LUK 24
24
Ahkü Shitsün
(Mat 21:1-10; Mrk 16:1-8; Yhn 20:1-10)
1Anoujet nouko ayanyap ahom ngüsoüh khemloutsün angannyam amei nyamtsün khaiutsom kankü etam nai shin. 2Naiuso ngüsoüh etam kiapjeitsün lung nou lekkankü ephe 3ngüso nap, lüko Apaou Yisu mia tsü ep. 4Ngüso nung thaiutha soisoileklekkü noinai, athaplu khaiunia nime ne ajin oukü tenkü ngüso shimkü tsa. 5Nungai ngüso ahat nou kha goh ai thaothio, nai nung ne ajin oukü tentsün khaiunia nime nou ngüso tü ngiom, “Asamüh tiau aa nou tü eanhai ongko yamji? 6Apa nungko tsünoi; apa ahkü shianiu. Apa Galil ai noitaoko asam tü titi chite, nung lüyangsan. 7‘Khaiunia Thso angeihoi phamongai thumkü kiukü hao noin, naiuso samnyi nouko ahkü shi-e.’”
8Nai apaüh ngiotaiutsün ngio nouso ngüsoüh yangsan. 9Nungai ngüso etam ainou laokü shikü nung sahoi chekü tsak nouso hau naiuso amaohai chikü hau chiten. 10Ngüso, Mary Magdalin, Yoana naiuso Yakob nyiu Mary noiküla; naiuso ngüso ko noitsün amao nyiuhai nousoüh sahoi hau nung chiten. 11Nung ngio nouso yaang chitetsünli ngüsoüh yang, naiuso ngüso da mong tsülam. 12Lüko Peter tsaloukü etam ai khu, nai apaüh etamkhan mongai kaothiokü thaplunai ne ashethop noulu ep. Nai nung athawaotsün ti ta ngakü apa tsamai laokü khuwan.
Emmaus ai Khutsün
(Mrk 16:12-13)
13Nungnyilu Yisu tü hoiluttsün khaiunia nime Yirusalem ainou kilometer chekü tsak thatso nok tsak nian nou Emmaus ai 14khutsün yamko thawaokü shitsün apem thaiutha chitekü noiküla. 15Ngüne chitekü sang-enai, Yisu ngüne shimkü shi, naiuso ngüneko khuha; 16Lüko ngüne niovei tsütsüokü nou ngüneüh apa sau tsünge. 17Yisuüh ngüne tü ngiom, “Aje yamai akhunai chitetsün ngio nou ti?”
Naiuso ngüne kha thaothiokü tsülemlemkü tsa-an. 18Ngüne ongko tsak nian nou Cleopaüh thalakü apa tü ngiom, “Yirusalem nai shamnoiküta ni nungko nung ajekhaiu nai ti thawao loüh tsüngeso?”
19Apaüh ngüne tü, “Ti in?” ta sang. Ngüneüh apa tü, “Nung Nazaret hai nou Yisu tü thawaokü noin,” ta thashin. “Nung khaiunia nou E-po tsak noiküla ta Goa nou naiuso khaiunia chikü nou apaüh ngiotsün naiuso chhitsün alum ko oukong nai noin ta tsangsheikü vesanji. 20Atengting mesonhoi naiuso nokpao nokshinghoi nou apa e-iao phio-ikü thumkü kiukü paiphu nai lalut. 21Lüko apa Israel Aasantsün noin ta samüh yangkü noiküla! Ah, nung apem thawaoküta nai lonyi nou samnyi nou noin. 22Loüh sam haiso ajantso ahom etam nai khukü sam lekkati-iu; 23tilai ngüsoüh Yisu miapem tsüep, aünhong nousoüh apa aa noin ta ngiom. 24Sam hoiso ajantso etam nai khunai nyiuhaihoi nousoüh ngiotsünli samüh lüko apa tsüep.”
25Nai Yisuüh ngüne tü ngiom, “Asam titengkü mainga, E-po nousoüh ngiotaiu nou da monglamao outsükong! 26Khrista nung angja omhe lüko apa ajinka nai napao tsünoi süne?” 27Mosa naiuso E-po nouso ainou yakü asiongio apem apa thaiutha sattsün apaüh ngüne tü sasakü chim.
