Mātiu 3
3
Ko e Malanga ‘a Sione Papitaisó
(Ma‘ake 1:1-8; Luke 3:1-18; Sione 1:19-28)
1Pea ʻi he taimi ko iá naʻe haʻu ʻa Sione Papitaiso ʻo kamata malanga holo ʻi he toafa ‘o Siuteá. 2Pea naʻá ne pehē: ‟Mou tafoki ki he ‘Otuá. He kuo panaki ʻa e Pule‘anga ʻo Hēvani̇́.” 3Ko Sione ia na‘e ʻuhinga ki ai ʻa e lau ʻa e palōfita ko ‘Aiseá:
‟Ko e le‘o ‘oku kalanga ‘i he toafá.
Mou teuteu ʻa e hā‘ele‘anga ‘o e ‘Eiki̇́.
Mou fakahangatonu hono ngaahi halá.”
4Ko e teunga ‘o Sioné ko e kofu fulufulu‘i kāmeli naʻe haʻiʻaki hono kongalotó ha leta kili‘i manu. Pea ko ʻene me‘atokoni̇́ ko e he‘e mo e huhu‘a‘i hone vaó. 5Pea na‘e toki omi kia Sione ʻa e kakai tokolahi mei Selusalemá, mo Siutea kātoa, mo e vahefonua kātoa ‘oku tafe atu ai a e vaitafe ko Soatani̇́. 6Pea nau vete ‘enau ngaahi angahalá kae papitaiso kinautolu ‘e Sione ʻi he vaitafe ko Soatani̇́.
7Ka ʻi he sio leva ‘a Sione kuo tokolahi ʻa e kau Fālesi mo e kau Sātusi ‘oku haʻu ke papitaiso ‘iate iá, na‘á ne pehē ange kiate kinautolu: ‟Hako‘i talangataʻa! Ko hai na‘á ne fale‘i kimoutolu ke mou hola mei he fakamaau ʻa e ‘Otuá ʻoku teu ke hokomai̇? 8Kapau ko ia, pea mou fakahā kuo mou liʻaki mo‘oni ho‘omou ngaahi angahalá. 9Pea ʻoua na‘á mou pehē, ‛Ko ‘Ēpalahame homau tupuʻangá,’ he ‘oku ou tala atu, ‘e lava noa pē ‘e he ‘Otuá ke fakatupu ha fānau kia ‘Ēpalahame mei he ngaahi maká ni. 10Kuo ‘osi toʻo hake ʻa e toki̇́ ke ta‘angaʻaki ʻa e tefitoʻi ʻakau kotoa pē ‘oku ‘ikai fua lelei, ke laku ki he afi̇́.
11Ko au ‘oku ou papitaiso vai kimoutolu ki he fakatomalá, ka ko e toko taha ‘oku muimui mai ‘iate aú, ‘oku mālohi ange ia ‘iate au, pea ‘oku ‘ikai te u taau ke vete hono senitoló. Ko e toko taha ko iá, te ne papitaiso kimoutolu ʻaki ʻa e Laumālie Mā‘oni‘oni̇́ mo e afi̇́. 12Kuó ne ‘osi toʻo ʻene me‘a tata uité ke siviʻi ʻa e uité ʻaki ʻa e matangi̇́. ‘E ngangana ʻa e uité ki he faliki ‘o e ‘au‘au‘angá, pea tānaki ia ki he feleokó, ka ʻe vilingia ʻa e kafukafú. Pea te ne toki tānaki ʻa e kafukafú ‘o tutu ‘i ha afi ‘e ‘ikai ala tāmate‘i.”
Ko e Papitaiso ‘o Si̇̄sū
(Ma‘ake 1:9-11; Luke 3:21,22)
13Pea toki haʻu ‘a Si̇̄sū mei Kāleli ki he vaitafe ko Soatani̇́, ‘o ne kole kia Sione ke papitaiso ia. 14Ka naʻe feinga ʻe Sione ke taʻofi ia, heʻene pehē: ‟Ko au na‘e totonu ke u ‘alu atu ‘o papitaiso ‘iate koé! Ko e hā kuó ke haʻu ai koe kiate aú?” 15Pea talaange ‘e Sīsuú, ‟Tuku mu‘a ke fai pehē pē ʻi he taimi̇́ ni. He ‘oku taau mo kitaua ke fakahoko ʻa e me‘a kotoa pē kuo finangalo ki ai ʻa e ‘Otuá.” Pea toki loto leva ‘a Sione ki ai.
16Pea kuo papitaiso ʻa Sisū, lolotonga ʻene kei ‘alu hake mei he vai̇́, naʻe fakaava hake ki ai ʻa e langi̇́, pea naʻá ne mamata ki he Laumālie ‘o e ‘Otuá ‘oku hā‘ele hifo ‘o hangē ko ha lupe, ‘o tuʻu ‘iate ia. 17Pea na‘e ongo mai mo ha le‘o mei he langi̇́ ‘oku pehē mai; ‟Ko hoku ʻAlo ‘ofa‘angá ‘ena, ʻa ia ʻoku leleiʻia ai hoku lotó.”
Currently Selected:
Mātiu 3: TCNT
Highlight
Share
Copy
Want to have your highlights saved across all your devices? Sign up or sign in
Tongan Contemporary New Testament © Bible Society of the South Pacific, 2011.