Salmai 80
80
Invëkö Inlööktit Ngam Panam
1Ō yōm vē pököre Israĕl, hangihtöre, ngaich Man hachōnyen Yôsĕf sā kinteūmö pököre: Me-eṅ amūichhak i hôi yip karupīm, yang Man yēḵ.
2Urēhĕkūö Ifrēm, Penyamin, Manasē inrē: hareutlö ngam kumlēḵ re Man tā-a yih, hayööken ih.
3Havanten ih hēk, Ō Tēv: vīten ngam kūö Meh nö yang, hòṅ ih hayöökaṙen.
4Ō Mā Tēv, yip tö maṙôngö: i rô-òten Öm min līn i vine-eṅkūö re tö vē tarik Meh?
5Ha-aṅlöng yin tö Meh tö makmat: ha-ôkö yin tö Meh tö makmat nö pōivat.
6Vītu in tö Meh linā-alkūö i vē hol re: ngaich vē lā-al ih nö hayīölngen ih nö in re.
7Havanten ih hēk, Ō Mā Tēv yip tömaṙôngö: vīten ngam kūönre nö yang, hòṅ ih min hayöölöngṙen.
8Kēnyö ngam vāin Man nö ṙā-ang Aikup: ngaich Öm ahōngö pumnāmö tarik, ngaich teūichten e nö umuh.
9Urēhĕkūö e Me-eṅ halēnten chūök e: ṙēhtöre ngaich angū-ö nö aṙū-uti, ngaich hatööḵlö ngam panam.
10Kahultöre kui minë rôngö tö nyat e: ngaich nup pak ò nö sā nup tökôlò sītör ngam Tēv.
11Söömngö nuk pak re anga-aṅ nö el mai: nup misīöpö e inrē nö el Tahël.
12Kūöyòh öm tīṙōlngö minë kinlonglö Ò: ngaich acha-a yip lamök umuh, nö teuklen Ò?
13Ngaich nup ha-un el inchōn nö ungehngen e: ngaich nup aṅ el inchōn töṙeūla nö nyāngen e.
14Ō Tev yip tömaṙôngö, hayāichtöre in ve-ekūö Meh, havantöre hēk: Ngëicha Öm el halīöngö, meuk inrē, chöhkö ngòh vāin.
15Laklö ngam taneūich, ngam taheūichtö ngam lahāmö kël Meh: ngam pak inrē ngam tö vītu nö ngëḵ nö Me-eṅ Meh.
16Föngiyö an tö tameūyö, ṙāliyö an: lëlngö nun tö vinëköre tö ngam kūö Meh.
17Hökngen ngam kël Meh yēḵ, nö i kui ngam tarik lā hāmö Meh, i kui ngam kūön tarik, ngam tö vīlöng tö Meh nö tökalēḵ, nö Me-eṅ Meh.
18Hòṅ ih min öt havanngöre ṙāngen Meh: ha-aṅhaṅ ih, ngaich havëkö mine-eny Meh min īhö.
19Havanten ih hēk, Ō Mā Tēv yip tömaṙôngö: vīten ngam kūö re nö yang, hòṅ ih min hayöölöngṙen.
Currently Selected:
Salmai 80: CANIBSI
Highlight
Copy
Compare
Share
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
