܼܚܵܐ ܕܐ݇ܡܝܼܪܹܗ، ’ܛܘܼܒ݂ܵܐ ܠܗ̇ܘ ܕܝܲܗ݇ܒܸܠ، ܙܵܘܕܵܐ ܡ̣ܢ ܠܗ̇ܘ ܕܫܵܩܹܠ.‘“

36ܡ̣ܢ ܒܵܬ݇ܪ ܕܗܘܼܡܙܸܡ ܠܹܗ ܐܲܢܹܐ ܗܹܡܸܙܡܵܢܹ̈ܐ، ܒܪܝܼܟ ܠܹܗ ܥܲܠ ܒܘܼܪ̈ܟܵܟܘܼܗܝ ܥܲܡ ܟܠܲܝܗܝ ܐ݇ܚܹܪ̈݇ܢܹܐ ܘܨܘܼܠܹܐ ܠܹܗ. 37ܒܟܹܐ ܠܗܘܿܢ ܟܠܲܝܗܝ. ܚܦܝܼܩ ܠܗܘܿܢ ܠܦܵܘܠܘܿܣ ܘܢܫܝܼܩ ܠܗܘܿܢ ܐܸܠܹܗ. 38ܐܝܼܢܵܐ ܒܘܼܫ ܙܵܘܕܵܐ ܦܫܝܼܡ ܠܗܘܿܢ ܒܝܲܕ ܗܹܡܸܙܡܵܢ ܕܐ݇ܡܝܼܪܹܗ، ܕܐ݇ܚܹܪ݇ܢܵܐ ܠܹܐ ܚܵܙܝܼ ܗ݇ܘܵܘ ܠܵܗ̇ ܦܵܬܹܗ. ܗ̇ܝܓܵܗ ܡܘܼܦܫܸܛ ܠܗܘܿܢ ܐܸܠܹܗ ܗܲܠ ܓܵܡܝܼ.

Currently Selected:

ܣܘܥܪ̈ܢܐ 20: ABTAB

Highlight

Copy