Psonm 42
42
Lapriyer En Egzile
Pour sef lakoral. En poenm sorti dan fraternite Kore.
1Mon soupir apre ou, mon Bondye,
parey en serf i rod en sours delo.
2Mon swaf pour Bondye,
mon Bondye ki vivan.
Kan eski mon pou kapab
prezant mwan devan ou prezans?
3Lizour koman aswar,
mon larm i mon sel nouritir.
Zot demann mwan: Oli ou Bondye?
4Mon gard en bon souvenir dan mon leker:
Mon rapel byen, mon ti pe marse avek lafoul.
Mon ti pe mars devan laprosesyon
ziska tanp Bondye.
Ansanm avek lafoul dan lafet,
nou ti sant bann kantik remersiman.
5Akoz mon dekouraze?
Akoz mon plenny lo mon sor?
Met ou konfyans dan Bondye!
Mon pou loue li ankor, li, mon Sover.
6Dan mon latristes, mon mazin ou,
depi dan pei Zourden ek montanny Hermon
ek montanny Mitsear.
7Ou fer ronfle bann toran;
en laroul i swiv en lot laroul;
ou fer zot kraz mwan.
Zot tou, zot in pas lo mwan.
8Lizour, SENYER i montre mwan son fidelite.
Aswar, mon sant pour li,
mon priy Bondye ki donn mwan lavi.
9Mon demann Bondye, mon Ros protekter:
Akoz ou'n oubliy mwan?
Akoz mon bezwen reste dan latristes
e les mon bann lennmi kraz mwan?
10Zot bann lensilt i kraz mwan
ziska dan mon lezo.
Tou le zour zot demann mwan:
Oli ou Bondye?
11Akoz mon dekouraze?
Akoz mon plenny lo mon sor?
Met ou konfyans dan Bondye!
Loue li ankor, i mon Sover e mon Bondye!
Currently Selected:
Psonm 42: BSK
Highlight
Copy
Compare
Share
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
