Salmai 81
81
Tinkökö Hē-el Tö Kiṙöng Sakāmö
1Pōitô tikökṙôre im Tēv kumlēḵ hī: pōitô tö ṙanāmölōn im Tēv Yāköp!
2Kē ngam Salmai, pong hārp tö vai: tö ngam Salmai inrē.
3Föö ngam römpet hē ngam chingëṅt nö ayöö: ip kumtōp, hē el sakāmö nahaṅl hī inrē.
4Tön chöngö an nö i Israĕl: inchöngten aṅ im Tēv Yāköp.
5Vī-il e Anga-aṅ nö in Yôsĕf nö minkahngö, hē ò nö kiröönngöre nö lā-al ngam panam Aikup: i chūök chu hang ëlô, öp töt huneū-euṅṙô chu.
6Kēngö elranôṙö Ò chū-ö tö lumngan: ṙānyu nuk kuntī Ò nö i nuk kuvôkö.
7Hu-a Me-eṅ hē el kahingen, ngaich ṙānyen meh chū-ö: sapṙô Meh chin el palēt chūök kunṙôkö; kalaha Meh chin i nup mak i Meripah.
8Ō yī-ö tarik chu, hangihtöre, hòṅ chu hameukhöti in Meh: Ō Israĕl, yē meh hō hang ṙô chu.
9Uh Man īnu tö tö tohtöre tēv: uh rēhĕn öm salām tö tohtöre tēv.
10Chū-ö chin Mā Tēv meh, kamënyen meh ṙā-ang ap panam Aikup: pōitikūö man vā-alkūö re, hòṅ chu hatööḵöl e.
11Hö-ö pöri vē tarik chu nö hang ṙô chu: sōḵ tö chu inrē ang Israĕl.
12Lökten chin hökngen cha, nö tömrit ngam töt hanvöökenkūö ellōn cha: hòṅ cha nö lök im kanahngenre inlēnö tö cha.
13Ō hang ṙô chu yin öre vē tarik chu: hòṅ lök el talöökö chu ang Israĕl!
14Ngaich chū-ö öre tumṙeūtö vē lā-al cha: ngaich havöötö ngam kël re nö lā-al yip tö kunyahaṅ-elmat tö cha.
15Yip tö sumrik tö ngam Mā Tēv, hòṅ hang chöngö Ò: öt chanuhavṙen pöri ngam ṙētak cha.
16Ha-aṅlen cha öre Anga-aṅ tö tö pahīöya atra: hatööḵngen Meh inrē tö hönī aṅ alaha ihong.
Currently Selected:
Salmai 81: CANIBSI
Highlight
Copy
Compare
Share
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