28Naiuso ngüso khutsün nok shimkü shisaonai loüh Yisu khaai khushiaoli han, 29lüko ngüneüh apa lulaokü ngiom, “Sam ko anoi-anha, tititenai aje saowanji.” Naiuso apa ngüneko shamanao khu. 30Tilai Yisu ngüneko heshiuao moknoi, apaüh themtsai loukü oukkiu naiuso nung lopekkü ngüne hao kiu. 31Nungai ngüne niovei sopsat, küta ngüneüh apa ngekü iula. Lüko ngüneüh apa tsüepshikü mowan. 32Ngüne chitekü ngiom, “Yamai apaüh jeko chitekü asiongio sasakü chimnai je mongai injekli tsükia süne?”
33Nung taokolu ngüne tsaloukü Yirusalem ai khu, küta sahoi chekü tsak nouso naiuso ngüsoko noinso aikü kamkü, 34“Apaou atsüoting ahshikü noin! Apa Simon dongai tsangsheikü sung!” ta chitekü ep.
35Khaiunia nime nou ngüne tü yamai ti thawaokü noiküla, naiuso apaüh themtsai lopek nai ngüneüh Apaou titi ngela nung thaiutha ngüso hau chite.
Yisuüh Apa Sahoi Dongai Sungkü Hanji
(Mat 28:16-20; Mrk 16:14-18; Yhn 20:19-23; Hong 1:6-8)
36Ngüneüh nung ngio chitekü noitaonai, alekta Yisu ngüso ongko tsakü ngiom, “Asam ko aalu lünoi.”
37Ngüsoüh nung mia-on tsak epji ta yangkü lekkü hattat. 38Lüko apaüh ngüso tü ngiom, “Asam tiauta lekkatji? Asam ongko nung ahenyitsün tiauta sungji? 39Jü phanaiuso jü hok nai athaplu, nung atsüoting Ngo, ngü da athantan naiuso athaplu, tititenai asamüh ngo eptsünli, mia on tsak da nyih naiuso ou nou tsünoi.” 40Apaüh nung ngioküta apa phasihok ngüso hau han. 41Ngüsoüh loüh amongling nou mong tsülamkü ngawan nai apaüh ngüso tü ngiom, “Asamüh nungko eheau tso taiumo?” 42Ngüsoüh apa hau ngou asashio tsak kiu. 43Apaüh nung lou, küta ngüso khako he. 44Apaüh ngüso tü ngiom, “Mosa Ngiokhem nai E-pohoi khapiam ngio nai, naiuso Nianlom Jih nai ti jü thaiutha sat, nung shinapao noin ta jü ngio nung ngo asamko noihanai chiten.” 45Nai Yisuüh Asiongio ngelaao thaiutha ngüso mong losiokiu. 46Apaüh ngüso tü ngiom, “Khrista omhean-e naiuso samnyi nouko e ainou ahkü shi-e. 47Yirusalem ai yakü shingkhan apem tü mong phoklekü apa nianko angei wankiuao chimkü hao noin ta nungti asiongio nai sattaim. 48Nung thaiutha mitha kiuao asam noin. 49Naiuso athaplu, Jü poüh thaloutsün ngü asam dongai hong-e, lüko koi ainou oukong asam dongai moshikün lektso asamüh noknio nai taiukü anoi.”
Yisu Aün Nai Kankü Sungji
(Mrk 16:19-20; Hong 1:9-11)
50Nai Yisuüh ngüso Bethani dongai nialükhun, küta apa pha loksankü, ngüso oukkiu. 51Apaüh ngüso oukkiu nai apa ngüso ainou pung-e, naiuso aün nai niakü sung. 52Ngüsoüh apa amkham, küta amongling asong nai Yirusalem ai laokü shin, 53naiuso Goa nian lomkü ngüso Amkham tsam ainou tsükhukü taiukü noi.
Currently Selected:
LUK 24: KHIABSI
Highlight
Share
Copy
Want to have your highlights saved across all your devices? Sign up or sign in
Khiamnuingan Naga C.L. Bible - ASIO THSAMLAI
Copyright © 2005 by The Bible Society of India
Used by permission. All rights reserved worldwide.