Psonm 40
40
En Kantik pour Loue Senyer
En psonm David. Pour sef lakoral.
1Avek pasyans, mon'n esper led SENYER.
I'n port atansyon lo mwan e i'n antann mon lapel.
2I'n tir mwan dan dezespwar lanmor,
dan labou san fon.
I'n met mwan debout lo en ros;
i'n fer mon lipye vin for.
3I'n met en nouvo kantik lo mon lalev;
en kantik pour loue nou Bondye.
Bokou dimoun ki pou temwen,
pou annan respe pour SENYER
e met zot konfyans dan li.
4I byennere sa enn ki'n met son konfyans dan SENYER!
I pa tourn ver bann arogan
ni ver bann ki swiv bann fo bondye.
5SENYER mon Bondye!
Ou'n fer en kantite keksoz merveye pour nou;
napa personn parey ou.
Mon anvi fer konnen ou bann mervey.
Me i annan tro bokou pou rakonte.
6Ou'n donn mwan zorey pour mwan tande:
Ou pa oule ni sakrifis, ni lofrann.
Ou pa aksepte okenn sakrifis konplet,
ni okenn sakrifis pour pardon pese.
7Alor, mon ti dir: Mon vin ver ou.
Sa liv in ekri lo mon size.
8Mon Bondye!
Mon oule fer ou lavolonte.
Ou lalwa in grave dan fon mon leker.
9Devan lasanble,
mon anons nouvel ou delivrans.
Ou konnen ou menm SENYER:
Mon pa'n gard silans.
10Mon pa'n kasyet ou lazistis
dan fon mon leker;
mon'n fer proklanm ou fidelite
ek ou delivrans pour mwan.
Mon pa'n kasyet ou fidelite
ek ou lanmour devan lasanble.
11SENYER! Pa refiz mwan ou konpasyon.
Ou lanmour ek ou fidelite
i touzour protez mwan.
Lapriyer pour Demann Led
12En kantite maler in serkle mwan partou;
i tro bokou pour konte.
Mon bann pese in retonm lo mwan;
zot anpes mwan war kler;
zot plis ki seve lo mon latet
e mon'n perdi kouraz.
13SENYER! Delivre mwan.
Pa tarde pour sekour mwan.
14Fer onte bann ki esey touy mwan.
Fer rekile e met dan konfizyon
tou bann ki rod mon maler.
15Ferm labous sa bann ki riy mwan
e monk mwan dan laont.
16Me ki lazwa sa bann ki rod ou
i deborde akoz ou!
Zot ki kontan ou koman zot Sover,
pa pou arete proklanmen,
“SENYER i gran!”
17Mwan, mon en pov malere;
me SENYER i mazin mwan.
SENYER! Ou menm mon sekour, mon liberater.
Mon Bondye pa tarde!
Currently Selected:
Psonm 40: BSK
Highlight
Copy
Compare
Share
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
