ZEKARIA 6
6
Timriang Medai Keliâbe gene Ngaube
1Zai a mik rak ’ndingchu gai kadai de lei, zai ni pie le lau, kedeiloa kena kak gene timriang medai patbe I ngau de lei; zai chi kedeiloa kena ze â kangngâgeî deiloa lei. 2Keraîbe timriang ge hekun kegiebe ramme bam, pakenabe ge hekun tikbe ramme bam, 3pakechumbe ge hekun kehâbe ramme bam, zai pamedaibe ge hekun pû-perierikbe ramme bam lei. 4Chidadege achu ka’mpaupeu angel’mpeu je I ne, “A pau gau, airamme ze ’ndaikau se lau,” ze acheu bei de lei. 5Dadege angel’mpeu ne achu kak ze, “Airamme ze â tinggîm bâm gu tingkai (herui) medai kedeirei leine gu Tingwang masuage sap ze bambe gene zuapatbe kau de lei. 6Timriang hekun tikbe ramme bambe zene tingpeî ’mbia gu heram ’mbiatat lei, timriang hekun kehâbe ramme bambe zene tingrun ’mbia gu heram ’mbia ’mbe tat lei, zai timriang hekun pu-perierikbe ramme bambe zene tingpî ’mbia gu heram ’mbia ’mbe tat lei,” ze kacheu de lei. 7Hekun peranchibe ramme zuapat kai dege â mâ de ’nzaî ta di ze kedeirei je reî ze pieruachu di de lei. Dadege pa ne, “Tat ze kedeirei reî ze pierua gai zu lau,” kacheu de lei. Chigum ze penui ne pierua gai de lei. 8Chidadege â pa achu sa’nchi ze, “Ni pie le lau, tingpeî ’mbiatatbe hekun ramme zene tingpeî ’mbia bambe heram ge I a râtabe ze tewhegeikeu gai de lei,” ze kacheu de lei.
Joshuabe je Heguang Peichûp luak kai ra Diegaibe
9Dadege Tingwang gu sam a dage wangkeu de lei: 10“Keli’ndime bau Babilon gene wangme, Heldaibe, Tobijabe zai Jedaiabe dagene kela gechâk benai gepût lu le lau; zai chipau mai gîm ge penui Babilon gene wangchanggairaibe ki, Zephaniabe na Josiabe ki ge gut kai lau. 11Penui dagene gechâk benai gepût lu-lu ze heguang peichûp hang teleu lu dezai Jehozadakbe na tingku dilangpeu Joshuabe peî ge luak kai lau; 12dezai pechu, ‘Tingwang baudime Rapeu ne aigum ze rang ze, “Pie le lau, ziemmena pe ji Pekeî, kacheupeu: pa bambe bâm gene chîngpat ku zai pa ne Tingwang gu kellumki tewchu gu lei. 13Pa zene Tingwang ki tewchurapeu de lei, zai heguang ji dibe pa ne tei gu, zai pa ne pe gu heguang-bamrak ge ’ntau ze samram gu lei. Zai pa ne tingkupeu chang gu lei, zai desieyibe lungkat, suîkattewbe ze heguang benai tingku kena kakge bam gu lei,” ze acheu zeu,’ ze kacheube ze salia lau. 14Zai Tingwang gu kellumki ge heguangpeichûp bambe zene Heldaibe, Tobijabe, Jedaiabe zai Zephaniabe na Josiabe hangge chibamrabe de lei.
15“Zai Kedeu ’mbe bamme ne wang ze Tingwang gu kellumki ze tewchu’ngngugaihâ gu lei; chidezai Tingwang baudime Rapeu ne achu lang gai lei be ningnui chî gu lei. Zai ningnui ne lungsangkai ze Tingwang ningnui Rapeu kuâ pheu bei zai â aize wangchang gu lei,” acheu zeu
Currently Selected:
ZEKARIA 6: ZEMEBSI
Highlight
Copy
Compare
Share
Want to have your highlights saved across all your devices? Sign up or sign in
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.
