ZEKARIA 5
5
Keliambe Leisizui Keliâbe gene Ngaube
1A mik I rak’ndingchu gai kadai de lei, zai ni pie le lau, keliambe leisizui I ngau de lei! 2Dadege pa ne achu, “Nang ’ndaikau ngau lau?” ze kacheu de lei. I ne kak ze, “I ne keliambe leisizui ngau lei; petâ â sâu ’ngkai lei, zai pedit â sâu kereu lei,” ze acheu bei de lei. 3Chidadege pa ne achu, “Aize kedeirei leine ge desetkaibe zuapatbe kau de lei; chize ne rangbe luî â, mi-mige hegachime leine je â heram gene lupat ’ndu lei, zai chize ne rangbe luî ze â, mi-mige karasa ne deseutewchime leine je â heram gene lupat ’ndu lei. 4I ne langpat kai gu lei ze Tingwang baudime Rapeu ne kacheu de lei, zai chize mâ-kahegapeu ki ge benai a ji gene karasa ne deseutewchipeu ki ge gut ku lei; zai pe ki ge chize bam bam gu lei, zai pe ki gu heki’ngra benai tingchu ramme tew’ngga kam gai gu lei,” ze kacheu de lei.
’Mpuimi Hegeî ’nsung Lungge bambe Keliâbe gene Ngaube
5Chidadege achu ka’mpaupeu angel’mpeu ne wang’nna lu achu, “Ning mik rak’ndingchu lu ai zuapattibe ze ’ndaikau mei be pie gai ni lau,” ze kacheu de lei. 6Dadege I ne, “Chize ’ndaikau rei lau?” acheu bei de lei. Pa ne, “Ai zuapattibe ze â ephah (hemui-helut) de lei,” ze acheu bei de lei. Zai pa ne, “Aize heram leine ge hemui-helut bambe de lei,” ze kacheu de lei. 7Zai ni pie le lau, hegeî ’nsunggum hegeî ka’nchiapbe zat ne tewbe ze lat kai de lei, zai Epha lungge ’mpuimi hangkat dung laleu lei! 8Dadege pa ne, “Aize â helungriaksiabe ze de lei,” ze kacheu de lei. Dadege pa ne chipaupui je ephah lung ’mbe chuihunggut kai dai lu hegeî ka’nchiapbe zat ne tewbe hegeî ’nsunggum ze gekapkeu gai bei de lei. 9Chidadege I a mik rak’ndingchu gai de lei, zai ni pie le lau, ’mpuimi hangna zuawang leu de lei! Penai kan ge tingkai bam lei; teluâk kan gumbe penai kan pung lei, zai penai ne tinggîm benai kedei kakge chi ephah ze teichu di de lei. 10Chidadege achu ka’mpaupeu angel’mpeu je I ne, “’Ndai’ngge penai ne chi ephah ze teitat kai ra rei lau?” ze acheu bei de lei. 11Pa ne, achu, “Chipau bung hang heki tew gai ra Shinarram ’mbe teitatbe kau de lei; zai chipau ki ze teleu kam lu dezai chipau bâm ge penai ne ephah ze teikeu ze kai gai gu lei,” ze kacheu de lei.
Currently Selected:
ZEKARIA 5: ZEMEBSI
Highlight
Copy
Compare
Share
Want to have your highlights saved across all your devices? Sign up or sign in
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.
