Salmai 78
78
Ngam Tēv Tö Yip Tarik Ò
1Ō yī-ö tarik chu, kētö el vāngre im chöngö chu: asītö elnang re i minë ṙô ngih elvāng chu.
2Vā-ainykūöre chin min i inchō-oṙô: ṙônyö tö sangūla chin ṙô, ṙô mā misī;
3Nuk ahang hī, mikahlōn hī inrē: vënyu inrē tö yik yöng hī nö in hī.
4Hö-ö in hòṅ hayunngö u i yip kūön cha: ve-enynang yip mu-unôich tö yīhih tumkölchap, tö minë nöinyö ngam Mā Tēv, ngam kumlēḵ Ò, pinngangkūö vahīṙen Ò inrē.
5Pòn vītö minkahngö Anga-aṅ nö in Yāköp: vītö chöngö inrē in Israĕl, ngam tinöölô yik yöng hī tö Ò, nö hōten cha nö mikahtölōn yik kūön re tö u.
6Pòn hōtu yip mu-unôichtö yīhih tumkölchap, nö akahalōn tö u: acha-a yip nyīö min tö kayôḵnyu; yip chamôhòlre môkö, ngaich vë-eny u nö i yip kūön re.
7Hòṅ cha nö ṙātö ngam maheūṅkköre nö im Tēv: öt vachngö inrē tö nup vahīṙen ngam Tēv, haköp minë chöngö Ò pöri.
8Hòn öt sā yik yöng re töt hanlöinyken, ane inrē maha-ôngen nö tumkölchap: tumkölchap nö töt mahachiptö ellōnre, yik töt köpö ellōn nö im Tēv.
9Yik kūön Ifrēm, kē aṅtīre, kē linreny re inrē: hapung tö uk re ngaich hē el kinyūngö.
10Öt haköp ngam kinlēḵngô ngam Tēv cha-a: sōḵ inrē nö lök im chöngö Ò;
11Vaichngö cha-a inrē tö nuk la-en Ò: nuk hameuktö Ò nö in cha pinngangkūö la-en;
12Nuk pinngangkūö tī Ò nö i kūö yik yöng cha: i panam Aikup el töngā i Sō-an.
13Harēvngö ngam mai Anga-aṅ, ngaich hōten cha nö lök in e: vī ngam mai inrē Anga-aṅ nö fônghaka nö söktöheich.
14Hē sakāmö inrē Anga-aṅ nö hachō-o cha nö el taṙul: ngaich hĕng mitööm nö el yangkūö tameūyö.
15Lirak ihong Anga-aṅ nö el nyalnyi: ngaich kētö òk cha nö pōyen tī nö löklö lā taṙeū.
16Ahëmnyö mak inrē Anga-aṅ nö löknyö el ihong: ngaich vīten nuk mak nö hëmti sā tahël.
17Sön cha-a nöng irūhen nö köölö fālen nö in Ò: nö ahôngen ngam lamātulöng nö el tö nyalnyi.
18Kalah ngam Tēv cha-a inrē nö ellōn re; nö havëkö kā re tö alaha, ip yanālö re.
19Hòṅ, chökhuṙô cha-a tö ngam Tēv; ngö ṙô cha-a: kô-òren Ang ngam Tēv nö halēn mīs nö el inchōnngö?
20Yĕh meuk, foh ihong Anga-aṅ, pòn hōtö mak nö pònyi, ngaich taṙēichlöng ngam mak: kô-òren Ang inrē nö kētö rôtī? Meukṙen vē tarik re Ang min tö alaha?
21Hang ngam Mā Tēv, ngaich līn: hūlökūö ngaich ngam tameūyö nö in Yāköp, in Israĕl inrē ngam lanīnö.
22Pò cha nö öt ṙātö-ellōn re nö im Tēv: öt hayönglenre nö im inyööken aṅ in Ò.
23Höng sön Anga-aṅ nö tölṙô minë taṙul latulöng: ngaich löpnyö kūö inkūp ngam halīöngö.
