Mark 1

Pregoth Yowann Besydhyer

Mat 3:1-12; Luk 3:1-9, 15-17; Yow 1:19-28

1Dalleth aweyl Yesu Krist, Mab Duw. 2Kepar dell yw skrifys yn Ysay an profoes,

‘Awotta, my a dhannvon ow hannas a-rag dha fas,

neb a dharbar dha fordh;#1:2 dha fordh: War-lergh re a'n dornskrifow dha fordh a-dheragos.

3lev onan ow kria y'n gwylvos:

Pareusewgh fordh an Arloedh, gwrewgh kompes y hynsyow ev.’

4Yth esa Yowann ow pesydhya y'n gwylvos, hag ow pregoth#1:4 Yth esa Yowann ow pesydhya y'n gwylvos, hag ow pregoth: War-lergh re a'n dornskrifow Yowann Besydhyer a omdhiskwedhas y'n gwylvos ow pregoth. besydh a edrek yn dehwelyans peghosow. 5Yth e yn-mes bys dhodho oll an pow a Yudi, hag oll tus Yerusalem, hag yth esens besydhys ganso y'n avon Yordan, ow yes aga feghosow. 6Yowann o gwiskys yn blew kowrvargh, ha gans grogys a groghen a-dro dh'y dhiwglun; ev a wre dybri lokustes ha mel gwyls. 7Hag yth esa ow pregoth, ow leverel, ‘Y teu war ow lergh onan yw moy galloesek agesov vy, ha ma nag o'ma gwiw, owth omblegya, dhe dhigelmi kroen y eskisyow. 8My re'gas besydhyas gans dowr; mes ev a wra agas besydhya gans an Spyrys Sans.’

Besydh Yesu

Mat 3:13-17; Luk 3:21-22

9Y hwarva y'n dydhyow na, y teuth Yesu a Nazareth yn Galile, hag ev a veu besydhys y'n Yordan gans Yowann. 10Kettell dheuth yn-bann yn-mes a'n dowr, ev a welas an nevow terrys igor, ha'n Spyrys kepar ha kolomm ow tiyskynna warnodho; 11ha lev a dheuth a'n nevow, ‘Ty yw ow Mab karadow; ynnos yma ow delit.’

Temptyans Yesu

Mat 4:1-11; Luk 4:1-13

12A-dhesempis an Spyrys a'n helghyas yn-mes bys y'n gwylvos. 13Yth esa y'n gwylvos dew-ugens dydh temptys gans Satnas, hag yth esa gans an bestes gwyls, ha'n eledh a venystra dhodho.

Yesu ow Pregoth yn Galile

Mat 4:12-17; Luk 4:14-15

14Wosa Yowann dhe vos dalghennys, Yesu a dheuth dhe Alile, ow pregoth aweyl Duw,#1:14 aweyl Duw: War-lergh re a'n dornskrifow aweyl gwlaskor Duw. 15hag ow leverel, ‘Kollenwys yw an termyn, ha gwlaskor Duw re dheuth nes; koedhewgh yn edrek, ha krysewgh y'n aweyl.’

Galow an Kynsa Dyskyblon

Mat 4:18-22; Luk 5:1-11

16Ow kerdhes ryb mor Galile, ev a welas Simon hag Androw broder Simon ow tewlel roes y'n mor; rag pyskadoryon ens i. 17Yn-medh Yesu dhedha, ‘Dewgh war ow lergh, ha my a wra dhywgh bos pyskadoryon a dus.’ 18Distowgh i a asas aga roesow, hag a'n holyas ev. 19Ow mos pols alena, ev a welas Jamys mab Zebede ha Yowann y vroder, hag i keffrys y'n gorhel owth ewnhe an roesow. 20Desempis ev a's gelwis; hag i a asas aga thas Zebede y'n gorhel gans an wesyon wobrys, ha mos a wrussons war y lergh.

