ROM 8
8
Hagau a umna hinkhuo
1Tuaziehin tuin vang, Khrist Jesu a um a, khelna dan zuilou a, Hagau dan a, umte ding in siemmaw tansahna mawngmawng aum nawn sih hi. 2Aziehpen Khrist Jesu a um, hinna Hagau danin khelna leh shina dan akipat ahing zalensahta hi. 3Tahsa zieh a dana hatlouna zieh a, dan in abawl guollou khu, Pasian in a Tapa ngei khelna tahsa melpuo in, khelna thoidamna dinga hing sawlin, tahsa a khelna um khu siemmaw atangsahta hi. 4Tahsa dan a peilou a, Hagau dan a pei zaw eite tunga dihtatnain aphut dan khu suhtangtunga a um theina dingin. 5Tahsa dan a hingten, tahsa lam silte a lunggul ua, hinanleh Hagau dan a hingten hagau lam silte alunggul uhi. 6Tahsa lam silte lunggul khu shina ahi a, Hagau lam silte lunggul khu hinna leh hamuonna ahi. 7Tahsa lam lunggulna khu Pasian toh kimelmatna ahiziehin, tuakhu Pasian dan nuoi ah a um sih a, um zong a um thei sih hi. 8Tuabanga tahsa a umten Pasian akipahsah thei sih uhi.
9Hinanleh Pasian Hagau nouma a um tahtah ahi nahleh tahsa ah na um sih ua, Pasian Hagau nouma sungah ateng zaw hi. Tuin mi koizong Khrist Hagau neilou khu Ama a ahi sih uhi. 10Tualeh Khrist nouma a aum leh tahsa pumpi khelna ziehin ashi ahi. Hinanleh Hagau khu dihtatna ziehin ahing ahi. 11#1 Kor. 3.16Hinanleh mishi lah a kipat Jesu kaithoupa Hagau khu nouma a aum leh mishi lah a kipat a Khrist kaithoupah nouma a um Hagau ziehin na tahsapum uh shi theite zong ahingsah ding hi.
12Tuaziehin unaute aw bat inei hi, tahsa dan a hing dingin, tahsa lah ah vang ahi sih hi. 13Aziehpen tahsa dan a naum u’leh, na shi ding uhi; hinanleh tahsa silbawlte Hagau a na suhlup zel u’leh, na hing ding uhi. 14Aziehpen Pasian Hagauin apui poumate, Pasian tate ahi uhi. 15#Gal. 4.5-7#Mak. 14.36; Gal. 4.6Zau a um kia dingin suoh hina Hagau na mu uh ahisih a, ta hina Hagau na mu uh ahizaw hi; tua Hagau ziehin “Abba Pa” chiin i kikou zaw uhi. 16Hagau ngei in, eima hagau toh, Pasian tate ihi chi ahing theipi hi. 17Tuabanga tate ihi u’leh gouluote, Khrist toh Pasian gou luokhawmte ihi uhi. Ama toh ithuoh khawm pouleh, Ama toh pahtawi a umkhawm thei ding i hi.
Thupina inga dinguh
18Tu hun lai a ithuohgimnate pen dachienga eite a thupina sulat a um ding toh tekah tham in ka sep sih hi. 19Silsiem zousiein kinem tahin Pasian tate kilatna ding angahla mama uhi. 20#Siem. 3.17-19Aziehpen silsiem zousiete sil thulimlou thuthu a umsahin a umta hi, amaute ut thu hilouin, kinepna nei a amauh umsahpa ziehin ahi zaw hi. 21Silsiem zousie zong shi theina saltaanna akipat suotatsah ahi ding ua, Pasian tate noplenna thupi a lut ding ahi uhi. 22Aziehpen silsiem zousie tutan dongin thum leh nauvei natna thuohin a um uh chi ithei uhi. 23#2 Kor. 5.2-4Silsiemte guoh hilouin, Hagau ga masa nei eite ngei zong ta hina, itahsapum uh tatna ding ngahla in ilungsim sung uah thumin i um uhi. 24Tam kinepna ziehin hundam in i um uhi, ahivangin muthei kinepna pen kinepna ahisih hi; mi’n amusa bangdinga kinem na lai lai ding ahiei? 25I mu nailou i kinep leh pen kukal tah in ingah teitei hi.
26Tuabangmain ihatlounate uah Hagau in ahing panpi zel hi; aziehpen eiten bangchi banga thungen ding ihiei chi nasan ithei sih uhi, hinanleh Hagau in kamtenga genthei guollou a thumin ahing nget pieh hi. 27I lungtangte vel a theichienpa’n Hagau lungsim athei a, tua Hagau in Pasian dei danin misiengthoute a dingin anget pieh hi.
28Tualeh sil bangkimah Pasian in Ama itte, Aman adei bang bawl dinga ahatte a dingin ahoina dingun silzousie asemkhawm chiet hi chi, ithei uhi. 29Aziehpen Pasian in atheilawhte Ama Tapa bangtah a um dingin aguotlawh a, Atapa khu unau tampite lah a, ta masapen ahing hitheina ding ahi. 30Tualeh aguotlawhte ahan nalai a, ahatte khu siematangsah nalai a, tualeh siem atansahte khu apahtawi na lai hi.
Pasian itna Jesu Khrist ah akilang hi
31Ahileh tam thute ah bang igenta diei leh? Pasian ei lam a apan leh koi ahiei hingdou thei ding? 32Ama tapa ngel zong khetlou a, i unpi ua dinga hing pepa’n bang dingin sil zousie amanbei a Ama toh hing pekhawm lou ding ahiei? 33Pasian mi telte koiin ahiei heh ding? Siemtangsahpa lah Pasian ahi thuoi a. 34Koiin ahiei siemmawtangsah ding? Ashi khu Khrist ahi ngal a, ahi, athoukia zawta a Pasian ziellam a uma hing nget piehpa ahi. 35Khrist itna akipat eite hing khen ding koi ahiei? Gimthuohnain ahiei, lunggimnain ahiei, bawlsietnain ahiei, kielin ahiei, guohtanna in ahiei, shi zauhuoina in ahiei, ahisihleh namsau in ahiei, hingkhen ding?
36 #
Late. 44.22
“Nangma ziehin sun nitum in thain ka um uh;
gaw ding belamte bangin simtel ka hi uh,
chi a kigiel bangin.”
37Khen vawtlou ding; tamte zousie ah, ahing itpa ziehin guolzoute sanga tungtuong zaw ihi uhi. 38Shina ahiei, hinna ahiei, vansawlsiengte ahiei, thuneinate ahiei, silbawltheinate ahiei, tuhun a sil umte ahiei, sil hing um dingte ahiei, 39Sanna ahiei, thuhna ahiei, ahisihleh silsiem dang mawngmawngin zong, i Mangpa uh Khrist Jesu a um Pasian itna akipat ahing khen thei sih ding chi kichien tahin ka thei hi.
Currently Selected:
ROM 8: ZOUBSI
Highlight
Share
Copy
Want to have your highlights saved across all your devices? Sign up or sign in
Zou CL Bible - LAISIENGTHOU
Copyright © 1992 by The Bible Society of India
Used by permission. All rights reserved worldwide.