LEBITIKAS 2
2
Dekuîmeu Peipatbe
1“Mige ne mâ-hîmra kela Tingwang dage peipat dezai pe gu kela peipatbe ze dekuîmoîne yibe ne peipat ra lei; chige taudui ruî gai ze mâ-perîmyibe kai ra lei, 2chize Aaronbe name tingkume dage teiwang gai ra lei. Zai dekuîmoîne yibe bakui kat zai taudui zai mâ-perîmyibe leine pa ne bakui kat-kat lupat ra lei; chize chibamrabe dam hang gum ze tingkupeu ne lu lu ze Tingwang dage mâ-perîmyibe chang ra herâtewbe bâm hemi peireige chi peipatkaibe kela ze rû gai ra lei. 3Zai mâ-hîmra kela peipatbe ka’nsakbe ramme ze Aaronbe benai pe name hang chang ra lei; chize Tingwang hangge hemi ge peipatbe kela ’nchilangbe kat lei.
4“’Mmang gene langlube mâ-hîmra kela ze nang kela peipatbe hang teiwang dezai, chize ’nduihîkaimakbe tingku taudui kebutlube ne ra lei, makchai ’nduihîkaimakbe tingku liâp ge taudui kepin-gailube ne ra lei. 5Zai ning gu kela peipatbe ze mâ kagetabe kuak gene getalube mâ-hîmra dizai â chize taudui ne kenei zunlube ’nduihîkaimakbe dekuî niangbe ne ra lei; 6chi tingkukuak ze nang tewpâng’nchiâmra gai ra lei, zai chige taudui ruî gai ra lei; chize mâ-hîmra kela peipatbe de lei. 7Zai ning gu kela peipatbe ze mâ-kagetabe kuak gene langlube mâ-hîmra kela dizai â chize dekuî niangbe taudui kailube zene ra lei. 8Zai mâ-hîmra kela ze airamme gene teleulube gene Tingwang dage nang teiwang gai ra lei; zai chize tingkupeu dage pei gai dezai chize pa ne herâtewbe-kaira ge teiwang gai ra lei. 9Zai tingkupeu ne chi mâ-hîmra kela gene chibamrabe dam ze lu lu herâtewbe-kaira ge rû gai ra lei, hemi gene peipatbe, Tingwang dage mâ-perîmyibe changbe zeu. 10Zai mâ-hîmra kela peipatbe ze â Aaronbe benai pe name hang chang ra lei; chize Tingwang dage hemi gene kela peipatbe ’nchilangbe lei.
11“Mâ-hîmra kela Tingwang hang teiwangbe ze ’nduihî ne nang teleu mak ra lei; hemi gene Tingwang hang kela peipatbe ge ’nduihî mei nune ’ngkuidui mei be â rû ra mak daseu. 12Mâ-helei ’nchikeuraibe ramme kela peipatbe hangge Tingwang dage ningnui teiwang ra lei, kane mâ-perîmyibe hang chiramme ze herâtewbe-kaira ge kai mak ra lei. 13Ning gu mâ-hîmra kela peipatbe leine ge ’nchaî kai ra lei; ning gu kela peipatbe mâ-hîmra ge ning Rapeu dage puinakattewbe gu ’nchaî ze ga ze kai mak ra lei; ning gu mâ-kela peipatbe leine ge ’nchaî kai ra lei.
14“Ning gu mâ-hîmra ’nchikeuraibe gene mâ-hîmra kela peipatbe Tingwang dage nang pei gai dizai â hemeu meipatraibe ze hemi gene gesiê lu taunianglube mâ-hîmra kela peipatbe hangge nang pei gai ra lei. 15Zai taudui bepeirei ge ruî gai ra lei, zai chige mâ-perîmyibe kai ra lei; chize mâ-hîmra kela peipatbe kela de lei. 16Dezai chêu tâulube ge benai taudui ge mâ-perîmyibe ramme kailube ze chiramme dam hangge changbe ze tingkupeu ne rû gai ra lei; chize Tingwang dage hemi gene mâ-peipatbe de lei.
Currently Selected:
LEBITIKAS 2: ZEMEBSI
Highlight
Share
Copy
Want to have your highlights saved across all your devices? Sign up or sign in
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.