24Ngaich Anga-aṅ nö hōngtö manna nö i kui cha, nö nya-aṅ cha: ngaich kē-ĕkūö cha tö sāiny aṅ el halīöngö.
25Ṙòkhöre kūö tarik ngaich nö nyā rutri aṅ im tö mihôiṅ: söömtö kā cha Anga-aṅ nö tööḵngen.
26Vīten ngam kuföt chuhöt Anga-aṅ nö föötöre nö el halīöngö: ngaich hachōkūö ngam kuföt lòhngö Anga-aṅ nö i minhôiṅyö re.
27Hōng tö alaha Anga-aṅ nö i kui cha, nö el tumlat: tö sanëòku inrē chehechōn, sā ṙôken kuyāyö ngam mai.
28Ngaich hökngen u Anga-aṅ nö suktöre nö ik elyöngö cha: vinngö nö ik elyöngö cha.
29Nya-avkūö cha-a ngaich, ngaich tööḵngen: kē-ĕkūö cha Anga-aṅ tö yanālö cha.
30Ṙòngmö in cha ngam yanālö cha: ṙòngmöng elvāng cha nuk kā cha,
31Hē ngam lanīnö ngam Tēv nö in cha: ngaich fëlngö yik tö kiröng alaha in cha, yik ṙāl tarik inrē i Israĕl.
32Sön cha-a nö ṙòngmö köölöfālen: öt ṙātö ellōn re nö i nuk la-en Ò pinngangkūö.
33Lökten nuk sakāmö cha nö keuheūt nö chanök alaha cha: nuk samyeūheu cha inrē nö i pinhe-eṅkūö.
34Hē Ò nö fëlngen cha, ngaich möl cha-a nö hatönken Ò, ngaich havantöre cha-a nö chöh ngam Tēv inrē, nö kalē-ĕlōn.
35Fē-ĕlre cha-a inrē töm Tēv nö ihong cha: ngam Lamātulöng inrē Tēv nö ṙāmānyen cha.
36Höng elvāng re ṙô pöri cha-a nö harōyö Ò: ngaich minyôiny-aṅ nö in Ò, nö i litāk re.
37Pò ngam ellōn cha nö öt chip nö in Ò: ötrēhĕn acha-a nö chip nö in Ò: ötrēhĕn acha-a nö kô-en nö im kinlēḵngô Ò.
38Tööḵlö pöri Anga-aṅ tö miṙēlōn, ngaich aṙēlö nuk tökööl cha: ngaich rö-ö nö halëlngen cha; hôṅ, ṙōlheuh Anga-aṅ nö havanrit lanīnöre, öt ṙūölö nup tanānyö re.
39Köpölōn Anga-aṅ tö cha nöng alaha: kuföt, töng changāchi, öt mahavan nö hēk.
40Ām heuh cha-a nö ahôngen Ò nö el inchōnngö nö: miṙivngölōn Ò inrē nö el tö nyalnyi!
41Havantöre cha-a hēk nö kalah ngam Tēv: ngaich harunnyö lanīnö ngam Töhet nö in Israĕl.
42Öt köpölōn cha-a töp kël Ò: ötrēhĕn tö nuk sakāmö hē ò nö ṙānyen cha nö ṙā-ang ip tö kunyahaṅ-elmat.
43Hameuktö nuk minkahngöre Anga-aṅ nö i Aikup: nuk pinngangkūö inrē nö el töngā i Sō-an.
44Vīten nuk tahël cha Anga-aṅ nö mahām: nuk kun tö hëm mak inrē, lökten cha nö öt kô nö òk.
45Tīntö inṙūöi inrē Anga-aṅ nö in cha, nuk ngameūkten cha: nuk tarôṅt inrē mahalëlngen cha.
46Kētö nuk tanë-eṅ cha Anga-aṅ nö i kata-ëm: nuk inlānen cha inrē nö i mufākö.
47Halëli nuk vāin cha tö tö kënngöre kumṙah: nuk chōn sikamòr inrē nö i tö mulngöre kumṙah.
48Kētö nuk nuā cha inrē nö i tö kënngöre kumṙah: nuk kiteūmö nuk töṙeūla cha inrē, nö i linkuknyökūö hanyālö.
