Psonm 44
44
Lapriyer pour Demann Proteksyon
Pour sef lakoral. En poenm sorti kot fraternite Kore.
1Mon Bondye!
Nou'n antann avek nou prop zorey.
Nou zanset in rakont nou
tou bann gran keksoz ki ou ti fer a lepok:
2Avek ou lafors, ou ti sas bann nasyon
pour etabli nou zanset.
Ou'n kraz bann nasyon
pour fer ou pep grandi.
3Pa avek zot lepe ki zot ti ganny sa pei;
pa avek zot lafors, ki zot ti ganny laviktwar.
Me par ou lanmen, par ou lafors,
par lalimyer ou prezans,
akoz ou ti kontan zot.
4Mon Bondye! Ou ki mon lerwa.
Donn laviktwar Zakob.
5Par ou, nou repous nou bann lennmi.
Par ou, nou kraz bann ki atak nou.
6Mon pa met mon konfyans dan mon fles;
mon lepe pa pour kapab donn mwan laviktwar.
7Ou ki'n sov nou kont nou bann lennmi.
Ou'n fer dimoun ki imilye nou perdi zot loner.
8Tou le zour, nou sant louanz pour Bondye
e loue son non pour touzour.
9Me ou'n rezet nou;
ou'n les nou ganny imilye.
Ou nepli akonpanny nou larme dan konba.
10Ou fer nou rekile devan lennmi
e zot in depouy nou, mannyer zot oule.
11Ou'n livre nou parey bann mouton pour labatwar.
Ou'n dispers nou parmi lezot nasyon.
12Ou'n vann ou pep pour nanryen,
san fer okenn profi.
13Ou'n les bann vwazen ridikiliz nou.
Dimoun otour nou in mepriz nou;
zot in gognard nou.
14Zot rakont fab lo nou.
Zot riy nou e zot sekwe latet.
15Tou lazournen, mon maler i devan mwan.
Mon figir i kouver avek laont,
16ler mon antann mon lennmi
ek sa bann ki ay mwan,
pe provok mwan, pe ensilte mwan.
17Tousala in ariv nou.
Pourtan, nou pa'n oubliy ou,
nou pa'n zanmen trai ou lalyans.
18Nou pa'n abandonn ou.
Ni nou lipye pa'n kit ou semen.
19Me ou'n kraz nou dan dezer
parmi bann sakal.
Ou'n kouver nou anba en gro lonbraz lanmor.
20Si nou ti'n oubliy non nou Bondye,
oubyen lev nou lanmen ver en lot bondye,
21Bondye ki konn sekre leker imen,
pa ti ava'n remarke?
22Akoz ou,
nou ganny martirize tou lazournen
e ganny trete parey mouton pour labatwar.
23SENYER! Leve! Akoz ou dormi?
Sorti dan ou sonmey!
Pa rezet nou pour touzour!
24Akoz ou kasyet ou figir?
Akoz ou oubliy nou maler ek nou latristes?
25Nou pe trennen dan lapousyer;
nou pe ranpe lo later.
26Leve! Vin sekour nou!
Delivre nou akoz ou fidelite.
Currently Selected:
Psonm 44: BSK
Highlight
Copy
Compare
Share
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