An Den hag Ynno Spyrys Avlan

Luk 4:31-37

21Hag yth ethons yn Kapernaum; ha distowgh y'n Sabot ev eth a-bervedh y'n synaga, ha dyski. 22Yth esa marth dhedha a'y dhyskas; rag ev a wre aga dyski avel den ow toen awtorita ha ny'n gwre avel an skribys. 23Distowgh yth esa yn aga synaga den hag ynno spyrys avlan; hag ev a armas, 24‘Pandr'a vynnydh tejy genen ni, Yesu a Nazareth? Osta devedhys rag agan diswul ni? My a'th aswonn piw os, an Sans a Dhuw.’ 25Yesu a'n koskas, ow leverel, ‘Taw, ha deus yn-mes anodho.’ 26Ha wosa an spyrys avlan dh'y gryghylli gans nerth ha garma gans lev ughel, ev a dheuth yn-mes anodho. 27Yth ens i sowdhenys glan yn kettep penn, may hwrussons govynn an eyl orth y gila ow leverel, ‘Pandr'yw hemma? Dyskas nowydh gans awtorita! Ev a worhemmynn ynwedh dhe'n spyrysyon avlan, ha gostyth yns dhodho.’ 28Ha desempis yth eth son anodho dres oll an pow a-dro dhe Alile.

Yaghheans Lies Den

Mat 8:14-17; Luk 4:38-41

29Hware, wosa i dhe dhos yn-mes a'n synaga, yth ethons a-bervedh yn chi Simon hag Androw, gans Jamys ha Yowann. 30Mes hweger Simon a wrowedhi grevys gans fevyr, ha hware i a gewsis orto anedhi. 31Ev a dheuth ha'y hemmeres er an leuv, ha'y drehevel; ha'n fevyr a's gasas, ha hi a venystra dhedha.

32Devedhys an gorthugher, wosa an howl dhe sedhi, i a dhros bys dhodho oll an glevyon, ha'n re dalghennys gans dywolow; 33hag oll an sita o kuntellys orth an daras. 34Ev a yaghhas lies o klav a glevesow a bub eghenn, hag a dewlis mes lies dyowl; ha ny asas an dhywolow dhe gewsel, drefenn i dh'y aswonn ev.

Kerdh Pregoth

Luk 4:42-44

35Myttin a-varr, hag ev ow sevel fest pell kyns hy bos dydh, ev eth yn-mes hag omdenna bys yn tyller difeyth, hag ena yth esa ow pysi. 36Simon ha'n re esa ganso a'n holyas, 37ha wosa i dh'y gavoes, yn-medhons dhodho, ‘Yma peub orth dha hwilas.’ 38Ev a leveris dhedha, ‘Gwren ni mos yn ken le, y'n trevow nessa, may hylliv pregoth ena ynwedh; rag dhe henna yth o'ma devedhys mes.’ 39Ev a dheuth ow pregoth yn aga synagys dres oll Galile, ow tewlel yn-mes an dhywolow.

Glanhe Klavorek

Mat 8:1-4; Luk 5:12-16

40Y teuth unn klavorek dhodho, orth y bysi war benn-dewlin, ha leverel dhodho, ‘Mar mynnydh, ty a yll ow glanhe.’ 41Hag ev, ow kemmeres truedh, a ystynnas y leuv, ha'y dochya, ha leverel dhodho, ‘Mynnav; bydh glanhes.’ 42Hware an lovryjyon eth yn-mes anodho, hag y feu glanhes. 43Ev a'n gwarnyas yn straght, ha'y dhannvon dhe-ves dison 44ow leverel dhodho, ‘Gwayt na leverri travyth orth denvyth, mes ke war dha hyns, omdhiskwa dha honan dhe'n oferyas, hag offrynn rag dha lanheans an taklow a worhemmynnis Moyses, yn dustuni dhedha.’ 45Mes ev eth yn-mes ha dalleth kewsel anodho yn feur ha dyllo an dra a-les, ma na ylli ev entra dhe'n sita namoy a-wel tus, mes yth esa a-ves yn tylleryow difeyth; hag i a dheuth dhodho a bub tu.

Currently Selected:

Mark 1: ABK

Highlight

Copy

Compare