49Suktökui cha Anga-aṅ töp lanīnö re nö tainy: lanīnö, tanainy-elmat, kanihngen inrē, tīntö tötlöök inrē ma-aṅhānga.
50Vī talöökö tanānyö re Anga-aṅ; öt ṙālö nômö cha Anga-aṅ nö im kinpaha kētö umhômö cha pöri nö im tö lëlngökūö invah.
51Ṙòkhöre yik lanòh nö fëli i Aikup: yik yöngkūö kumlēḵ cha nö el inrūkui Hem.
52Hachōnyö yik tarik pöri Anga-aṅ nö sā sīṅp: hachōkūö cha inrē nö el inchōnngö nö sā kiteūmö töṙeūla.
53Hachōnyen cha Anga-aṅ nö öt pinlānguṙen, pòn sōten cha nö pa-ekūö: ngaich pöri ngam mai nö pavtökui yik tökunyahaṅ lemat tö cha.
54Kēten cha Anga-aṅ inrē nö i kūöngö ök tö hat chūökö, i ngih rôngö: havah ngam lahāmö kël Ò.
55Ahōngö yik pumnāmö tarik inrē Anga-aṅ nö i kūö cha, ngaich michööḵö cha tö amin cha nö haṙākö: ngaich vīten yik miyöngö Israĕl nö iyöng el inrūkui re.
56Sön cha-a nö kalah, ane inrē ahôngen ngam Lamātulöng Tēv: ngaich öt haköp minë tö kūichi inmeuktö kanô-en;
57Havöötö uk re pöri, öt kô-en nö sā yik yöng re: hakāni cha-a, sā kūö tö vaich linreny.
58Pò cha nö harunnyö lanīnö Ò tö nuk chūökö lamatulöng: ngaich vīten Ò nö līn nö in cha kūö nuk insā tēv.
59Hē ngam Tēv nö hāngö e, līn ngaich Anga-aṅ: ngaich heūlngöre tö Israĕl.
60Lökten Anga-aṅ nö ṙāngö ök inrūkui Sailō: ök inrūkui ṙahātö Ò nö i tarik.
61Ngaich kētö ök kumlēḵ ò nö i inkövö: ök ineu-euṅ ò inrē nö eltī tökunyahaṅ-elmat.
62Kētö yik tarik re Anga-aṅ inrē nö i kūö sanët: ngaich līn nö i yik amin re.
63Ṙāpngökūö ök tameūyö tö yik ṙāl tarik: ngaich yik ṙēlö nö öt tinköku nö i inpihö.
64Pôḵ sanët yik kūönṙô cha: ngaich yik tafīösi cha nö öt harāmöre.
65Choholre ngaich ngam Mā nö sā ṙamā-ang inṙôhò: sā öp tökalēḵ tarik ma-ayôṙa tö kūö vāin.
66Fohtö uk yik lā-al re Anga-aṅ: kēten cha nö im töt chanuhuvṙen minṙēngö.
67Ngaich sōḵ Anga-aṅ tök inrūkui Yôsĕf: ngaich öt atöllö ök miyöngö Ifrēm;
68Atöllö miyöngö Yūtā pöri: ngam Rung Siyòn, ngam hanāngen Ò.
69Ngaich mānlö ngam töhet chūök re Anga-aṅ, nö sā minë tö marô-òlkui: sā ngam tumlat ngam tököp tö tī Ò, nöng örheūheu.
70Atöllen Tāvit inrē Anga-aṅ nö kūönṙô Ò: ngaich kē an nö ṙā-ang inyōmö sīṅp.
71Kēnyen Ò Anga-aṅ ṙā-ang i tinömkörit nup kan sīṅp, mahapīö kūön re: nö ha-aṅlen Yāköp, öp tarik Ò, Israĕl inrē öp amin Ò.
72Ha-aṅlen cha Anga-aṅ sā chaniplö ellōn Ò: ngaich hachōkūö cha, nö i haneūheu nup kël Ò.
Currently Selected:
Salmai 78: CANIBSI
Highlight
Copy
Compare
Share
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
