JOHAN 1
ZOMI
1
Jesu Khrist Pasian hina
1Achil in thu a um a, thu khu Pasian kungah aum hi, thu khu Pasian ahi. 2Achiil in Ama Pasian toh a um khawm hi. 3Sil zousie Ama tungtawn a siem ahia, silsiem chinteng Ama lou a kisiem bangma a um sih hi. 4Ama ah hinna a um a, tua hinna khu mihingte vahna ahi. 5Vah khu miel lah ah ahing vah a, miel in tua khu athei sih hi.
Baptispa Johan nasep
6 Pasiana kipat a sawl mi khat a um a amin Johan ahi. 7Tam mipa khu theipitu ding in ahing pei a, tua vah thu ama zieh a mi zousie’n atahsan theina dingun. 8Ama pen vah khu ahisih a, hinanleh tua vah theipi ding a sawl ahi zaw hi. 9Tuakhu vah dihtah, michin leitunga hing pei pouma salvahpa ahi.
Leitungin ama theisih
10Ama leitung ah a um a, leitung Ama siem ahia, tualeh leitungin Ama athei sih hi. 11Ama amite kung ah ahing pei a, Ama amiten akipahpi sih uhi.
Khrist pomte Pasian tate ahi
12Hinanleh Ama kipahpi poumate kungah Pasian tate hitheina ding hamphatna apie hi, Ama min gingtate kungah: 13Tua mite pen sisan a pieng ahisih ua, tahsa deidana pieng zong ahisih ua, tualeh mihing deidan a pieng zong ahi dieh sih ua, hinanleh Pasian a pieng ahizaw uhi.
Khrist tahsa ahing suohna
14Tualeh thu khu tahsa ahing suoh a, i lah uah a um a, (Pa tapa tang nei sun thupi bangin athupina imu uhi) hepina leh thutah in adim hi. 15Johan in Ama theipina apie a akikou a, “Ka nua a hing peipa’n Kei ahing makhelta hi, Kei masanga um mawng ahi ziehin, chia atungtang thu ka genpa khu Ama ahi.” 16Ama bukimna itang chiet ua, hepina tungah hepina sawn sawn toh. 17Aziehpen dan thu Mosi tungtawna pieh ahia, hepina leh thutah pen Jesu Khrist tungtawn a hing um ahi. 18Koiman bangmachihin Pasian amungai sih. Pa angsunga um Tapa tang nei sun in Ama tanchin aphuongkheta hi, achi hi.
Siempute leh Levimite kung a Johan theipina thu
(Mat. 3.1-12; Mak. 1.1-8; Luk. 3.3-16)
19Judaten Jerusalem a kipat in siempute leh Levimite Johan kungah, “Koina hiei?” chia dong ding a asawl lai ua, tambang theipina thu ana gen ahi. 20Aman nielse louin agenkhie a, “Kei Khrist ka hi loupi” chi’n akiphuong hi. 21 Amauten “Ahileh koina hiei? Elijah na ma leh?” chi’n adong uhi. Aman ka hi sih achia, “Guolnei na hiei leh?” achi ua, Aman “Ka hi sih” chi’n adawng hi. 22Tuachi’n amaun akung ah, “Koi na hiei? Kou hing sawlte ka dawn theina ding un hing hil in. Nang leh nang koi kichi na hiei mah?” achi uhi.
23 Aman guolnei Isai genbang a,
“Mangpa lampi siel tang un chi a,
gamdai a Kikoupa aw khu kahi,”
achi hi.
24Ami sawlte u’pen Pharisaite lah a mite ahi uhi. 25Amaun, “Khrist lah hilou, Elijah lah hilou, tualeh guolnei lah hilou, na hileh bang ding a na baptis ahiei?” chiin adong uhi.
26Johan in amauh adawnga, “Ken tuiin ka baptis a hinanleh na theilou uh mi khat na lah uah ading hi. 27Ama ahi kanua a, hing pei ahing makhel dingpa, Kei pen akedap khau sut taah zong ka hisih hi,” achi hi. 28Tam silte pen Jordan gal a Bethabara a, Johan in abaptis na mun a kibawl ahi.
