NASEPTE 6
6
Upa masate telna
1Tua hun lai a nuazuite ahing pun semsem laiun, ani china asil hawm thu uah, Greek ham zang meithaite na nelsie uhi chiin, Greek ham zang Judate Hebrute tungah aphun ta uhi. 2Tuachi’n sawm leh niten nuazui mipite ahankhawm ua, “Pasian thugen tawpsan a, nehletah ka sai uh adih sih ding hi. 3Tuaziehin unaute aw, na lah ua Hagau Siengthou leh pilna adim, mi min hoi ngen sagi#sagi = Kichite pen local upa (LCC) ichite ahia, Deacon (Eng) Diakonos (Gr) tel unlen, amaute tam nna sem dinga ka guot theina dingun, achi uhi. 4Koute pen thum leh thu nasem in ka um zom den zaw ding uhi,” achi uhi,
5Tua thuin mi zousie akipahsaha, tuachi’n Stephen ginna leh Hagau Siengthou a dim toh, Philip leh Prokora toh, Nikanor leh Timon toh Parmena leh Judate biehdan zui Antiok khuo a mi Nikola toh atel uhi. 6Amaute khu sawltahte masangah a ding sah ua, tualeh thumna neiin, atung uah akhut uh anga uhi. 7Tuachi’n Pasian thu ahing kithedal semsem a, Jerusalem khuo ah nuazuite apungta mama ua, tuachi’n siempute lah ah zong mi tampi ginna lam ah athumangta uhi. 8Tualeh Stephen ginna leh silbawltheina a dimin, mite lah ah sillamdang leh chiemtena thupi tahte abawl zel hi.
Stephen vaihawmte masanga adinna
9Tuachi’n zalensah#Zalensah sap ham (Eng) in Freedmen. mite kikhopna#kikhopna-Synagogue inn kichi akipat Sairin khuo a mite Alexandria khuo a mite leh Silisia leh Asia gam a kipat Judate pawl khat ahing kisa ua, Stephen ahing kinielpi uhi. 10Hinanleh apilna leh Hagau zal a athugente anielkhe theita sih uhi. 11Tuachi’n amauten simtham in mi achiil ua, “Stephen in Mosi leh Pasian agensiet lam ka za uhi,” achisah uhi. 12Tualeh amauten mipite, upate leh laigiel mite achiilsie ua, Stephen amansah ua, vaihawmte kungah ahing pui uhi. 13Amauten theipi zuoutheite abawl ua, tua miten, “Tam mipa’n mun siengthou leh dan agensie ngitnget hi achi uhi; 14Aziehpen tami Nazareth Jesu’n tami mun siengthou asuse dinga, Mosi in dan ahing piehte asulamdang ding hi, chia agen kaza uhi,” achi uhi. 15Tuachi’n vaihawmna a toute zousiein Stephen khu a en sal chiet ua, amel khu vansawlsieng mel bangin amu uhi.
Currently Selected:
NASEPTE 6: ZOUBSI
Highlight
Share
Copy
Want to have your highlights saved across all your devices? Sign up or sign in
Zou CL Bible - LAISIENGTHOU
Copyright © 1992 by The Bible Society of India
Used by permission. All rights reserved worldwide.