GALATIANG KVDVNG 2

Poulbv:lang Mclvgla Ager Germonam Akedc

1Odokkc tagyvngkolang dv:tak tagpi: lcdudo ngo lckoda Barnaba:kc lcdulo Jerusalempc gvto, Titumc ngok lcdulo gvbola. 2Ngo lungor lunamki gvto; odokkc ngo buluk kcra:do (atckpc cmpige:la sc:kobulu amin gvdagaji buluk kcra:do) tadponc lutaddcm lubito okodcm ngo angu tani:kvdv:dok kcra:lo lutadbitoji; ckvma:mvlo ngo kapcjila ngo ipusire:ycm pa:ycpc cdcmanggom cmmumpc ipusire: pa:to. 3Cmpige:la cdcmv:pci Titu:bv, sc:ko ngok lcdulo du:mvndungaji, gatpukru:pci iyc cmna lumangai, bv Girik tania:gom. 4Cmpige:la lume:lunc bvrrangcm kinmango:pc gva:bola, sc:ko ngo mcngkampc du:namcm ruyugla tadlenpc cmna gva:tonc okodc ngolukkc Kristokolo du:ji, jc bulu ngolum makana:lo tumla:dopc cmna– 5bulum ngolu kcvgpc du:namdcm tadtomang cdcmv:pc migyap ako lcgangcsinci; jc tadponc agomdok arodcm noluk lcgangc mosv:la lc:ycpc cmna.

6Odokkc cdc sc:kobulu amin gvdagaji o:kaiko cmna (okodcm bulu ngokkokki angumotoma:ji; Ru:ncpvncbv oko atcgcmsin lcngkanmang) –cdcmbulum, ngo ludung, sc:kobulu amin gvdagaji okkomsin ngokkolo mosettmang. 7Cmpige:la odok kekonpc, cdvlo bulu ka:to jc ngom tadponc lutaddcm gadpukma:nam kvdv:dok lcga:pc togc:lvgtak, kapc Pitormc tadponc lutaddokki gadpukma:nam kvdv:do:pc togc:lvgtagji. 8(Kapcnc sc:kobv Pitorkokki mclvgla gerpcnam agerdcm gertoji gadpuk-ma:namkvdv:dok lcgangc ngokkokkisin gerto Ru:ncmc Kinma:nc tani:kvdv:dok lcgangc.) 9Odokkc cdvlo bulu ngom binam aya:dcm mcngkinto, Jakobbv:lang Kepa:bv odokkc Jo:nbv, sc:kobulu vlvng kuntc cmna bottcru:pc amin gvdaganc, ngomna Barnaba:mc ajon jonsunamdok lagbvg alagdcm bito, jc ngo Ru:ncmc kinma:nc tani:kvdv:do:pc gvpcnammc odokkc bulu gadpuknam kvdv:do:pc; 10bulu ngolu opannc kvdvngo:dcm mc:pa:moiya:pc, okodcmar ngo airu:pc ipc mc:dagaji.

Poulbv Antiokdo Pitormc Ge:nam

11Cmpige:la cdvlo Kepa:bv Antiokpc gvtoji bvm ngo ka:de:pc lutumka, Kapila:nc bvm aimang cmna lunamai. 12Kapila:nc Jakobkolokkc tani: akonc gvmangadapc, bv Ru:ncmc kinma:nc tani:kvdv:dok lcdulo domvnto; cmpige:la cdvlo bulu gvlattokunc bv ngetsuk sukang, odokkc avdc, gadpuknc kcrc:dcm pcsola angupc angukang. 13Odokkc bvk lcdulo Jiwukvdv:dok akedc aima:pc imvnkang, cdcmpc ika:nc jc Barnaba:mc buluk aima:pc inamdokki gvcrbokang. 14Cmpige:la cdvlo ngo ka:to jc bulu yvgcmpc agomcm tadponc lutaddok arodcm ludodcm lumang, ngo luto buluk appv:dok kcra:do Kepa:mc, “Ngo jodi, Jiwuge:la:gom, Ru:ncmc kinma:nc tani:ycmpc du:yc odokkc Jiwucmpc du:mang, kapc no Ru:ncmc kinma:nc kvdv:dcm Jiwucmpc du:dopc du:moru:la:ycn?”

Jiwukvdv:dc:lang Ru:ncm Kinma:nc Tani:kvdv:d Mc:jvgkokki Moturnam

15Ngolu av avyc, sc:kobulu ododokkcbong Jiwucnc odokkc Ru:ncmc kinma:nc pa:pkancmang. 16Ckvdaggom sc:ko kindag jc tani:akonc lujvg lurodok agerkvdv:dokki ainc cmna lumang cmpige:la Jisu Kristomc mc:jvgnamdokki, anki ngolu Kristo Jisukolo mc:jvglo, Kristokolo mc:jvgla ainc cmna ludopc, odokkc lujvglurodok agerkvdv:dokki sc:kosin ainc cmna luma:yc. 17Cmpige:la jodi, ngoluk aipc gernam agerkvdv:dokki Kristokolo ainc cmna luyc, ngolu avycm avyc papi: cmna kinsuto, Kristobv cmpcmvlo pa:blo igcsanggcbonnci? Cdcmpc ima:rungkc! 18Cmpige:la ngo jodi cdc attarkvdv:dcm motenycku okodcmbulum mosedamtoji, odo ngo avycm pa:b innc cmna avyc lukansudung. 19Kapila:nc ngo lujvglurodokki lujvglurodokkcpc sito, jc ngo Ru:ncpvnckcpc turra:dopc. 20Ngom Kristokokki kurusdo pvtketo; cdc ngo:ma:bong sc:kobv turdu:ji, cmpige:la Kristobv sc:ko ngokkolo turdu:ji; odokkc ngok adinamvrki turnamdc ngo su:pak Ru:ncpvnckc Awodo mc:jvgdo turdung, sc:kobv ngom aya:tonc odokkc Bv avdc ngok lcgangc bitoji. 21Ngo Ru:ncpvnckc aya:dcm lupakmang; kapila:nc jodi aidag cmnamdc lujvglurodokki ludagamvlo, cmpcmvlo Kristobv atv agom kama:pc sikang.

Currently Selected:

GALATIANG KVDVNG 2: MISIBSI

Highlight

Copy