Jesu Baptisma tanna
(Mat. 3.13-17; Mak. 1.9-11; Luk. 3.21-22)
29Azingni’n Johan in Jesu ama lam zuon a hing pei amu a, “En un, Pasian belamnou leitung khelna lamangpa khu. 30Ka nua a hing peipa, Kei um masanga umsa mawng ahizieh in, Kei sanga thupizaw ahi chia ka genpa khu tam mipa ahi. 31Ken Ama kana thei sih hi, hinanleh Israelte kunga suhlat ahi theina dingin tui a baptis in ka hing pei ahi,” achi hi. 32Tualeh Johan in athu atheipi a, Hagau vakhu banga van a kipat a hing kumsuh a atunga tuong den ka mu hi. 33Ken Ama kana thei sih a, hinanleh tui a baptis ding a hing sawlpa, Ama mama in ka kungah, koi hitaleh Hagau hing kumsuh a atunga tuongden na mu penpa khu, Ama ahi, Hagau siengthou a baptis ding pa khu, ahing chi hi. 34Tua khu ka muta a, tualeh tampa khu Pasian tapa ahi chi ka theipi hi, achi hi.
Andru leh Peter in Jesu nuazui uh
35Azing nikia in Johan anuazuite ni toh ading uhi. 36Jesu avah lai a en a, “En un, Pasian belamnou” achi hi. 37Tua nuazui nite’n athugen aza ua, Jesu azuita uhi. 38Tuachi’n Jesu akihei a, ahingzui uh amu a, akung uah, “Bang ahiei na sui uh?” achi hi. Amaun akungah “Rabbi (tua khu Siepa china ahi) hei a um na hiei?” achi uhi. 39Aman akung uah, “Hing pei unlen, En un,” achi hi. Tuachi’n amaute ahing pei ua, a umna ava mu uhi. Tualeh nitah lam nai li vel ahitah ziehin tua ni akungah ataamta uhi.
40Johan thugen za a, Jesu zuitegel lah a khat khu Simon Peter sanggampa Andru ahi hi. 41Aman amasapen in ama sanggampa ngel Simon ava mudoh a, akungah “Messiah Ka muta uh,” achi hi. (Messiah pen Khrist china ahi.) 42Tualeh aman Jesu kungah Simon ahing zawpi a, Jesu’n ama a en a, “Nang pen Jonah Tapa Simon na hi a, Kephas ahing kichita ding hi” tua khu suong china ahi.
Phillip leh Nathanael in Jesu azuina
43Azingni in Jesu Galili gam ah pei asawm a, Philip amu a, akungah, “Hing zui in” achi hi. 44Philip khu Andru leh Peter tenna khuo Bethsaida a teng ahi. 45Philip in Nathanael amu a, akungah, “Mosi in dan laibu sunga atungtang thu ana gelpa guolneiten zong ana gel uh Nazareth Jesu Joseph tapa khu ka muta uhi,” achi hi. 46Nathanael in akungah, “Nazareth akipat in sil hoi apawtkhe ngai amah” achi hi. Philip in akungah “Hing pei inlen hing en in,” achi hi. 47Jesu’n Nathanael Ama kunglam zuon a hing pei amu tahin, ama tungthu ana gen a, “En un, Israel mi dihtah lepchie ngailoupa ahi,” achi hi. 48Nathanael in akungah, “Kei bang nahing chi thei ahiei?” achi hi. Jesu’n adawng a akungah, “Philip in nang ahing hat masang a theipi phung nuoi a na um laiin, ka hing muta hi,” achi hi. 49Nathanael in adawnga, akungah, “Rabbi, Nang Pasian Tapa na hia, Israel te leengpa na hi,” achi hi.
50Jesu’n adawnga akungah, “Theipi kung nuoi ah ka hing muta ka hing chi zieh a, na hing gintat amah? Tam silte sanga thupizaw na hing mu nalai ding hi,” achi hi. 51 Tualeh Jesu’n akungah, “Adihtahin ka hing hil ahi, Tunua chiengin, Van kihong na mu dinga, Pasian vansawlsiengte Mihing Tapa tunga kaltou leh kumsuh na mu ding hi,” achi hi.

©1992 Bible Society of India

Learn More About LAISIENGTHOU